Fetela boitsebisong

Fetela lethathamong la tse ka hare

Thekollo ke Mpho e Molemo e Tsoang ho Ntate

Thekollo ke Mpho e Molemo e Tsoang ho Ntate

“Mpho e ’ngoe le e ’ngoe e molemo le neo e ’ngoe le e ’ngoe e phethahetseng e tsoa ho . . . Ntate.”—JAK. 1:17.

LIPINA: 148, 109

1. Tokisetso ea thekollo e tlisa litlhohonolofatso life?

SEHLABELO sa thekollo sa Jesu Kreste se re tlisetsa litlhohonolofatso tse ngata. Tokisetso ea thekollo e fa bana bohle ba Adama ba ratang ho loka monyetla oa hore qetellong e be karolo ea lelapa la Molimo. Ka lebaka la thekollo, re ka khona ho phela ka ho sa feleng re thabile. Leha ho le joalo, thekollo ea Kreste e etsa se fetang seo ho batho ba mamelang. Batho ba lefatšeng le ba leholimong ba rua molemo haholo ka hore ebe Jesu o ile a shoa a ntse a tšepahala.—Baheb. 1:8, 9.

2. (a) Ke lintho life tsa bohlokoa tseo re li fumanang thapelong ea Jesu? (Sheba setšoantšo se qalong.) (b) Re tl’o hlahloba eng sehloohong see?

2 Lilemo tse peli pele Jesu a shoa, o ile a ruta barutuoa ba hae hore ha ba rapela ba re: “Ntat’a rōna ea maholimong, lebitso la hao le ke le halaletsoe. ’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.”  (Mat. 6:9, 10) E le hore re ananele thekollo haholoanyane, a re ke re hlahlobeng hore na e amana joang le ho halaletsoa ha lebitso la Molimo, ho busa ha ’Muso oa Molimo le ho phethahala ha morero oa Molimo.

“LEBITSO LA HAO LE KE LE HALALETSOE”

3. Lebitso la Jehova le akaretsa’ng, ’me Satane o ile a senya lebitso leo le halalelang joang?

3 Ntho ea pele eo Jesu a ileng a e kopa thapelong ea mohlala ke hore ho halaletsoe lebitso la Molimo. Lebitso la Jehova le akarelletsa bokhabane, khalalelo le boholo ba hae. Thapelong e ’ngoe ea hae, Jesu o ile a re Jehova ke “Ntate ea halalelang.” (Joh. 17:11) Kaha Jehova oa halalela, melao le melao-motheo ea hae ea halalela. Leha ho le joalo serapeng sa Edene, ka masene Satane o ile a belaella tokelo ea Molimo ea ho behela batho melao. Ka ho bua mashano ka Jehova, Satane o ile a senya lebitso la Molimo le halalelang.—Gen. 3:1-5.

4. Jesu o ile a etsa’ng ho halaletsa lebitso la Molimo?

4 Jesu eena o ne a rata lebitso la Jehova haholo. (Joh. 17:25, 26) O ile a le halaletsa. (Bala Pesaleme ea 40:8-10.) Le hoja Jesu a ne a phethahetse ha a phela lefatšeng, o ile bontša hore ho loketse hore Jehova a behele libopuoa tsa hae tse bohlale melao. Esita leha Satane a ile a etsa hore Jesu a bolaoe ka sehloho, Jesu o ile a lula a tšepahala ho Ntate oa hae ea leholimong. Ka ho lula a tšepahala, Jesu o ile a bontša hore motho ea phethahetseng a ka khona ho mamela ka ho feletseng melao ea Molimo e lokileng.

5. Re ka etsa’ng hore re halaletse lebitso la Molimo?

5 Re ka bontša joang hore re rata lebitso la Jehova? Ka tsela eo re itšoarang ka eona. Jehova o batla hore re halalele. (Bala 1 Petrose 1:15, 16.) Sena se bolela hore re rapele eena feela, le hore re mo mamele ka lipelo tsohle tsa rona. Esita leha re hlorisoa, re etsa sohle seo re ka se khonang ho phela ka melao-motheo ea hae e lokileng. Ha re etsa lintho tse ntle, re etsa hore leseli le khanye ’me seo se tlisetsa lebitso la Jehova thoriso. (Mat. 5:14-16) Re bontša hore rea halalela ka ho phela ka tsela e bontšang hore melao ea Jehova e molemo le hore liqoso tsa Satane ke mashano. Joaloka batho ba sa phethahalang, ha re etsa liphoso rea baka ’me re khaotsa ho etsa lintho tse sa khahliseng Jehova.—Pes. 79:9.

