Fetela boitsebisong

Fetela lethathamong la tse ka hare

Re Lokela ho Bonahatsa Lerato

Re Lokela ho Bonahatsa Lerato

MOAPOSTOLA PAULUSE o ile a bua ka makhabane a robong ao moea o halalelang o ka re thusang ho ba le ’ona. (Bagal. 5:22, 23) Pauluse o ile a re makhabane ao kaofela ke “litholoana tsa moea.” * Makhabane ana ke ’ona “botho bo bocha.” (Bakol. 3:10) Ha motho a e-na le moea o halalelang, o tla bonahatsa makhabane ana feela joalokaha sefate se e-ba le litholoana ha se nosetsoa.—Pes. 1:1-3.

Pauluse o ile a qala pele a bua ka lerato. Lerato le bohlokoa hakae? Pauluse o ile a re motho ea seng lerato ha se “letho.” (1 Bakor. 13:2) Empa hantle-ntle lerato ke eng, hona re ka etsa’ng letsatsi le letsatsi ho bontša hore re batho ba lerato?

MOTHO EA LERATO O JOANG?

Le hoja ho le thata ho hlalosa hore na lerato ke eng, Bibele eona ea bontša hore na motho ea lerato o joang. Ka mohlala, e re motho ea lerato oa ‘tiisetsa ’me o mosa.’ E boetse e re ‘o thabela ’nete’ ’me o ‘jara lintho tsohle, o lumela lintho tsohle, o tšepa lintho tsohle, o mamella lintho tsohle.’ Hape, motho ea lerato o rata batho ba bang ho tsoa pelong ebile o ba tsotella haholo. Leha ho le joalo, motho ea se nang lerato o mona, oa ikhohomosa, o itšoara hampe, o icheba boeena ebile ha a tšoarele batho ba bang. Motho ea lerato eena “ha a batle lithahasello tsa hae.”—1 Bakor. 13:4-8.

JEHOVA LE JESU BA RATA BATHO

“Molimo ke lerato.” Jehova ke eena ea lerato ka ho fetisisa. (1 Joh. 4:8) Lintho tsohle tseo a li entseng lia bontša hore o lerato. Ntho e kholo ka ho fetisisa eo a e entseng ho bontša hore o rata batho ke ea ho romela Jesu hore a tl’o hlokofatsoa le ho bolaoa molemong oa rona. Moapostola Johanne o ile a re: “Lerato la Molimo le ile la bonahatsoa ho rōna ka sena, hobane Molimo o ile a romela Mora oa hae ea tsoetsoeng a ’notši lefatšeng e le hore re ka fumana bophelo ka eena. Lerato le ka tsela ena, eseng hore re ratile Molimo, empa hore o ile a re rata ’me a romela Mora oa hae e le sehlabelo sa poelano bakeng sa libe tsa rōna.” (1 Joh. 4:9, 10) Kaha Jehova oa re rata, o re tšoarela libe tsa rona ebile o tšepisa ho re fa bophelo bo sa feleng.

Jesu o ile a bontša hore o rata batho ka ho etsa thato ea Molimo. Pauluse o ile a re: “[Jesu] o re: ‘Bona! Ke tlile ho etsa thato ea hao.’ . . . Ka ‘thato’ e boletsoeng re halalelitsoe ka ho nyeheloa ha ’mele oa Jesu Kreste hang le ka ho ke keng ha phetoa.” (Baheb. 10:9, 10) Jesu o lerato ho feta motho e mong le e mong. O ile a re: “Ha ho ea nang le lerato le leholo ho lena, hore motho a nehelane ka moea oa hae molemong oa metsoalle ea hae.” (Joh. 15:13) Joale na re ka khona ho etsisa Jehova le Jesu ka hore re be lerato le hoja re sa phethahala? E, re ka khona. Re tl’o hlahloba hore na re ka ba etsisa joang.   

