Fetela boitsebisong

Ke Etse’ng Haeba ke Jeoa ke Bolutu?

Ke Etse’ng Haeba ke Jeoa ke Bolutu?

Seo u ka se etsang

1. Nahana ka litšobotsi tse ntle tseo u nang le tsona. (2 Bakorinthe 11:6) Le hoja ho le hotle hore u elelloe mefokolo ea hao, ho na le ho hongata hoo u ka fanang ka hona. Ho lemoha litšobotsi tse ntle tseo u nang le tsona ho tla etsa hore u itšepe ka ho lekaneng e le hore u itšoasolle litlamong tsa ho ikhella fatše ’me u hlōle bolutu. Ipotse, ‘Ke ipabola linthong life?’ Nahana ka bokhoni bo bong kapa litšobotsi tsa hao tse ntle.

2. Thahasella ba bang e le kannete. Qala ka ho thahasella batho ba seng bakae. Mocha e mong ea bitsoang Jorge o re, “Ho botsa ba bang hore na ba ntse ba ea joang kapa ho ba botsa ka mosebetsi oa bona ho u thusa hore u ba tsebe hamolemonyana.

U ka rarolla bothata bo kang lekhalo bo pakeng tsa hao le lithaka tsa hao

Keletso: U se ke ua etsa botsoalle le lithaka tsa hao feela. E meng ea mehlala e metle ka ho fetisisa ea botsoalle e tlalehiloeng ka Bibeleng e ne e le pakeng tsa batho ba sieanang haholo ka lilemo, joaloka Ruthe le Naomi, Davida le Jonathane, hammoho le Timothea le Pauluse. (Ruthe 1:16, 17; 1 Samuele 18:1; 1 Bakorinthe 4:17) Hape hopola hore moqoqo ke ho fapanyetsana maikutlo e seng ho mamela motho a le mong. Batho ba rata ho mameloa ka tsebe e lethoethoe. Kahoo haeba u motho ea lihlong, hopola hore hase uena feela ea lokelang ho bua nako ena kaofela!

3. Hlaolela moea oa “ho utloelana bohloko.” (1 Petrose 3:8) Le haeba u sa lumellane le maikutlo a e mong, mo lumelle hore a bue u sa fele pelo. Bua ka lintho tseo le lumellanang ka tsona. Haeba u utloa hore u tlameha ho bua ka taba eo le sa lumellaneng ka eona, etsa seo ka moea o motle le ka tsela e sa hlabeng.

Keletso: Bua le ba bang ka tsela eo u neng u ka rata hore ba bue le uena ka eona. Ho pheha khang ho sa hlokahale kapa ho soma ba bang, hammoho le ho ba nyenyefatsa kapa ho iketsa ea lokileng ebe u nyatsa ba bang, ho ka etsa hore batho ba balehele thōko le uena. Ba tla u rata haholoanyane haeba ‘seo u se buang kamehla e le se nang le mosa.’—Bakolose 4:6.