Fetela boitsebisong

Fetela lethathamong la tse ka hare

 SEHLOOHO SE ITHUTOANG 41

U ka Thusa Lithuto Joang Hore li Qetelle li Kolobelitsoe?​—Karolo ea Pele

U ka Thusa Lithuto Joang Hore li Qetelle li Kolobelitsoe?​—Karolo ea Pele

“Le bonahatsoa le le lengolo la Kreste le ngotsoeng ke rona re le basebeletsi.”​—2 BAKOR. 3:3.

PINE EA 78 “Ruta Lentsoe la Molimo”

SELELEKELA *

Ha ho letho le ka thabisang phutheho kaofela ho feta ha ba bona thuto ea Bibele e kolobetsoa. (Sheba serapa sa 1)

1. 2 Bakorinthe 3:​1-3 e re thusa joang ho ananela tokelo eo re nang le eona ea ho thusa lithuto tsa Bibele hore li qetelle li kolobelitsoe? (Sheba setšoantšo se sekoahelong.)

U EE u ikutloe joang ha u bona seithuti sa Bibele phuthehong ea heno se kolobetsoa? Kannete e tlameha ebe pelo ea hao ea tlola-tlola ke thabo. (Mat. 28:​19) Athe haeba teng e le uena ea ithutileng Bibele le seithuti se secha, u thaba le ho feta ha se kolobetsoa. (1 Bathes. 2:​19, 20) Barutuoa ba sa tsoa kolobetsoa e ba “mangolo a puello,” ho batho ba ithutileng Bibele le bona esita le ho phutheho eohle.​—Bala 2 Bakorinthe 3:​1-3.

2. (a) Ke potso efe ea bohlokoa eo re lokelang ho ipotsa eona, hona hobane’ng? (b)  Motho e ba thuto ea Bibele ha ho le joang? (Sheba naletsana.)

2 Ke ntho e ntle ho tseba hore lilemong tse ’nè tse fetileng ka kakaretso ho ile ha tlalehoa lithuto tse ka bang 10 000 000 tsa Bibele * khoeli le khoeli lefatšeng lohle. Hona lilemong tseo ka kakaretso ho ile ha boela ha kolobetsoa batho ba ka holimo ho 280 000. Re ka etsa’ng ho thusa ba bang ba eketsehileng ho bao ba limilione hore ba kolobetsoe? Hafeela Jehova a ntse a e-na le mamello ’me a file batho nako le monyetla oa hore e be barutuoa ba Kreste, re lokela ho etsa boiteko bohle ho thusa batho bao hore ba kolobetsoe kapele kamoo ho ka khonehang, etsoe metsotso e se e jele babeli!​—1 Bakor. 7:​29a; 1 Pet. 4:7.

3. Re tl’o ithuta’ng sehloohong see mabapi le ho khanna lithuto tsa Bibele?

 3 Mosebetsi oa ho etsa batho barutuoa o bohlokoa haholo hona joale ebile o potlakile. Kahoo Sehlopha se Busang se ile sa botsa liofisi tsa makala hore na re ka etsa’ng e le hore re thuse batho ba bangata ba ithutang Bibele hore ba kolobetsoe. Sehloohong sena le se latelang re tl’o bona hore na re ka ithuta’ng ho bo-pula-maliboho, baromuoa le bapotolohi ba nang le boiphihlelo. * (Liprov. 11:​14; 15:​22) Ba hlalositse hore na mesuoe ea Bibele le lithuto tsa eona e ka etsa’ng e le hore thuto ea Bibele e atlehe. Sehloohong sena re tl’o bua ka lintho tse hlano tseo seithuti ka seng se lokelang ho li etsa e le hore se ka tsoela pele ho fihlela se kolobetsoa.

