Fetela boitsebisong

Fetela lethathamong la tse ka hare

Lumellang Jehova ho Matlafatsa Lenyalo la Lōna le ho le Sireletsa

Lumellang Jehova ho Matlafatsa Lenyalo la Lōna le ho le Sireletsa

“Ntle le haeba Jehova a lebela motse, ke ha lefeela molebeli a lutseng a falimehile.”PES. 127:1b.

1, 2. (a) Ke hobane’ng ha Baiseraele ba 24 000 ba ile ba fetoa ke monyetla o babatsehang? (b)Ke hobane’ng ha ketsahalo eo ea boholo-holo e le ea bohlokoa ho rōna?

NAKOANA pele sechaba sa Iseraele se kena Naheng e Tšepisitsoeng, banna ba likete tse mashome ba ile ba ‘kopanela liphate le barali ba Moabe.’ Ka lebaka leo, Jehova o ile a bolaea ba 24 000. Ak’u nahane feela—Baiseraele ba ne ba le haufi le ho rua naha eo e neng e le khale ba e letetse, empa ba ile ba fetoa ke monyetla oo o babatsehang ka lebaka la ho inehela tekong.—Num. 25:1-5,9.

2 Tlokotsi eo e tlalehiloe “hore e be temoso ho rōna bao bofelo ba litsamaiso tsa lintho bo ba fihletseng.” (1 Bakor. 10:6-11) Hona joale re elella bofelong ba ‘matsatsi a ho qetela,’ ’me batho ba Molimo ba moeling oa lefatše le lecha la ho loka. (2Tim. 3:1; 2 Pet. 3:13) Empa ka bomalimabe, barapeli ba bang ba Jehova ba khaolitse ho falimeha. Ba tšoasitsoe ke leraba la boitšoaro bo bobe, ’me ba kotutse litholoana tse babang. Batho bao ba ipeha kotsing ea ho lahleheloa ke litlhohonolofatso tsa ka ho sa feleng.

3. Ke hobane’ng ha banyalani ba hloka tataiso ea Jehova le tšireletso ea hae? (Sheba setšoantšo se qalong.)

3 Ka lebaka la ho hlepha ha boitšoaro kajeno, banna le  basali ba hloka tataiso le tšireletso ea Jehova e le hore ba atlehe boitekong ba bona ba ho sireletsa manyalo a bona. (Bala Pesaleme ea 127:1.) Re tlil’o tšohla kamoo banyalani ba ka matlafatsang lenyalo la bona kateng ka ho sireletsa lipelo tsa bona, ho atamela haufi le Molimo, ho apara botho bo bocha, ho ba le puisano e nang le morero le ho fanana tokelo ea lenyalo.

SIRELETSA PELO EA HAO

4. Ke’ng e etsang hore Bakreste ba bang ba oele boitšoarong bo bobe?

4 Ke’ng e ka hohelang Mokreste hore a oele boitšoarong bo bobe? Hangata bothata bo qala ka seo a se shebang. Jesu o ile a re: “E mong le e mong ea ntseng a tsoela pele ho sheba mosali e le hore a be le takatso e matla bakeng sa hae o se a febile le eena ka pelong ea hae.” (Mat. 5:27, 28; 2 Pet. 2:14) Bakreste ba bangata ba oetseng boitšoarong bo bobe ba ile ba ipeha kotsing ka ho sheba litšoantšo tse litšila, ho bala libuka tse tsosang takatso, kapa ho sheba lintho tse ling tse tsoileng tseleng Inthaneteng. Ba bang ba khethile ho shebella lifilimi le mananeo a thelevishene a bontšang boitšoaro bo bobe ba ho kopanela liphate. Ba bang ba tsamaea li-nightclub kapa ba ea libakeng tse ling tsa botekatse.

5. Ke hobane’ng ha re lokela ho sireletsa lipelo tsa rōna?

5 Ba bang ba oela tekong hobane ba tloaelane le batho ba fosahetseng. Lefatšeng lena leo batho ba se nang boitšoaro, ho bonolo hore pelo e mano e susumelletse motho ho ba le maikutlo a fosahetseng a lerato ka motho eo e seng molekane oa hae. (Bala Jeremia 17:9, 10.) Jesu o ile a re: “Pelong ho tsoa menahano e khopo, lipolao, bofebe, bohlola.”—Mat. 15:19.

6, 7. (a) Pelo e mano e ka lebisa motho tseleng e fosahetseng joang? (b)Motho a ka etsa’ng ho qoba ho oela boitšoarong bo bobe?

