Fetela boitsebisong

Fetela lethathamong la tse ka hare

Lipotso Tse Tsoang ho Babali

Lipotso Tse Tsoang ho Babali

 Lipotso Tse Tsoang ho Babali

Kaha Morena Solomone oa Iseraele ea boholo-holo ha aa ka a tšepahala ho Molimo botsofaling ba hae, na re ka phetha ka hore a ke ke a tsosoa?—1 Marena 11:3-9.

Le hoja Bibele e thathamisa mabitso a banna le basali ba itseng ba tumelo bao ntle ho pelaelo ba tlang ho tsosoa, ha e bolele ka ho toba hore ho na le tšepo ea hore motho e mong le e mong ea boletsoeng ka lebitso ho eona o tla tsoha. (Baheberu 11:1-40) Leha ho le joalo, taba ea Solomone e ka re thusa ho utloisisa kahlolo ea Molimo ka hore re bapise se ileng sa mo etsahalla ha a e-shoa le se ileng sa etsahalla batho ba bang ba tšepahalang ha ba e-shoa.

Mangolo a bua ka menyetla e ’meli feela bakeng sa ba shoeleng—boemo ba nakoana ba ho se phele le boemo ba lefu la ka ho sa feleng. Ba ahloloang ka hore ha ba tšoaneloe ke tsoho ba akheloa “Gehena,” kapa “letša la mollo.” (Matheu 5:22; Mareka 9:47, 48; Tšenolo 20:14) Batho bana ba akarelletsa batho ba pele ba babeli, e leng Adama le Eva, moeki Judase Iskariota le batho ba itseng ba ileng ba shoa ha Molimo a ne a ba ahlola, ba kang batho ba mehleng ea Noe le baahi ba Sodoma le Gomora. * Ba tla tsosoa ba ea lebitleng le tloaelehileng la batho—Sheole, kapa Hadese, ha ba e-shoa. Ha Bibele e bua ka bokamoso ba bona, e re: “Leoatle la nehelana ka bafu ba ho lona, ’me lefu le Hadese tsa nehelana ka bafu ba ho tsona, eaba ba ahloloa ka bomong ho ea ka liketso tsa bona.”—Tšenolo 20:13.

Kahoo, ba tšepahalang bao ho builoeng ka bona ho Baheberu khaolo ea 11, ba Sheole, kapa Hadese, ’me ba letetse tsoho. Har’a bona ho na le bahlanka ba tšepahalang ba Molimo e leng Abrahama, Moshe le Davida. Joale hlokomela hore na Bibele e bua joang ka bona ha ba ne ba e-shoa. Jehova o ile a re ho Abrahama: “Ha e le uena, u tla ea ho baholo-holo ba hao ka khotso; u tla patoa u tsofetse haholo.” (Genese 15:15) Jehova o ile a re ho Moshe: “Bona! U tla robala le baholo-holo ba hao.” (Deuteronoma 31:16) Mabapi le Davida, ntat’a Solomone, Bibele e re: “Davida a robala le baholo-holo ba hae ’me a patoa Motseng oa Davida.” (1 Marena 2:10) Kahoo, polelo e reng ‘motho o robala le baholo-holo ba hae’ ke tsela e ’ngoe ea ho bolela hore motho o ile Sheole.

Ho ile ha etsahala’ng ka Solomone ha a e-shoa? Bibele ea araba: “Matsatsi ao ka ’ona Solomone a neng a busitse Baiseraele bohle a le Jerusalema e ne e le lilemo tse mashome a mane. Joale Solomone a robala le baholo-holo ba hae, ’me a patoa Motseng oa ntat’ae Davida.” (1 Marena 11:42, 43) Kahoo, ho bonahala ho utloahala ho phetha ka hore Solomone o Sheole, kapa Hadese, e leng moo a tla tsosoa teng.

Qeto ena e fana ka maikutlo a hore batho ba bang bao Mangolo a bolelang ka ho toba hore, ‘ba ile ba robala le baholo-holo ba bona’ ho na le monyetla oa hore ba tsosoe. Ha e le hantle, ho builoe joalo ka marena a mangata a ileng a hlahlama Solomone, le hoja a ne a sa tšepahale. Ena hase ntho e thata ho e lumela, kaha “ho tla ba le tsoho ea ba lokileng le ba sa lokang.” (Liketso 24:15) Ho hlakile hore, ke feela ka mor’a hore “bohle ba mabitleng a khopotso” ba tsosoe, re tla tseba hantle hore na ke bo-mang ba hauhetsoeng ka tsoho. (Johanne 5:28, 29) Kahoo, ho e-na le ho tsitlella maikutlong a itseng mabapi le ho tsosoa ha motho leha e le ofe oa boholo-holo, rea leta, re tšepile hore Jehova o tla etsa qeto e phethahetseng.

[Mongolo o botlaaseng ba leqephe]

^ ser. 4 Bona leqephe la 30-1 la tokollo ea Molula-Qhooa oa June 1, 1988.