Fetela boitsebisong

Fetela lethathamong la tse ka hare

 PALE EA BOPHELO

Ho Tloaelana le Batho ba Ratang Jehova ho Nthusitse Haholo

Ho Tloaelana le Batho ba Ratang Jehova ho Nthusitse Haholo

HOSENG ho hong ho ne ho foka moea o batang Brookings, South Dakota U.S.A. Moea oo o ne o nkhopotsa hore Mariha a haufi le ho kena. Hona letsatsing leo, re ne re le sehlopha se senyenyane ’me re le ka har’a setala sa liphoofolo se batang haholo. Re eme pel’a sejelo sa liphoofolo se tšetseng metsi a batang. E-re ke le phetele pale ea ka ea bophelo le hore na re ne re batla’ng ka setaleng.

BOPHELO BA KA HA KE SA LE NGOANA

Ntate-moholo Alfred le ntate oa ka

Ke hlahile ka la 7 March 1936. Heso re bane ’me ke ngoana oa ho fela. Re ne re lula polasing e nyenyane ka bochabela ho South Dakota. Re ne re nka ho hlokomela mohlape le ho lema e le lintho tsa bohlokoa empa e ne e se tsona tse tlang pele bophelong. Ka 1934 batsoali ba ka ba ile ba kolobetsoa ’me ea e-ba Lipaki Tsa Jehova. Kaha ba ne ba inehetse ho Ntate oa rona ea maholimong Jehova, ba ne ba nka ho etsa thato ea hae e le eona ntho e tlang pele bophelong ba bona. Ntate oa ka, Clarence, e ne e le mohlanka oa phutheho (eo hona joale a bitsoang mohokahanyi oa sehlopha sa baholo) phuthehong ea rona e nyenyane Conde, South Dakota. Hamorao ntate-moholo Alfred, e leng abuti oa Ntate le eena e ile ea e-ba mohlanka oa phutheho.

Lapeng re ne re tloaetse ho ea libokeng tsa Bokreste le tšebeletsong ea ntlo le ntlo ho ea bolella batho ka lintho tse ntle tseo Molimo a tla li etsa nakong e tlang tse hlahang ka Bibeleng. Mohlala le thuto eo batsoali ba rona ba ileng ba re fa eona, e ile ea thopothela lipelong tsa rona re sa le bana ’me ea re thusa haholo. ’Na le ausi oa ka Dorothy, re ile ra ba bahoeletsi ha re le lilemo li tšeletseng. Ka 1943, ke ile ka ngolisa Sekolong sa Tšebeletso sa Puso ea Molimo se neng se sa tsoa kenyelletsoa libokeng tsa rona.

Ha ke le pula-maliboho ka 1952

 Re ne re lula re ea likopanong tse kholo le tse nyenyane. Ka 1949, Mor’abo rona Grant Suiter e ne e le sebui sa moeti kopanong e neng e tšoaretsoe Sioux Falls, South Dakota. Ke ntse ke hopola sehlooho sa puo ea hae se neng se re, “Bofelo bo Haufi ho Feta Kamoo U Nahanang Kateng!” O ile a khothalletsa Bakreste bohle ba kolobelitsoeng hore ba etse sohle se matleng a bona hore ba bolele litaba tse molemo tsa ’Muso. Puo eo e ile ea etsa hore ke batle ho kolobetsoa. Kahoo ke ile ka kolobetsoa kopanong ea potoloho e latelang e neng e le Brookings ka setaleng sa liphoofolo seo ke buileng ka sona qalong. Re ile ra kolobetsoa re le bane ka har’a sejelo se seholo sa lesenke ka la 12 November 1949.

Ho tloha ka nako eo, ke ile ka ipolella hore ke batla ho ba pula-maliboho. Kahoo ka qala ka la 1 January 1952, ha ke le lilemo li 15. Bibele e re: “Ea tsamaeang le batho ba bohlale o tla hlalefa.” (Liprov. 13:20) Batho ba lelapa leso ba ile ba bontša hore ba bohlale ka ho ntšehetsa ha ke ba pula-maliboho. Ntate-moholo Julius, e leng abuti oa Ntate ea neng a le lilemo li 60, o ile a bula maliboho le ’na. Le hoja a ne a le moholo haholo ho ’na, ke ne ke sebetsa hamonate le eena tšimong. Ke ithutile lintho tse ngata ho eena. Dorothy le eena e ile ea e-ba pula-maliboho.