ITHUTENG BEKE LE BEKE

Botsa thuto ea hao hore na le ka khona hore le be le nako ea ho lula fatše le ithute Bibele (Sheba serapa sa 4 ho ea ho sa 6)

4. Re tlameha ho elelloa’ng ka ho khanna thuto re le monyako?

4 Bara le barali babo rona ba bangata ba khanna lithuto tsa Bibele ba eme monyako oa mong’a ntlo. Le hoja mokhoa ona o le motle haholo ntlheng ea ho tsosa thahasello ea motho ea ho ithuta Bibele, meqoqo e buuoang ho engoe menyako e ba mekhutšoanyane ’me hangata ha e be teng beke le beke. E le ho etsa hore motho a batle ho ithuta haholoanyane, ba bang ba ee ba kope linomoro tsa motho eo ba ntseng ba mo etela ebe ba mo letsetsa har’a nako hore ba buisane ka litemana tsa Bibele. Meqoqo e joalo e ka tsoela pele ka likhoeli tse ngata empa ho sa be le phetoho e bontšang hore ho tla ke ho be le thuto e tsitsitseng ea Bibele. Na kannete seithuti se ka inehela le ho kolobetsoa haeba nako eo e le eona feela eo se ithutang Bibele ka eona? Ha re lumele joalo.

5. Ho ea ka Luka 14:​27-33, Jesu o ile a hatisa eng e ka re thusang ha re etsa mosebetsi oa rona oa ho etsa batho barutuoa?

5 Ka nako e ’ngoe Jesu o ile a hlalosa hore na ho ba morutuoa oa hae ho akarelletsa’ng. O ile a etsa mohlala ka motho ea batlang ho haha tora, le morena ea neng a batla ho ea ntoeng. Jesu o ile a re motho ea batlang ho haha o lokela hore a “lule fatše pele ’me a bale litšenyehelo” e le hore a ka qeta mosebetsi oa hae. A boela a re le morena o lokela hore “a lule fatše pele ’me a tšoare litherisano” ho bona hore na masole a hae a ka khona ho etsa mosebetsi oo ba batlang ho o etsa. (Bala Luka 14:​27-33.) Ka tsela e tšoanang, Jesu o ne a tseba hore e le hore motho e be morutuoa oa hae, o lokela ho hlahloba ka hloko hore na ho mo latela ho akarelletsa’ng. Lebaka leo ke lona le re susumelletsang hore re khothalletse lithuto tsa rona hore li ithute Bibele le rona beke le beke. Re ka khona joang ho etsa joalo?

6. Re ka etsa’ng hore re be le lithuto tse hatelang pele?

 6 Qala ka ho nka nako e teletsana ha u khanna thuto u eme monyako. Ho phaella tabeng eo le buang ka eona, u ka bua ka Lengolo le leng nakong eo u mo etetseng. Ha mong’a ntlo a se a se na bothata ba ho eteloa nako e teletsana, mo botse hore na ho na le moo le ka phomolang teng ebe le tsoela pele ka puisano ea lona. Tsela eo mong’a ntlo a tla arabela ka eona e tla bontša hore na o ikemiselitse ho ithuta Bibele kapa che. Ha nako e ntse e ea, e le hore a ithute kapelenyana u ka ba oa mo botsa hore na a ka thabela ho ithuta habeli ka beke kapa che. Empa ho hlokahala ho hongata ho feta ho ithuta hanngoe kapa habeli ka beke.

LOKISETSA THUTO KA ’NGOE

Lokisetsa hantle ’me u bontše le seithuti sa hao hore na se lokela ho lokisetsa joang (Sheba serapa sa 7 ho ea ho sa 9)

7. U ka etsa’ng e le hore u tle u atlehe ho khanna thuto ka ’ngoe eo u nang le eona?

Joaloka mosuoe, u lokela ho lokisetsa thuto ka ’ngoe eo u tl’o e tšoara. U ka qala pele ka ho bala lintho tseo le tl’o ithuta tsona le ho sheba Mangolo, hape u tsebe lintlha tsa sehlooho hantle. Nahana ka sehlooho sa thuto ea lona, lihloohoana, lipotso, mangolo a baloang, litšoantšo le livideo tse ka ’nang tsa u thusa ho hlakisa taba eo hantle. Joale, u nahanne ka seithuti sa hao, nahana esale pele hore na u tla fetisa lintlha tseo joang ka tsela e bonolo le e hlakileng e tla etsa hore se utloisise lintlha hantle le ho li sebelisa.​—Neh. 8:8; Liprov. 15:​28a.

