Fetela boitsebisong

Fetela lethathamong la tse ka hare

 Ruta Bana ba Hao

Jothame o Ile a Lula a Tšepahala ho sa Tsotellehe Mathata ka Lapeng

Jothame o Ile a Lula a Tšepahala ho sa Tsotellehe Mathata ka Lapeng

HA MOTSOALI a tlohela ho sebeletsa Molimo oa ’nete, Jehova, ngoana a ka thatafalloa ke bophelo. A re ke re bue ka Jothame. Re tla ithuta ka mathata ao a ileng a ba le ’ona habo ha a ntse a hōla.

Ntate oa Jothame, e leng Uzia, e ne e le morena oa Juda. E ne e le monna ea phahameng ka ho fetisisa naheng eo. Uzia e ne e bile morena ea molemo ka lilemo tse ngata, le pele Jothame a hlaha. Empa hamorao, ha Jothame a ntse a le monyenyane, Uzia o ile a ikhohomosa ’me a tlōla Molao oa Molimo. Ka hona, Molimo o ile a mo otla ka lepera, e leng lefu le lebe. Na ua tseba hore na Jothame o ile a etsa’ng ka mor’a moo? *

Jothame o ile a tsoela pele a sebeletsa Jehova. Mohlomong ’mè oa hae, e leng Jerusha, o ile a mo thusa. Ho ntse ho le joalo, e ka ’na eaba ho ne ho le thata hore Jothame a lule a tšepahala ho Jehova ka mor’a hore ntate oa hae, Uzia, a lelekoe ntlong ea Jehova.

U ne u tla etsa’ng haeba ntate oa hao kapa ’mè oa hao a tlohela ho sebeletsa Jehova? Ho ne ho ke ke ha e-ba monate, na ha ho joalo?— Empa hase phoso ho nahana hore ntho e joalo e ka etsahala. Re ka bona sena ha re bala seo Davida a se ngotseng ka Bibeleng.

Ntate oa Davida, e leng Jese, e ne e le monna ea lokileng. O ne a sebeletsa Jehova ’me kannete Davida o ne a rata ntate oa hae. Empa Davida o ne a rata Jehova ho feta kamoo a neng a  rata Jese kateng. A re ke re bone hore na ke hobane’ng ha re tseba sena.

Ka kōpo phetla Bibele ho Pesaleme ea 27:10. Davida o ile a ngola a re: “Haeba Ntate le ’Mè ba ne ba ka ntlohela, Jehova o ne a tla nthola.” Nahana ka sena: Bibele e re haeba ntate oa Davida, Jese, kapa ’mè oa hae ba ka tlohela ho sebeletsa Jehova, Davida o ne a tla tsoela pele a Mo sebeletsa.

Uena u ne u tla etsa’ng? Na u ne u tla tsoela pele u sebeletsa Jehova le haeba ntate oa hao kapa ’mè oa hao a sa mo sebeletse?— Ena ke potso e ntle eo u ka ipotsang eona. Lebaka la sena le amana le taelo ea bohlokoa ka ho fetisisa ka Bibeleng. Taelo eo e re: “U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.”

Taelo ena e bolela hore u tšepahale ho Jehova esita le ha ho le thata hore u etse joalo. U nahana hore ke mang ea batlang hore re tlohele ho sebeletsa Jehova?— Ke sera sa Molimo, Satane Diabolose. Jesu o ile a re ke “’musi oa lefatše lena.” Bibele e boetse e re ke “molimo oa tsamaiso ena ea lintho.” Na re lokela ho tšaba Satane?

Che, ha rea lokela ho mo tšaba. Ho e-na le hoo, re lokela ho hopola hore Jehova o matla ho feta Satane. Jehova o tla re sireletsa haeba re mo tšepa. Bibeleng ea hao, bala kamoo Jehova a ileng a sireletsa Davida ho senatla se tšabehang se bitsoang Goliathe. Jehova a ka u sireletsa le uena haeba u lula u tšepahala ho eena.

^ ser. 4 Ha u bala sehlooho sena le ngoana, motoa o u hopotsa hore u etse khefu ’me u khothalletse ngoana hore a ntše maikutlo a hae.