Fetela boitsebisong

Fetela lethathamong la tse ka hare

“Le Tla ba Lipaki Tsa Ka”

“Le Tla ba Lipaki Tsa Ka”

“[Jesu] a re ho bona: ‘. . . Le tla ba lipaki tsa ka . . . ho isa karolong e hōle-hōle ea lefatše.’”—LIK. 1:7, 8.

1, 2. (a) Ke mang eo e leng paki ea Jehova e ka sehloohong? (b) Lebitso Jesu le bolela’ng, hona Mora oa Molimo o ile a le phelela joang?

“KE TSOALETSOE sena, ’me ke tletse sena lefatšeng, hore ke pakele ’nete.” (Bala Johanne 18:33-37.) Jesu Kreste o ile a bua mantsoe ana ho ’musisi oa Moroma oa Judea, ha a ne a le qosong. O ne a sa tsoa itsebahatsa hore ke morena. Lilemo hamorao, moapostola Pauluse o ile a bua ka mohlala ona oa Jesu oa ho ba sebete ha a re, “eo joaloka paki a ileng a etsa boipolelo bo botle ba phatlalatsa ka pel’a Ponse Pilato.” (1 Tim. 6:13) Ha e le hantle, ka linako tse ling ho hlokahala sebete hore motho e be “paki e tšepahalang le ea ’nete” lefatšeng lena le khopo la Satane.—Tšen. 3:14.

2 Kaha Jesu e ne e le Mojuda, e ne e le paki ea Jehova ka tsoalo. (Esa. 43:10) Ha e le hantle, e bile paki e ka sehloohong ho tsohle tse kileng tsa pakela lebitso la Molimo. Jesu o ne a nka ka ho teba se boleloang ke lebitso leo Molimo a mo rehileng lona. Lengeloi le ile la bolella Josefa, ntate oa Jesu oa mohōlisi, hore Maria o imisitsoe ke moea o halalelang, ’me la phaella ka ho re: “O tla tsoala mora, ’me u tla mo reha lebitso la Jesu, etsoe o tla pholosa batho ba habo libeng tsa bona.” (Mat. 1:20, 21) Litsebi tsa Bibele ka kakaretso li lumela hore lebitso Jesu le tsoa lebitsong la Seheberu Jeshua, ’me le na le khutsufatso ea lebitso la Molimo le hore le bolela “Jehova ke Poloko.” Tumellanong  le se boleloang ke lebitso la hae, Jesu o ile a thusa “linku tse lahlehileng tsa ntlo ea Iseraele” hore li bakele libe tsa tsona e le hore Jehova a ka boela a li amohela. (Mat. 10:6; 15:24; Luka 19:10) E le hore a li thuse, Jesu o ile a chesehela ho paka ka ’Muso oa Molimo. Mongoli oa Kosepele Mareka o re: “Jesu a kena Galilea, a ntse a bolela litaba tse molemo tsa Molimo a re: ‘Nako e behiloeng e phethehile, ’me ’muso oa Molimo o atametse. Bakang, ’me le be le tumelo litabeng tse molemo.’” (Mar. 1:14, 15) Ka sebete, Jesu o ile a boela a nyatsa baeta-pele ba bolumeli ba Sejuda, e leng e ’ngoe ea lintho tse ileng tsa etsa hore a bolaeloe thupeng.—Mar. 11:17, 18; 15:1-15.

“LINTHO TSE HLOLLANG TSA MOLIMO”

3. Ho ile ha etsahala’ng letsatsing la boraro ka mor’a hore Jesu a bolaoe?

3 Ruri ketsahalo e latelang e ile ea e-ba mohlolo! Ka letsatsi la boraro Jesu a bolailoe ka sehlōhō, Jehova o ile a mo tsosa e le sebōpuoa se sa shoeng sa moea. (1 Pet. 3:18) Ho paka hore o fela a tsohile, Morena Jesu o ile a itlhahisa ka ’mele oa nama ’me a fana ka bopaki ba hore o tsositsoe. Letsatsing leo a tsositsoeng ka lona, o ile a iponahatsa bonyane ka makhetlo a mahlano ho barutuoa ba hae ba sa tšoaneng.—Mat. 28:8-10; Luka 24:13-16, 30-36; Joh. 20:11-18.

4. Jesu o ile a tšoara seboka sefe ka mor’a hore a tsosoe bafung, hona o ile a fa barutuoa ba hae boikarabelo bofe bo hlakileng?

