Fetela boitsebisong

Fetela lethathamong la tse ka hare

Bo-pula-maliboho ba babeli e leng George Rollston le Arthur Willis ba tlatsa ralieitha ea koloi ea bona ka metsi.—Tšimo e ka Leboea, 1933

 HISTORI EA RONA

“Ha ho na Tsela e Thata Kapa e Telele”

“Ha ho na Tsela e Thata Kapa e Telele”

KA LA 26 March 1937, banna ba babeli ba neng ba se ba khathalitsoe ke leeto, ba ne ba khanna teraka e lerole ebile e tsamaea butle, ba ea motseng oa Sydney o Australia. Haesale ba tloha moo ba lulang teng ha selemo se qala ’me ba se ba tsamaile lik’hilomithara tse 19 300. Ba ne ba tsamaea libakeng tse ka thoko-thoko tse tletseng majoe ka ho fetisisa naheng eo ea Australia. Empa banna bana e ne e se bahahlauli. Arthur Willis le Bill Newlands e ne e le bo-pula-maliboho ba chesehang ba neng ba ikemiselitse ho bolella batho ba libakeng tse lehoatateng la Australia litaba tse molemo.

Ho elella qetellong ea lilemo tsa bo-1920, sehlopha se senyenyane sa Baithuti ba Bibele * sa Australia se ne se se se boleletse batho ba lulang tikolohong eo ba neng ba le ho eona molaetsa oa Bibele hammoho le libakeng tse e potolohileng. Sebaka se seholo se bohareng ba naha ea Australia ke lehoatata ’me ho lula batho ba ’maloa ho sona. Barab’abo rona ba ne ba tseba hore balateli ba Kreste ba ne ba lokela ho paka ka eena “ho isa karolong e hōle-hōle ea lefatše,” ho akarelletsa le lehoatateng la Australia. (Lik. 1:8) Empa ba ne ba tla etsa seo joang? Ba ne ba na le tumelo ea hore Jehova o tla hlohonolofatsa boiteko ba bona ’me ba ne ba ikemiselitse ho etsa sohle se matleng a bona.

HO QALOA MOSEBETSI OA BOBOLELI

Ka 1929, liphutheho tsa Queensland le tse ka Bophirimela ho Australia li ile tsa iketsetsa livene tseo ba neng ba tla li sebelisa ho ea paka libakeng tse bohareng ba naha. Livene tseo li ne li sebelisoa ke bo-pula-maliboho ba sebetsang ka thata, ba neng ba ka khona ho li lokisa ha li robeha. Ba ne ba ea libakeng tseo ho tsona ho s’o kang ho boleloa litaba tse molemo.

Bo-pula-maliboho ba se nang livene ba ne ba ea moo lehoatateng ka libaesekele. Ka mohlala, ka 1932 Bennett Brickell ea lilemo li 23 o ile a nka leeto la likhoeli tse hlano, a tloha Rockhampton e Queensland, ho ea bolela litaba tse molemo karolong e ka leboea ea Queensland. Baesekele ea hae e ne e imetsoe kaha o ne a tlameletse likobo, liaparo, lijo le libuka tse ngata ho eona. Ha litaere tsa eona li pancha, o ile a tsoela pele, a tšepile hore Jehova o tla mo tšehetsa. O ile a phusha baesekele ea  hae lik’hilomithara tse 320 tsa ho qetela ’me a feta libakeng tseo ho tsona batho ba kileng ba shoa, ba bolaoa ke lenyora. Lilemong tse 30 tse ileng tsa latela, Mor’abo rona Brickell o ile a tsamaea lik’hilomithara tse likete libakeng tse ngata tsa Australia a sebelisa baesekele, sethuthuthu le koloi. O ile a bolella batho ba Maaborijene litaba tse molemo ’me a thusa hore ho be le liphutheho tse ncha. Kahoo batho ba moo ba ne ba mo tseba ebile ba mo hlompha.

