Fetela boitsebisong

Fetela lethathamong la tse ka hare

 SEHLOOHO SE KA NTLE | ’MUSO OA MOLIMO—O KA U ETSETSA’NG?

’Muso oa Molimo ke oa Bohlokoa Hakae ho Jesu?

’Muso oa Molimo ke oa Bohlokoa Hakae ho Jesu?

Jesu o ile a ruta ka lintho tse ngata tšebeletsong ea hae ea lefatšeng. Ka mohlala, o ile a ruta balateli ba hae ho rapela, ho khahlisa Molimo le hore na ke lintho life tse ka ba thabisang e le kannete. (Matheu 6:5-13; Mareka 12:17; Luka 11:28) Empa taba eo Jesu a neng a rata ho bua ka eona ke ’Muso oa Molimo.—Luka 6:45.

Joalokaha re bone sehloohong se fetileng, Jesu o ne a amehile haholo ka ho ‘bolela le ho phatlalatsa litaba tse molemo tsa ’Muso.’ (Luka 8:1) O ne a ikitlaetsa, a nka maeto a malelele ho pholletsa le Iseraele e le hore a rute batho ka ’Muso oa Molimo. Tšebeletso ea Jesu e tlalehiloe ka Likosepeleng tse ’nè, tse buang ka ’Muso ka makhetlo a fetang 100. Boholo ba litlaleho tseo li thehiloe mantsoeng a Jesu, empa e tlameha ebe hase hona phetho hoo a ileng a ho bua ka ’Muso oa Molimo!—Johanne 21:25.

Ke hobane’ng ha ’Muso oa Molimo e ne e le oa bohlokoa hakaale ho Jesu ha a le lefatšeng? Hobane Jesu o ne a tseba hore Molimo o mo khethile hore e be Morena oa oona. (Esaia 9:6; Luka 22:28-30) Empa Jesu o ne a sa ameha ka ho iphumanela matla a bolaoli kapa ho itlotlisa. (Matheu 11:29; Mareka 10:17, 18) O ne a sa rute batho ka ’Muso e le hore a ithuise molemo. Lebaka le ka sehloohong leo Jesu a ratang ’Muso oa Molimo * ka lona, ke seo o tla se etsetsa Ntate oa hae ea leholimong le balateli ba hae ba tšepahalang.

’MUSO O TLA ETSETSA NTATE OA JESU ENG?

Jesu o rata ntate oa hae haholo. (Liproverbia 8:30; Johanne 14:31) O rata litšobotsi tsa ntate oa hae tse ntle tse kang lerato, kutloelo-bohloko le toka. (Deuteronoma 32:4; Esaia 49:15; 1 Johanne 4:8) Ha ho pelaelo hore Jesu ha a rate ho utloa mashano ao batho ba a buang ka Ntate oa hae, a kang hore Molimo ha a tsotelle ha batho ba utloa bohloko le hore o batla ba utloe bohloko. Jesu o ne a chesehela ho bolela “litaba tse molemo tsa ’Muso,” kaha o ne a tseba hore ka nako e loketseng ’Muso o tla halaletsa lebitso la Ntate oa hae. (Matheu 4:23; 6:9, 10) O tla etsa seo joang?

Jehova o tla sebelisa ’Muso oa hae ho tlisa liphetoho tse tla tsoela batho molemo. “O tla hlakola meokho eohle” mahlong a bahlanka ba hae ba tšepahalang. Jehova o tla felisa lintho tse llisang batho ka hore a etse bonnete ba hore “lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng.” (Tšenolo 21:3, 4) ’Muso oa Molimo o tla felisa mahlomola ’ohle a batho. *

 Hase feela Jesu a neng a cheseha ha a ruta batho ka ’Muso! O ne a tseba hore ’Muso o tla bontša hore Ntate oa hae o na le matla ebile o utloela batho bohloko. (Jakobo 5:11) Jesu o ne a boetse a tseba hore ’Muso o tla tsoela balateli ba hae ba tšepahalang molemo.

SEO ’MUSO O TLA SE ETSETSA BATHO BA TŠEPAHALANG

Jesu o ne a phetse leholimong le Ntate oa hae ka lilemo tse ngata pele a tla lefatšeng. Ntate oa hae o ile a mo sebelisa ho etsa lintho tsohle ho akarelletsa leholimo le hlollang le tletseng linaleli hammoho le liphoofolo tsohle tse lefatšeng. (Bakolose 1:15, 16) Har’a lintho tsena tsohle Jesu o ile a “rata” batho.—Liproverbia 8:31.

Lerato le ile la susumelletsa Jesu ho bolela litaba tse molemo. Li sa tloha feela, o ile a hlakisa hore o tlile lefatšeng ho tla ‘bolella mafutsana litaba tse molemo.’ (Luka 4:18) Empa lerato la Jesu ho batho e ne e se puo ea molomo feela. Kamehla o ne a etsa lintho tse bontšang hore o rata batho. Ka mohlala, ha bongata bo boholo bo ne bo bokane ho tla mo mamela, Jesu o ile “a bo hauhela, ’me a phekola ba kulang ba bona.” (Matheu 14:14) Ha monna e mong ea neng a tšoeroe ke lefu le etsang hore a opeloe a bontša tumelo hore Jesu a ka mo phekola haeba a batla, Jesu o ile susumetsoa ke lerato. O ile a phekola monna eo, ’me ka qenehelo a re: “Kea batla. Hloeka.” (Luka 5:12, 13) Ha Jesu a bona motsoalle oa hae Maria a utloile bohloko ka lebaka la lefu la moholoane oa hae Lazaro, Jesu o ile “a bobola moeeng,” “a khathatseha,” a ba “a ntša meokho.” (Johanne 11:32-36) Ka mor’a moo, Jesu o ile a etsa mohlolo oa ho tsosa Lazaro bafung le hoja ho ne ho fetile matsatsi a mane a hlokahetse!—Johanne 11:38-44.