6 Hang ha batho ba babeli ba qala ho ba le litakatso tse fosahetseng pelong e mano, ba ka ’na ba iphumana ba se ba ntse ba buisana ka lintho tseo ba sa lokelang ho li bua le batho ba bang ntle ho balekane ba bona. Ka mor’a moo, ba se ba qala ho batla menyetla ea hore ba be hammoho, ’me ha nako e ntse e ea lintho tse ba kopanyang ba sa rera lia eketseha. Ha ba ntse ba tloaelana le ho feta, seo se ba beha kotsing e fetang ea hore ba oele boitšoarong bo bobe. Ha ba se ba qalile tseleng ena e fosahetseng, ho ba thata le ho feta hore ba khaotse, le hoja ba tseba hore seo ba se etsang se fosahetse.—Liprov. 7:21,22.

7 Butle-butle litakatso tse fosahetseng lia tota, ’me ba qala ho tšoarana ka matsoho, ho akana, ho phathatsana le ho etsa lintho tse ling ho bontšana lerato, tseo ba lokelang ho li etsa le balekane ba bona feela. Qetellong ba ‘huloa le ho ekoa ke takatso ea bona.’ Ha takatso e se e emere, “e tsoala sebe”—’me boemong bona ba oela boitšoarong bo bobe ba ho kopanela liphate. (Jak. 1:14, 15) Eo ke tlokotsi e kaakang! Ba ka be ba qobile sena sohle haeba ka bobeli ba ne ba ile ba lumella Jehova hore a ba thuse ho hlompha khalalelo ea lenyalo. Ba ka etsa see joang?

ATAMELA HAUFI LE MOLIMO

8. Ho ba metsoalle ea Jehova ho sireletsa banyalani joang boitšoarong?

8 Bala Pesaleme ea 97:10. Ntho ea bohlokoa e ka re qobisang boitšoaro bo bobe ke ho ba metsoalle ea Jehova. Ha re ntse re ithuta ka litšobotsi tse ntle tsa Molimo ’me re leka ho ba ‘baetsisi ba Molimo, joaloka bana ba ratoang, ebile re tsoela pele ho tsamaea leratong,’ re tla  ikemisetsa ho qoba “bohlola le ho se hloeke ha mofuta o mong le o mong.” (Baef. 5:1-4) Ha banyalani ba tseba hore “Molimo o tla ahlola lihlola le bafebi,” ba tla sebetsa ka thata ho boloka lenyalo la bona le hlompheha le bile le hloka litšila.—Baheb. 13:4.

9. (a) Josefa o ile a etsa’ng e le hore a qobe teko ea ho oela boitšoarong bo bobe? (b)Re ka ithuta’ng mohlaleng oa Josefa?

9 Bahlanka ba bang ba tšepahalang ba Molimo ba ipehile kotsing ea ho oela boitšoarong bo bobe ka hore ba qete nako le basebetsi-’moho le bona bao e seng Lipaki ka mor’a lihora tsa mosebetsi. Esita le nakong ea mosebetsi ba ntse ba ka ’na ba lekoa. Mohlankana e mong ea motle ea bitsoang Josefa o ne a le mosebetsing ha a hlokomela hore mosali oa mong’a hae o oa mo rata. O ne a lula a leka ho mo hohela. Qetellong o ile ‘a mo tšoara ka seaparo, a re: “Robala le ’na!”’ Empa Josefa o ile a chophola a baleha. Ke’ng e ileng ea thusa Josefa hore a lule a falimehile moeeng boemong boo bo lekang? Kaha o ne a ikemiselitse ho se senye kamano ea hae le Molimo, o ile a lula a hloekile a bile a tšepahala. O ile a lahleheloa ke mosebetsi ka lebaka la qeto eo a e entseng ’me a koalloa chankaneng ka leeme, empa Jehova a mo hlohonolofatsa. (Gen. 39:1-12; 41:38-43) Mokreste o lokela ho qoba maemo a ka mo behang kotsing ha a le mosebetsing kapa sebakeng se seng le motho eo e seng molekane oa hae.

