Fetela boitsebisong

Fetela lethathamong la tse ka hare

 MOQOQO LE MOAHELANI

Ke Hobane’ng ha re Lokela ho Ithuta Bibele?

Ke Hobane’ng ha re Lokela ho Ithuta Bibele?

Moqoqo o latelang ke o tloaelehileng oo e mong oa Lipaki Tsa Jehova a ka bang le oona le moahelani oa hae. A re nke hore Paki e bitsoang Brian e buisana le Eric.

TLALEHO EA BIBELE EA HISTORI E NEPAHETSE

Eric: Ua tseba ha ke motho ea thahasellang bolumeli! Kahoo, ke nahana hore re ke ke ra bua hakaalo.

Brian: Kea utloisisa. Oh, ebile ke lebetse ho u joetsa lebitso la ka, ke ’na Brian. Ebe uena u mang?

Eric: Ke ’na Eric.

Brian: Kea leboha Eric.

Eric: Le ’na kea leboha.

Brian: Ke kōpa ho u botsa hore na u hōletse lelapeng le ratang bolumeli.

Eric: Ho joalo. Empa ha ke le k’holejeng ke ile ka khaotsa ho ea kerekeng.

Brian: Oh, kea bona. U ne u etsa thuto efe k’holejeng?

Eric: Ke ne ke etsa thuto ea kahisano (social studies) le histori. Haesale ke rata histori, ’me ke ithutile hore na ho tlile joang hore batho ba phele ka tsela ena.

Brian: Histori ke thuto e monate. Mohlomong ua tseba hore Bibele ke buka ea histori. Na u kile ua e sebelisa ha u etsa lipatlisiso?

Eric: Che. Kea tseba hore ke buka ea bohlokoa empa ha ho mohla nkileng ka nahana hore Bibele ke buka ea histori.

Brian: U bonahala u le motho ea bohlale. Haeba u na le nako, ke lakatsa ho u bontša mehlala e bontšang hore Bibele e tlalehile histori ka ho nepahala.

Eric: Ho lokile. Empa ha ke na Bibele.

Brian: Ha ho na bothata. Ke tla shebisana le uena ho ena ea ka. Mohlala oa pele o ho 1 Likronike khaolo ea 29, temana ea 26 le 27. Litemana tseo li re: “Ha e le Davida mora oa Jese, a busa Baiseraele bohle; matsatsi ao a busitseng Iseraele ka ’ona e ne e le lilemo tse mashome a mane. A busa Hebrone ka lilemo tse supileng, ’me a busa Jerusalema ka lilemo tse mashome a mararo a metso e meraro.”

Eric: Tlaleho ee e bontša joang hore Bibele e tlalehile histori ka ho nepahala?

Brian: Ha e le hantle, ka linako tse ling ba hanyetsang Bibele ba re Morena Davida hase motho oa sebele.

Eric: Kannete? Ke hobane’ng ha ba rialo?

Brian: Lebaka ke hore ntle ho Bibele, ke libuka tse seng kae feela tse buang ka eena. Leha ho le joalo, ka 1993 sehlopha sa baepolli ba lintho tsa khale se ile sa fumana lejoe le ngotsoeng “Ntlo ea Davida.”

Eric: Ke taba e thahasellisang hakaakang!

Brian: Motho e mong eo ba bang ba reng hase motho oa sebele ke Ponse Pilato, e leng ’musisi oa mehleng ea Jesu. Ho buuoa ka eena ho Luka khaolo ea 3, temana ea 1 e le e mong oa babusi ba neng ba hlaheletse mehleng eo.

Eric: E, kea bona. E re “ha Ponse Pilato e ne e  le ’musisi oa Judea, . . . Heroda [e ne] e le ’musi oa setereke oa Galilea.”

