Fetela boitsebisong

Ho Bolela Haufi le Nōka ea Xingu

Ho Bolela Haufi le Nōka ea Xingu

Mathoasong a July 2013, Lipaki Tsa Jehova tse 28 tsa Brazil li ile tsa tloha motseng oa São Félix do Xingu, tsa nka leeto le eang tšimong ea Maindia ea Cayapo le Yuruna. Li ile tsa nka leeto la limithara tse 15 ka sekepe, li nyolosa Nōka ea Xingu, e phallang ka lik’hilomithara tse 2 092 ka leboea e lebile Nōkeng ea Amazon.

Sehlopha seo se ile sa nka leeto lena bakeng sa ho ea bolela ka ’Muso oa Molimo ho batho ba lulang metseng e haufi le nōka. Ka letsatsi la boraro, sehlopha se ile sa fihla motseng oa Kokraimoro. Se ile sa amoheloa ke batho ba thabileng le ba botsoalle. Se ile sa kopana le mosali e mong ea neng a sebelisa puo ea matsoho. Motho ea neng a tsamaisa sehlopha seo o ile a hlalosa hore “boitšisinyo ba hae bo bolela hore: ‘Tloo’ng kaofela ha lōna. Re batla ho le tseba kaofela ha lōna!’ ”

Lipaki li ile tsa bua le motho e mong le e mong—ho ba bang ka Sepotoketsi ’me ho ba bang ka lipontšo le boitšisinyo ba ’mele. Litšoantšo tse mebala tse ka har’a lingoliloeng tsa Bibele tseo li tlileng le tsona li ile tsa li thusa haholo ’me baahi ba bangata ba ile ba li amohela, haholo-holo bukana ea Listen to God.

Gerson, e leng pula-maliboho oa São Félix do Xingu, o hopola kamoo moahi e mong a ileng a amohela sengoliloeng sa Buka ea ka ea Lipale Tsa Bibele kateng, o re: “O ile a e sheba ’me a e mamarela ka thata ka matsoho a mabeli; o ne a sa batle ho e beha fatše leha e ka ba ka motsotso feela.”

Lipaki Tsa Jehova li ile tsa aba libuka tse 500, limakasine le libukana ho baahi ba nang le kananelo haufi le nōka. Motseng oa Kawatire, baahi ba ile ba mamela ka thahasello e khōlō tšepiso ea Bibele e mabapi le paradeise lefatšeng. Tonjaikwa, e leng Moindia oa Cayapo ea nang le kamohelo e mofuthu ea baeti o ile a re, “Batho ba Paradeiseng ba tla phela joaloka rōna”.

Batho ba bangata ba São Félix do Xingu ba ne ba tseba ka leeto lena. Simone, e mong oa ba neng ba le leetong leo, o ile a re batho ba motseng oa habo ba ne ba sa kholoe hore eena le metsoalle ea hae ba ne ba tla amoheloa metsaneng eo. Leha ho le joalo, ha hoa ka ha e-ba le bothata. Simone o re, “Re ile ra amoheloa ’me ra bolela ho bohle.”