Fetela boitsebisong

Fetela lethathamong la tse ka hare

  SEHLOOHO SE KA NTLE | NA BAFU BA TLA TSOHA

Na ho na le Tšepo ka Bafu?

Na ho na le Tšepo ka Bafu?

Na bafu ba tla tsoha?

SEO BIBELE E SE BUANG: “Hora ea tla eo ka eona bohle ba mabitleng a khopotso ba tla utloa lentsoe la [Jesu] ’me ba tsoe.”Johanne 5:28, 29.

Jesu o ile a bolela esale pele hore nakong ea puso ea hae, bafu ba tla tsoha Mabitleng. Fernando eo ho builoeng ka eena sehloohong se qalang o re: “Ke ile ka hlolloa ha ke qala ho bala lengolo la Johanne 5:28, 29. Le ile la ntsosa molota ’me ka qala ho ba le tšepo ea bokamoso.”

Jobo ea tšepahalang oa mehleng ea boholo-holo o ne a e-na le tšepo ea hore ha a ka hlokahala qetellong Molimo o tla mo tsosa. O ile a botsa a re: “Haeba monna ea shahlileng a shoa na a ka phela hape?” Eaba ka kholiseho oa araba o re: “Ke tla leta ka matsatsi ’ohle a mosebetsi oa ka o qobelloang, [nako eo a tla e qeta a le Lebitleng] ho fihlela phomolo ea ka e fihla. U tla hooa, ’me ke tla u araba.”—Jobo 14:14, 15.

Tsoho ea Lazaro e re fa tšepo ea bokamoso

Khaitseli ea Lazaro, e leng Maretha o ne a sa qale ho utloa ho buuoa ka tsoho. Ka mor’a hore abuti’ae Lazaro a hlokahale, Jesu o ile a re ho eena: “Khaitseli ea hao e tla tsoha.” Maretha a mo araba a re: “Kea tseba hore o tla tsoha tsohong ka letsatsi la ho qetela.” Eaba Jesu o re ho eena: “Ke ’na tsoho le bophelo. Ea bontšang tumelo ho ’na, esita le hoja a ka shoa, o tla phela.” (Johanne 11:23-25) Hang ka mor’a moo Jesu a tsosa Lazaro! Ketsahalo ena e hlollang e re bontša tlhasenyana feela ea se tla etsahala nakong e tlang. Ak’u nahane ha batho ba se ba tsosoa lefatšeng lohle!

Na ho na le ba tla tsohela ho ea phela leholimong?

SEO BIBELE E SE BUANG: Lentsoe la Molimo le bontša hore tsoho ea Jesu e ne e fapane le ea ba bang ba robeli bao Bibele e buang ka bona. Batho bao ba robeli ba ile ba boela ba phela lefatšeng mona. Empa ha Bibele e bua ka tsoho ea Jesu e re: “Jesu Kreste o ka letsohong le letona la Molimo, kaha o ile a ea leholimong.” (1 Petrose 3:21, 22) Na Jesu ke eena feela ea tsoselitsoeng ho ea phela leholimong? Pele ho lefu la hae, Jesu o ile a tšepisa baapostola ba hae a re: “Haeba ke il’o le lokisetsa sebaka, ke tla boela ke tle ’me ke tla le amohela lapeng ho ’na, e le hore moo ke leng teng le lōna le ka ba teng.”—Johanne 14:3.

Kreste o ile a ea leholimong ’me a lokisetsa ba bang ba barutuoa ba hae bolulo. Qetellong palo ea ba tla  tsosetsoa ho ea leholimong e tla ba 144 000. (Tšenolo 14:1, 3) Empa barutuoa bao ba Jesu ba tla etsa’ng moo?

Ba tla phathahana haholo! Bibele e re: “Ho thaba ’me ho halalela mang kapa mang ea nang le kabelo tsohong ea pele; lefu la bobeli ha le na matla holim’a bona, empa e tla ba baprista ba Molimo le ba Kreste, ’me ba tla busa le eena e le marena ka lilemo tseo tse sekete.” (Tšenolo 20:6) Ba tla tsosetsoa ho ea leholimong, ba tla busa le Kreste e le marena le baprista holim’a lefatše.

Ke bo-mang ba tla tsosoa hamorao?

SEO BIBELE E SE BUANG: Ka Mangolong ho tlalehiloe mantsoe ana a moapostola Pauluse a reng: “Ke na le tšepo ho Molimo, e leng tšepo eo batho bana le bona ba nang le eona, ea hore ho tla ba le tsoho ea ba lokileng le ba sa lokang.”Liketso 24:15.

Lentsoe la Molimo le re tiisetsa hore batho ba libilione ba hlokahetseng ba tla boela ba phele

Batho bao Pauluse a reng ke “ba lokileng” ba akarelletsa bo-mang? Ka mohlala, ho elella qetellong ea bophelo ba Daniele ea neng a tšepahala ho ile ha thoe ho eena: “U tla phomola, empa u tla ema bakeng sa kabelo ea hao bofelong ba matsatsi.” (Daniele 12:13) Daniele o tla tsohela hokae? “Ba lokileng ba tla rua lefatše, ba tla lula ho lona ka ho sa feleng.” (Pesaleme ea 37:29) Hape Jesu o ile a re: “Ho thaba ba maikutlo a bonolo, kaha ba tla rua lefatše.” (Matheu 5:5) Daniele hammoho le banna le basali ba bang ba tšepahalang ba tla tsosetsoa ho tla phela lefatšeng mona hape, ebile e le ka ho sa feleng.

Batho bao Pauluse a reng ke “ba sa lokang” ba akarelletsa bo-mang? Ke batho ba libilione ba ileng ba shoa ba sa ka ba e-ba le monyetla oa ho ithuta Bibele. Ka mor’a hore ba tsosoe ba tla fuoa monyetla oa ho ithuta ka Jehova * le Jesu. (Johanne 17:3) Bohle ba tla ikhethela ho sebeletsa Molimo, ba tla ba le tšepo ea ho phela ka ho sa feleng joaloka Jehova.

Bohle ba tla ikhethela ho sebeletsa Molimo ba tla ba le tšepo ea ho phela ka ho sa feleng ba phetse hantle ’meleng ba bile ba thabile

Lefatše le tla ba joang ka nako eo?

SEO BIBELE E SE BUANG: Molimo “o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng.” (Tšenolo 21:4) “Ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona.”—Esaia 65:21.

Ak’u nahane u se u phela lefatšeng le joalo le baratuoa ba hao ba tsositsoeng bafung! Empa potso ea sala, u ka kholiseha joang hore tsoho ea bafu e tla feela e be teng?

^ ser. 15 Jehova ke lebitso la Molimo le hlahang ka Bibeleng.