Fetela boitsebisong

Fetela lethathamong la tse ka hare

 SEHLOOHO SE KA NTLE: HOBANE’NG MAHLOMOLA A LE MANGATA HAKAALE? A TLA FELA NENG?

Batho ba Bangata ba se Nang Molato Baa Shoa!

Batho ba Bangata ba se Nang Molato Baa Shoa!

Noelle e ne e le ngoana ea neng a rata batho a bile a rata ho toroea. Mantsiboeeng a mang a lehlabula o ne a ntse a itsamaela jareteng ea habo, ha ka tšohanyetso a khoptjoa ’me a oela ka letamong la ho sesa. O ile a khangoa ke metsi libeke tse peli feela pele a e-ba lilemo li ’nè.

Charlotte, Daniel, Olivia, Josephine . . . Ana ke a mang a mabitso a bana ba 20 ba lilemo li tšeletseng kapa li supileng, ba neng ba le har’a batho ba 26 ba ileng ba thunngoa sekolong, Connecticut, U.S.A., ka la 14 December, 2012. Tšebeletsong ea sehopotso sa bona, Mopresidente Obama o ile a bitsa mabitso a bana bao ’me a bolella bamameli ba neng ba saretsoe a re: “Litlokotsi tsena li tlameha ho fela.”

Bano, ea lilemo li 18 o ile a tloha Iraq ka 1996, a fallela Norway le lelapa labo. Metsoalle ea hae e ne e mo reneketsa ka ho mo bitsa Sun Rays (se bontšang hore o ne a lula a thabile). Ka bomalimabe ka la 22 July, 2011, Bano e ne e le e mong oa batho ba 77, ba ileng ba bolaoa ke motho ea chesehelang lipolotiki ka ho feteletseng, ea ileng a ithorisa a re: “Ke lakatsa ho kōpa tšoarelo . . . ka hore ebe ha kea khona ho bolaea ba bangata ho feta moo.”

Litaba tse kang tsena tse utloisang bohloko li ile tsa ’na tsa tlalehoa ka bongata lefatšeng ka bophara. Nahana ka bohloko le masisa-pelo a ’nileng a e-ba teng ka lebaka la likotsi, tlōlo ea molao, lintoa, bokhukhuni, likoluoa tsa tlhaho le litlokotsi tse ling. Ho na le mahlomola a mangata lefatšeng ’me batho ba bangata ba se nang molato baa shoa!

Batho ba bang ba beha Molimo molato, ba nka hore ’Mōpi oa rōna ha a re tsotelle. Ba bang ba nka hore Molimo o bona mathata a rōna empa o ikhethela ho re tlohela feela. Athe ba bang bona ba re litlokotsi tse joalo li ile tsa reroa esale pele. Ho bonahala ho e-na le maikutlo a mangata ka taba ena. Re ka fumana likarabo tse khotsofatsang le tseo re ka li tšepang hokae? Lihloohong tse latelang, re tla hlahloba Lentsoe la Molimo, Bibele, hore re fumane likarabo tsa hore na ke eng e bakang mahlomola le hore na a tla felisoa joang.