Fetela boitsebisong

Fetela lethathamong la tse ka hare

 SEHLOOHO SE KA NTLE | U KA KHONA HO UTLOISISA BIBELE

Buka e ka Utloisisoang

Buka e ka Utloisisoang

Bibele ke buka ea khale haholo. Ke ea khale hakae? Bibele e qalile ho ngoloa Bochabela bo Hare lilemong tse ka bang 3 500 tse fetileng. Ke nakong ea lesika la marena a matla a Mashang, a Chaena le hoo e ka bang lilemo tse sekete pele bolumeli ba Bobuddha bo qala India.—Sheba lebokose le nang le sehlooho se reng “ Lintlha Tse Mabapi le Bibele.”

Bibele e fana ka likarabo tse khotsofatsang lipotsong tsa bohlokoa bophelong

E le hore buka e itseng e tsoele batho molemo, ba lokela ho e utloisisa le ho bona hore na e ba ama joang bophelong. Bibele ke buka ea mofuta oo. E araba lipotso tsa bohlokoa bophelong ka tsela e khotsofatsang.

Ka mohlala, na u kile ua ipotsa hore na ‘Re phelela’ng?’ Potso eo e ’nile ea qaka batho ka lilemo tse likete, ’me e ntse e ba qaka le kajeno. Empa re ka fumana karabo ea eona likhaolong tse peli tsa pele bukeng e qalang ea Bibele, e leng Genese. Moo, Bibele e bua ka “tšimolohong,” e leng lilemong tse libilione tse fetileng nakong eo bokahohle, bo akarelletsang lefatše le linaleli, bo neng bo bōptjoa. (Genese 1:1) E boetse e hlalosa kamoo butle-butle lefatše e ileng ea e-ba sebaka seo ho ka luloang ho sona, kamoo lintho tse phelang tse sa tšoaneng li ileng tsa e-ba teng, kamoo batho ba bileng teng le hore na morero oa hore li be teng ke ofe.

E NGOLLETSOE HORE BATHO BA E UTLOISISE

Bibele e fana ka likeletso tse ka re thusang ho rarolla mathata a rōna. Ho bonolo ho utloisisa likeletso tsa eona. Sena se bonahala lintlheng tse peli tse latelang.

Ea pele, Bibele e ngotsoe ka tsela e hlakileng, e tobileng le e khahlang. Ha e sebelise mantsoe ao ho leng thata ho a utloisisa, ho e-na le hoo e bua ka lintho tsa sebele. Lintho tseo ho leng thata ho li utloisisa li hlalosoa ka mantsoe a tloaelehileng.

Ka mohlala, Jesu o ile a etsa mehlala e mengata e bonolo ka lintho tseo batho ba li tloaetseng e le hore a ba rute lithuto tse ba amang lipelo. Bongata ba mehlala eo bo fumanoa Thutong e tsebahalang ea Thabeng, e tlalehiloeng khaolong ea 5 ho ea ho ea 7 lengolong la Bibele la Matheu. Ha mohlalosi e mong a bua ka thuto eo o ile a re “ke thuto e molemo, e sa rereloang ho tlatsa lihlooho tsa rōna ka mehopolo e itseng, empa e reretsoeng ho re tataisa le ho re fa litaelo tse re thusang ho ba le boitšoaro.” U ka bala likhaolo tseo ka metsotso e 15 ho isa ho e 20, ’me u tla hlolloa ha u hlokomela kamoo mantsoe a Jesu a leng bonolo, empa hape a le matla.

 Ntlha e ’ngoe e etsang hore ho be bonolo ho utloisisa Bibele ke litaba tseo e buang ka tsona. Hase buka ea litšōmo. Empa joalokaha The World Book Encyclopedia e hlalosa, “e bua ka batho ba tummeng le ba tloaelehileng,” hape e bua “ka mathata a bona, tšepo eo ba neng ba e-na le eona, lintho tseo ba ileng ba hlōleha ho li etsa, esita le lintho tseo ba ileng ba atleha ho li etsa.” Ho bonolo hore re utloisise litlaleho tsena tsa Bibele tse buang ka batho ba sebele le liketsahalo esita le lithuto tsa eona tsa bohlokoa.—Baroma 15:4.

BATHO BOHLE BA KA E FUMANA

E le hore u utloisise buka e itseng, e lokela ho ngoloa ka puo eo u e tsebang. Mehleng ena, mohlomong Bibele ea fumaneha ka puo eo u e utloisisang ho sa tsotellehe hore na u lula hokae kapa u oa morabe ofe. Hlokomela hore na ho etsoa boiteko bo bokaakang e le hore Bibele e fumanehe.

Phetolelo. Qalong Bibele e ne e ngotsoe ka Seheberu, Searame le Segerike. Kahoo hase batho bohle ba neng ba ka khona ho e bala. Bafetoleli ba lipelo li ntle ba ’nile ba sebetsa ka thata hore e fumanehe ka lipuo tse ling. Ka lebaka la boiteko boo ba bona, hona joale e fetoletsoe ka lipuo tse ka bang 2 700, e feletse kapa e le mangolo a itseng. Sena se bolela hore batho ba fetang liphesente tse 90 har’a baahi ba lefatše ba ka bala mangolo a itseng a Bibele ka puo eo ba e antseng letsoeleng.

Khatiso. Qalong Bibele e ne e ngoletsoe linthong tse senyehang habonolo tse kang, letlalo le loli. E le hore molaetsa oa eona o fetisetsoe ho batho ba bang, libuka tseo li ne li kopitsoa ka hloko li bile li ngoloa hape ka letsoho. Likopi tseo li ne li le turu ’me li rekoa ke batho ba ’maloa feela. Empa batho ba bangata ba ile ba khona ho fumana Libibele ka mor’a hore ho etsoe mochine o hatisang oa Gutenberg lilemong tse 550 tse fetileng. Phuputso e ’ngoe e bontša hore ho se ho abiloe likopi tse libilione tse hlano tsa Bibele, e feletse kapa e le mangolo a itseng.

Ha ho na buka leha e le efe ea bolumeli e tšoanang le Bibele lintlheng tsena. Ho hlakile hore Bibele ke buka e ka utloisisoang. Leha ho le joalo, ho ka ’na ha se ke ha e-ba bonolo ho e utloisisa. Empa u ka fumana thuso. U ka e fumana hokae? Hona u ka rua molemo joang? U tla fumana likarabo sehloohong se latelang.