8. Mantsoe a moapostola Pauluse a ho Bakolose 1:​9, 10 a re ruta’ng mabapi le ho rapella lithuto tsa rona tsa Bibele?

8 Ha u ntse u lokisetsa, bua le Jehova ka seithuti sa hao le ka litlhoko tsa sona. Kopa Jehova hore a u thuse hore u rute ho tsoa Bibeleng ebile e le ka tsela e tla etsa hore u ame pelo ea motho eo u buang le eena. (Bala Bakolose 1:​9, 10.) Leka ho nahana ka hore na ebe seithuti sa hao se ka ’na sa thatafalloa ke ho utloisisa eng kapa ho lumela eng. U se ke oa lebala hore sepheo sa hao ke ho mo thusa hore a kolobetsoe.

9. Hlalosa hore na mosuoe a ka etsa’ng e le hore a thuse seithuti sa hae hore se lokisetse.

9 Re na le tšepo ea hore thuto ea Bibele e khannoang ka tsela e tsitsitseng e tla thusa seithuti hore se rate lintho tseo Jehova le Jesu ba re etselitseng tsona se be se batle ho ithuta haholoanyane. (Mat. 5:​3, 6) Seithuti se lokela ho tsepamisa kelello ea sona linthong tseo se ithutang tsona e le hore se rue molemo kahohle-hohle. E le ho mo thusa hore a khone ho etsa joalo, mo hlalosetse hore na ke hobane’ng ha ho le bohlokoa hore a lokisetse thuto ka ’ngoe a le mong pele le tl’o bala le hore a nahane ka hore na litaba tseo li mo ama joang. U ka etsa’ng ho mo thusa hore a etse joalo? Lokisetsang thuto hammoho  e le ho mo bontša hore na a etse’ng nakong e tlang. * Mo bontše hore na a ka fumana likarabo tse tobileng joang tse arabang lipotso hape u mo bontše hore na a ka tšoaea mantsoe a sehlooho kapa lipoleloana tsa sehlooho joang e le hore a khone ho hopola karabo. Ka mor’a moo u mo kope hore a fane ka karabo ka mantsoe a hae. Ha a etsa joalo, u tla khona ho bona hore na o utloisisa lintho tseo le ntseng le ithuta tsona hakae. Leha ho le joalo, ho na le ntho e ’ngoe hape eo u ka khothalletsang seithuti sa hao hore se e etse.

MO RUTE HO BUA LE JEHOVA LETSATSI KA LENG

Ruta seithuti sa hao hore na se ka bua le Jehova joang (Sheba serapa sa 10 le 11)

10. Ke hobane’ng ha ho le bohlokoa ho bala Bibele letsatsi le letsatsi hona ho hlokahala eng hore a rue molemo oa ho ithuta Bibele?

10 Ntle le hore motho ea ithutang a bale le mosuoe oa hae beke le beke, a ka boela a rua molemo ha a ithuta moo a leng mong. O lokela ho bua le Jehova a be a mo mamele. A ka mamela Jehova ka hore a bale Bibele letsatsi le letsatsi. (Josh. 1:8; Pes. 1:​1-3) Mo bontše hore na a ka sebelisa lenaneo leo a ka ikopiletsang lona le hlahang ho jw.org/st la hore na a ka ithuta Bibele joang. * Ha e le hantle, e le hore u mo thuse hore a rue molemo kahohle-hohle lenaneong la hae la ho bala Bibele, mo khothalletse hore a thuise ka hore na Bibele e mo ruta’ng ka Jehova le hore na a ka sebelisa lintho tseo a ithutang tsona joang bophelong.​—Lik. 17:​11; Jak. 1:​25.

11. Ke joang seithuti se ka ithutang ho rapela ka tsela e nepahetseng, hona ke hobane’ng ha ho le bohlokoa hore se rapele Jehova nako le nako?

11 Khothalletsa seithuti sa hao hore se rapele Jehova letsatsi le leng le leng. Etsa thapelo e tlohang botebong ba pelo pele ho thuto le ka mor’a eona, u rapela le seithuti sa hao ebile u se rapella. Ha a u mametse ha u rapela, o tla ithuta hore na o lokela ho rapela joang ho tsoa pelong. Hape o tla ithuta hore o lokela ho rapela Jehova ’me a fetise lithapelo tsa hae ka lebitso la Jesu Kreste. (Mat. 6:9; Joh 15:​16) Ak’u nahane feela hore na ho bala Bibele letsatsi le letsatsi (ho mamela Jehova) le ho mo rapela (ho bua le eena) ho ka thusa seithuti sa hao ho le hokae hore se atamele haufi le Molimo! (Jak. 4:8) Haeba seithuti sa hao se tloaela ho etsa lintho tsena, se ka khona ho hatela pele ’me se inehele ho Jehova se be se kolobetsoe.

