Fetela boitsebisong

Fetela lethathamong la tse ka hare

 SEO BIBELE E SE RUTANG KA

Leholimo

Leholimo

Batho ba bangata ha ba tsebe hantle hore na ho etsahala’ng leholimong. Leha ho le joalo, Bibele ha e lumellane le seo batho bana ba nahanang hore baa se tseba ka leholimo.

Leholimo ke eng?

SEO BATHO BA BANG BA SE BUANG

Batho ba bangata ba lumela lintho tse fapaneng ka leholimo le se etsahala’ng teng. Ka mohlala:

  • Batho ba bangata ba ipitsang Bakreste ba lumellana le buka e bitsoang New Catholic Encyclopedia e reng leholimo ke “lehae la batho ba hlohonolofatsoang hobane ba shoeletse Moreneng.”

  • Moruti e mong e leng Bentzion Kravitz o re bolumeli ba Bojuda bo ruta haholo ka se etsahalang bophelong ho e-na le ho ruta ka se etsahalang ka mor’a hore motho a shoe. Empa o boetse o re “ha moea o le leholimong, motho o ba haufi le Molimo ho feta ha a ne a le lefatšeng.” Moruti enoa o re le hoja Bajuda ba lumela hore leholimo le teng, buka ea bona e nang le mangolo a Bibele e bitsoang Torah, ha e bue hakaalo ka lona.

  • Malumeli a Mabuddha le Mahindu a lumela lintho tse fapaneng ka leholimo. Ba lumela hore ke sebaka seo motho a eang ho sona ebe o tsoaloa hape e se e le motho e mong kapa a fetele ka ’nģane ho leholimo.

  • Batho ba bang ha ba lumele eng kapa eng eo malumeli a e buang ka leholimo ’me ba re ha e utloahale.

Batho ba bangata ha ba tsebe hantle hore na ho etsahala’ng leholimong

SEO BIBELE E SE RUTANG

Bibele e hlalosa lentsoe “leholimo” ka litsela tse fapaneng. Ka mohlala:

  • Genese 1:20 e bua ka ho bōptjoa ha linonyana tse ‘fofang holim’a lefatše sepakapakeng sa maholimo.’ Lengolong lena lentsoe “maholimo” le bolela sepakapaka.

  • Esaia 13:10 e bua ka “linaleli tsa maholimo le lihlopha tsa tsona tsa linaleli,” e leng seo re reng ke sepakapaka.

  • Bibele e bua ka ‘sebaka sa Molimo sa bolulo, maholimong’ le hore ho na le ‘mangeloi leholimong.’ (1 Marena 8:30; Matheu 18:10) Seo re se hlokomelang ke hore lentsoe ‘maholimo’ le ‘leholimo’ ha se thehello empa ke moo ho lulang Molimo le mangeloi. *

“Talima u le leholimong ’me u bone u le sebakeng sa hao sa bolulo se phahameng sa khalalelo le botle.”Esaia 63:15.

 Na batho bohle ba lokileng ba ea leholimong?

Bibele ha e rute hore lefatše ke sebaka seo batho ba lulang ho sona ka nakoana ebe ha ba shoa ba ea leholimong. Ho e-na le hoo, Bibele e re ha se morero oa Molimo hore batho ba shoe. Nahana ka lintlha tse latelang:

  • Molimo o ile a re ho Adama le Eva: “Atang le ngatafale le tlale lefatše.” (Genese 1:28) Batho ba ne ba tla phela lefatšeng ka ho sa feleng. Ba ne ba tla shoa haeba feela ba sa mamele Molimo. Ka bomalimabe ha baa ka ba mamela.—Genese 2:17; 3:6.

  • Kaha Adama ha aa ka a mamela Molimo, batho bohle baa shoa ka lebaka la sebe sa hae. (Baroma 5:12) Empa na batho ha ba sa tla hlola ba phela ka ho sa feleng?

  • Bibele e re “ho na le maholimo a macha le lefatše le lecha tseo re li letetseng ho ea ka tšepiso ea hae.” * (2 Petrose 3:13) Molimo o tla etsa hore lefatše ebe paradeise joalokaha a ne a rerile ’me “lefu ha le sa tla hlola le e-ba teng.” (Tšenolo 21:3, 4) Na lengolo lee le bua ka bophelo leholimong kapa lefatšeng? Ha ho thoe ntho e itseng ha e sa le eo, ho hlakile hore e kile ea e-ba teng. Empa lefu ha le eo leholimong. Kahoo, lengolo leo le bua ka ntho e tla etsahala mona lefatšeng, moo Molimo a batlang hore re lule teng ka ho sa feleng le batho bao re ba ratang. Hape Bibele e re batho ba hlokahetseng ba tla tsosoa.—Johanne 5:28, 29.

Batho ba bangata ba thaba haholo ha ba utloa seo Bibele e se rutang ka leholimo. Ka mohlala, motho e mong eo e kileng ea e-ba Mok’hatholike o re: “Ke ratile haholo seo Bibele e se rutang ha e re batho ba tla phela ka ho sa feleng lefatšeng. Taba eo e utloahala ho feta ha ho thoe batho ba ea leholimong.” *

“Ha e le maholimo, ke maholimo a Jehova. Empa lefatše o le file bara ba batho.”Pesaleme ea 115:16.

^ ser. 13 Rea utloisisa hore Molimo ke moea ’me ha a tšoane le batho. (Johanne 4:24) Kahoo, hoa utloahala ha ho thoe sebaka sa hae sa bolulo ke sa moea ’me se fapane le seo batho ba lulang ho sona.

^ ser. 19 Ha ho thoe “lefatše le lecha” ha ho boleloe hore Molimo o tla bōpa lefatše le leng empa ho boleloa batho bao Molimo a ba amohelang ba tlang ho phela mona lefatšeng.—Pesaleme ea 66:4.

^ ser. 20 Bibele e ruta hore ’Musong oa Molimo, ke batho ba 144 000 feela ba tla busa le Jesu leholimong.—1 Petrose 1:3, 4; Tšenolo 14:1.