Fetela boitsebisong

Fetela lethathamong la tse ka hare

 U Ka Etsa’ng Hore U Thabe?

Tseba Hore na U Phelela’ng

Tseba Hore na U Phelela’ng

HO NA LE LINTHO TSE NGATA TSEO RE LE BATHO RE NANG LE BOKHONI BA HO LI ETSA, TSE ETSANG HORE RE IKHETHE. RE TSEBA HO NGOLA, HO TOROEA LE HO QAPA LINTHO. RE BILE RE IPOTSA LIPOTSO TSE KANG: Ke hobane’ng ha Molimo a bopile leholimo le lefatše? Ho tlile joang hore re be teng? Re phelela’ng? Bokamoso ba rona bo tla ba joang?

Batho ba bang ha ba itube ka ho nahana ka lipotso tseo hobane ba re li thata. Ba bang bona ba bona ho se na thuso ho nahana ka tsona hobane ba lumela hore lintho li ikentse. Moprofesa e mong ea bitsoang William Provine o re: “Ha ho na molimo ea bopileng lintho, ebile ha ho na lebaka le ikhethang leo ka lona lintho li leng teng.” O boetse o re: “Ha ho na mang kapa mang eo ho ka thoeng o fane ka melao e tataisang batho lefatšeng lohle, ebile le bophelo ha bo na thuso.”

Leha ho le joalo, batho ba bang bona ha ba lumellane le mantsoe a moprofesa eo. Ba hlokomela kamoo lintho tseo Jehova a li bopileng li laolehileng hantle kateng. Ba bile ba li tsota botle ’me ba qapa lintho tse batlang li sebetsa joaloka tsona. Letsatsi le letsatsi ba hlokomela lintho tse ncha tse ntle haholo tse ba rutang hore ho na le ’Mopi ea bohlale.

Ka lebaka leo, batho ba bang ba neng ba sa lumele hore Molimo o teng ba qeteletse ba fetotse maikutlo a bona. Re tl’o bua ka mehlala e ’meli ea batho bao.

NTATE ALEXEI MARNOV KE NGAKA E SEBETSANANG LE BOKO. O re: “Sekolong re ne re rutoa hore Molimo ha a eo le hore lintho li ikentse. Mang kapa mang ea neng a lumela ho Molimo o ne a nkoa a sa ruteha.” Empa ka 1990 o ile a fetola maikutlo a hae ka lintho tseo a li rutiloeng sekolong.

O tsoela pele hore: “Ke ile ka leka ho batlisisa mabaka a utloahalang a hore na ke hobane’ng ha lintho tse ling li le teng, tse kang boko ba motho. Boko ba motho bo tsebahala bo rarahane ho feta ntho e ’ngoe le e ’ngoe. Empa ke ee ke ipotse hore na kannete motho a ka bopelloa le ntho e rarahaneng joaloka boko, e mo thusang ho ithuta lintho tse ngata ebe neng-neng oa shoa. Ke ne ke utloa taba ena e sa utloahale ho hang. Eaba ke qala ho ipotsa hore na ebe re phelela’ng. Ka mor’a ho nahanisisa ka potso eo, ke ile ka ipolella hore e tlameha ebe ho na le motho ea re bopileng.”

Ntate Alexei o ile a ithuta Bibele hobane a batla ho fumana karabo ea potso eo a ileng a ipotsa eona. Mosali oa hae e ne e le ngaka a bile a lumela hore Molimo ha a eo, eaba hamorao o ithuta Bibele. Empa sepheo sa hae e ne e le ho paka hore monna oa hae o fositse. Leha ho le joalo, bobeli ba bona ba se ba lumela hore Molimo o teng ebile ba se ba utloisisa morero oa Molimo ka batho.

NTATE HUABI YIN KE SETSEBI SA THUTO EA SAENSE. O ile a ithuta thuto e bitsoang fisiks ’me a qeta lilemo tse ngata a ntse a batlisisa ka karolo e fumanehang letsatsing e bitsoang plasma.

Ntate Huabi o re: “Nako le nako ha bo-rasaense ba batlisisa haholoanyane ka hore na lintho tsa tlhaho li sebetsa joang, ba fumana hore li sebetsa ka mokhoa o hlophisehileng haholo. Ke ile ka ipotsa hore na ho tla joang hore li hlophisehe hantle hakana. Ka mohlala, ha motho a pheha, o lokela ho ba hlokolosi ka hore na o pheha ka mollo o mokae. Kahoo, ka ipotsa hore na ebe ke mang ea laolang letsatsi hore le ntše mocheso o lekaneng. Ka mor’a nako ke ile ka hlokomela hore Bibele e fana ka karabo e utloahalang haholo ea potso ea ka ha e re: ‘Tšimolohong Molimo o ile a bōpa maholimo le lefatše.’”—Genese 1:1.

Thuto ea Saense e na le likarabo tsa lipotso tse ngata tse kang: Boko bo sebetsa joang? Hape ho tla joang hore letsatsi le futhumatse le be le khantše? Empa joalokaha re se re bone, Bibele eona e araba lipotso tse bohlokoa le ho feta, tse kang: Ke hobane’ng ha lefatše le leholimo li le teng? Ke hobane’ng ha lintho tsohle tse lefatšeng le leholimong li hlophisehile hakaale? Hape re phelela’ng?

Bibele e re: ‘’Mōpi oa lefatše le Moetsi oa lona ha aa le bōpela lefeela, o le etselitse hore le be le baahi.’ (Esaia 45:18) Sehlooho se latelang se tla bontša hore Molimo o bopile lefatše ka morero le hore morero oo ke hore a re etsetse lintho tse molemo ka moso.