Fetela boitsebisong

Fetela lethathamong la tse ka hare

 PALE EA BOPHELO

Ke Ikitlaelletsa ho Etsisa Mehlala e Metle

Ke Ikitlaelletsa ho Etsisa Mehlala e Metle

Izak Marais ea Patterson, New York o ile a ntetsetsa ke le Colorado, eaba kea mo botsa ke re: “Na u ua tseba hore na ke lilemo li kae?” O ile a nkaraba a re: “E, ke tseba hantle.” E reng ke le qoqele hore na ho tlile joang hore re fihle tabeng ena.

KE HLAHETSE motseng oa Wichita, Kansas, U.S.A., ka la 10 December, 1936, ’me ke ’na e moholo lapeng la bana ba bane. Batsoali ba ka, e leng William le Jean, e ne e le barapeli ba chesehang ba Jehova. Ntate e ne e le mohlanka oa phutheho, e leng tsela eo mor’abo rōna ea etellang pele ka phuthehong a neng a bitsoa ka eona nakong eo. ’Mè o ne a rutiloe linnete ke ’mè oa hae, e leng Nkhono Emma Wagner. Nkhono o ile a ruta batho ba bangata linnete, ho akarelletsa le Gertrude Steele, ea qetileng lilemo tse ngata e le moromuoa Puerto Rico. * Kahoo ke ne ke na le mehlala e mengata eo nka e etsisang.

KE HOPOLA E MENG EA MEHLALA E METLE

Ntate o eme seterateng o fa batho ba fetang limakasine

Ke hopola ka Moqebelo o mong mantsiboea ha ke ne ke le lilemo li hlano, ke eme seterateng le Ntate re ntse re fa batho ba fetang limakasine tsa Molula-Qhooa le Consolation (hona joale e bitsoa Tsoha!). Ka nako eo Ntoa ea II ea Lefatše e ne e ntse e kupa. Ngaka e ’ngoe e neng e tahiloe e ile ea tla ho Ntate ea mo rohaka hobane a sa nke lehlakore, ’me ea re ke lekoala le tšabang ho ea ntoeng. Ngaka eo e ile ea ema ka pel’a Ntate eaba e re, “Nkotle, lekoala tooe!” Ke ne ke tšohile empa ka khahloa ke sebete sa Ntate. O ile a tsoela pele a fa batho ba bokaneng moo limakasine. Ha lesole le leng le feta ngaka eo e ile ea le hoeletsa ea re, “Ak’u tl’o otla lekoala ke lena!” Lesole leo le ne le bona hore ngaka eo e tahiloe, eaba le re ho eona, “E ea hae u il’o robala!” Ka mor’a moo ba itsamaela. Ha ke hopola sebete seo Jehova a ileng a se fa Ntate letsatsing leo kea thaba. Ntate o ne a e-na le libaka tse peli tseo ho kutoang moriri ho tsona motseng oa Wichita, ’me ngaka eo e ne e kuta ho tsona!

Ke ea le batsoali ba ka kopanong Wichita lilemong tsa bo-1940

Ha ke le lilemo li robeli, batsoali ba ka ba ile ba rekisa ntlo le khoebo ea bona, ba etsa k’haravene eaba re fallela Colorado, moo ho neng ho e-na le tlhokahalo. Re ile ra lula sebakeng se haufi le Grand  Junction, moo batsoali ba ka ba neng ba bula maliboho teng ’me ka matsatsi a mang ba sebetsa polasing. Jehova o ile a hlohonolofatsa boiteko ba bona ka hore ho thehoe phutheho moo. Ha re ntse re le moo Ntate o ile a nkolobetsa nōkeng ka la 20 June, 1948, hammoho le ba bang ba neng ba amohetse linnete, ho akarelletsa le Billie Nichols le mosali oa hae. Hamorao ba ile ba etsa mosebetsi oa potoloho, ’me mora oa bona le mosali oa hae ba tsamaea mohlaleng oa bona.