MO THUSE HO BA LE SETSOALLE SE MATLA LE JEHOVA

12. Mosuoe a ka thusa seithuti sa hae joang hore se be le kamano e haufi le Jehova?

12 Lintho tseo seithuti se ithutang tsona thutong ea Bibele ha lia lokela ho ama kelello ea  sona feela empa li lokela ho fihla le pelong. Hobane’ng? Lipelo tsa rona li ka re susumelletsa hore re nke khato kaha li akarelletsa litakatso, maikutlo le menahano. Jesu o ile a ruta batho ka tsela e neng e susumetsa likelello tsa bona. Empa batho ba ile ba mo latela hobane a ne a boetse a ama lipelo tsa bona haholo. (Luka 24:​15, 27, 32) Seithuti sa hao se lokela ho bona Jehova e le Ntate oa sebele, e le motho eo se ka etsang setsoalle le eena le eo se ka mo nkang e le Ntate, Molimo le motsoalle. (Pes. 25:​4, 5) Nakong eo le ntseng le ithuta, bua haholo ka makhabane a Jehova. (Ex. 34:​5, 6; 1 Pet. 5:​6, 7) Lebisa tlhokomelo ea hao haholo ho makhabane a Jehova a hlahang moo. Thusa seithuti sa hao ho ananela makhabane a Jehova a kang lerato, mosa le kutloelo-bohloko. Jesu o ile a re “taelo e kholo le ea pele” ke ho ‘rata Jehova Molimo oa hao.’ (Mat. 22:​37, 38) Leka ho etsa hore seithuti sa hao se rate Jehova haholo.

13. Fana ka mohlala oa hore na u ka thusa seithuti sa hao joang hore se ananele makhabane a Jehova.

13 Ha u ntse u bua le seithuti sa hao, hlalosa hore na ke hobane’ng ha u rata Jehova. Ntho eo e ka thusa seithuti sa hao ho elelloa hore se hloka ho ba le setsoalle se matla le Jehova. (Pes. 73:​28) Mohlala, na buka eo le ntseng le e bala kapa temana e itseng e na le polelo e u amang pelo e buang ho hong ka makhabane a Jehova, a kang lerato, toka, bohlale kapa matla? E hlalosetse seithuti sa hao ’me u se bolelle hore ke tse ling tsa lintho tse etsang hore u rate Jehova. Ho na le ntho e ’ngoe hape eo seithuti se seng le se seng se lokelang ho e etsa e le hore se kolobetsoe.

MO KHOTHALLETSE HO EA LIBOKENG

Khothalletsa seithuti sa hao hore se ee libokeng kapele kamoo ho ka khonehang (Sheba serapa sa 14 le 15)

14. Baheberu 10:​24, 25 e re liboka li ka thusa seithuti sa hao joang hore se hatele pele?

14 Kaofela ha rona re batla hore lithuto tsa rona li kolobetsoe. Tsela e ’ngoe ea bohlokoa eo re ka ba thusang ka eona ke ka ho ba khothalletsa hore ba be teng libokeng. Mesuoe e nang le boiphihlelo e re lithuto tse eang libokeng li sa tloha feela li etsa liphetoho ka potlako. (Pes. 111:1) Mesuoe e meng e hlalosetsa lithuto tsa eona hore li tla fumana halofo ea tsebo ea Bibele ha ba ntse ba ithuta ’moho ebe halofo e ’ngoe ba e fumana libokeng. Bala Baheberu 10:​24, 25 le seithuti sa hao ’me u se hlalosetse melemo eo se tla e fumana haeba se e-ba teng libokeng. Mo shebellise video ea Ho Etsahala’ng Holong ea ’Muso? * Thusa seithuti sa hao hore se ikemisetse ho se lofe liboka ho hang.