HO HLOLA LITEKO

Australia ke naha e se nang baahi ba bangata ka ho fetisisa lefatšeng haholo-holo libakeng tsa eona tse lehoatata. Kahoo batho ba Jehova ba bontšitse boikemisetso ba ho ea pakela batho ba libakeng tse ka thoko naheng eo.

Bo-pula-maliboho ba kang Stuart Keltie le William Torrington ba ile ba bontša boikemisetso bo joalo. Ka 1933, ba ile ba feta lehoatata le bitsoang Simpson, le nang le liqubu tse ngata tsa lehlabathe ho ea paka motseng oa Alice Springs o bohareng ba naha. Ha koloi ea bona e nyenyane e robeha ba ile ba tlameha ho e siea, eaba Mor’abo rona Keltie ea neng a tsamaea ka leoto le entsoeng ka lepolanka, o tsoela pele ka leeto a se a sebelisa kamele. Boikitlaetso boo ba bona, bo ile ba hlahisa litla-morao tse ntle, ha ba ne ba kopana le mookameli oa hotele seteisheneng sa terene se ka thoko se bitsoang William Creek. Mookameli eo oa hotele ea bitsoang Charles Bernhardt o ile a amohela molaetsa oa Bibele, eaba o rekisa hotele ea hae ’me a qala ho sebetsa a le mong e le pula-maliboho ka lilemo tse 15 libakeng tse ommeng le tse ka thoko ka ho fetisisa naheng ea Australia.

Arthur Willis o itokisetsa ho nka leeto la ho ea bolela litaba tse molemo lehoatateng la Australia.—Perth, Australia e ka Bophirimela, 1936

Ho hlakile hore bo-pula-maliboho bao ba nakong ea pele, ba ne ba hloka sebete le mamello e le hore ba hlole liteko tse ngata tseo ba neng ba kopana le tsona. Leetong leo la bona la ho tsamaea ba pakela batho ba mahoatateng a Australia, Arthur Willis le Bill Newlands bao re buileng ka bona qalong ea sehlooho, ka le leng ba ile ba tlameha ho qeta libeke tse peli ba tsamaea lik’hilomithara tse 32 hobane lipula tsa litloebelele li ne li entse hore lehoatata leo le tlale seretse. Ka linako tse ling ba ne ba tlameha ho phusha teraka ea bona liqubung tse kholo tsa lehlabathe, ba feta lipakeng tsa lithaba moo ho nang le majoe le pel’a linoka. Hangata ha teraka ea bona e ne e robeha ba ne ba qeta matsatsi ba tsamaea ka maoto kapa ka libaesekele ho ea motseng o haufinyane. Ha ba fihla moo, ba ne ba qeta libeke ba emetse hore likarolo tse ncha tsa koloi li fihle. Ho sa tsotelle mathata ao ba neng ba kopana le ’ona, ba ne ba sa nyahame. Arthur Willis ha a bua ka se ileng sa boleloa makasineng oa The Golden Age oa Senyesemane o re: “Ha ho na tsela e thata kapa e telele bakeng sa lipaki tsa Hae.”

Charles Harris eo e ileng ea e ba pula-maliboho ka nako e telele o hlalosa hore mathata ao a kopaneng le ’ona libakeng tseo tse ka thoko a entse hore a be le kamano e haufi le Jehova. O ile a boela a re: “Ho phela u na le lintho tse ’maloa tsa motheo ho molemo ho feta ho ba le tse ngata. Haeba Jesu o ne a ikemiselitse ho robala ka ntle ha ho hlokahala, le rona re lokela ho etsa seo haeba likabelo tsa rona li hloka re etse seo.” Bo-pula-maliboho ba bangata ba ile ba etsa seo. Ka lebaka la boikemisetso ba bona, litaba tse molemo li ile tsa fihla le libakeng tse hole naheng ea Australia ’me ba ile ba thusa batho hore ba tšehetse ’Muso oa Molimo.

^ par. 4 Ka 1931 Baithuti ba Bibele ba ile ba qala ho bitsoa Lipaki Tsa Jehova.—Esa. 43:10.