Re ne re tloaelane re bile re ba le meqoqo e matlafatsang tumelo le ba bangata ba neng ba le tšebeletsong ea nako e tletseng, haholo-holo ba lelapa la ha Steele, e leng Don le Earlene, Dave le Julia, hammoho le Si le Martha, ba ileng ba e-ba le tšusumetso e khōlō bophelong ba ka. Ba ile ba mpontša kamoo ho batla ’Muso pele ho leng molemo kateng ho bileng ho thabisang.

KEA FALLA HAPE

Ha ke le lilemo li 19, motsoalle e mong oa lelapa leso ea bitsoang Bud Hasty, o ile a nkōpa hore ke il’o bula maliboho le eena karolong e ka boroa ea United States. Molebeli oa potoloho o ile a re re ee motseng oa Ruston, Louisiana, moo Lipaki tsa teng tse ’maloa li neng li se li sa kopanele tšebeletsong. O ile a re re tšoare liboka tsohle beke le beke ho sa tsotellehe hore na ho tla batho ba bakae. Re ile ra fumana sebaka seo re ka tšoarelang liboka ho sona, ’me ra se lokisa. Re ne re tšoara liboka tsohle, empa ha feta nako re tla re le babeli feela. Re chenchana ka lipuo, ’me e mong a araba lipotso tsohle. Haeba puo e na le pontšo, re ne re e etsa re le babeli ebe ha ho na motho ea re shebeletseng! Qetellong, morali’abo rōna ea seng a hōlile o ile a qala ho tla libokeng. Ha nako e ntse e ea, liithuti tse ling tsa Bibele le bahoeletsi ba bang ba neng ba se ba sa kopanele ba ile ba tla, ’me ho e-s’o ee kae re ne re se re e-ba bangata.

Ka letsatsi le leng, ’na le Bud re ile ra kopana le moruti e mong ea ileng a bua ka mangolo ao ke neng ke sa a tloaela. Sena se ile sa mpula mahlo ’me ka qala ho nahanisisa ka seo ke se lumelang. Ke ile ka qeta beke ke sa robale bosiu ke ntse ke batla likarabo tsa lipotso tseo a li botsitseng. Seo se ile sa nthusa ho utloisisa Bibele haholoanyane, ’me ke ne ke se ke sa tšabe ho pakela baruti.

Nakoana ka mor’a moo, molebeli oa potoloho o ile a nkōpa hore ke fallele motseng oa El Dorado, Arkansas, ke il’o thusa phutheho ea moo. Ha ke le moo, ke ne ke atisa ho ea Colorado ke il’o hlaha ka pel’a boto e bitsetsang batho sesoleng. Ka lekhetlo le leng ha ke le tseleng e eang teng ke tsamaea le bo-pula-maliboho  ba bang, re ile ra ba kotsing ea koloi ’me koloi ea ka ea senyeha hampe. Re ile ra letsetsa mor’abo rōna e mong ea ileng a re lata ’me a re isa ha hae le libokeng. Ha re le libokeng ho ile ha phatlalatsoa hore re bile kotsing ea koloi, eaba barab’abo rōna ba re phallela ka chelete. Mora eo oabo rōna o ile a rekisa koloi ea ka ka lidolara tse 25.

Re ile ra khona ho fumana lifti e eang motseng oa Wichita, moo motsoalle e mong oa lelapa leso, ea bitsoang E. F. “Doc” McCartney, a neng a bula maliboho teng. Ke ne ke tloaelane le bara ba hae ba mafahla, e leng Frank le Francis ’me le hona joale e ntse e le metsoalle ea ka. O ne a e-na le koloi ea khale eo a ileng a nthekisetsa eona ka lidolara tse 25, e leng chelete e lekanang hantle le eo ke rekisitseng koloi ea ka e chaisitseng ka eona. Lena e ne e le lekhetlo la pele ke bona hantle ha Jehova a mpha seo ke se hlokang e le hore ke tsoele pele ke le tšebeletsong. Ha ke ntse ke le moo, ba ha McCartney ba ile ba ntsebisa morali’abo rōna e motle le ea chesehang, ea bitsoang Bethel Crane. ’Mè oa hae, e leng Ruth, o ile a tsoela pele e le pula-maliboho e chesehang motseng oa Wellington, Kansas, ho fihlela a fetile lilemo tse 90. ’Na le Bethel re ile ra nyalana ka mor’a likhoeli tse seng kae ka 1958, ’me a tla bula maliboho le ’na El Dorado.