15. Re ka etsa’ng e le ho khothalletsa lithuto tsa rona hore li be teng libokeng kamehla?

15 U lokela ho etsa’ng haeba thuto ea hao ha e  e-s’o ee libokeng kapa ha e ee kamehla? Mo hlalosetse hore na ke eng ntho eo ka ho khetheha u ileng oa e rata libokeng. Taba eo e ka etsa hore seithuti sa hao se batle ho ea libokeng ho feta hore uena u se bolelle hore se ee. Mo fe kopi ea Molula-Qhooa kapa bukana ea Seboka sa bophelo le Tšebeletso ea Rona tse ntseng li sebelisoa libokeng ka nako eo. Mo bontše hore na ho tla be ho buuoa ka eng libokeng ’me u mo botse hore na ke karolo efe eo ka ho khetheha a utloang e mo natefela. Lintho tseo seithuti sa hao li tla li bona le ho li utloa sebokeng sa pele seo a tla ea ho sona li tla feta hole lintho leha e le life tseo a ileng a li bona le ho li utloang bolumeling leha e le bofe bo bong. (1 Bakor. 14:​24, 25) O tla kopana le batho ba bang ba behang mohlala o motle oo a ka o etsisang le ba tla mo thusa hore a hatele pele ho fihlela a kolobetsoa.

16. Re ka etsa’ng ho thusa liithuti tsa rona hore li qetelle li kolobelitsoe, hona re tl’o ithuta eng sehloohong se latelang?

16 Re ka etsa’ng e le hore re khanne lithuto tse ka hatelang pele ho fihlela li kolobetsoa? Re ka thusa seithuti ka seng hore se nke ka botebo taba ea ho ithuta re be re se khothalletse hore se be le nako ea ho ithuta beke le beke, le ho lokisetsa thuto ka ’ngoe. Re boetse re ka se khothalletsa hore se bue le Jehova letsatsi le letsatsi le hore se be le setsoalle se matla le Jehova. Re boetse re ka se khothalletsa hore se be teng libokeng. (Sheba lebokose le reng: “ Seithuti se Lokela ho Etsa’ng Hore se Kolobetsoe?”) Empa joalokaha sehlooho se latelang se tla bontša, ho na le lintho tse ling tse hlano tseo mesuoe ea Bibele e ka li etsang ho thusa liithuti hore li kolobetsoe.

PINA EA 76 U Utloa ho le Joang?

^ ser. 5 Ho ruta motho e mong ntho e itseng ho akarelletsa ho mo thusa hore a nahane, a ikutloe a be a etse lintho ka tsela e ncha kapa e fapaneng. Temana ea rona ea selemo ea 2020 e leng Matheu 28:​19, e ile ea re hopotsa bohlokoa ba ho ithuta Bibele le batho le ho ba ruta hore na ba lokela ho etsa’ng e le hore e be barutuoa ba Kreste ba kolobelitsoeng. Sehloohong sena le se latelang, re tla ithuta hore na re ka ntlafatsa tsela eo re etsang mosebetsi ona oa bohlokoa ka eona joang.

^ ser. 2 TLHALOSO: U khanna thuto ea Bibele haeba uena le motho eo u ithutang Bibele le eena le e-na le nako e tsitsitseng ebile le e phelela. U ka tlaleha thuto haeba u bontšitse motho hore na thuto e khannoa joang, hape u e khannile ka makhetlo a mabeli ka mor’a moo ebile u lumela hore thuto eo e tla tsoela pele.

^ ser. 3 Lihlooho tsena li boetse li na le lintlha tse ka re thusang tse nkiloeng letotong le nang le sehlooho se reng “Ho Khanna Lithuto Tsa Bibele Tse Tsoelang Pele” tse ileng tsa hlaha ho Tšebeletso ea Rona ea ’Muso ea July 2004 ho ea ho May 2005.

^ ser. 9 Shebella video ea metsotso e mene e nang le sehlooho se reng Ho Ruta Liithuti Tsa Rona ho Lokisetsa. Ho JW Library®, kena ho MEDIA > OUR MEETINGS AND MINISTRY > IMPROVING OUR SKILLS.

^ ser. 10 Kena ho LINGOLILOENG > LIBUKA LE LIBUKANA.

^ ser. 14 Ho JW Library, kena ho MEDIA > OUR MEETINGS AND MINISTRY > TOOLS FOR THE MINISTRY.