6. Ke hobane’ng ha Jehova a ka re nka re le ba lokileng le hoja re sa phethahala?

6 Ka lebaka la sehlabelo sa Kreste, Jehova o tšoarela libe tsa ba bontšang tumelo. O amohela barapeli ba inehelang ho eena. Jehova o nka Bakreste ba tlotsitsoeng e le bana ba hae ba lokileng ’me ba “linku tse ling” o ba nka e le metsoalle ea hae e lokileng. (Joh. 10:16; Bar. 5:1, 2; Jak. 2:21-25) Kahoo, hona joale re khona ho ba ba lokileng ka pel’a Ntate oa rona le ho nka karolo ho halaletsoeng ha lebitso la hae.

“’MUSO OA HAO O KE O TLE”

7. Thekollo e entse hore ho be le monyetla ofe?

7 Thapelong ea mohlala, Jesu o ile a boela a kopa Molimo a re: “’Muso oa hao o ke o tle.” Thekollo e amana joang le ’Muso oa Molimo? Thekollo e entse hore batho ba 144 000 ba fumane monyetla oa ho ea sebeletsa joaloka marena le baprista leholimong le Kreste. (Tšen. 5:9, 10; 14:1) Ba tla sebetsa le  Jesu hammoho, ho busa moloko oa batho ba mamelang ka lilemo tse sekete. Lefatše le tla fetoha paradeise, batho bohle ba tšepahalang ba tla phethahala, ’me karolo e leholimong le e lefatšeng ea lelapa la Molimo e tla momahana. (Tšen. 5:13; 20:6) Jesu o tla felisa Satane ’me a tlose mathata ’ohle ao Satane a a bakileng.—Gen. 3:15.

8. (a) Jesu o thusitse barutuoa ba hae joang hore ba bone hore ’Muso oa Molimo ke oa bohlokoa? (b) Kajeno re bontša joang hore re tšehetsa ’Muso oa Molimo?

8 Jesu ha a le lefatšeng, o ile a thusa barutuoa ba hae ho bona hore ’Muso oa Molimo ke oa bohlokoa. Hang-hang ka mor’a ho kolobetsoa, Jesu o ile a phatlalatsa “litaba tse molemo tsa ’muso oa Molimo” libakeng tsohle. (Luka 4:43) Pele a ea leholimong Jesu o ile a bolella barutuoa ba hae hore e tla ba lipaki tsa hae “ho isa karolong e hōle-hōle ea lefatše.” (Lik. 1:6-8) Ka lebaka la mosebetsi oa ho bolela litaba tse molemo tsa ’Muso, batho lefatšeng ka bophara ba na le monyetla oa ho ithuta ka thekollo le ho tšehetsa ’Muso oa Molimo. Kajeno, re bontša hore re tšehetsa ’Muso ka ho thusa batlotsuoa mosebetsing oa ho bolela litaba tse molemo tsa ’Muso oa Molimo lefatšeng lohle.—Mat. 24:14; 25:40.

“THATO EA HAO E KE E ETSAHALE”

9. Ke hobane’ng ha re ka kholiseha hore Jehova o tla phethahatsa seo a neng a se rerile ka batho?

9 Jesu o ne a bolela’ng ha a re: “Thato ea hao e ke e etsahale”? Jehova ke ’Mopi. Ha a re ntho e tla etsahala, e fela e etsahala joalokaha a boletse. (Esa. 55:11) A ke ke a lumella bofetoheli ba Satane bo senye seo a neng a se rerile ka batho. Ho tloha qalong, haesale e le thato ea Jehova hore lefatše le tlale ka bana ba Adama le Eva ba phethahetseng. (Gen. 1:28) Hoja ebe Adama le Eva ba ile ba shoa pele ba e-ba le bana, morero oa Molimo oa hore bana ba bona ba tlale lefatše o ne o ke ke oa phethahala. Ke kahoo, ka mor’a hore Adama le Eva ba etse sebe, Jehova a ileng a ba tlohela hore ba be le bana. Ka lebaka la thekollo, Molimo o fa bohle ba bontšang tumelo monyetla oa ho phethahala le ho phela ka ho sa feleng. Jehova o rata batho, ’me o batla hore ba mo mamelang ba phele bophelo boo a neng a bo rerile.