MEMO E THABISANG

Ka mor’a ho thuisa ka mehlala e metle eo re e behetsoeng, re ile ra etsa qeto ea hore re tla ea hohle moo mokhatlo oa Jehova o reng re ee teng. Re ile ra abeloa ho ea ba bo-pula-maliboho ba khethehileng motseng oa Walnut Ridge, Arkansas. Eaba ka 1962, re fumana memo ea ho ea tlelaseng ea bo37 sekolong sa Gileade. Re ile ra thaba ha re hlokomela hore re tlelaseng e le ’ngoe le Mor’abo rōna Don Steele. Ha re qeta sekolong sa Gileade, ’na le Bethel re ile ra abeloa ho ea sebeletsa Nairobi, Kenya. Re ne re tšohile ha re tloha New York, empa re ile ra thaba ha re kopana le barab’abo rōna boema-fofaneng ba Nairobi!

Re tšimong Nairobi le Mary le Chris Kanaiya

Ho e-s’o ee kae re ne re se re thabela tšebeletso ea rōna Kenya. Batho ba pele bao re ileng ra ithuta Bibele le bona ’me ba hatela pele ke Chris Kanaiya le mofumahali oa hae Mary. Ba ntse ba le tšebeletsong ea nako e tletseng Kenya. Ka mor’a selemo re ile ra abeloa ho ea sebeletsa Kampala, Uganda, re le baromuoa ba pele naheng eo. Re ne re thabela ho sebeletsa moo, kaha batho ba bangata ba ne ba thahasella ho ithuta Bibele, ’me ba bang ba bona e ile ea e-ba Lipaki. Leha ho le joalo, ka mor’a ho qeta lilemo tse tharo le halofo re ile ra tloha Afrika, ho ea hōlisa bana. Ra khutlela United States. Ha re tloha Afrika, ho ne ho le thata ho feta ha re tloha New York. Re ne re se re rata batho ba Afrika, ’me re tšepa hore ka letsatsi le leng re tla khutlela teng.

RE FUOA KABELO E NCHA

Re ile ra lula karolong e ka bophirima ea motse oa Colorado, moo batsoali ba ka ba neng ba lula teng. Morali oa rōna oa pele, e leng Kimberly o ile a hlaha nakoana ka mor’a moo, oa bobeli, e leng Stephany a tla hlaha ka mor’a likhoeli tse 17. Re ile ra nka ka botebo kabelo ea rōna e ncha ea ho hōlisa bana, ’me ra ikemisetsa ho ba ruta linnete. Re ne re batla ho ba behela mohlala o motle o tšoanang le oo re o behetsoeng. Ke ’nete hore ho behela bana mohlala o motle ho molemo, empa seo hase tiiso ea hore ba tla sebeletsa Jehova ha ba se ba hōlile. Moena oa ka le khaitseli ea ka ba ile ba tlohela phutheho. Ke tšepa hore ka le leng ba tla boela ba etsisa mohlala o motle oo ba o behetsoeng.

 Re ne re thabela ho hōlisa barali ba rōna, ’me kamehla re leka ho etsa lintho re le lelapa. Kaha re ne re lula haufi le Aspen, Colorado, re ile ra ithuta ho thellisa leqhoeng e le hore ka linako tse ling re e’o thellisa teng hammoho. Ha re ntse re thellisa joalo re ne re fumana monyetla oa ho buisana le barali ba rōna. Re ne re tloaetse ho tsoa re il’o robala litenteng, ebe re ba le moqoqo o monate ha re orile mollo. Le hoja ba ne ba le banyenyane, ba ne ba nahana ka lipotso tse kang hore na ba tla etsa’ng ha ba hōla le hore na ba batla ho nyaloa ke batho ba joang. Re ile ra ikitlaetsa ho ba thusa hore ba be le lipakane tsa moea. Ra ba khothalletsa ho kenela tšebeletso ea nako e tletseng le hore ba nyaloe ke batho ba nang le pakane e tšoanang. Hape ra leka ho ba hlokomelisa hore ho molemo hore ba se ke ba nyaloa ba sa le banyenyane. Re ile ra qapa poleloana e reng, “Lula u lokolohile ho fihlela bonyane u le lilemo li 23.”

