Mosebetsi oa rona oa lefatše lohle o tšehetsoa ka monehelo oa baithaopi bao e leng Lipaki Tsa Jehova. a Liholong tsa rona tsa Lipaki Tsa Jehova ho na le mabokose a monehelo ao batho ba ka ithaopelang ho ntša monehelo ka ho ona, hape hona le litsela tse ling tsa ho nehela tse hlahang websaeteng ea rona ea monehelo. Motho e mong le e mong o iketsetsa qeto ea hore na o batla ho ntša monehelo bakeng sa litšenyehelo tsa phutheho kapa monehelo bakeng sa mosebetsi oa rona oa lefatše lohle kapa oa tsona li le peli.

 Ha hoa lebelloa hore Lipaki Tsa Jehova li ntše karolo ea leshome kapa li bolelloe hore na li lokela ho ntša chelete e kae mokholong oa tsona. (2 Bakorinthe 9:7) Ha re nke koleke kapa chelete ea ho kena liholong tsa Lipaki Tsa Jehova, kapa hona hore baholo ba phutheho ba batle chelete ea kolobetso, mafu, manyalo kapa litšebeletso tse ling tsa bolumeli. Ha re etse chelete ka ho pheha, ho bula mabenkele, ho bapala lipapali tsa bingo, boithabiso, ho pheha lijo tsa motšehare, ho rekisa lirafole, kapa liketsahalo tse tšoanang le tseo le ho kopa menehelo. Ba ntšang monehelo ha ba boleloe ka mabitso. (Matheu 6:2-4) Websaete le lingoloa tsa rona ha li na lipapatso.

 Liphuthehong ho fanoa ka tlaleho ea lichelete khoeli le khoeli e le hore phutheho e tsebe. Tlaleho ea lichelete e shejoa nako le nako phuthehong ka ’ngoe ho bona hore na menehelo e ntse e sebelisoa hantle kapa joang.—2 Bakorinthe 8:20, 21.

Mekhoa ea ho ntša monehelo

•   Lebokose la monehelo: O ka tšela monehelo oa chelete kapa cheke mabokoseng a monehelo Liholong tsa Lipaki Tsa Jehova, Liholong Tsa Kopano kapa libakeng tse ling tseo re kopanelang ho tsona.

•   Ho fana ka monehelo ka Inthanete: Linaheng tse ngata o ka sebelisa websaete ea rona “Donate to Jehovah’s Witnesses” ho ntša monehelo o sebelisa credit cards, debit cards, bank transfers kapa mekhoa e meng ea elektronike. b Lipaki tse ling li khetha ho ‘behella ka thoko’ chelete ea monehelo o tla huloa khoeli le khoeli ba sebelisa e ’ngoe ea litsela tsena.—1 Bakorinthe 16:2.

•   Menehelo e reroang esale pele: Mekhoa e meng ea ho nehela e hloka ho reroa esale pele kapa e hloka keletso e tsoang molaong. Ho etsa joalo ho ka etsa hore o fumane melemo ea lekhetho ea sebakeng sa heno. Batho ba bangata ba fumane melemo ka hore ba tsebisoe hore ba tla etsetsoa lintho tse itseng hona joale ha ba ntse ba phela kapa ba tla thusoa ka lintho tse itseng ha ba ka hlokahala. Re kopa u bue le ofisi ea lekala ea Lipaki Tsa Jehova haeba u batla ho tseba haholoanyane ka ho fana ka monehelo o sebelisa lintho tse latelang:

  •   liakhaonte tsa banka

  •   inshorense

  •   setša se nang le mohaho

  •   listock le libond

  •   mangolo a kabo ea lefa le matlole

 Ho fumana tlhahiso leseling mabapi le hore na ke mekhoa efe ea ho nehela e sebelisoang sebakeng sa heno sheba karolo ea “Donate to Jehovah’s Witnesses.”