APARA BOTHO BO BOCHA

10. Ho apara botho bo bocha ho re sireletsa joang?

10 Kaha botho bo bocha ‘bo bōpiloe ho ea ka thato ea Molimo ho lokeng ha ’nete le botšepehing,’ bo thusa ho sireletsa banyalani moeeng. (Baef. 4:24) Batho ba aparang botho bo bocha ba ‘bolaea’ litho tsa bona tsa ’mele “mabapi le bohlola, ho se hloeke, takatso ea botona kapa ea botšehali, takatso e kotsi, le ho chacheha ka mohono.” (Bala Bakolose 3:5,6.) Lentsoe ho ‘bolaea’ le bontša hore re lokela ho loantša ka matla takatso ea ho kopanela boitšoarong bo bobe. Kahoo re tla qoba ntho leha e le efe e re tsosetsang takatso ka motho eo re sa nyalanang le eena. (Jobo 31:1) Ha re ntse re leka ho phela tumellanong le thato ea Molimo, re ithuta ‘ho nyonya se khopo’ le ‘ho khomarela se molemo.’—Bar. 12:2,9.

11. Ho apara botho bo bocha ho ka matlafatsa lenyalo joang?

11 Botho bo bocha bo bonahatsa “setšoantšo sa Ea bo bōpileng,” e leng Jehova. (Bakol. 3:10) Ruri banna le basali baa hlohonolofatsoa ha ba qoba boitšoaro bo bobe ka hore ba ikapese “lerato le mofuthu la qenehelo, mosa, ho ikokobetsa kelellong, bonolo, le tiisetso”! (Bakol. 3:12) Ba boetse baa momahana ha ba lumella ‘khotso ea Kreste hore e laole lipelo tsa bona.’ (Bakol. 3:15) Ka sebele e ba ho khathollang ha banyalani ‘ba bontšana lerato le mofuthu’! Baa thaba ha ba ‘etella pele ho bontšaneng tlhompho.’—Bar. 12:10.

12. U nahana hore ke litšobotsi life tse hlokahalang e le hore banyalani ba thabe?

12 Ha Sid a botsoa hore na ke litšobotsi life tse etsang hore banyalani ba thabe, o ile a re: “Lerato ke tšobotsi e ka sehloohong eo re lulang re leka ho e hlaolela. Re hlokometse hore bonolo le bona ke ba bohlokoa.” Mosali oa hae, Sonja, o lumellana le eena ’me o phaella ka ho re: “Ho boetse ho hlokahala hore re be mosa. ’Me re lula re leka ho bonahatsa boikokobetso, le hoja ka linako tse ling ho se bonolo.”

 E BANG LE PUISANO E NANG LE MORERO

13. Ke’ng e etsang hore banyalani ba be le botsitso, hona hobane’ng?

13 Ha ho pelaelo hore ntho e ’ngoe e etsang hore banyalani ba be le botsitso ke ha ba buisana ka mosa. Ruri e ka ba ho utloisang bohloko hore banyalani ba khahlapetsane ha ba buisana, empa ba bua hantle ha ba bua le batho bao ba sa ba tsebeng kapa ba bua le liphoofolo tsa bona! Ha banyalani ba tlakoloha ’me ba bonahatsa “lehloeo le nang le lonya, bohale, khalefo, ho tleroha le puo e nyefolang,” ba thefula bomoea ba bona. (Baef. 4:31) Ho e-na le hore ba lule ba tšoaeana liphoso kapa ba phoqana, banyalani ba lokela ho tiisa kamano ea bona ka hore ba buisane ka mosa, bonolo le ka kutloelo-bohloko.—Baef. 4:32.

14. Re lokela ho qoba lintho life?

14 Bibele e re ho na le “nako ea ho khutsa.” (Moek. 3:7) Empa sena hase bolele hore re lokela ho ngala, ebe ha re sa buisana, e leng se sitisang hore ho be le puisano. Mosali e mong oa Jeremane o re: “Ho khutsa ka tsela eo, ho ka utloisa molekane oa hao bohloko.” Empa o phaella ka ho re: “Le hoja ka linako tse ling ho se bonolo hore motho a khobe matšoafo ha a imetsoe kelellong, ha ho hlokahale hore a phasolohe. U ka ’na ua utloisa molekane oa hao bohloko ka ho bua kapa ka ho etsa ntho e itseng, ’me seo sa mpefatsa lintho le ho feta.” Ha monna le mosali ba tjolietsana kapa ba khaotsa ho buisana, ba ke ke ba rarolla mathata. Empa ba ka matlafatsa kamano ea bona haeba ba itloaetsa ho se phehisane khang kapa ho ngangisana nako e telele.