10. Thekollo e entse hore ho be le monyetla ofe bakeng sa bafu?

10 Ho tla etsahala’ng ka batho ba libilione ba ileng ba shoa ba sa ka ba fumana monyetla oa ho tseba Jehova le ho mo sebeletsa? Ka lebaka la thekollo, ho tla ba le tsoho ea bafu. Ntate oa rona ea lerato o tla ba tsosa ’me ba fumane monyetla oa hore ba ithute ka eena le hore ba fumane bophelo bo sa feleng. (Lik. 24:15) Jehova o batla hore batho ba phele, eseng ba shoe. Kaha ke Mohloli oa bophelo, e tla ba ntate oa bohle ba tla tsosoa. (Pes. 36:9) Ke hantle hakaakang hore Jesu o ile a re ruta ho rapela “Ntat’a rōna ea maholimong.” (Mat. 6:9) Jehova o file Jesu boikarabelo ba bohlokoa ba ho tsosa bafu. (Joh. 6:40, 44) Paradeiseng, Jesu o tla phethahatsa boikarabelo ba hae ba hore e be “tsoho le bophelo.”—Joh. 11:25.

11. Morero oa Molimo ka “bongata bo boholo” ke ofe?

11 Jehova o batla hore motho e mong le e mong e be karolo ea lelapa la hae. Jesu o re: “Mang kapa mang ea etsang  thato ea Molimo, enoa ke mor’eso le morali’eso le ’Mè.” (Mar. 3:35) Molimo o batla hore “bongata bo boholo” bo tsoang lichabeng tsohle le melokong eohle le malemeng ’ohle e be barapeli ba hae. Bohle ba bontšang tumelo sehlabelong sa Kreste ’me ba etsa thato ea Molimo ba tla ba har’a ba hoeletsang ba reng: “Poloko ea rōna e tsoa ho Molimo oa rōna, ea lutseng teroneng, le Konyana.”—Tšen. 7:9, 10.

12. Thapelo ea mohlala e re bontša eng ka morero oa Molimo?

12 Thapelong ea Jesu ea mohlala re bona hantle seo Jehova a se rerileng ka batho ba mo mamelang. Tumellanong le thapelo ena, re batla ho etsa sohle se matleng a rona, ho halaletsa lebitso la Jehova le ho le hlompha. (Esa. 8:13) Lebitso la Jesu ka bolona le bolela hore “Jehova ke Poloko,” ’me ka lebaka la thekollo re khona ho hlompha le ho halaletsa lebitso la Jehova. ’Muso oa Molimo o tla tlisetsa batho ba mamelang litlhohonolofatso tse tlisoang ke thekollo. Ruri thapelo ea mohlala ea re tiisetsa hore ha ho letho le ka thibelang Molimo ho phethahatsa morero oa hae!—Pes. 135:6; Esa. 46:9, 10.

BONTŠA HORE U ANANELA THEKOLLO

13. Re bontša eng ha re kolobetsoa?

13 Tsela eo re ka bontšang ka eona hore re ananela thekollo ke ka ho inehela ho Jehova le ka ho bontša tumelo sehlabelong sa thekollo ’me re kolobetsoe. Ha re kolobetsoa re bontša hore “re ba Jehova.” (Bar. 14:8) ’Me re kopa Molimo hore a re fe letsoalo le letle. (1 Pet. 3:21) Jehova o araba kopo eo ea rona ka hore a sebelise mali a Kreste a hloekileng e le sehlabelo molemong oa  rona. ’Me re kholisehile hore o tla re fa sohle seo a re tšepisitseng sona.—Bar. 8:32.