BAPOTOLOHI BA ILE BA NTHUSA HAHOLO

Ho tloha ke sa le monyane, batsoali ba ka ba ne ba amohela balebeli ba potoloho le basali ba bona lapeng. Mor’abo rona Jesse le mosali oa hae Lynn Cantwell ba ile ba nthusa haholo. Ba ile ba nkhothatsa hore ke be pula-maliboho. Kaha ba ne ba ipha nako ea ka, ke ile ka ithuta lintho tse ngata ho bona eaba ke qala ho nahana hore na nka etsetsa Jehova eng. Ha ba ne ba ea liphuthehong tse pel’a heso, ka linako tse ling ba ne ba mpitsa hore ke tsamaee tšimo le bona. Ke ne ke thabela ho ea tšimong le bona!

Ha mopotolohi Cantwell a tsamaea, Mor’abo rona Bud Miller le mosali oa hae Joan, e ile ea e-ba balebeli ba rona ba potoloho. Ka nako eo ke ne ke le lilemo li 18 ’me ’muso o batla hore ke be lesole. Lekhotla le khethang banna ba eang sesoleng le ile la re ke ee sesoleng, e leng seo Jesu a neng a sa batle hore balateli ba hae ba se etse. Ke ne ke batla ho bolela litaba tse molemo tsa ’Muso. (Joh. 15:19) Ke ile ka kopa sehlopha sa batho ba khethang masole hore ke se ke ka ba lesole.

 Ke ile ka ameha maikutlo haholo ha Mor’abo rona Miller a ithaopela ho ea le ’na ka pel’a sehlopha se khethang masole. E ne e le motho oa batho a bile a sa tšabe ho bua le bona. Kaha ke ne ke tsamaea le motho ea sebete, le ’na ke ile ka ba sebete. Ka mor’a hore ke kope hore ke se ke ka kena sesoleng, kopo ea ka e ile ea amoheloa ka 1954. Ka lebaka leo, ke ile ka fihlela lintho tseo ke neng ke batla ho li etsetsa Jehova.

Ha ke sa tsoa fihla Bethele, ke eme pel’a teraka ea polasi

Nakoana ka mor’a moo, ke ile ka amoheloa Bethele e Staten Island, New York. Ka nako eo e ne e bitsoa Polasi ea Watchtower. Ke ile ka sebeletsa moo ka lilemo tse tharo. Ke ile ka thabela ho sebetsa moo haholo hobane ke ile ka kopana le batho ba bangata ba bohlale ’me ka sebetsa le bona.

HO SEBETSA BETHELE

Re seea-le-moeeng sa WBBR le Mor’abo rona Franz

Polasi eo e Staten Island e ne e na le seea-le-moea sa WBBR se neng se sebelisoa ke Lipaki Tsa Jehova ho tloha ka 1924 ho ea ho 1957. Ke batho ba 15 kapa 20 feela ba tsoang Bethele ba ileng ba sebeletsa polasing eo. Boholo ba rona re ne re le bacha ’me re na le tsebo e fokolang ka mosebetsi. Re ne re sebetsa le mor’abo rona Eldon Woodworth eo e neng e le motlotsuoa. O ne a rata Jehova haholo. Kaha o ne a lula a e-na le rona, re ile ra ithuta lintho tse ngata ho eena tse ileng tsa re thusa hore re be le kamano e ntle le Molimo. Ka linako tse ling ha re ne re utloisana bohloko ka lebaka la se phethahale, Mor’abo rona Woodworth o ne a tloaetse ho re: “Mosebetsi oo Jehova a o etsang o moholo ho sa tsotellehe ho se phethahale ha batho bao a ba sebelisang.”