“LE TSOELE PELE HO TSAMAEA LERATONG”

Pauluse o re: “Le be baetsisi ba Molimo, joaloka bana ba ratoang, ’me le tsoele pele ho  tsamaea leratong, feela joalokaha Kreste le eena a ile a le rata ’me a inehela bakeng sa lōna.” (Baef. 5:1, 2) Re lokela ho “tsamaea leratong” ka hore letsatsi le letsatsi re etse lintho tse bontšang hore re lerato ho e-na le hore re bue feela hore re lerato. Johanne o ile a re: “Bana ba banyenyane, a re se keng ra rata ka lentsoe kapa ka leleme, empa re rate ka ketso le ’nete.” (1 Joh. 3:18) Ka mohlala, re lokela ho bolella baahisani ba rona “litaba . . . tse molemo tsa ’muso” ho bontša hore re rata Molimo hammoho le baahisani ba rona. (Mat. 24:14; Luka 10:27) Hape, re lokela ho ba le mamello, re be mosa ’me re tšoarelane hobane Bibele e re: “Esita le joalokaha Jehova a ile a le tšoarela ka bolokolohi, le etse joalo le lōna.”—Bakol. 3:13.   

Leha ho le joalo, ho ba lerato ha ho bolele hore ha rea lokela ho khalemela kapa ho eletsa batho ba bang. Ka mohlala, motsoali a ka leka ho tholisa ngoana oa hae ea tefang ka hore nako ena kaofela ha ngoana a lla, a mo fe ntho e ’ngoe le e ’ngoe eo a e batlang. Empa haeba motsoali a rata ngoana oa hae, o tla mo khalemela ha ho hlokahala hore a etse joalo. Ke ’nete hore Jehova o lerato, empa le eena “o laea eo a mo ratang.” (Baheb. 12:6) Kahoo, le batsoali ba lokela ho bontša hore ba lerato ka hore ba khalemele bana ba bona ha ho hlokahala. (Liprov. 3:11, 12) Hape, re lokela ho hopola hore kaha ha rea phethahala, ka linako tse ling re ka hloleha ho etsa lintho tse bontšang hore re lerato. Kahoo, ke joang re ka ntlafatsang tsela eo re etsang lintho ka eona hore re bontše hore re lerato? Re tl’o hlahloba lintho tse tharo tseo re ka li etsang.

RE KA ETSA’NG HORE RE BE LERATO HAHOLOANYANE?

Kaha moea o halalelang o ka re thusa hore re be lerato, ntho ea pele eo re ka e etsang ke hore re rapele Jehova re mo kope hore a re thuse ka ’ona. Jesu o ile a re Jehova o fa batho “ba mo kōpang” moea o halalelang. (Luka 11:13) Haeba re rapela Jehova re mo kopa hore a re thuse ka moea o halalelang ’me re ‘tsamaea ka moea,’ re tla khona ho etsa lintho tse bontšang hore re lerato. (Bagal. 5:16) Ka mohlala, haeba u moholo ka phuthehong, u ka kopa hore Jehova a u thuse ka moea o halalelang e le hore u eletse Mokreste-’moho le uena kapa motho e mong ka tsela e bontšang hore u lerato. Kapa haeba u motsoali, u ka kopa Jehova hore a u thuse ka moea o halalelang hore u se ke oa halefela bana ba hao, empa u ba khalemele ka tsela e bontšang hore oa ba rata.

Ntho ea bobeli eo u ka e etsang ke hore u nahane ka tsela eo Jesu a ileng a bontša hore o lerato esita leha a ne a utloisoa bohloko. (1 Pet. 2:21, 23) Re ka etsa joalo haholo ha motho e mong a re hatile torong kapa ha re tšoaroa ka leeme ka tsela e itseng ka hore re ipotse hore na Jesu eena o ne a ka etsa’ng ha a utloisitsoe bohloko. Morali’abo rona Leigh o re ho etsa joalo ho ile ha mo thusa hore a se ke a potlakela ho halefa. O re: “Ka le leng, ’mè e mong eo ke sebetsang le eena o ile a romella basebetsi-’moho le ’na molaetsa oo ho oona a neng a bua hampe ka ’na le mosebetsi oo ke o etsang. Ke ile ka utloa bohloko haholo. Empa ka ipotsa hore na nka etsisa Jesu joang le hore na eena a ka be a ile a etsa’ng haeba a ne a le boemong boo. Kahoo, ka etsa qeto ea hore ke tlohele taba eo ’me ke se ke ka nahana ka thata ka eona. Ka mor’a nako, ke ile ka tseba hore ’mè eo o ne a imetsoe kelellong ka lebaka la bokulo bo neng bo mo tšoere. Kahoo, ka nahana hore e ka ’na eaba o ne a buile hampe ka ’na hobane a ne a imetsoe kelellong, eseng hobane a ne a batla. Ho nahanisisa ka tsela eo Jesu a neng a le lerato ka eona leha a ne a utloisoa bohloko ho ile ha nthusa hore le ’na ke rate mosebetsi-’moho le ’na le hoja a ne a nkutloisitse bohloko.” Re tla lula re etsa lintho tse bontšang hore re lerato hafeela re etsisa Jesu.

