Fetela boitsebisong

Fetela lethathamong la tse ka hare

 PALE EA BOPHELO

Jehova o Hlohonolofatsa ba mo Mamelang

Jehova o Hlohonolofatsa ba mo Mamelang

’Na, monna oa ka, abuti oa ka le mohats’a hae re ile ra amohela memo ea ho bolella batho ka ’Muso oa Molimo eaba re re: “Re tla etsa joalo.” Ke hobane’ng ha re ile ra amohela memo eo, hona Jehova o ile a re hlohonolofatsa joang? E re ke qale pele ka ho le bolella pale ea bophelo ba ka.

KE HLAHILE ka 1923 motseng oa Hemsworth, o Yorkshire, naheng ea Engelane. Ke na le abuti a le mong. Lebitso la hae ke Robert. Ha ke ne ke le lilemo li robong, ntate oa ka o ile a fumana libuka tse hanyetsang lithuto tsa bohata. O ile a li thabela haholo kaha o ne a hloile boikaketsi bo teng likerekeng. O ile a khahloa ke seo a se balileng libukeng tseo. Lilemo hamorao Robert Atkinson o ile a re chakela eaba o re bapalla e ’ngoe ea lipuo tsa mor’abo rona Rutherford. Re ile ra hlokomela hore puo ena e ne e tsoa mohloling o le mong le libuka tseo re buileng ka tsona. Batsoali ba ka ba ile ba kopa mor’abo rona Atkinson hore a je lijo tsa mantsiboea le rona mantsiboea a mang le a mang e le hore a ka tseba ho arabela lipotso tsa Bibele tseo re neng re e-na le tsona. Re ile ra memeloa libokeng tse neng li tšoareloa ha mor’abo rona e mong lik’hilomithara tse ’maloa ho tloha moo re neng re lula. Re ile ra qala ho kopanela le bona ’me hamorao phutheho e nyenyane e ile ea e-ba teng sebakeng seo sa Hemsworth. Hamorao re ile ra amohela balebeli ba libaka bao hona joale ba seng ba bitsoa balebeli ba potoloho. Hape ra memela bo-pula-maliboho ba haufi lijong tsa mantsiboea. Setsoalle seo re ileng ra ba le sona le bona se ile sa etsa hore ke be le thahasello mosebetsing oa boboleli.

Re ne re sa tsoa bula khoebo ea lelapa empa ntate o ile a re ho abuti oa ka: “Haeba u batla ho ba pula-maliboho, re ka koala khoebo ena.” Robert o ile a lumela eaba o tloha hae ho ea bula maliboho ha a le lilemo li 21. Lilemo tse peli hamorao, ha ke le lilemo li 16, ke ile ka ba pula-maliboho. Boholo ba nako ke ne ke sebetsa ke le mong ke sebelisa karete e ngotsoeng molaetsa oa Bibele le keramafono ntle leha e le mafelo beke. Jehova o ile a ntlhohonolofatsa ka seithuti sa Bibele se ileng sa tsoela pele hantle haholo. Ba bangata lelapeng la bo seithuti seo ba ile ba ithuta Bibele. Selemong se latelang ke ile ka khethoa hore ke be pula-maliboho e khethehileng le Mary Henshall. Re ile ra romeloa tšimong e sa sebetsoeng khafetsa seterekeng sa Cheshire.

Ntoa ea Bobeli ea Lefatše e ne e ntse e kupa, ’me basali le bona ho ne ho thoe ba thuse ntoeng eo. Kaha  re ne re le baboleli ba nako e tletseng, re ne re lebeletse hore ha re na isoa ntoeng joalokaha baruti ba likereke tse ling ba sa isoe. Empa lekhotla ha lea ka la lumela, kahoo ka ahloleloa lilemo tse 31 teronkong. Selemong se latelang ha ke e-ba lilemo li 19 ke ile ka nkuoa ke le ea hanang ho kena sesoleng ka lebaka la letsoalo la ka. Ke ile ka qosoa makhotleng a mabeli empa qetellong nyeoe ea ka ea qhaloa. Linthong tsena kaofela tse nketsahaletseng ke ile ka hlokomela hore moea o halalelang o ne o nthusa haholo le hore Jehova o ne a ntšoere ka letsoho, a nthusa hore ke tiisetse ’me ke be matla.—Esa. 41:10, 13.