Re ile ra leka kahohle hore re ee libokeng le tšebeletsong ea tšimo re le lelapa, feela joalokaha batsoali ba rōna ba ne ba re behetse mohlala. Re ne re atisa ho mema batho ba tšebeletsong ea nako e tletseng. Re bile re tloaetse ho bua ka nako e thabisang ea ha re sa le baromuoa. Ra ba hlalosetsa hore ekare re ka etela Afrika re le ’moho. Barali ba rōna ba ne ba labalabela seo haholo.

Re ne re tšoara thuto ea lelapa kamehla, ’me re bontšana hore na ba ka sebetsana joang le liteko tse ka ba hlahelang sekolong. Barali ba rōna e ne e e-ba Lipaki ebe ba araba lipotso. Ba ne ba thabela ho ithuta ka tsela ena, ’me ho ba thusa hore ba itšepe. Ha ba ntse ba hōla, ka linako tse ling ba ne ba tletleba ha e ba nako ea thuto ea lelapa. Ka le leng, ke ho tsieleha, ke ile ka re ba ee likamoreng tsa bona ha re na ho bala letsatsing leo. Ba ile ba tšoha eaba baa lla ba re ba batla re ithute. Re ile ra hlokomela hore re fela re ba finyeletse lipelo. Ba ne ba se ba rata ho ithuta, ’me re ne re ba lumella ho ntša maikutlo ka bolokolohi. Leha ho le joalo, ka linako tse ling re ne re utloa bohloko ha ba sa lumellane le thuto e itseng ea Bibele. Empa re ne re ithuta se ka lipelong tsa bona. Ka mor’a ho behelana mabaka le bona, ba ne ba khotsofala.

HO BA LE LIPHETOHO TSE LING

Nako ea ho hōlisa bana e ile ea feta ka potlako. Mokhatlo oa Molimo o ile oa re thusa ho ba hōlisa e le hore ba tšabe Jehova. Re ile ra thaba haholo ha barali ba rōna e e-ba bo-pula-maliboho ha ba qeta sekolong se phahameng, ’me ba ithuta ho etsa mosebetsi o tla ba nolofalletsa ho iphelisa. Ba ile ba fallela motseng oa Cleveland, Tennessee, le barali babo rōna ba bang ba babeli ho ea sebeletsa moo ho nang le tlhokahalo. Re ne re ba hopola haholo, empa re thabile hore ebe ba tšebeletsong ea nako e tletseng. Eaba ’na le Bethel re ba bo-pula-maliboho hape, e leng se ileng sa re bulela litokelo tse ling tse thabisang. Ka linako tse ling re ne re etsa mosebetsi oa potoloho le oa kopano.

Pele barali ba rōna ba fallela Tennessee, ba ile ba ea London, Engelane, ’me ba etela ofising ea lekala. Ke hona moo Stephany, ea neng a le lilemo li 19 ka nako eo a ileng a kopana le mohlankana e mong ea sebeletsang Bethele, ea bitsoang Paul Norton. Ka lekhetlo le leng ha ba etetse moo hape, Kimberly o ile a kopana le mohlankana e mong ea neng a sebetsa le Paul, e leng Brian Llewellyn. Paul le Stephany ba ile ba nyalana, ’me ka nako eo o ne a se le lilemo li 23. Brian le Kimberly ba ile ba nyalana selemong se latelang, ’me o ne a le lilemo li 25. Kahoo ba ile ba lula ba lokolohile ho fihlela ba le lilemo li 23. Re ile ra amohela balekane ba bona ka lipelo tsohle.

Re na le Paul, Stephany, Kimberly le Brian ofising ea lekala e Malawi, ka 2002

Barali ba rōna ba re mohlala oa rōna le oa batsoali ba rōna o ba thusitse hore ba mamele taelo ea Jesu ea hore ‘ba ’ne ba batle ’muso pele,’ esita leha ba e-na le mathata a lichelete. (Mat. 6:33) Ka April 1998, Paul le Stephany ba ile ba memeloa tlelaseng ea bo105 ea Gileade, ’me ka mor’a eona ba abeloa ho ea sebeletsa Malawi, Afrika. Ka nako e tšoanang, Brian le Kimberly ba ile ba amoheloa Bethele e London ’me hamorao ba isoa Bethele e Malawi. Re ne re thabile haholo, kaha ena ke tsela e molemo ka ho fetisisa eo bacha ba ka e khethang bophelong.