4 Lekhetlong la bohlano, Jesu o ile a itlhahisa ho baapostola ba hae le ho ba bang ba neng ba bokane le bona. Ketsahalong eo e sa lebaleheng, re ka re o ile a tšoara thuto ea Lentsoe la Molimo. O ile “a bula likelello tsa bona ka botlalo hore li utloisise se boleloang ke Mangolo.” Ka tsela eo ba ile ba utloisisa hore Mangolo a ne a boletse esale pele hore o tla bolaoa ke lira tsa Molimo ’me a tsosoe bafung ka tsela ea mohlolo. Qetellong ea seboka seo se neng se bua ka tsoho, Jesu o ile a totobaletsa bamameli ba hae hore na ba fuoe boikarabelo bofe. O ile a ba bolella hore “ka lebitso la hae pako bakeng sa tšoarelo ea libe e ne e tla boleloa lichabeng tsohle—ho qala Jerusalema.” ’Me a phaella ka ho re: “Le tla ba lipaki tsa lintho tsena.”Luka 24:44-48.

5, 6. (a) Ke hobane’ng ha Jesu a ile a re: “Le tla ba lipaki tsa ka”? (b) Ke taba efe e ncha e mabapi le morero oa Jehova eo barutuoa ba Jesu ba neng ba lokela ho e tsebahatsa?

5 Kahoo, matsatsi a 40 hamorao, ha Jesu a itlhahisa ka lekhetlo la ho qetela, e tlameha ebe baapostola ba hae ba ile ba utloisisa hore na taelo eo e tobileng empa e le matla e bolela’ng: “Le tla ba lipaki tsa ka Jerusalema le Judea le Samaria kaofela le ho isa karolong e hōle-hōle ea lefatše.” (Lik. 1:8) Ke hobane’ng ha Jesu a ile a re: “Le tla ba lipaki tsa ka,” eseng tsa Jehova? Jesu a ka be a itse ke lipaki tsa Jehova, empa o ne a bua le Baiseraele bao e neng e se e ntse e le lipaki tsa Jehova.

Joaloka barutuoa ba Jesu, re tsoela pele ho phatlalatsa seo Jehova a rerang ho se etsa nakong e tlang (Sheba serapa sa 5 le 6)

6 Joale balateli ba Jesu ba ne ba lokela ho phatlalatsa taba e ’ngoe e ncha e mabapi le morero oa Jehova—ea bohlokoa ho feta ho lopolloa ha Baiseraele bokhobeng Egepeta, ’me hamorao botlamuoeng Babylona. Lefu le tsoho ea Jesu Kreste li ile tsa rala motheo oa ho lokolloa bokhobeng bo bobe ka ho fetisisa, e leng ba sebe le lefu. Ka Pentekonta ea 33 C.E., barutuoa ba Jesu ba sa tsoa khethoa ba ile ba tsebisa batho “lintho tse hlollang tsa Molimo,” ’me ba bangata ba ba mamela. Kahoo, Jesu o ile a sheba a le ka letsohong le letona la Ntate oa hae leholimong, ’me a qala ho bona ha se boleloang ke lebitso la hae se hlaka le ho feta ’me batho ba likete ba baka ba bile ba bontša hore ba lumela hore ke eena eo Jehova a mo sebelisang ho ba lopolla.—Lik. 2:5, 11, 37-41.

 “THEKOLLO E LE PHAPANYETSANO BAKENG SA BA BANGATA”

7. Lintho tse etsahetseng ka Pentekonta ea 33 C.E. li ile tsa bontša eng?

7 Lintho tse etsahetseng ka Pentekonta ea 33 C.E. li ile tsa bontša hore ka mosa Jehova o amohetse boleng ba ’mele oa Jesu o phethahetseng e le sehlabelo se hlakolang, kapa se koahelang libe. (Baheb. 9:11, 12, 24) Joalokaha Jesu a hlalositse, o ne a sa “tlela ho sebeletsoa, empa ho sebeletsa le ho fana ka moea oa hae hore e be thekollo e le phapanyetsano bakeng sa ba bangata.” (Mat. 20:28) “Ba bangata” ba neng ba tla rua molemo sehlabelong sa Jesu sa thekollo, e ne e se Bajuda ba bakileng feela. Ho e-na le hoo, thato ea Molimo ke hore “batho ba mefuta eohle ba pholohe,” kaha thekollo ‘e tlosa sebe sa lefatše!’1 Tim. 2:4-6; Joh. 1:29.

8. Barutuoa ba Jesu ba ile ba paka ka ho pharaletseng hakae, hona see se ile sa khoneha joang?

8 Na ho ne ho hlokahala hore barutuoa bao ba Jesu ba lekholong la pele la lilemo ba be sebete e le hore ba tsoele pele ho paka ka eena? Ho ne ho hlokahala, empa ha baa ka ba etsa seo ka matla a bona. Moea o halalelang oa Jehova o matla o ile oa ba susumetsa le ho ba matlafalletsa ho tsoela pele ba paka. (Bala Liketso 5:30-32.) Lilemo tse ka bang 27 ka mor’a Pentekonta ea 33 C.E., ho ne ho ka boleloa hore ‘litaba tse molemo’ li boleletsoe Bajuda le Balichaba “pōpong eohle e tlas’a leholimo.”—Bakol. 1:5, 23.