MOTHUSI E MOCHA

Ke ile ka kopana le Arthur Matthews ka 1946. Arthur o ile a kena teronkong likhoeli tse tharo hobane a hanne ho kena sesoleng ka lebaka la letsoalo la hae. Eena le ngoan’abo eo lebitso la hae e leng Dennis e ile ea e-ba bo-pula-maliboho ba khethehileng Hemsworth. Ntate oa bona o ile a ba ruta ka Jehova ho tloha e sa le masea ’me ba kolobetsoa ha ba le lilemong tsa bocha. Ho e-s’o ee kae, Dennis o ile a isoa Ireland, eaba o siea abuti’ae a se na mothusi boboleling ba litaba tse molemo. Batsoali ba ka ba ile ba khahloa ke tsela eo mocha enoa oa pula-maliboho a neng a itetse ka teng, eaba ba mo kopa hore a lule le bona. Ha ke chaketse lapeng, ke ne ke atisa ho hlatsoa lijana le Arthur kamehla ha re qeta ho ja. Ka mor’a moo ra qala ho ngollana mangolo. Ka selemo sa 1948, Arthur o ile a boela a hlahleloa teronkong likhoeli tse tharo hape. Ka January 1949 re ile ra nyalana ’me ra lumellana hore re tla kenela tšebeletso ea nako e tletseng molebe. E le hore re tsoele pele re le bo-pula-maliboho, re ile ra sebelisa nako ea rona hamolemo ka hore ha re sa ea tšimong re thuse bahoebi ho kha litholoana masimong. Jehova o ile a hlohonolofatsa boiteko ba rona.

Re Hemsworth ka mor’a lenyalo la rona ka 1949

Selemo hamorao re ile ra kopuoa ho ea Northern Ireland. Ra qala sebakeng se bitsoang Armagh, ’me nakoana ka mor’a moo ra ea Newry. Litorotsoaneng tseo ka bobeli, boholo ho ne ho lula Mak’hatholike. Kaha ba ne ba sa thahaselle moqoqo oa rona ho ne ho se bobebe ho buisana le bona, re ne re lokela ho ba masene ha re buisana le batho ka Bibele. Liboka li ne li tšoareloa ha banyalani ba bang ba Lipaki ba neng ba lula lik’hilomithara tse ka bang 16 ho tloha moo re lulang. Hangata libokeng tseo re ne re e-ba robeli. Haeba re robalelitse, re ne re robala fatše e be re thabela matletse tletse a lijo tsa hoseng ’moho letsatsing le latelang. Hoa thabisa ho tseba hore hona joale Lipaki li ngata haholo sebakeng seo.

“RE TLA ETSA JOALO”

Abuti oa ka le mohats’a hae Lottie ba ne ba se ba ntse ba le Northern Ireland e le bo-pula-maliboho ba khethehileng. Ka 1952, bone ba rona re ile ra ea kopanong ea setereke e neng e tšoaretsoe Belfast. Mor’abo rona e mong o ile a re amohela kaofela lelapeng la hae. A boela a amohela le Pryce Hughes le moemeli oa lekala la Brithani. Bosiung bo bong re ile ra buisana ka ho lokolloa ha bukana ea God’s Way Is Love e neng e lokolloa ho nahannoe haholo-holo ka baahi ba  Ireland. Mor’abo rona Hughes o ile a bua ka bothata ba ho finyella lipelo tsa Mak’hatholike a sebakeng seo sa Ireland. Barab’abo rona ba ne ba ntšoa libakeng tseo ba lulang ho tsona, ba loantšoa ke mahoohoo ka tšusumetso ea baruti. Mor’abo rona Pryce o ile a re: “Re hloka banyalani ba nang le likoloi, ho kenela letšolo la ho fana ka libukana tseo ho potoloha le Ireland.” * Re ile ra arabela hang-hang ra bua mantsoe a hlahang qalong ea pale ena, ra re: “Re tla etsa joalo.”