MEMO E ’NGOE E THABISANG

Ka January 2001, ke ile ka fumana mohala oane oo ke buileng ka oona qalong. Mor’abo rōna Marais, e leng molebeli Lefapheng la Litšebeletso Tsa Phetolelo, o ile a re barab’abo rōna ba ntse ba lokisetsa  hore bafetoleli lefatšeng ka bophara ba fuoe thupelo ea puo ea Senyesemane, ’me le hoja ke le lilemo li 64, ba kōpa hore ke be e mong oa barupeli. ’Na le Bethel re ile ra rapella taba ena, ’me ra buisana ka eona le bo-’mè ba rōna ba neng ba se ba hōlile. Ka bobeli ba ne ba batla hore re tsamaee le hoja ba ne ba tla sala ba hloka batho ba ba thusang. Ke ile ka letsa ka bolela hore re tla thabela ho phetha kabelo ena e babatsehang.

Eaba ka nako eo lingaka li fumana hore ’Mè o tšoeroe ke lefu la kankere. Ke ile ka re re tla lula re thusane le khaitseli ea ka Linda ho mo hlokomela. ’Mè o ile a re, “Le se ke be la etsa joalo. Nka utloa bohloko haeba le ke ke la tsamaea.” Linda o ne a ikutloa ka tsela e tšoanang. Ruri re ananela moea oa bona oa boitelo, hammoho le oa barab’abo rōna ba sebakeng seo! Letsatsi ka mor’a hore re ee Setsing sa Thupelo sa Watchtower se Patterson, Linda o ile a letsa a re tlalehela hore ’Mè o hlokahetse. Re ile ra etsa seo a re khothallelitseng ho se etsa, ’me ra ikakhela ka setotsoana mosebetsing oa rōna o mocha.

Kabelo ea rōna ea pele e bile ho ea lekaleng la Malawi, moo barali ba rōna le balekane ba bona ba sebeletsang teng. Ruri re ile ra thaba ho ba ’moho le bona! Ha re tloha moo, ra ea Zimbabwe le Zambia. Ka mor’a ho qeta lilemo tse tharo le halofo re ntse re koetlisa bafetoleli, re ile ra kōpuoa ho khutlela Malawi ho ea ngola liphihlelo tsa Lipaki tsa moo tse ileng tsa hlorisoa hobane li sa nke lehlakore. *

Re tšimong le litloholo tsa rōna

Ka 2005 re ile ra boela ra khutlela hae Basalt, Colorado, moo ’na le Bethel re ntseng re le bo-pula-maliboho teng. Ka 2006, Brian le Kimberly ba ile ba fallela haufi le rōna e le hore ba tl’o hōlisa barali ba bona ba babeli, e leng Mackenzie le Elizabeth. Paul le Stephany ba ntse ba le Malawi, ’me Paul ke setho sa Komiti ea Lekala. Hona joale ke habile lilemo tse 80, ’me kea thaba ha ke bona bacha bao ke neng ke sebetsa le bona ba nka boikarabelo boo ke ’nileng ka bo etsa ka lilemo tse ngata. Ntho e ka sehloohong e re tliselitseng thabo ke ho etsisa mohlala o motle oo re o behetsoeng le oo re ileng ra ikitlaelletsa ho o latela molemong oa bana ba rōna le litloholo tsa rōna.

^ par. 5 Sheba Molula-Qhooa (oa Senyesemane) oa May 1, 1956, leqepheng la 269-272 le oa March 15, 1971, leqepheng la 186-190, e le hore u bale ka ho eketsehileng ka mosebetsi oa boromuoa o entsoeng ke ba lelapa la ha Steele.

^ par. 30 Ka mohlala, sheba pale ea bophelo ea Trophim Nsomba Molula-Qhooeng oa April 15, 2015, leqepheng la 27-31.