Harry Peterson o ne a rata tšimo haholo

Re ile ra boela ra sebetsa le Mor’abo rona Frederick Franz. Kaha o ne a tseba Mangolo a bile a e-na le boiphihlelo, re ile ra ithuta lintho tse ngata ho eena tse ileng tsa fetola bophelo ba rona. Re ne re pheheloa ke Mor’abo rona Harry Peterson. Ho ne ho le bonolo ho mo bitsa ka lebitso leo ho e-na le ho mo bitsa ka la hae e leng, Papargyropoulos. Le eena e ne e le motlotsuoa, a rata tšimo haholo. Mor’abo rona Peterson o ne a ipabola mosebetsing oa hae oa Bethele le tšebeletsong ea tšimo. Khoeli le khoeli a fana ka limakasine tse fetang lekholo. O ne a araba lipotso tse ngata tsa rona hantle hobane a tseba Mangolo a mangata.

KE ITHUTILE HO BARALI BABO RONA BA RATANG MOLIMO

Lijo tse neng li tsoa polasing li ne li kenngoa ka libotlolong e le hore li se ke tsa bola. Ka selemo  ho ne ho etsoa libotlolo tse ka bang 45 000 tsa litholoana le meroho bakeng sa lelapa la Bethele. Ha ke le moo, ke ile ka sebetsa le morali oabo rona Etta Huth ea neng a rata Jehova. O ne a re etsetsa liresepe tsa ho kenya litholoana le meroho ka libotlolong. Barali babo rona ba lulang haufi ba ne ba re thusa ho kenya litholoana le meroho ka libotlolong ’me Etta e ne e ba eena ea ikarabellang. Ho ntse ho le joalo, o ne a hlompha bara babo rona ba neng ba etella pele moo polasing. Tsela eo a neng a etsa lintho ka eona e nthutile ho hlompha bohlooho ka mokhatlong oa Molimo.

’Na le Angela le Etta Huth

Morali’abo rona e mong ea ileng a re thusa ke Angela Romano. Etta ke eena ea neng a mo ruta Bibele. ’Na le Angela re nyalane ka April 1958 ’me re se re na le lilemo tse 58 re sebeletsa Jehova ’moho. Tsela eo Angela a ratang Jehova ka eona e entse hore lenyalo la rona le matlafale. Kea tseba hore Angela o tla ntšehetsa mathateng ’ohle.

MOSEBETSI OA BOROMUOA LE OA POTOLOHO

Ha mohaho oa WBBR o rekisoa ka 1957, ke ile ka sebeletsa Bethele e Brooklyn ka nakoana. Ha ’na le Angela re nyalana, re ile ra tloha Bethele ’me ra ba bo-pula-maliboho Staten Island ka lilemo tse ka bang tharo. Ke ile ka sebeletsa baokameli ba bacha ba seea-le-moea se neng se se se bitsoa WPOW.

’Na le Angela re ne re ikemiselitse ho nolofatsa bophelo ba rona e le hore re tle re khone ho sebeletsa hohle moo mokhatlo o re hlokang teng. Kahoo ha selemo sa 1961 se qala re ile ra khona ho amohela kabelo ea ho ba bo-pula-maliboho ba khethehileng motseng oa Falls City, Nebraska. Hang ha re fihla moo re ile ra memeloa Sekolong sa Tšebeletso sa ’Muso. Ka nako eo se ne se nka khoeli ’me se tšoareloa South Lansing, New York. Re ile ra ithuta lintho tse ngata haholo moo. Kaha re ne re ikemiselitse ho khutlela Nebraska, re ile ra makala ha re fuoa kabelo ea ho ba baromuoa Cambodia! Naheng ena e ka Boroa bochabela ho Asia ho na le libaka tse ntle haholo, melumo le menko e monate ’me li ne li fapane le tsa linaha tseo re kileng ra fihla ho tsona. Re ne re tatetse ho bua le batho ba moo ka Bibele.