Re na le bo-pula-maliboho ba bang re palame sethuthuthu se mabili a mane

Bo-pula-maliboho ba ne ba tloaetse ho fihlela Dublin ha morali’abo rona Ma Rutland ea ’nileng a sebeletsa Jehova ka botšepehi. Re ile ra fihlela ha hae eaba re rekisa thepa ea rona e ’ngoe. Robert o ne a e-na le sethuthuthu se palamisang batho ba bane, re ile ra se palama eaba re kena letšolong la ho batlana le koloi eo re ka e rekang. Re ile ra e fumana eaba re kopa hore mong’a eona a e tlise ha rona kaha bobeli re ne re sa tsebe ho khanna. Arthur o ile a qeta mantsiboea ao a lutse betheng, a etsa eka o chencha likere tsa koloi. Letsatsi le latelang ha a leka ho ntša koloi ka karajeng, moromuoa e mong eo lebitso la hae e leng Mildred Willett (eo hamorao a ileng a nyaloa ke John Barr) o ile a fihla. Kaha o ne a tseba ho khanna, o ile a re ruta eaba ka mor’a moo re kena tseleng.

Koloi ea rona le k’haravene

Joale re ne re se re hloka moo re robalang. Re ile ra lemosoa hore re qobe ho robala ka k’haraveneng kaha bahanyetsi ba rona ka ’na ba e chesa. Eaba re batla ntlo letsatsing leo, empa ha rea ka ra e fumana. Bosiung boo, bone ba rona re ile ra robala ka koloing. Letsatsi le latelang, re ile ra fumana k’haravene e nyane e nang le libethe tse peli. E ile ea e-ba ntlo ea rona ka mor’a moo. Bo-rapolasi ba mosa ba ile ba re lumella ho paka k’haravene eo mapolasing a bona. Re ile ra koahela tšimo e bohole ba lik’hilomithara tse 16 ho ea ho tse 24. Ka mor’a moo re ile ra khutlela ho ba thahasellang libakeng tseo re fetileng ho tsona.

Re ile ra chakela libakeng tse ka boroa-bochabela ho Ireland ntle le bothata ba letho ’me ra tsamaisa lingoliloeng tse ka holimo ho 20 000. Eaba re fa ofisi ea lekala ea Brithani mabitso a batho bohle ba thahasellang bao re ba fumaneng. Hona joale ho na le Lipaki tse makholo moo.

RA KHUTLELA ENGELANE EABA REA SCOTLAND

Hamorao re ile ra abeloa ho ea London. Ka mor’a libeke tse seng kae re le moo, Arthur o ile a letsetsoa ke ba ofisi ea lekala ea Brithani ba mo kopa hore a qale mosebetsi oa potoloho letsatsing le latelang. Re ile ra fuoa thupelo ea beke eaba re ea potolohong Scotland. Le hoja Arthur a ne a e-na le nako e fokolang haholo ho lokisetsa lipuo tsa hae, o ne a ikemiselitse ho etsa sohle seo a ka se khonang tšebeletsong ea Jehova. Tsela eo a neng a etsa lintho ka eona e ne e nkhothatsa haholo. Re ne re thabela mosebetsi oa rona oa potoloho. Re ile ra qeta lilemo tse ’maloa tšimong e sa abuoang. Ra thabela ho ba har’a bara le barali babo rona.

Ha Arthur a amoheloa a le mong Sekolong sa Gileade ka 1962 se nkang likhoeli tse leshome, re ne re ipotsa hore na re tl’o etsa joang. Re ile ra etsa qeto  ea hore le hoja ’na ke sa amoheloa, Arthur o lokela ho ea. Ke ile ka abeloa hore ke be pula-maliboho ea khethehileng Hemsworth kaha ke ne se na mothusi. Selemo hamorao ha Arthur a khutla re ile ra abeloa ho ba balebeli ba setereke ’me ra sebetsa Scotland, ka leboea ho Engelane le Ireland.

