Fetela boitsebisong

Fetela lethathamong la tse ka hare

Thabo e Tlisoang ke ho Phela Bophelo bo Bobebe

Thabo e Tlisoang ke ho Phela Bophelo bo Bobebe

DANIEL LE MIRIAM ba nyalane ka September 2000 eaba ba lula Barcelona, naheng ea Spain. Daniel o re: “Re ne re phela bophelo bo tloaelehileng, re sebetsa mosebetsi o re patalang hantle ’me re ja lireschorenteng tsa maemo, re ea phomolong linaheng tse ling hape re apara liaparo tse turu. Leha ho le joalo, re ne re ntse re ipha nako ea ho ea tšimong kamehla.” Empa lintho li ile tsa fetoha.

Ha ba le kopanong ka 2006, Daniel o ile a angoa ke puo e neng e re: ‘Na re etsa sohle se matleng a rona ho ‘thiba ba thekesellang polaong’ hore ba fumane bophelo bo sa feleng?’ (Liproverbia 24:11) E ile ea hatisa bohlokoa ba ho phatlalatsa molaetsa oa Bibele o pholosang. (Liketso 20:26, 27) Daniel o hopola kamoo a ileng a ikutloa kateng. O re: “Ke ile ka utloa eka Jehova o bua le ’na.” Puo eo ile ea boela ea hatisa taba ea hore ho eketsa tšebeletso ea rona ho tlisa thabo. Daniel o ne a tseba hore seo ke ’nete. Mosali oa hae Miriam e ne e se e ntse e le pula-maliboho ’me o ne a thabile.

Daniel o re: “Ke ile ka ipolella hore ke lokela ho etsa liphetoho tse kholo.” O ile a fela a li etsa. O ile a fokotsa nako eo a e qetang mosebetsing, eaba e ba pula-maliboho, ’me a nahana ka thabo eo eena le mosali oa hae Miriam ba tla e fumana ka ho sebeletsa moo baboleli ba litaba tse molemo ba neng ba fokola ka palo.

MATHATA LE LITHLOHONOLOFATSO

Ka May 2007, Daniel le Miriam ba ile ba tlohella mosebetsi eaba ba fallela naheng ea Panama eo ba kileng ba e chakela. Tšimo eo ba neng ba e sebetsa e ne e le lihlekehlekeng tse nyane karolong ea Bocas del Toro Archipelago e haufi le leoatle la Caribbean, ’me batho ba lulang moo ke Maguaymi. Daniel le Miriam ba ne ba bolokile chelete e itseng, ba nahana hore ba tla lula Panama likhoeli tse robeli.

Ba ne ba ea lihlekehlekeng tseo ka liketsoana le ka baesekele. Ba hopola leeto la bona la pele ka baesekele ba tsamaea sebaka sa lik’ hilomithara tse 32 lithabeng le letsatsing le chesang. Daniel o ile a batla a akheha ke mocheso le mokhathala. Leha ho le joalo ba ile ba thusoa ke malapa a Maguaymi kaha ba ne ba bile ba ithutile lipoleloana tse tloaelehileng tsa puo ea Seguaymi. Ho e-so ee kae ba ne ba se ba ithuta Bibele le batho ba 23.

Ka bomalimabe chelete eo ba neng ba e-na le eona e ile ea fela. Daniel o re: “Re ne re lla ha re nahana hore re tlameha ho khutlela Spain. Re ne re utloa bohloko le ho feta ha re nahana ka ho arohana le batho bao re ithutang Bibele le bona.” Empa khoeli hamorao ba ile ba fumana litaba tse monate. Miriam o re: “Re ile ra khethoa re le bo-pula-maliboho ba khethehileng. Re ile ra thaba haholo ha re khona ho tsoela pele kabelong ea rona.”

THABO E KHOLO KA HO FETISISA

Ka lebaka la liphetoho tse ileng tsa etsoa ka mokhatlong oa Jehova, Daniel le Miriam ba ile ba koptjoa ho sebeletsa e le bo-pula-maliboho ba kamehla ka 2015. Ba ile ba etsa joang? Ba ile ba tšepa tšepiso ea Molimo e hlahang ho Pesaleme ea 37:5 e reng: “Rōlela tsela ea hao ho Jehova, U itšetlehe ka eena, ’me o tla nka bohato.” Ba ile ba fumana mosebetsi hore ba khone ho itlhokomela ha e ntse e le bo-pula-maliboho ba kamehla, ’me hona joale ba phuthehong e ’ngoe e profinseng ea Veraguas, Panama.

Daniel o re: “Pele re tloha Spain, re ne re ipotsa hore na re tla khona ho phela bophelo bo bobebe. Re se re phela bophelo bo bobebe ’me ha re haelloe ke letho le molemo.” Ke eng e ba thabisitseng haholo? Ba re: “Ha ho ntho e tlisang thabo e kholo ho feta ho thusa batho ba ikokobelitseng ho tseba Jehova.”