Fetela boitsebisong

Nka Etsa’ng Hore ke Fumane Limaraka Tse Holimo?

Nka Etsa’ng Hore ke Fumane Limaraka Tse Holimo?

Seo u ka se etsang

E-ba le Boikutlo bo Nepahetseng! U se ke ua nahana hore u ke ke ua khona ho ntlafatsa lithutong tsa hao kaha seo se ka etsa hore u feile. Haeba u ikhalala, ithute ho itšepa. Ka mohlala, ha batho ba ne ba nyatsa moapostola Pauluse ka tsela eo a buang ka eona (mohlomong ba bile ba se na mabaka a utloahala), o ile a re: “Esita le haeba ke se kheleke puong, ka sebele ha ke joalo tsebong.” (2 Bakor. 10:10; 11:6) Pauluse o ne a tseba mefokolo ea hae. Empa o ne a boetse a tseba lintho tseo a etsang hantle ho tsona. Ho thoe’ng ka uena? Ke lintho life tseo u etsang hantle ho tsona? Haeba ha ho tseo u li hopolang, ke hobane’ng ha u sa botse motho e moholo ea u tsotellang? Motsoalle ea joalo a ka u thusa hore u lemohe lintho tseo u etsang hantle ho tsona e le hore u ikitlaetse haholoanyane ho tsona.

Hlaolela mekhoa e metle ea ho ithuta. E le hore u atlehe sekolong, u lokela ho sebetsa ka thata. Ke ’nete hore khopolo ea ho ithuta ka boeona e ka ’na ea se ke ea u thabisa. Empa ho ithuta ho ruisa molemo. Ha e le hantle, u ka ’na ua ho thabela haeba u ikitlaetsa ho se hokae. Empa u tla lokela ho hlophisa nako ea hao hantle, e le hore u be le mekhoa e metle ea ho ithuta. Hopola hore ha u ntse u le sekolong, ho ithuta ho lokela ho tla pele. Ke ’nete hore Bibele e re ho na le “nako ea ho tšeha” le “nako ea ho tlōla-tlōla.” (Moeklesia 3:1, 4; 11:9) Kahoo, mohlomong joaloka bacha ba bang ba bangata, u batla ho ba le nako ea ho ikhatholla. Empa Moeklesia 11:4 ea lemosa: “Ea shebellang moea a ke ke a jala peō; ’me ea talimang maru a ke ke a kotula.” Re ithuta’ng lengolong lee? U se ke ua lieha ho etsa lintho. U ke ke ua etsa mosebetsi oa bohlokoa. Qala ka ho ithuta, u ntan’o bapala. U se ke ua tšoenyeha—u ka fumana nako ea ho li etsa ka bobeli!

Feela joalokaha ho phahamisa litšepe ho ka matlafatsa mesifa ea hao, ho ba le mekhoa e metle ea ho ithuta ho ka u thusa hore u sebetse hantle sekolong.