9. Ke’ng e ileng ea etsahala ka phutheho ea Bokreste ea lekholong la pele, e leng se neng se boletsoe esale pele?

9 Empa ka masoabi phutheho ea Bokreste ea lekholong la pele la lilemo e ile ea silafala butle-butle. (Lik. 20:29, 30; 2 Pet. 2:2, 3; Juda 3, 4) Joalokaha Jesu a ne a boletse, bokoenehi boo bo hlohlelletsoang ke “ea khopo,” e leng Satane, bo ne bo tla hōla ’me bo pupetse Bakreste ba ’nete ho fihlela “qetellong ea tsamaiso ea lintho.” (Mat. 13:37-43) Ka mor’a moo, Jehova o ne a tla hlomamisa Jesu e le Morena oa bohle lefatšeng. Seo se etsahetse ka October 1914, ’me se ile sa tšoaea ho qaleha ha ‘matsatsi a ho qetela’ a tsamaiso e khopo ea Satane.—2 Tim. 3:1.

10. (a) Bakreste ba tlotsitsoeng ba kajeno ba ile ba bua ka nako efe e ikhethang? (b) Ho ile ha etsahala’ng ka October 1914, hona seo se ile sa totobala joang?

10 Bakreste ba tlotsitsoeng ba kajeno  ba ile ba bolela esale pele hore October 1914 ke nako e ikhethang. Ba ne ba itšetlehile ka boprofeta ba Daniele bo buang ka sefate se seholo se ileng sa rengoa ’me sa boela sa hōla ka mor’a “linako tse supileng.” (Dan. 4:16) Ha Jesu a profeta ka ho ba teng ha hae nakong e tlang le ka “qetello ea tsamaiso ea lintho,” o ile a e bitsa “linako tse behiloeng tsa lichaba.” Ho tloha ka selemo seo se ikhethang sa 1914, ‘pontšo ea ho ba teng’ ha Kreste e le Morena e mocha oa lefatše e ’nile ea totobala hore bohle ba e bone. (Mat. 24:3, 7, 14; Luka 21:24) Kahoo ho tloha ka nako eo “lintho tse hlollang tsa Molimo” li akarelelitse hore Jehova a hlomamise Jesu e le Morena oa moloko oa batho.

11, 12. (a) Morena e mocha oa lefatše o ile a etsa’ng ka 1919? (b) Ke liphetoho life tse ling tse ileng tsa totobala ho tloha ka bo-1935? (Sheba setšoantšo se qalong.)

11 E le Morena e mocha oa lefatše, Jesu Kreste o ile a qala ho lopolla balateli ba hae ba tlotsitsoeng botlamuoeng ba “Babylona e Moholo.” (Tšen. 18:2, 4) Ka 1919 ha ntoa e se e letse, ho ile ha e-ba le monyetla oa hore ho phatlalatsoe bopaki ba tokisetso eo Molimo a e entseng ea poloko le litaba tse molemo tsa ’Muso o hlomiloeng. Bakreste ba tlotsitsoeng ba ile ba sebelisa monyetla oo ho paka, e leng se entseng hore ho bokelloe batlotsuoa ba bang ba likete hore e tl’o ba majalefa-’moho le Kreste.

12 Ho tloha ka bo-1935 ho ea pele, ho ile ha hlaka hore Kreste o qalile ho bokella ‘linku tsa hae tse ling’ tse limilione tse tla bōpa “bongata bo boholo” bo tsoang lichabeng tsohle. Bongata bona bo boholo bo tataisoa ke Bakreste ba tlotsitsoeng, ’me bo etsisa Jesu tabeng ea ho bontša sebete ebile bo bolela phatlalatsa hore poloko ea bona e tsoa ho Molimo le Kreste. Haeba bo etsa mosebetsi ona oa ho paka ka mamello ’me bo tsoela pele ho bontša tumelo thekollong ea Kreste, bo tla feta “matšoenyehong a maholo,” a tla felisa lefatše la Satane.—Joh. 10:16; Tšen. 7:9, 10, 14.

