Fetela boitsebisong

Fetela lethathamong la tse ka hare

Abrahama e ne e le Mang?

Abrahama e ne e le Mang?

 Abrahama e ne e le Mang?

KE BATHO ba seng ba kae ba ileng ba e-ba le tšusumetso e khōlō malumeling a lefatše. Abrahama, * ea hlomphuoang ka tsela e tšoanang ke Bajuda, Mamosleme le Bakreste, o ’nile a hlalosoa e le “kakapa ka Mangolong” le “mohlala o hlaheletseng oa tumelo.” Bibele e re ke “ntat’a bohle ba nang le tumelo.”—Baroma 4:11.

Ke hobane’ng ha Abrahama a hlomphuoa hakaale? Lebaka le leng ke hore Abrahama ke eena feela eo ka Bibeleng ka ho toba a bitsoang motsoalle oa Molimo.—Esaia 41:8; Jakobo 2:23.

Leha ho le joalo, ntle ho moo, Abrahama e ne e ntse e le motho feela joaloka rōna. O ile a thulana le mathata a mangata a tšoanang le ao re thulanang le ’ona—’me o ile a sebetsana le ’ona ka katleho. Na u ka rata ho tseba hore na o ile a atleha joang? Hlokomela hore na Bibele e re’ng ka monna enoa ea ikhethang.

Moo a Neng a Tsoa Teng

Abrahama o hlahile ka 2018 B.C.E., ’me o hōletse Ure. (Genese 11:27-31) Ure e ne e le motse o moholo le o ruileng haholo. O ne o boetse o keneletse haholo borapeling ba litšoantšo. E ka ’na eaba ntate oa Abrahama, e leng Tera, e ne e le e mong oa ba neng ba rapela litšoantšo tse fapa-fapaneng. (Joshua 24:2) Leha ho le joalo, Abrahama o ile a khetha ho rapela Jehova * feela, ho e-na le ho rapela melimo e sa pheleng ea litšoantšo.

Ke eng e ileng ea etsa hore Abrahama a khethe ho etsa seo? Abrahama o phetse lilemo tse 150 pele mora oa Noe, Sema, a hlokahala. Haeba o ne a tloaelane le monna eo ea neng a se a hōlile haholo, e ka ’na eaba o ile a mo susumetsa joang bophelong? E ka ’na eaba Abrahama o ile a ithuta ka ho toba ho tsoa ho Sema hore na ho pholoha Moroallo ho ne ho le joang. Hape, e ka ’na eaba o ile a ithuta ka bohlokoa ba ho rapela Jehova, e leng Molimo ea ileng a pholosa Sema le lelapa labo Moroallong oo.

Ebang o ithutile ho tsoa ho Sema kapa ka litsela tse ling, Abrahama o ile a phetha seo a ileng a ithuta sona ka Molimo oa ’nete. Ha Jehova, “ea hlahlobang lipelo,” a hlahloba Abrahama, o ile a bona se molemo ho monna enoa—’me o ile a mo thusa hore e be motho ea molemo le ho feta.—Liproverbia 17:3; 2 Likronike 16:9.

Bophelo ba Hae

Abrahama o phetse bophelo bo maphatha-phathe le bo thahasellisang, boo hangata bo neng bo e-na le liphephetso empa ho se mohla bo neng bo se na morero. Hlokomela tse ling tsa lintho tseo a ileng a thulana le tsona.

Ha Abrahama a ntse a lula Ure, Molimo o ile a re a tlohe naheng eo a hlahetseng ho eona ’me a ee naheng eo a tla Mo bontša eona. Le hoja Abrahama le Sara ba ne ba sa tsebe lintlha kaofela—moo ba neng ba ea teng kapa hore na ke hobane’ng ha Molimo a ne a re ba falle—ba ile ba mamela. Qetellong Abrahama le Sara ba ile ba lula Kanana, ba lula moo e le bajaki bophelo bohle ba bona.—Liketso 7:2, 3; Baheberu 11:8, 9, 13.

Ha Abrahama le Sara ba ntse ba se na bana, Jehova o ile a tšepisa Abrahama ho mo etsa sechaba se seholo. Jehova o ile a phaella ka hore malapa ’ohle lefatšeng a tla hlohonolofatsoa ka Abrahama. (Genese 11:30; 12:1-3) Hamorao Jehova o ile a tiisa hore o tla phethahatsa tšepiso eo. O ile a tšepisa Abrahama hore litloholo tsa hae li tla ba ngata, joaloka linaleli leholimong.—Genese 15:5, 6.