Ntho ea boraro eo re ka e etsang ke hore re rate Bakreste-’moho le rona feela joalokaha Jesu a ile a re rata, hobane Bakreste ba ’nete ba tsebahala ka ho ratana joalo. (Joh. 13:34, 35) Bibele e re re be le “boikutlo . . . ba kelello” bo tšoanang le boo Jesu a neng a e-na le bona.  Jesu o ile “a ikhokhotha . . . ho isa lefung” molemong oa rona. (Bafil. 2:5-8) Haeba re nahanisisa ka tsela eo a ileng a re rata ka eona, re tla ba le maikutlo a tšoanang le a hae ’me re mo etsise. Ke melemo efe e meng eo re ka e fumanang ha re etsa lintho tse bontšang hore re lerato?

RE KA FUMANA MELEMO EFE?

Ha re bontša hore re batho ba lerato, re ka fumana melemo e mengata. E meng ea eona ke ena:

Re ka fumana melemo efe ha re bontša hore re lerato?

  • BAKRESTE-’MOHO LE RONA LEFATŠENG LOHLE BA TLA RE RATA: Kaha rea ratana, re kholisehile hore Bakreste-’moho le rona ba phutheho efe kapa efe lefatšeng lohle eo re ka fihlang ho eona ba tla re amohela ka mofuthu. Re hlohonolofetse haholo ka hore ebe re karolo ea ‘mokhatlo oohle oa barab’abo rona lefatšeng.’ (1 Pet. 5:9) Ha ho na batho bafe kapa bafe mona lefatšeng ba ratanang ho feta batho ba Molimo.

  • KHOTSO: Haeba re ‘mamellana ka lerato,’ ho ba le “tlamo e kopanyang ea khotso” pakeng tsa rona le Bakreste-’moho le rona. (Baef. 4:2, 3) Kahoo, re natefeloa haholo ke liboka le likopano. Khotso ena e teng pakeng tsa rona le Bakreste-’moho le rona ke eona e etsang hore re fapane hole le batho ba lefatše lena ba se nang khotso. (Pes. 119:165; Esa. 54:13) Ha re loanela ho ba le khotso le batho ba bang, rea bontša hore re ba rata ho tsoa pelong ’me Jehova o tla thaba.—Pes. 133:1-3; Mat. 5:9.

“LERATO LEA HAHA”

Pauluse o ile a re: “Lerato lea haha.” (1 Bakor. 8:1) Joang? Moapostola Pauluse o ile a hlalosa khaolong ea 13 ea Lengolo la pele la Bakorinthe hore na lerato le haha joang. O ile a bontša hore motho ea lerato o nahanela batho ba bang. (1 Bakor. 10:24; 13:5) Hape, kaha batho ba lerato ba mosa, ba nahanela batho ba bang ebile ba na le mamello, ba etsa hore ba malapa a bona hammoho le Bakreste-’moho le bona ba thabe ’me ba momahane.—Bakol. 3:14.

Ho rata Molimo ke eona ntho ea bohlokoa ka ho fetisisa. Ha re rata Jehova, re mo sebeletsa “ka mahetla a bapileng” hammoho le Bakreste-’moho le rona ba merabe le lipuo tsohle. (Sof. 3:9) Kahoo, a re ikemisetseng ho bontša hore re batho ba lerato letsatsi le letsatsi.

^ ser. 2 Sehlooho sena ke sa pele ho tse robong tse tla bua ka makhabane ana ka ho latellana.