Leha ho le joalo, maemo a lipolotiki a ile a fetoha ’me ra tlameha ho ea ka Boroa Vietnam. Ka masoabi, pele lilemo tse peli li fela ke ile ka kula haholo, kahoo ra kopuoa hore re khutlele naheng ea habo rona. Ke ne ke hloka nako e le hore ke fole. Hang ha ke fola, re ile ra boela ra ba bo-pula-maliboho.

’Na le Angela ka 1975, nakoana pele re hlahisoa thelevisheneng

Ka March 1965 re ile ra fuoa kabelo ea ho ba balebeli ba potoloho. ’Na le Angela re bile bapotolohi le balebeli ba setereke ka lilemo tse 33. Re ne re boetse re thusa ka ho hlophisa mosebetsi oa likopano. Ke ne ke rata likopano le mosebetsi oa ho li hlophisa. Re qetile lilemo tse ngata re le New York ’me likopano tse ngata li ne li tšoareloa Stediamong sa Yankee.

LIKOLO TSA PUSO EA MOLIMO LE HO KHUTLELA BETHELE

Re ile ra fuoa likabelo tse ngata tse ileng tsa re natefela haholo. Mohlala, ka 1995 ke ile ka fuoa kabelo ea ho ruta Sekolong sa ho Koetlisetsoa Bosebeletsi. Ka mor’a lilemo tse tharo, re ile ra fuoa kabelo ea ho sebeletsa Bethele. Ke ile ka thaba haholo  ha ke khutlela teng ka mor’a lilemo tse 40. Ke sebelelitse Lefapheng la Tšebeletso ke le morupeli oa likolo tse fapaneng ka nakoana. Ka 2007 Sehlopha se Busang se ile sa re likolo tse tšoareloang Bethele li be tlas’a Lefapha la Likolo Tsa Puso ea Molimo ’me ka ba molebeli oa tsona ka lilemo tse seng kae.

Morao tjena re bone liphetoho tse kholo likolong tsa puso ea Molimo. Ka 2008 ho ile ha qaloa Sekolo sa Baholo ba Phutheho. Lilemo tse peli ka mor’a moo, baholo ba fetang 12 000 ba ile ba ruteloa Patterson le Bethele e Brooklyn. Sekolo sena se ntse se tsoela pele libakeng tse fapaneng ’me se tšoaroa ke barupeli ba tšimo ba koetlisitsoeng. Ka 2010 Sekolo sa ho Koetlisetsoa Bosebeletsi se ile sa fetoloa lebitso ea ba Sekolo sa Bibele sa Barab’abo Rona ba Masoha ’me ha boela ha thehoa Sekolo sa Bibele sa Banyalani ba Bakreste.

Qalong ea selemo sa tšebeletso sa 2015, likolo tseo ka bobeli li ile tsa kopanngoa ho etsa Sekolo sa Baevangeli ba ’Muso. Banyalani le masoha ba ka khona ho ea sekolong seo. Batho ba bangata ba ile ba thaba haholo ha ba utloa hore sekolo seo se tla tšoaroa makaleng a fapaneng. Kea thaba ha ke bona hore batho ba bangata ba ka khona ho ea likolong tsena tsa puso ea Molimo. Hape ke thabela hore ebe ke kopane le batho ba bangata ba tlileng ho tsona.

Ha ke nahana ka bophelo ba ka pele ke kolobetsoa ho tla fihlela joale, ke leboha Jehova hore ebe ke ile ka kopana le batho ba mo ratang ba nthusitseng hore ke be le kamano e ntle le eena. Ba bang ba bona e ne e se lithaka tsa ka ’me ba bang e se ba morabe oa ka. Empa kaofela ba ne ba na le kamano e ntle le Jehova ebile ba mo rata. Ba ne ba bonahala ka tsela eo ba etsang lintho ka eona hammoho le boitšoaro ba bona. Ka har’a mokhatlo oa Jehova, ho na le batho ba bangata ba ratang Jehova bao re ka buang le bona. Ke ile ka bua le bona ’me ba nthusitse haholo.

Kea thaba ha ke kopana le liithuti tse tsoang linaheng tse fapaneng