KABELO E NCHA IRELAND

Ka 1964 Arthur o ile a fuoa kabelo e ncha e le mohlanka oa lekala naheng ea Ireland. Kaha re ne re rata mosebetsi oa ho potoloha, ke ile ka ngongoreha ha re fuoa kabelo eo. Hona joale ke thabile haholo hore ebe re ile ra ba le monyetla oa ho sebeletsa Bethele. Ke lumela hore ha u amohela kabelo eo u ka ’nang oa se ke oa e thabela, Jehova o tla u hlohonolofatsa. Ke ne ke sebetsa ka ofising, ke paka libuka, ke pheha ke bile ke hloekisa. Re ile ra boela ra ba balebeli ba setereke ka nakoana naheng eo. Ho ba balebeli ba setereke ho ile ha re thusa hore re bone tsoelo-pele ea liithuti tsa rona tšebeletsong ea Jehova. Re ile ra ba le metsoalle ea sebele naheng eo ea Ireland. Jehova o re hlohonolofalitse haholo.

BATHO BA BANGATA BA IRELAND E E-BA LIPAKI

Kopano ea pele ea machaba naheng ea Ireland e ne e tšoaretsoe Dublin ka 1965. * Ho sa tsotellehe khanyetso e ileng ea e-ba teng, kopano eo e ile ea atleha. Batho ba 3 948 ba ile ba e-ba teng kopanong eo ’me ha kolobetsoa ba 65. Bohle ba ileng ba amohela baeti ba 3 500 ba tsoang linaheng tse fapaneng ba ile ngolloa mangolo e le ho ba leboha. Le bona ba ne ba thabetse ho ba le baeti bao. Ka nako eo, batho ba bangata e ile ea e-ba Lipaki.

Arthur o lumelisa mor’abo rona Nathan Knorr kopanong ea 1965

Arthur o lokolla Buka ea ka ea Lipale Tsa Bibele Gaelic ka 1983

Le hoja libaka tse ka boroa le leboea tsa Ireland li ne li arohane ka lebaka la lipolotiki le bolumeli, ka 1966 li ile tsa oela tlas’a ofisi ea lekala ea Dublin. Re ne re thabile ho bona batho bao e neng e le Mak’hatholike e e-ba Lipaki ba bile ba sebetsa ’moho le bao e neng e le Maprostanta.

KABELO E NCHA

Ka 2011 ofisi ea lekala ea Brithani e ile la kopanngoa le ea Ireland eaba rona re isoa Bethele e London. Re tsamaile nakong eo ka eona Arthur a neng a kula. O ne a tšoeroe ke lefu la Parkinson. Ka la 20 May, 2015 motsoalle oa ka eo re qetileng lilemo tse 66 re lula ’moho o ile a hlokahala.

Lilemong tsa ho qetela tsa bophelo hae ke ile ka nyahama, ka utloa bohloko ka ba ka siama. Esale Arthur a ntšehetsa ’me ke mo hloloheloa haholo. Ho feta mathateng a tšoanang le ana ho u atametsa haufi le Jehova. Ke ile ka tšelisoa le ke ho bona hore na Arthur o ne a ratoa ke batho ba bangata hakae. Ke fumane mangolo a tsoang ho metsoalle ea rona ho tsoa Brithani, Amerika le Ireland. Mangolo ana le khothatso e tsoang ho abuti oa Arthur e leng Dennis le mosali oa hae Mavis le bana ba abuti oa ka e leng Ruth le Judy li ile tsa nthusa haholo.

Lengolo le ileng la nkhothatsa haholo ke la Esaia 30:18 le reng: “Jehova o tla lebella hore a le bontše mohau, ka hona o tla ema hore a le bontše mohau. Etsoe Jehova ke Molimo oa kahlolo. Ho thaba bohle ba mo lebeletseng.” Hoa tšelisa kannete ho tseba hore Jehova o letile ka mamello ho khutlisetsa lintho malulong le ho re fa likabelo le lefatšeng le lecha.

Ha ke hetla morao, ke sheba bophelo ba rona, ke bona kamoo Jehova a ileng a re tataisa le ho hlohonolofatsa mosebetsi sebakeng seo sa Ireland. Ke thabile hore ebe ke ile ka kenya letsoho keketsehong ea bahoeletsi ba Ireland. Ke ’nete hore ho etsa seo Jehova a reng re se etse ho ka re tlisetsa litlhohonolofatso.

^ ser. 12 Sheba Buka ea Selemo ea Lipaki Tsa Jehova ea 1988, leqepheng la 101 ho ea ho 102.

^ ser. 22 Sheba Buka ea Selemo ea 1988 leqepheng, la 109 ho ea ho 112.