Fetela boitsebisong

Liofisi tsa Lekala Tsa Lipaki Tsa Jehova li Kopantsoe

Liofisi tsa Lekala Tsa Lipaki Tsa Jehova li Kopantsoe

Ho tloha ka September 2012, mosebetsi oa bolebeli oa liofisi tsa makala tsa Lipaki Tsa Jehova tse fetang 20 o isitsoe makaleng a maholo.

Ho phaella moo, ho thehiloe makala a macha Serbia le Macedonia. Liphetoho tsena li entsoe ka mabaka a mabeli a maholo.

1. Theknoloji e nolofalitse mosebetsi

Lilemong tsa morao tjena, basebetsi ba fokotsehile makaleng a mang ka lebaka la mecha e ntlafetseng ea puisano le theknoloji ea ho hatisa. Kaha joale batho ba sebetsang makaleng a maholo ba fokotsehile, ho hlahile sebaka sa bolulo bakeng sa ba bang ba neng ba sebetsa makaleng a manyenyane linaheng tse ling.

Hona joale, ho na le Lipaki tse ngata tse nang le boiphihlelo makaleng a kopantsoeng tse hlokomelang mosebetsi oa thuto ea Bibele. Ka mohlala, mosebetsi oa boboleli naheng ea Costa Rica, El Salvador, Guatemala, Honduras, Nicaragua le Panama o hlokometsoe ke lekala la Mexico. Ka lebaka leo, liofisi tsa lekala tse neng li le linaheng tseo tse tšeletseng li ile tsa koaloa.

Lipaki tse 40 tse tsoang makaleng ao a tšeletseng li ile tsa abeloa ho ea lekaleng la Mexico. Tse ling tse ka bang 95 li ile tsa sala linaheng tsa habo tsona moo li ileng tsa kena mosebetsing oa ho bolella batho ka ʼMuso oa Molimo kamehla.

Ba bang linaheng tseo tsa Amerika Bohareng ba ile ba qala ho sebetsa liofising tsa phetolelo tse tlas’a lekala la Mexico. Ka mohlala, Panama Lipaki tse ka bang 20 li fetolela lingoliloeng tsa Mokhatlo oa Watchtower ka lipuo tsa sebakeng seo. Moo pele e neng e le ofisi ea lekala ea Guatemala, Lipaki tse ling tse 16 li fetolela lingoliloeng ka lipuo tsa moo tse ʼnè. Kahoo, Amerika Bohareng, mosebetsi oa ho kopanya makala bocha o fokolitse palo ea basebetsi ba liofisi tsa lekala ho tloha ho ba 300 ho ea ho ba ka bang 75.

2. Ho na le basebetsi ba ka qetang nako e ngata boboleling

Ka lebaka la makala ana a kopantsoeng, baboleli ba tšoanelehang ba neng ba sebeletsa makaleng ana a manyenyane ba ka ikitlaelletsa ho bolela litaba tse molemo.

Paki e ’ngoe ea Afrika, e ileng ea fuoa mosebetsi o mocha oa hore e tlohe lekaleng e e’o bolella batho ka ʼMuso oa Molimo, e re: “Ho fetola bophelo ba ka hore ke tloaelane le maemo a macha e bile phephetso ka likhoeli tse seng kae tsa pele. Leha ho le joalo, ho bolella batho ka ʼMuso oa Molimo letsatsi le letsatsi ho ntliselitse thabo le mahlohonolo a khaphatsehang. Hona joale, ke ithuta Bibele le batho ba 20, ʼme ba bang ba bona ba tla libokeng tsa phutheho.