Fetela boitsebisong

Fetela lethathamong la tse ka hare

“Llang le Batho ba Llang”

“Llang le Batho ba Llang”

“Le ’ne le tšelisane le ho hahana.” —1 Bathes. 5:11.

LIPINA: 121, 75

1, 2. Ke hobane’ng ha re lokela ho tšelisa batho ba hlokahalletsoeng? (Sheba setšoantšo se qalong.)

MORALI’ABO RONA SUSI o re: “Esita le ka mor’a selemo mora oa rona a hlokahetse, re ntse re utloile bohloko bo tebileng.” Mor’abo rona e mong eena o re ha molekane oa hae a hlokahala, o ile a utloa bohloko boo a sa khoneng ho bo hlalosa. Ha se bona feela ba ileng ba utloa bohloko bo joalo. Batho ba bangata ka phuthehong ba hlokahalletsoe ka tšohanyetso ke batho bao ba ba ratang. Haeba u hlokahalletsoe kapa u tseba motho ea hlokahalletsoeng, u ka ’na oa ipotsa hore na batho ba siameng ba ka thusoa joang hore ba tšelisehe.

2 Hangata batho ba ee ba re ha nako e ntse e e-ea ho tla loka. Empa na ho bolela hore ka mor’a nako bohloko boo bo tla fela? ’Mè e mong ea hlokahalletsoeng ke molekane o re: “Ke ithutile hore bohloko bo ka kokobela ho latela hore na u sebelisa nako ea hao joang.” Joalokaha bohloko ba leqeba bo kokobela ha le hlokomeloa, bohloko ba ho hlokahalloa  bo ka kokobela haeba motho ea utloileng bohloko a tšelisoa. Ke’ng e ka thusang batho ba siameng hore ba tšelisehe?

JEHOVA KE “MOLIMO OA MATŠELISO ’OHLE”

3, 4. Ke hobane’ng ha re kholisehile hore Jehova oa utloisisa hore motho ea hlokahalletsoeng o hloka matšeliso?

3 Re kholisehile hore Ntate oa rona e leng Jehova Molimo, ke eena ea ka re tšelisang ho feta mang kapa mang. (Bala 2 Bakorinthe 1:3, 4.) Kaha ke eena mohlala o phethahetseng oa ho utloela batho bohloko, o ile a re ho batho ba hae: “Ke ’na Ea le tšelisang.”—Esa.51:12; Pes. 119:50, 52, 76.

4 Jehova Ntate oa rona ea re ratang le eena o ile a hlokahalloa ke batho bao a ba ratang, ba akhang Abrahama, Isaka, Jakobo, Moshe le Morena Davida. (Num. 12:6-8; Mat. 22:31, 32; Lik. 13:22) Lentsoe la hae le re o labalabela ho ba tsosa kaofela. (Jobo 14:14, 15) Ba tla lula ba thabile ba bile ba phetse hantle. Hopola hore Mora oa Jehova “eo a neng a mo rata ka ho khethehileng” o ile a shoa lefu le bohloko. (Liprov. 8:22, 30) Bohloko boo Jehova a ileng a bo utloa ha bo hlalosehe.—Joh. 5:20; 10:17.

5, 6. Jehova o re tšelisa joang?

5 Kaha re kholisehile hore Jehova o tla re tšelisa, re mo rapela hore a re thuse. Kahoo ha rea lokela ho tsilatsila ho mo kopa hore a re tšelise. Re khothatsoa ke ho tseba hore Jehova o utloisisa kamoo re utloileng bohloko kateng ’me oa re tšelisa. Empa Jehova o re tšelisa joang?