15. Ho buisana ka bolokolohi ho ka matlafatsa lenyalo joang?

15 Lenyalo le tiea le ho feta ha banyalani ba ipha nako ea ho phetlelana sefuba. Ke habohlokoa hore re hlokomele seo re se buang le tsela eo re buang ka eona. Ka  hona, esita le maemong a thata, leka ho bua ka tsela e mosa, ’me u bontše seo ka molumo oa hao oa lentsoe le ka mantsoe ao u a sebelisang. Ka tsela eo, u tla nolofalletsa molekane oa hao hore a u mamele. (Bala Bakolose 4:6.) Monna le mosali ba ka matlafatsa lenyalo la bona ka hore ba buisane ka bolokolohi, ’me ba bue lintho tse ka hahang molekane e mong.—Baef. 4:29.

Monna le mosali ba ka matlafatsa lenyalo la bona ka hore ba buisane ka bolokolohi (Sheba serapa sa15)

FANANANG TOKELO EA LENYALO

16, 17. Ke hobane’ng ha e le habohlokoa hore banyalani ba nahanelane maikutlong le tabeng ea ho kopanela liphate?

16 Banyalani ba ka boetse ba tiisa kamano ea bona ea lenyalo ka hore molekane e mong a batle ho khahlisa e mong, ’me a eteletse pele lithahasello tsa hae. (Bafil. 2:3,4) Monna le mosali ba lokela ho nahanelana maikutlong le ha ho tluoa litabeng tsa ho kopanela liphate.—Bala 1 Bakorinthe 7:3,4.

17 Ka masoabi, balekane ba bang ha ba bontše balekane ba bona lerato kapa hona ho kopanela liphate le bona, ’me banna ba bang ba nka hore ho tšoara mosali ka mosa ke booatla. Bibele e re: “Lōna banna, lekang ho utloisisa basali ba lōna.” (1 Pet. 3:7, Phillips) Monna o lokela ho utloisisa hore ho fanana tokelo ea lenyalo hase feela taba ea ho kopanela liphate. Ho ka etsahala hore mosali a thabele ho kopanela liphate haeba monna a mo bontša lerato ka linako tsohle, eseng feela ha ba kopanela liphate. Haeba ba bontšana lerato ba bile ba nahanelana, ba ka tšehetsana maikutlong le ho khotsofatsana nameng.

18. Monna le mosali ba ka tiisa kamano ea bona ea lenyalo joang?

18 Le hoja ho se letho le lokafatsang hore molekane e mong a se ke a tšepahala, ho hlōleha ho tšoara molekane e mong ka mosa ho ka tlatsetsa hore a batle setsoalle sa motho e mong ea ka ntle. (Liprov. 5:18; Moek. 9:9) Ka hona, Bibele e phehella banyalani e re: “Le se ke la hanelana ka eona [tokelo ea lenyalo], haese ka tumellano ka nako e behiloeng.” Hobane’ng? “E le hore Satane a se ke a ’na a le leka ka lebaka la ho hloka boitšoaro ha lōna.” (1 Bakor. 7:5) Ruri e ka ba ho utloisang bohloko haeba banyalani ba ka lumella Satane hore a nke monyetla ka “ho hloka boitšoaro” ha bona, ’me a ba susumelletse ho oela tekong ea ho etsa bofebe! Ka lehlakoreng le leng, haeba molekane ka mong a sa batle ‘se molemo ho eena, empa a batla se molemo ho e mong,’ ’me ka bobeli ba fanana tokelo ea lenyalo e le pontšo ea lerato eseng feela ho phetha molao, seo se tla tiisa kamano ea bona ea lenyalo.—1 Bakor. 10:24.

SIRELETSANG LENYALO LA LŌNA

19. Re lokela ho ikemisetsa ho etsa’ng, hona hobane’ng?

19 Re lintšing tsa lefatše le lecha la ho loka. Ke kahoo ho inehella litakatso tsa nama ho ka bang kotsi ho rōna feela joalokaha ho bile kotsi ho Baiseraele ba 24 000 Lithoteng tsa Moabe. Lentsoe la Molimo le hlalosa ketsahalo eo e soabisang, ’me le eletsa ka ho re: “Ea nahanang hore o eme a ke a hlokomele hore a se ke a oa.” (1 Bakor. 10:12) Kahoo, ke habohlokoa hore re matlafatse manyalo a rōna ka hore re lule re tšepahala ho Ntate oa rōna ea leholimong le ho balekane ba rōna. (Mat. 19:5,6) Ena ke nako ea hore ‘re etse sohle se matleng a rōna hore qetellong a re fumane re se na letheba ebile re se na sekoli ’me re le khotsong.’—2 Pet. 3:13,14.