Fetela boitsebisong

Bukana ea Machaba e Rutang ka Litšoantšo

Bukana ea Machaba e Rutang ka Litšoantšo

Odval o lula Mongolia. Ha a tsebe hantle hore na o na le lilemo tse kae, empa o nahana hore o hlahile ka 1921. Ha e sa le ngoana, o ne a lisa liphoofolo tsabo ’me o ile a ea sekolong selemo se le seng feela. Ha a tsebe ho bala. Empa morao tjena ho ile ha tsoa bukana e mebala-bala e ileng ea mo thusa hore a tsebe Molimo ’me a ithute ka bokamoso bo thabisang bo boloketsoeng ba mo mamelang. Tsebo eo e mo amme pelo.

Bukana ena e hatisitsoeng ka 2011 ke Lipaki Tsa Jehova e fumaneha ka mefuta e ’meli. E le ’meli e na le litšoantšo tse ntle empa e fapane ka hore e ’ngoe e na le mantsoe a mangata ho feta e ’ngoe.

Haufinyane bukana e nang le mantsoe a mangata ea Mamela Molimo ’me U Phele ka ho sa Feleng, e tla fumaneha ka lipuo tse 583; ha e ’ngoe ea, Listen to God, e tla ba ka tse 483. Bapisa sena le Phatlalatso e Akaretsang ea Litokelo Tsa Botho ea Machaba a Kopaneng, eo ka October 2013 e neng e se e fetoletsoe ka lipuo tse 413. Ho phaella moo, ho se ho hatisitsoe likopi tse ka bang limilione tse 80 tsa libukana tsena tse peli.

Brazil, nkhono e mong o ile a amohela ka thabo bukana ea Listen to God ’me a re: “Hoa thabisa ho tseba hore ho na le batho ba tsotellang batho ba tšoanang le ’na. Ke ne ke sa amohele limakasine tsa lōna hobane ha ke tsebe ho bala. Empa ke batla bukana ena.”

Brigitte, e leng mosali ea sa tsebeng ho bala ea lulang Fora, o ile a re: “Ke sheba litšoantšo tse bukaneng ena letsatsi le leng le le leng.”

Paki e ’ngoe ea Afrika Boroa, e ile ea ngola ea re: “Ha ke e-s’o ka ke fumana bukana e molemo ho feta ena e ka thusang batho ba tšimong ea Sechaena ho ithuta linnete tsa Bibele. Ke ’nile ka ithuta le batho ba tsoang univesithing, ba bohlale haholo le ba sa tsebeng ho bala hantle—le batho ba rutehileng ka litsela tse fapaneng. Bukana ea Mamela Molimo ’me U Phele ka ho sa Feleng e nthusa hore ke khone ho fetisa lithuto tsa motheo tsa Bibele ka pele. Ke khona ho rala motheo oa thuto ka metsotso e mashome a mararo feela.”

Lipaki tse ling tsa Jeremane li ithuta le banyalani ba bang ba rutehileng. Monna o ne a khahluoe haholo ke bukana ena ’me o ile a re: “Ke hobane’ng ha u sa ka ua mpha bukana ee pejana? E nthusa hore ke utloisise liketsahalo tsa Bibele le mantsoe habonolo.”

Mosali e mong oa Australia o ile a re: “Ke lutse nako e telele le baitlami matlong a bona. Ke ne ke tloaelane le baeta-pele ba kereke haholo. Empa ha ho le ea mong oa bona ea ileng a nthuta hore na ’Muso oa Molimo ke’ng. Litšoantšo tse bukaneng ena li nthusitse hore ke utloisise hore na ha e le hantle Matheu 6:10 e bolela’ng.”

Ofisi ea lekala ea Lipaki Tsa Jehova e Canada e ile ea ngola ea re: “Ka mor’a ho fumana bukana ea Listen to God ka Sekrio, batho ba bangata ba tšimong ea Masierra Leone, ba ’nile ba susumelletseha hore ba babatse Lipaki Tsa Jehova ka hore ba sebetsa ka thata ho phatlalatsa molaetsa Bibele. Ba bang ba ile ba re, ‘Lea re tsotella le hoja batho ba bangata ba sa re tsotelle.’ ”