6 Jehova a ka re thusa ka ‘matšeliso a moea o halalelang.’ (Lik. 9:31) Kaha moea o halalelang ke matla a hae a sebetsang, o re tšelisa ka oona. Jesu o ile a re “Ntate ea leholimong o tla fana ka moea o halalelang . . . ho ba mo kōpang.” (Luka 11:13) Morali’abo rona Susi eo re buileng ka eena pejana o re: “Ka makhetlo re ne re rapela re kopa Jehova hore a re tšelise. Kamehla khotso ea hae e ne e lebela lipelo tsa rona le likelello tsa rona.”—Bala Bafilipi 4:6, 7.   

JESU O RE UTLOELA BOHLOKO

7, 8. Ke’ng e re kholisang hore Jesu o tla re tšelisa?

7 Tsela eo Jesu a neng a utloela batho bohloko ka eona ha a le lefatšeng, e bontša hantle hore na Jehova o ikutloa joang ka batho. (Joh. 5:19) Jesu o ne a rometsoe lefatšeng hore a tšelise batho ba “robehileng lipelo” le “bohle ba siameng.” (Esa. 61:1, 2; Luka 4:17-21) Ke kahoo a neng a tsebahala ka ho utloela batho bohloko le ho labalabela ho ba thusa.—Baheb. 2:17.

8 Ha a sa le mocha, o ile a hlokahalloa ke litho tsa lelapa le metsoalle. Ho bonahala hore Josefa, e leng ntate oa hae, o ile a hlokahala ha Jesu a sa le mocha haholo. * Nahana hore na Jesu ea neng a le mocha ka nako eo, o ne a ikutloa joang ka mor’a ho hlokahalloa ke ntate a bile a lokela ho tšelisa ’mè oa hae le banab’abo.

9. Jesu o ile a bontša joang hore o utloela batho bohloko?

 9 Ha Jesu a etsa mosebetsi oa ho bolela ka ’Muso oa Molimo, o ne a utloela batho bohloko a bile a ba nahanela. Hopola mohla Lazaro a neng a hlokahetse. Le hoja Jesu a ne a tseba hore o tl’o mo tsosa, o ile a utloa bohloko boo Maria le Maretha ba neng ba bo utloa. O ne a utloile bohloko hoo a ileng a ba a lla.—Joh. 11:33-36.

10. Re kholisoa ke’ng hore Jesu o re utloela bohloko?

10 Lintho tseo Jesu a ileng a li etsa tse bontšang hore o tsotella batho, li ka re thusa joang? Bibele e re “Jesu Kreste oa tšoana maobane le kajeno, le ka ho sa feleng.” (Baheb. 13:8) Kaha Jesu “Moemeli ea ka Sehloohong oa bophelo” o tseba hantle hore na ho joang ho siama, “o khona ho phallela ba ntseng ba lekoa.” (Lik. 3:15; Baheb. 2:10, 18) Kahoo, re kholisehile hore Jesu o ntse a utloisisa bohloko ba ho shoeloa ’me o tla re tšelisa “ka nako e nepahetseng.”—Bala Baheberu 4:15, 16.

“MATŠELISO A TSOANG MANGOLONG”

11. U ee u tšelisoe ke Mangolo afe?

11 Tsela eo Jesu a ileng a utloa bohloko ka eona ha Lazaro a shoele, ke e ’ngoe ea litlaleho tsa Bibele tse re tšelisang haholo. Lebaka ke hore “lintho tsohle tse ileng tsa ngoloa nakong e fetileng li ile tsa ngolloa ho re laea, e le hore ka mamello ea rōna le ka matšeliso a tsoang Mangolong re ka ba le tšepo.” (Baroma 15:4) Haeba u hlokahalletsoe, u ka tšelisoa ke Mangolo a latelang:   

  • “Jehova o haufi le ba lipelo li robehileng; O pholosa ba sithabetseng moeeng.”—Pes. 34:18, 19.

  • “Ha menahano ea ka e hlokisang botsitso e ngatafala ka hare ho ’na, matšeliso a hao [Jehova] a ile a qala ho hlabolla moea oa ka.”—Pes. 94:19.   