Ha Abrahama a le lilemo li 99 ’me Sara a le haufi le ho ba lilemo li 90, Jehova o ile a ba  tšepisa hore ba tla ba le mora. Ho batho, ho ne ho bonahala eka seo se ke ke sa khoneha, empa ho e-s’o ee kae, Abrahama le Sara ba ile ba ithuta hore ha ho letho le ka “sitang Jehova.” (Genese 18:14, Bibele ea Sesotho) Selemo hamorao, ha Abrahama a le lilemo li 100, o ile a ba le mora, eo a ileng a mo reha Isaka. (Genese 17:21; 21:1-5) Molimo o ile a tšepisa ka ho khethehileng hore ka Isaka, moloko oa batho o tla hlohonolofatsoa haholo.

Lilemo tse ’maloa hamorao, Jehova o ile a kōpa Abrahama ntho e sa tloaelehang ho hang: O ile a re Abrahama a etse sehlabelo ka mora oa hae, Isaka, le hoja mohlankana eo a ne a e-s’o nyale ’me a se na bana. * Le hoja e ka ’na eaba o ile a utloa bohloko haholo ha a nahana ka ho shoeloa ke mora, Abrahama o ile a itokisetsa ho mamela ’me a etsa Isaka sehlabelo. Abrahama o ne a lumela ka tieo hore Molimo o na le matla a ho tsosa Isaka, haeba ho hlokahala, e le hore a phethahatse litšepiso tsa Hae. (Baheberu 11:19) Nakong ena ea bohlokoa ka ho fetisisa ha Abrahama a ne a le mothating oa ho nehelana ka mora oa hae, Molimo o ile a kenella, eaba o pholosa bophelo ba Isaka. O ile a babatsa Abrahama ka ho mamela ka tsela e ikhethang. Joale Jehova o ile a bolella Abrahama litšepiso tsa hae hape.—Genese 22:1-18.

Ka mor’a hore a phele lilemo tse 175, Abrahama o ile a hlokahala. Bibele e re o ile “a shoa a tsofetse haholo,” ’me e phaella ka ho re o ne a “tsofetse ’me a khotsofetse.” (Genese 25:7, 8) Ka hona, Abrahama o ile a bona ha tšepiso e ’ngoe ea Molimo e phethahala—ea hore o tla phela nako e telele pele a ichoella ka khotso.—Genese 15:15.

Lefa Leo a le Siileng

Abrahama hase feela motho oa khale ea tsebahalang bolumeling kapa historing. Le mehleng ena pale ea hae e ntse e le ea bohlokoa, kaha e re bontša mohlala o motle oo kaofela re lokelang ho o etsisa. (Baheberu 11:8-10, 17-19) A re ke re hlahlobe tse ling tsa litšobotsi tse ntle tse ’nè tseo Abrahama a ileng a li bontša. Re tla qala ka tšobotsi eo re ka reng ke eona eo a tsebahalang ka eona ka ho fetisisa—e leng tumelo.

[Mongolo o botlaaseng ba leqephe]

^ ser. 2 Qalong, Abrahama o ne a bitsoa Abrame ’me mosali oa hae o ne a bitsoa Sarai. Hamorao Molimo o ile a fetola lebitso la Abrame a re ke Abrahama, e bolelang “Ntate oa Matšoele,” a fetola le lebitso la Sarai a re ke Sara, e bolelang “Khosatsana.” (Genese 17:5, 15) E le ho nolofatsa lintho, lihloohong tsena re tla ba bitsa Abrahama le Sara.

^ ser. 6 Jehova ke lebitso la Molimo le hlahang ka Bibeleng.

[Lebokose le leqepheng la 4]

Motho oa Bohlokoahali Historing ea Bibele

Likhaolong tsa eona tse leshome tse qalang, buka ea Bibele ea Genese e bua ka lipale tsa bophelo ba banna ba ’maloa ba neng ba e-na le tumelo, ho akarelletsa Abele, Enoke le Noe. Leha ho le joalo, likhaolong tse 15 tse latelang ho buuoa haholo ka bophelo ba motho a le mong—Abrahama.

Ho feta moo, ka lekhetlo la pele Bibele e hlahisa tse ling tsa lithuto tsa eona tsa bohlokoa ka ho fetisisa ha e bua ka Abrahama. Ka mohlala, paleng ea bophelo ba Abrahama re fumana . . . 

▪ moo ho buuoang ka lekhetlo la pele ka Molimo e le Thebe, kapa Mosireletsi oa bahlanka ba hae.—Genese 15:1; sheba Deuteronoma 33:29; Pesaleme ea 115:9; Liproverbia 30:5.

▪ moo ho buuoang ka lekhetlo la pele ka ho beha tumelo ho Molimo.Genese 15:6.

▪ moo lentsoe moprofeta le hlahang ka lekhetlo la pele.—Genese 20:7.

▪ moo ho buuoang ka lekhetlo la pele ka lerato la motsoali.—Genese 22:2.