Brian: U nepile. Ka lilemo tse ngata litsebi tse ling li ’nile tsa belaela hore na ebe Ponse Pilato ke motho oa sebele. Leha ho le joalo, lilemong tse ka bang 50 tse fetileng ho ile ha fumanoa lejoe le ngotsoeng lebitso la hae, Bochabela bo Hare.

Eric: Hmm. Li ncha litsebeng tsa ka.

Brian: Ke ’nete.

Eric: Ho bua ’nete, haesale ke nka hore Bibele ke buka ea bohlokoa, empa ke ne ke sa nahane hore litaba tsa eona lia re ama. Le hoja e nepahetse litabeng tsa histori, ha ke nahane hore e ka re tsoela molemo.

BIBELE KE BUKA EA KHALE EMPA E MOLEMO LE KAJENO

Brian: Batho ba bangata ba lumellana le mantsoe ao. Empa ’na ha ke lumellane le ’ona. Ke hobane ha ho mohla litlhoko tsa batho li kileng tsa fetoha. Ka mohlala, haesale batho ba na le litlhoko tse kang lijo, liaparo le bolulo. Banna le basali ba ’nile ba ba le takatso ea ho buisana le ho ba le malapa a thabileng. Na hase ’nete hore re nka lintho tseo e le tsa bohlokoa?

Eric: Ho joalo.

Brian: Bibele e ka re thusa lintlheng tseo kaofela. Le hoja e le buka ea khale, e ntse e le molemo le kajeno.

Eric: U bolela’ng?

Brian: E na le melao-motheo ea bohlokoa e neng e sebetsa lilemong tse makholo tse fetileng e ntseng e sebetsa le kajeno.

Bibele e na le melao-motheo ea bohlokoa e neng e sebetsa lilemong tse makholo tse fetileng e ntseng e sebetsa le kajeno

Eric: Lintlheng life?

Brian: Melao-motheo ea Bibele ea re tataisa hore re be le teka-tekano licheleteng, re be le malapa a thabileng kapa re be metsoalle e molemo. Bibele e ka re thusa hore re atlehe bophelong. Ka mohlala, na u ke ke ua lumela hore ho ba monna le hlooho ea lelapa e atlehang e ka ba phephetso kajeno?

Eric: Ke lumellana le uena ntlheng ena. Ho se ho fetile selemo re nyalane le mosali oa ka, ’me hase kamehla re bang le maikutlo a tšoanang.

Brian: Ho joalo. Empa Bibele e na le melao-motheo e bonolo e bileng e sebetsang. Ka mohlala, e re ke u bontše lengolo la Baefese khaolo ea 5, temana ea 22, 23 le 28. Na u ka li bala?

Eric: Ho lokile. Li re: “Basali ba ke ba ipehe tlas’a banna ba bona joalokaha ba ipeha tlas’a Morena, hobane monna ke hlooho ea mosali oa hae joalokaha Kreste le eena e le hlooho ea phutheho, kaha e le mopholosi oa ’mele ona.” Temana ea 28 e re: “Ka tsela ena banna ba tšoanela ho rata basali ba bona joaloka ’mele ea bona. Ea ratang mosali oa hae oa ithata.”

Brian: Kea leboha, u balile hamonate. Na bophelo ba lelapa e ne e ke ke ea e-ba bo monate haeba monna le mosali ba mamela keletso ee?

Eric: Ke nahana hore bo ne bo tla ba monate. Empa ha ho bonolo ho etsa joalo.

Brian: Ke ’nete hobane ha ho na motho ea phethahetseng. Ha e le hantle, khaolong eo ho na le temana e re khothalletsang hore re be le kahlolo e molemo. * Ka bobeli monna le mosali ba lokela ho nahanelana. ’Na le mosali oa ka re ithutile hore Bibele e ka re thusa hore re etse seo.

Eric: Taba eo ea utloahala.

Brian: Websaeteng ea Lipaki Tsa Jehova ho na le boitsebiso ba bohlokoa mabapi le lenyalo le bophelo ba lelapa. Haeba u sa na le nako nka u bontša mohlala oa boitsebiso bo hlahang moo.