  • “E se eka Morena oa rōna Jesu Kreste le Molimo Ntate, ba ileng ba re rata eaba ba fana ka matšeliso a sa feleng le tšepo e molemo ka mosa o sa tšoanelang, ba ka tšelisa lipelo tsa lōna le ho le tiisa.”—2 Bathes. 2:16, 17. *

LITHO TSA PHUTHEHO LI KA RE TŠELISA

12. Ke ntho efe e molemo eo re ka e etsang ho tšelisa batho?

12 Re ka boela ra tšelisoa ke litho tsa phutheho. (Bala 1 Bathesalonika 5:11.) Ke joang u ka tšelisang “moea o hlomohileng”? (Liprov. 17:22) Hopola hore ho na le “nako ea ho khutsa le nako ea ho bua.” (Moek. 3:7) ’Mè Dalene ea hlokahalletsoeng ke molekane o re: “Motho ea hlokahalletsoeng o hloka ho ntša maikutlo. Kahoo, ntho e molemo ka ho fetisisa eo u ka e etsang ke hore u mo mamele ka hloko u sa mo kene hanong.” Morali’abo rona Junia eo abuti oa hae a ileng a ipolaea o re: “Le hoja u ke ke oa utloisisa hantle hore na motho ea hlokahalletsoeng o ikutloa joang, taba ea bohlokoa ke ho leka ho utloisisa hore na o ikutloa joang.”

13. Ke’ng eo re lokelang ho e hopola ka tsela eo batho ba utloang bohloko ka eona?

13 Hopola hore batho ha ba utloe bohloko ka tsela e tšoanang. Kaha bohloko ba seeta bo utluoa ke mong’a sona, ho ka ba thata hore motho ea hlokahalletsoeng a hlalose hore na o ikutloa  joang. Bibele e re: “Motho o tseba bohloko ba pelo ea hae, ha ho e mong ea ka utloang thabo ea eona.” (Liprov. 14:10, BPN) Esita leha motho a ka leka ho hlalosa kamoo a ikutloa kateng, ha ho bonolo hore batho ba bang ba utloisise hantle hore na o re’ng.

14. Ke joang re ka tšelisang batho ba hlokahalletsoeng?

14 Kahoo, re ka thatafalloa ho tseba hore na re re’ng ho motho ea hlokahalletsoeng. Leha ho le joalo, Bibele e re “maleme a ba bohlale ke pholiso.” (Liprov. 12:18) Batho ba bangata ba buisana le batho ba hlokahalletsoeng ka bukana ea Ha Eo U Mo Ratang A E-shoa. * Empa hangata ntho e ka tšelisang le ho feta ke ho ‘lla le batho ba llang.’ (Bar. 12:15) ’Mè Gaby ea hlokahalletsoeng ke molekane o re: “Hangata ha ke utloile bohloko kea lla. Kahoo kea tšeliseha ha batho ba lla le ’na. Kea hlokomela hore ha ke motoai-toai.”

15. Re ka tšelisa batho joang haeba re thatafalloa ho bua le bona? (Sheba lebokose le reng “ Mantsoe a Tšelisang)

15 Haeba u thatafalloa ho bua le motho ea hlokahalletsoeng, ho ka ba bonolo ho mo tšelisa ka ho mo ngolla karete, lengolo kapa ho mo romella molaetsa. U ka qotsa temana e itseng, oa ngola ka makhabane a motho eo ea hlokahetseng kapa oa bua ka lintho tse monate tse ileng tsa etsahala a le teng. Morali’abo rona Junia o re: “Ha ke fumana molaetsa o mokhutšoanyane o tšelisang kapa Bakreste-’moho le ’na ba kopa hore ke ba chakele, ke tšeliseha haholo. Kea hlokomela hore baa nthata ebile baa ntsotella.”