Ke ka litsela life re bontšang hore re ananela thekollo? (Sheba serapa sa 13 le 14)

14. Ke hobane’ng ha re fuoe taelo ea hore re rate batho ba bang?

14 Re ka boela ra bontša joang hore re ananela thekollo? Ntho e ’ngoe le e ’ngoe eo Jehova a e etsang e susumetsoa ke lerato, ’me o batla hore batho ba mo rapelang le bona ba be le lerato. (1 Joh. 4:8-11) Haeba re rata batho ba bang re tla be re bontša hore re batla ho ba “bara ba Ntat’a [rona] ea leng maholimong.” (Mat. 5:43-48) Taelo ea pele ke hore re rate Jehova ’me ea bobeli ke hore re rate batho ba bang. (Mat. 22:37-40) Tsela eo re ka bontšang hore re rata batho ba bang ka eona ke ka ho mamela taelo ea hore re bolele litaba tse molemo tsa ’Muso oa Molimo. Ha re rata batho ba bang, re bontša khanya ea Molimo. Ha e le hantle lerato la rona ho Molimo le tla etsoa “le phethahetseng ho rōna” haholo-holo ha re rata barab’abo rona.—1 Joh. 4:12, 20.

THEKOLLO E TLISA “LINAKO TSE KHATHOLLANG” TSE TSOANG HO JEHOVA

15. (a) Jehova o re fa litlhohonolofatso life hona joale? (b) Re letetsoe ke litlhohonolofatso life?

15 Jehova o tla re tšoarela ka ho feletseng haeba re bontša tumelo sehlabelong sa thekollo. Lentsoe la Molimo le re tiisetsa hore libe tsa rona li tla ‘hlakoloa.’ (Bala Liketso 3:19-21.) Joalokaha re hlokometse qalong hore ka lebaka la thekollo, Jehova o khethile bahlanka ba hae ba batlotsuoa hore e il’o ba bana ba hae leholimong. (Bar. 8:15-17) O mema “linku tse ling,” hore e be karolo ea lelapa la hae e lefatšeng. Ka mor’a hore ba hlole teko ea ho qetela Jehova o tla ba etsa bana ba hae ba ratoang lefatšeng. (Bar. 8:20, 21; Tšen. 20:7-9) Jehova o tla lula a rata bana ba hae. Litlhohonolofatso tse tlisoang ke thekollo li tla ba teng ka ho sa feleng. (Baheb. 9:12) Mpho ena e tla lula e le ea bohlokoa. Ha ho motho ea ka re nkelang eona.

16. Thekollo e re thusitse joang hore re lokolohe?

16 Haeba re bakela libe tsa rona, ha ho letho leo Diabolose a ka le etsang ho re thibela ho ba karolo ea lelapa la Jehova. Jesu o ile a re shoela lefatšeng “hang le ka ho ke keng ha phetoa.” Kahoo thekollo e re rekolotse ka ho feletseng. (Baheb. 9:24-26) E hlakola sebe sohle seo re se futsitseng ho Adama. Ka lebaka la sehlabelo sa lefu la Kreste, re lokolohile bokhobeng ba lefatše lena la Satane, ’me ha re sa tšaba lefu.—Baheb. 2:14, 15.

17. Lerato la Jehova le bolela’ng ho uena?

17 Kamehla re ka tšepa litšepiso tsa Molimo. Joalokaha melao ea hae ea popo e sa fetohe, Jehova a ke ke a fetoha. ’Me a ke ke a re soetsa. (Mal. 3:6) Jehova o re fa ho hoholo ho feta mpho ea bophelo. O re fa lerato. “Rea tseba ’me re lumetse lerato leo Molimo a nang le lona ho rōna. Molimo ke lerato.” (1 Joh. 4:16) Lefatše lohle e tla ba paradeise e ntle, ’me motho e mong le e mong ea tla phela moo o tla bontša lerato la Molimo. ’Me batho ba lefatšeng le ba leholimong ba tla re: “Poko le khanya le bohlale le liteboho le tlhompho le bonatla le matla li be ho Molimo oa rōna ka ho sa feleng le kamehla. Amen.”—Tšen. 7:12.