Fetela boitsebisong

Fetela lethathamong la tse ka hare

 SEHLOOHO SE KA NTLE | U KA ETSA’NG E LE HORE U NATEFELOE KE HO BALA BIBELE?

Bibele e ka Ntlafatsa Bophelo ba Hao Joang?

Bibele e ka Ntlafatsa Bophelo ba Hao Joang?

Bibele ha se buka feela tjee. E re fa likeletso tse tsoang ho ’Mopi oa rona. (2 Timothea 3:16) Molaetsa oa eona o ka re susumetsa haholo. Ha e le hantle, Bibele e re: “Lentsoe la Molimo lea phela ’me le fana ka matla.” (Baheberu 4:12) Bibele e na le matla a ho ntlafatsa bophelo ba rona ka litsela tse peli. Ea pele, e re fa likeletso tseo re li hlokang bophelong ba letsatsi le letsatsi. Ea bobeli, e re thusa hore re tsebe Molimo le lintho tseo a re tšepisang tsona.—1 Timothea 4:8; Jakobo 4:8.

E ka ntlafatsa bophelo ba hao. Bibele e ka u thusa ho sebetsana le mathata. E fana ka likeletso tse sebetsang mabapi le lintho tse latelang.

Banyalani ba bang ba bacha lilemong ba lulang Asia, ba ananela tsela eo Bibele e ba thusitseng ka eona. Joaloka banyalani ba bang ba bacha, le bona ba ile ba thatafalloa ho tloaela tsela eo e mong a etsang lintho ka eona le hore ba buisane ka bolokolohi. Empa ba ile ba qala ho sebelisa seo ba ithutileng sona Bibeleng. Phello e bile efe? Vicent o re: “Lintho tseo ke ithutileng tsona ka Bibeleng li nthusitse hore ke bontše lerato ha ke sebetsana le mathata. Ho sebelisa keletso ea Bibele ho re thusitse ho thabela ho phela hammoho.” Mosali oa hae Annalou, le eena o lumellana le sena. O re: “Ho bala ka mehlala e ka Bibeleng ho re thusitse haholo. Hona joale ke thabile ebile ke khotsofetse.”

Ho tseba Molimo haholoanyane. Vicent o boetse o re: “Ha ke bala Bibele, ke utloa ke le haufinyane haholo le Jehova.” Sena se re bontša hore ha re bala Bibele re tla tseba tsela eo Molimo a nahanang ka eona. Haeba u etsa joalo, u tla rua molemo likeletsong tsa Molimo ’me u tla khona ho mo etsa motsoalle. U tla boela u bone hore Molimo o re tšepisa bokamoso bo monate, e leng nako eo re tla thabela “bophelo ba sebele” ka ho sa feleng. (1 Timothea 6:19) Ruri ha ho buka leha e le efe e ka re tšepisang bokamoso bo monate hakana!

Haeba u ntse u tsoela pele ho bala Bibele, e tla u thusa hore u ntlafatse tsela eo u phelang ka eona ’me u tsebe Molimo le ho feta. Leha ho le joalo, ho ka etsahala hore ha u ntse u bala Bibele u be le lipotso tse ngata. Haeba seo se etsahala, hopola mohlala oa letona la Moethiopia, le ileng la phela lilemong tse 2 000 tse fetileng. O ne a e-na le lipotso tse ngata ka Bibele. Ha a botsoa hore na o utloisisa seo a se balang o ile a re: “Ka sebele, nka tseba joang ntle leha e mong a ka ntataisa?” * Filipi eo e neng e le molateli oa Jesu hape a tseba ho ruta, o ile a thusa letona lena ho utluisisa Bibele. (Liketso 8:30, 31, 34) Haeba le uena u batla ho tseba haholoanyane ka Bibele, kena ho www.jw.org/st kapa u ngolle atereseng e haufi le moo u lulang teng e hlahang makasineng ena. U ka boela oa ikopanya le e mong oa Lipaki Tsa Jehova kapa oa etela Holong ea ‘Muso ea Lipaki Tsa Jehova e sebakeng sa heno. Ke hobane’ng ha u sa qalelle ho bala Bibele hona joale, e le hore e ntlafatse bophelo ba hao?

Haeba ha oa kholiseha hore Bibele e nepahetse, sheba video e reng Re ka Tseba Joang Hore Bibele e Ruta ’Nete? Kena ho www.jw.org/st

^ ser. 8 E le hore u bone mehlala e meng ea kamoo Bibele e ka re thusang kateng, kena websaeteng ea rona ho jw.org/st. Sheba tlas’a LITHUTO TSA BIBELE > LIPOTSO TSA BIBELE LIA ARAJOA.

^ ser. 11 U ka boela oa sheba sehlooho se reng, “Ke Hobane’ng ha ho le Thata ho Utloisisa Bibele?” makasineng ena.