Fetela boitsebisong

Fetela lethathamong la tse ka hare

 BABALI BA BATLA HO TSEBA . . .

Na Bakreste ba Lokela ho Keteka Easter?

Na Bakreste ba Lokela ho Keteka Easter?

Buka e ’ngoe e hlalosang mantsoe e bitsoang Encyclopædia Britannica e re Easter ke “mokete o ka sehloohong oo Bakreste ba o tšoarang ho ikhopotsa tsoho ea Jesu Kreste.” Empa na e simolohile Bokresteng?

Hore re tiisehe hore thepa e itseng ke ea sebele re lokela ho e hlahlobisisa. Ka ho tšoanang, e le hore re tiise hore Easter ke mokete oa Bokreste re lokela ho tseba haholoanyane ka eona.

Taba ea pele, Jesu o ile a laela balateli ba hae hore ba ikhopotse lefu la hae eseng tsoho ea hae. Moapostola Pauluse o ile a re sehopotso seo ke “lijo tsa shoalane tsa Morena.”—1 Bakorinthe 11:20; Luka 22:19, 20.

Ho feta moo, Britannica e re litloaelo tse ngata tsa Easter “ha ho moo li amanang” le tsoho ea Jesu, “ho e-na le hoo li thehiloe meetlong e tloaelehileng ea batho.” Ka mohlala, ha The Encyclopedia of Religion e bua ka lintho tse sebelisoang ka Easter, e leng lehe le ’mutlanyane e re: “Lehe le tšoantšetsa ho lokoloha lefung.” Ha e tsoela pele e re: “’Mutlanyane o ne o tsebahala ka ho tsoala haholo kahoo o tšoantšetsa ho tla ha nako ea selemo.”

Ha moprofesa oa lingoliloeng tsa boholo-holo ea bitsoang Philippe Walter a hlalosa kamoo meetlo eo e ileng ea kenyelletsoa moketeng oa Easter kateng o ile a re: “Nakong ea ha malumeli a bohetene a kenngoa Bokresteng,” ho ne ho tloaelehile ho amahanya mekete ea bohetene e ketekoang “ha mariha a fela le ha selemo se kena” le tsoho ea Jesu. Ha Walter a tsoela pele o re, ho kenya “mekete ea Bokreste” matsatsing a phomolo a bohetene e ne e le mohato oa bohlokoa o neng o tla etsa hore ho be bonolo hore bahetene ba bangata ba sokolohele Bokresteng.

Taba ena ea ho “kenyelletsa mekhoa ea bohetene Bokresteng” ha ea ka ea etsahala mehleng ea baapostola kaha ba ne ba e ‘thibela.’ (2 Bathesalonika 2:7) Moapostola Pauluse o ile a lemosa hore ka mor’a hore a “tlohe,” ho ne ho tla “hlaha batho ’me ba bue lintho tse sothehileng hore ba ikhulele barutuoa ka mor’a bona.” (Liketso 20:29, 30) Hoo e ka bang ka bo-99 C.E., moapostola Johanne o ile a re ho na le batho ba khelosang Bakreste. (1 Johanne 2:18, 26) Sena se ne se tla etsa hore Bakreste ba qetelle ba boloka meetlo ea bohetene.

“Le se ke la kena jokong e sa lekaneng hammoho le ba sa lumelang.”—2 Bakorinthe 6:14

Leha ho le joalo, ba bang ba ka ba le maikutlo a hore ho kenyelletsa meetlo e meng ea Easter Bokresteng ha ho phoso kaha seo se thusitse “bahetene” ho utloisisa se boleloang ke tsoho ea Jesu. Leha ho le joalo, Pauluse o ne a ke ke a lumellana le maikutlo ao. Le hoja a tsebile meetlo e mengata ea bohetene ha a ntse a tsamaea ho pholletsa le Roma, ha ho mohla a kileng a boloka le o mong ka morero oa hore batho ba tsebe Jesu hantle. Ho e-na le hoo, o ile a lemosa Bakreste a re: “Le se ke la kena jokong e sa lekaneng hammoho le ba sa lumelang. Etsoe ho loka le tlōlo ea molao li na le setsoalle sefe? Kapa leseli le na le karolo efe le lefifi? ‘Ka hona tsoang har’a bona, ’me le ikarole,’ ho bolela Jehova, ‘le khaotse ho ama ntho e sa hloekang.’”—2 Bakorinthe 6:14, 17.

Re ithutile’ng ha re hlahlobisisa tšimoloho ea Easter? Ho hlakile hore Bakreste ha baa lokela ho keteka Easter kaha ha e simolohe Bokresteng.