‘ITETE SEBETE HO BOLELA LITABA TSE MOLEMO’

13. Joaloka Lipaki Tsa Jehova, re ikemiselitse ho etsa’ng, hona re ka etsa’ng ho tiisa hore re tla atleha?

13 E se eka re ka tsoela pele ho ananela tlotla ea ho ba Lipaki tsa “lintho tse hlollang” tseo Jehova Molimo a li entseng le tseo a tšepisang ho li etsa. Ke ’nete hore ka linako tse ling ha ho bonolo ho fana ka bopaki. Barab’abo rōna ba bangata ba sebetsa tšimo eo ho eona batho ba sa thahaselleng, ba ba somang kapa ba ba hlorisang. Re lokela ho etsisa moapostola Pauluse le bo-mphato ba hae. O ile a re: ‘Re ile ra iteta sebete ka Molimo oa rōna ho le bolella litaba tse molemo tsa Molimo ka ntoa e khōlō.’ (1 Bathes. 2:2) Kahoo a re se keng ra tela. Ho e-na le hoo, a  re ikemisetseng ho phelela boinehelo ba rōna ho fihlela tsamaiso ena ea Satane e timetsoa. (Esa. 6:11) Re ke ke ra etsa sena ka matla a rōna, empa re lokela ho etsisa Bakreste ba lekholong la pele la lilemo, re rapele Jehova re mo kōpe hore ka moea oa hae o halalelang a re fe “matla a fetang se tloaelehileng.”—Bala 2 Bakorinthe 4:1, 7; Luka 11:13.

14, 15. (a) Batho ba ne ba talima Bakreste joang lekholong la pele la lilemo C.E., hona moapostola Petrose o ile a re’ng ka bona? (b) Re lokela ho ikutloa joang ha batho ba re tšoara hampe hobane re le Lipaki Tsa Jehova?

14 Kajeno, batho ba limilione ba ka ’na ba ipolela hore ke Bakreste, ‘empa ba latola Molimo ka mesebetsi ea bona, hobane ba manyala, ha ba mamele ’me ha ba amohelehe bakeng sa mosebetsi o molemo oa mofuta leha e le ofe.’ (Tite 1:16) Re lokela ho hopola hore le lekholong la pele la lilemo, batho ba bangata ba mehleng eo ba ne ba hloile Bakreste ba ’nete. Ke kahoo moapostola Petrose a ileng a ngola, a re: “Haeba le ntse le nyelisetsoa lebitso la Kreste, lea thaba, hobane . . . moea oa Molimo, o lutse holim’a lōna.”—1 Pet. 4:14.

15 Na mantsoe aa a bululetsoeng aa sebetsa le ho Lipaki Tsa Jehova kajeno? E, aa sebetsa kaha re paka hore Jesu ke morena. Kahoo, ha batho ba re hloea hobane re jere lebitso la Jehova ho tšoana le ho “nyelisetsoa lebitso la [Jesu] Kreste,” ea ileng a re ho bahanyetsi ba hae: “Ke tlile ka lebitso la Ntate, empa ha le nkamohele.” (Joh. 5:43) Ka hona, ha u kopana le khanyetso tšimong, e-ba sebete. Ha u hanyetsoa, seo ke bopaki ba hore Molimo o oa u amohela le hore moea oa hae ‘o lutse holim’a hao.’

16, 17. (a) Ho etsahala’ng ka batho ba Jehova libakeng tse ngata? (b) U ikemiselitse ho etsa’ng?

16 Leha ho le joalo, hopola hore libakeng tse ngata ho na le keketseho e khōlō. Esita le tšimong e sebelitsoeng khafetsa, re ntse re fumana batho ba mamelang bao re ka ba bolellang molaetsa o babatsehang oa poloko. E se eka re ka khothalla ho khutlela ho batho ba bontšitseng thahasello, ’me haeba ho khoneha re ba khannele thuto ea Bibele, re be re ba thuse hore ba tsoele pele ho fihlela ba inehela le ho kolobetsoa. Mohlomong u ikutloa joaloka Sarie oa Afrika Boroa, ea qetileng lilemo tse fetang 60 a ntse a paka. O re: “Ke ananela haholo sehlabelo sa Jesu sa thekollo, kaha se ’nolofalletsa ho ba le kamano e ntle le Jehova, ’Musi oa bokahohle ebile ke thabela ho phatlalatsa lebitso la hae le phahameng.” Eena le monna oa hae, Martinus, ba thusitse batho ba bangata hore e be barapeli ba Jehova, ho akarelletsa bana ba bona ba bararo. Sarie o phaella ka ho re: “Ha ho na mosebetsi o mong o re khotsofatsang ho feta ona, ’me Jehova o sebelisa moea oa hae o halalelang ho re fa matla ao re a hlokang e le hore re tsoele pele ka mosebetsi ona o pholosang bophelo.”

17 Ebang re Bakreste ba kolobelitsoeng kapa re hahamalla ho kolobetsoa, re na le mabaka a mangata a ho ananela tlotla ea ho ba karolo ea phutheho ea lefatše lohle ea Lipaki Tsa Jehova. Ka hona, tsoela pele ho fana ka bopaki ka botlalo ha u ntse u loanela ho ipoloka u hloekile lefatšeng lena le litšila la Satane. Ha u etsa joalo, u tla tlotlisa Ntate oa rōna ea lerato ea leholimong, eo re nang le tlotla ea ho jara lebitso la hae le phahameng.