Eric: Ha ho na bothata. Ke sa na le metsotso e se mekae.

Brian: Kea leboha. Websaete eo ke www.jw.org/st. Lena ke leqephe le qalang.

Eric: Litšoantšo tsa eona li ntle.

Brian: Ke litšoantšo tsa batho ba etsang mosebetsi oa ho bolela litaba tse molemo lefatšeng lohle. Eke! Tlas’a sehlooho sena se reng “Se ka Thusang  Banyalani le Batsoali” ho na le lihlooho tse fapaneng. Na ho na le se u khahlang?

Eric: Ke rata sena se reng “Ho Lokisa Mathata Lenyalong la Lōna.” Ke bona eka se ka nthusa.

Brian: Sehlooho sena se bua ka litsela tse ’nè tsa ho lokisa mathata. Ke kōpa u bale serapa sena Eric.

Eric: Ke tla se bala. Se re: “Joalokaha pelo le matšoafo li hlokahala hore mali a phalle ’meleng, lerato le tlhompho lia hlokahala hore ho be le puisano e ntle lenyalong.” Hmm, ke rata tsela eo e hlalositsoeng ka eona.

Brian: U balile hamonate. Ho na le lengolo la Bibele le bontšitsoeng mona. U ka le phetla ka hore u behe monoana holim’a lona.

Eric: Ke lena. Baefese 5:33 e re: “E mong le e mong oa lōna ka bomong a ke a rate mosali oa hae joalokaha a ithata; ka lehlakoreng le leng, mosali o lokela ho ba le tlhompho e tebileng ho monna oa hae.”

Brian: Na u hlokometse hore ntlha ea bohlokoa ke hore ka bobeli ba lokela ho fana ka seo ba lebeletseng ho se fumana ho e mong?

Eric: Ha ke utloisise.

Brian: Na hase ’nete hore monna o batla hore mosali oa hae a mo hlomphe, le hore mosali o batla ho kholiseha hore monna oa hae o mo rata e le kannete?

Eric: E, ke lumellana le uena.

Brian: Haeba nako le nako monna a batla menyetla ea ho bontša mosali oa hae hore oa mo rata, na ho ke ke ha e-ba bonolo hore mosali oa hae a mo hlomphe?

Eric: Ho ka ba bonolo.

Brian: Kahoo, le hoja temana ena e ngotsoe lilemong tse ka bang 2 000 tse fetileng, e bua ka litlhoko tsa monna le mosali ’me e fana ka keletso e molemo e bileng e sebetsang, ’me joaloka papisong eo re buileng ka eona pejana, “pelo le matšoafo” tsa lenyalo li tla lula li phetse hantle.

Eric: Kea bona hore Bibele e na le boitsebiso bo bongata ho feta kamoo ke neng ke nahana kateng.

Brian: Ke leboha hore ebe u bona taba ena ka tsela eo. Ebe ho ka ba joang ha re ka kopana moo re tl’o buisana ka sehloohoana se reng “Litsela Tse ’nè Tsa ho Lokisa Mathata” se tlas’a sehlooho sona see? *

Eric: Ho lokile. Re tla e bala hammoho le mohats’a ka.

Na ho na le potso ea Bibele eo u ’nileng oa batla karabo ea eona? Na u rata ho tseba ho itseng ka tumelo ea Lipaki Tsa Jehova kapa ka tsela eo li etsang lintho ka eona? Haeba ho joalo, u se ke ua tsilatsila ho botsa Paki ea Jehova lipotso tseo. E ka thabela ho buisana le uena ka litaba tseo.

^ ser. 63 E le hore u fumane boitsebiso bo eketsehileng, sheba khaolo ea 14 ea buka ea Ha e le Hantle ke Eng Seo Bibele e se Rutang? e hatisitsoeng ke Lipaki Tsa Jehova.