Fetela boitsebisong

LA 18 NOVEMBER, 2013
LITABA TSA MOLAO TSA LEFATŠENG LOHLE

Hopolang ba Lichankaneng

Hopolang ba Lichankaneng

Molao oa bo18 oa Selekane sa Machaba sa Litokelo Tsa Baahi le Tsa Lipolotiki o re “ho ba le bolokolohi ba ho nahana, ba ho mamela letsoalo le ba ho ba le bolumeli” ke tokelo ea mantlha ea botho. * Linaheng tse ling, haeba Paki ea Jehova e ka batla ho sebelisa tokelo ena e ka kenngoa chankaneng kapa ea tšoaroa hampe. Boholo ba batho ba chankaneng ke bahlankana ba hanang ho kenela sesole ka lebaka la matsoalo a bona. Ba bang ba tšoeroe feela ka lebaka la bolumeli ba bona.

Ho hlekefetsoa hona ha ho etse hore Lipaki Tsa Jehova li khaotse ho tšepahalla bolumeli ba tsona. Ho e-na le hoo, ho senya lebitso la linaha tse hlōlehang ho hlompha litokelo tsa botho. Lethathamo le ka tlaase mona le bontša linaha tse kentseng Lipaki Tsa Jehova chankaneng, le hore na ke tse kae naheng ka ’ngoe.

HOKAE?

CHANKANENG

 Eritrea

52

 Korea, Boroa

599

 Nagorno-Karabakh

1

 Singapore

18

 Turkmenistan

9

Kakaretso

679

Lethathamo la ba chankaneng haesale ho tloha ka la 12 November, 2013

 ERITREA

Tlalehong ea ho qetela e fumanoeng, ho bontšitsoe hore ho koalletsoe banna le basali ba Lipaki Tsa Jehova ba 52 maemong a mabe ka ho fetisisa. Le hoja ho se na ea seng a qositsoe, ba tšoeroe ka lebaka la matsoalo a bona a sa ba lumelleng hore ba nke karolo sesoleng, ka lebaka la bolumeli le a mang a sa tsejoeng. E se e le lilemo tse 20 joale ho tloha ka la 24 September, 1994 banna ba bararo e leng Paulos Eyassu, Isaac Mogos le Negede Teklemariam, ba tšoeroe ka lebaka la matsoalo a bona a sa ba lumelleng hore ba kenele sesole. Misghina Gebretinsae le Yohannes Haile, e leng ba bang ba Lipaki Tsa Jehova ba lilemo tse ka holimo ho 60, ba ile ba hlokahala ba ntse ba le chankaneng. Haesale Eritrea e ba naha e ikemetseng ka 1993, e ’nile ea kenya Lipaki Tsa Jehova chankaneng, ea li hlokofatsa ea ba ea li hlekefetsa.

 KOREA BOROA

Hona joale, bahlankana ba 599 ba Lipaki Tsa Jehova ba koalletsoe likhoeli tse 18 motho ka mong hobane ba hana ho kenela sesole. Ho tloha nakong ea ntoa ea Korea ho fihlela joale, haesale Korea Boroa e tsitlella ho ahlola bahlankana ba Lipaki ba hanang ho kenela tšebeletso ea sesole ’me e hana le ho ba fa mesebetsi e meng eo ba ka e etsang. Ho fihlela joale, e se e ahloletse Lipaki tse 17 549 hore li hlole chankaneng nako ea lilemo tse 34 100 ha li kopanngoa, hobane li hanne ho kenela tšebeletso ea sesole. Korea Boroa e hlōlehile ho boloka selekane sa machaba seo e se tekenneng ’me e hana ho hlompha litokelo tsa mantlha tsa botho tsa batho ba hanang ho kenela sesole ka lebaka la matsoalo a bona. E le ho fumana boitsebiso bo eketsehileng, sheba sehlooho se reng Mohoo oa Machaba oa ho Hloka Toka ha Korea Boroa.

 NAGORNO-KARABAKH

Mohlankana ea lilemo li 20 o tšoeroe hobane a hanne tšebeletso ea sesole ka lebaka la bolumeli, kaha Nagorno-Karabakh ha e na tokisetso ea hore ho be le mosebetsi o mong oa sechaba oo a ka o etsang. Ka la 30 December, 2011 o ile a ahloleloa ho hlola likhoeli tse 30 chankaneng ’me ka la 29 January, 2013 kōpo ea hae ea ho lokolloa ka parola e ile ea qheleloa ka thōko. Batsamaisi ba chankana ba ile ba hana kōpo ea hae ea hore a lokolloe e le hore a il’o ikoka hae.

 SINGAPORE

’Muso oa Singapore o qobella batho hore ba kenele tšebeletso ea sesole e tlamang ’me ha o hlomphe litokelo tsa ba hanang ho e kenela ka lebaka la bolumeli ba bona. Bahlankana ba 18 ba kopanelang le Lipaki Tsa Jehova ba koalletsoe likhoeli tse 39 motho ka mong Liahelong Tsa Botlamuoa Tsa Sesole kaha ba ikemiselitse ho se hatelle matsoalo a bona a koetlisitsoeng ka Bibele. Paki e ’ngoe e ile ea lokolloa chankaneng ka August 2013 ka mor’a ho qeta selemo e koalletsoe ka lebaka la ho hana ho etsa mosebetsi o amanang le sesole.

 TURKMENISTAN

Banna ba robong ba Lipaki ba ntse ba le chankaneng Turkmenistan—ba robeli ba bona ke ba hanang ho kenela sesole ka lebaka la bolumeli ’me a le mong ke ka liqoso tsa bohata. Banna bana ba ahloletsoe ho hlola chankaneng likhoeli tse 12 ho isa ho tse 24 ’me hangata ba otloa habohloko ke balebeli ba chankana le masole. Ka linako tse ling, ka mor’a hore batšoaruoa bao ba lokolloe, ba ’nile ba tšoaroa hape ’me ba qosoa ka ho tlola molao o tšoanang ebe ba kenngoa lichankaneng tse mpe le ho feta.

^ ser. 2 U ka boela ua sheba Molao oa bo18 oa Phatlalatso e Akaretsang ea Machaba a Kopaneng ea Litokelo Tsa Botho le Molao oa bo9 oa Tumellano ea Linaha Tsa Europe ea Litokelo Tsa Botho.