Ntle ho tikatiko, Jesu o ne a tseba hore tharollo ea hae mathateng a batho ke ea nakoana. O ne a tseba hore ka mor’a nako batho bao a ba phekotseng ba tla boela ba kule ’me bao a ba tsositseng ba tla boela ba shoe. Leha ho le joalo, Jesu o ne a tseba hore ’Muso oa Molimo o tla felisa mathata ao ka ho feletseng. Ke ka lebaka leo Jesu a neng a sa etse mehlolo feela empa hape a neng a “bolela litaba tse molemo tsa ’Muso” ka cheseho. (Matheu 9:35) Mehlolo eo a ileng a e etsa e ne bontša hore na haufinyane ’Muso oa Molimo o tla etsa’ng lefatšeng lohle. Nahana hore na Bibele e re’ng ha e bua ka nako eo.

  •  Ho kula ho tla fela.

    “Ka nako eo mahlo a lifofu a tla tutuboloha, ’me litsebe tsa ba sa utloeng litsebeng li tla buleha. Ka nako eo ea holofetseng o tla tlōla joalokaha khama e tona e tlōla, ’me leleme la ea sa khoneng ho bua le tla hooa ka nyakallo.” Ho feta moo, “Ha ho moahi ea tla re: ‘Kea kula.’”—Esaia 33:24; 35:5, 6.

  • Lefu le tla fela.

    “Ba lokileng ba tla rua lefatše, ba tla lula ho lona ka ho sa feleng.”Pesaleme ea 37:29.

    “O tla metsa lefu ka ho sa feleng, ’me ka sebele ’Musi Morena Jehova o tla hlakola meokho lifahlehong tsohle.”—Esaia 25:8.

  • Bafu ba tla tsoha.

    “Bohle ba mabitleng a khopotso ba tla utloa lentsoe la hae ’me ba tsoe.”—Johanne 5:28, 29.

    “Ho tla ba le tsoho.”—Liketso 24:15.

  • Ha ho sa tla ba le batho ba hlokang matlo le mosebetsi.

    “Ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. Ba ke ke ba haha ’me e mong a lule teng; ba ke ke ba lema ’me e mong a je. . . . Bakhethoa ba ka ba tla sebelisa mosebetsi oa matsoho a bona ka botlalo.”—Esaia 65:21, 22.

  •  Lintoa li tla fela.

    “O felisa lintoa ho isa pheletsong ea lefatše.”—Pesaleme ea 46:9.

    “Sechaba se ke ke sa phahamisetsa sechaba se seng sabole, ha ba sa tla hlola ba ithuta ntoa.”—Esaia 2:4.

  • Tlala e tla fela.

    “Lefatše le tla fana ka lihlahisoa tsa lona; Molimo, Molimo oa rōna, o tla re hlohonolofatsa.”—Pesaleme ea 67:6.

    “Ho tla ba le lijo-thollo tse ngata lefatšeng; Ho tla ba le nala holim’a litlhōrō tsa lithaba.”—Pesaleme ea 72:16.

  • Bofutsana bo tla fela.

    “Hase kamehla mofutsana a tla lebaloa.”—Pesaleme ea 9:18.

    “O tla lopolla ea futsanehileng ea hoeletsang ho kōpa thuso, le ea hlorileng le mang kapa mang ea se nang mothusi. O tla utloela ea tlaase bohloko le ea futsanehileng, o tla pholosa meea ea ba futsanehileng.”—Pesaleme ea 72:12, 13.

Ha u nahana ka seo Molimo a se tšepisang ’Musong oa hae, na ua utloisisa hore na ke hobane’ng ha Jesu a nka ’Muso e le oa bohlokoa hakaale? Ha Jesu a sa ntse a le lefatšeng, o ne a chesehela ho bua ka ’Muso oa Molimo ho bohle ba mo mamelang, hobane o ne a tseba hore ’Muso oo o tla felisa mathata a sithabetsang ao re a bonang kajeno.

Na u khahloa ke seo Bibele e se tšepisang mabapi le ’Muso? Haeba ho joalo, u ka etsa’ng e le hore u ithute haholoanyane ka oona? U ka etsa’ng e le hore u rue molemo linthong tseo ’Muso o tla li etsetsa batho? Sehlooho se latelang se tla araba lipotso tsena.

^ ser. 5 Sehlooho sena se bontša kamoo Jesu a ikutloang kateng hona joale kaha o ntse a phela leholimong ’me ntle ho pelaelo o nka ’Muso e le oa bohlokoa.—Luka 24:51.

^ ser. 8 E le hore u fumane boitsebiso bo mabapi le hore na ke hobane’ng ha Molimo a lumeletse hore batho ba utloe bohloko ka nakoana, sheba khaolo ea 11 ea buka ea Ha e le Hantle ke Eng Seo Bibele e se Rutang? e hatisitsoeng ke Lipaki Tsa Jehova. E boetse e fumaneha ho www.jw.org/st