16. Ntho ea bohlokoa ka ho fetisisa eo re ka e etsang ho tšelisa batho ke efe?

 16 Lithapelo tsa rona li ka thusa Bakreste-’moho le rona ba hlokahalletsoeng. Re ka ba rapella ra ba ra rapela le bona. Le hoja ho ka ba thata ho rapela nakong eo e boima, ha re rapella motho ea siameng, le haeba re rapela re ntse re lla, le lentsoe le thothomela, thapelo eo e ka mo thusa haholo hore a tšelisehe. Morali’abo rona Dalene o re: “Ka linako tse ling ha baralib’abo rona ba tl’o ntšelisa, ke ee ke ba kope hore ba rapele le ’na. Le hoja ha ba qala ho etsa thapelo mantsoe a bona a thothomela, ka mor’a ho bua lipolelo tse seng kae, mantsoe a bona aa tiea ebe ba etsa thapelo e nthobang pelo. Ha ke bona tsela eo ba ratang Jehova kateng le kamoo ba ntsotellang kateng, tumelo ea ka ea matlafala.”

LE ’NE LE TŠELISE BA SIAMENG

17-19. Ke hobane’ng ha re lokela ho lula re tšelisa batho ba siameng?

17 Batho ha ba tšelisehe ka mor’a nako e lekanang. Kahoo, e-ba teng ho tšelisa motho ea siameng, eseng feela matsatsi ka mor’a lefu nakong eo ba lelapa le metsoalle ba leng teng, empa le likhoeli ka mor’a hore batho bohle ba ee malapeng. “Motsoalle oa ’nete o lerato ka linako tsohle, ’me ke mor’abo motho ea tsoaletsoeng ha ho e-na le mahlomola.” (Liprov. 17:17) Re lokela ho tšelisa Bakreste-’moho le rona nakong eo ba siameng, ho sa tsotellehe hore na ho nka nako e kae hore ba tšelisehe.—Bala 1 Bathesalonika 3:7.

18 Hopola hore motho ea hlokahalletsoeng a ka boela a utloa bohloko ka lebaka la lintho tse kang ’mino, lifoto, liketsahalo, menko e itseng, melumo, letsatsi le itseng joaloka la lenyalo kapa nako ea selemo. Lintho tse ngata tseo motho ea hlokahalletsoeng ke molekane a li etsang a le mong ka lekhetlo la pele, tse kang ho ea kopanong kapa Sehopotsong, li ka mo utloisa bohloko haholo. Mor’abo rona e mong o re: “Ke ne ke tseba hore ke tla utloa bohloko haholo ha letsatsi leo re nyalaneng ka lona le fihla. ’Me ho ile ha fela ha e-ba boima. Empa Bakreste-’moho le ’na ba ile ba nketsetsa ’moka o monyenyane hore ke se ke ka ba mong.”

19 Empa batho ba hlokahalletsoeng ba hloka ho tšelisoa ka linako tsohle, eseng feela ka matsatsi a khethehileng. Morali’abo rona Junia o re: “Lintho tseo batho ba ileng ba nketsetsa tsona leha e se ka letsatsi le khethehileng, li nthusitse haholo hore ke tšelisehe.” Le hoja re ke ke ra koala sekheo sa motho ea hlokahetseng, re ka tšelisa motho ea siameng ka hore re mo thuse ka hohle kamoo re ka khonang. (1 Joh. 3:18) Morali’abo rona Gaby o re: “Ke leboha Jehova haholo hore ebe o ile a sebelisa baholo ho ntlhokomela nakong eo ke neng ke oele ka phatla. Ba entse hore ke utloe hore Jehova oa nthata.”

20. Ke hobane’ng ha lintho tseo Jehova a li tšepisang li re tšelisa?

20 Hoa tšelisa ho tseba hore Jehova, Molimo oa matšeliso ’ohle, o tla felisa lefu ebe ‘bohle ba mabitleng a khopotso ba utloa lentsoe la [Jesu] ’me baa tsoa.’ (Joh. 5:28, 29) Bibele e re: “O tla metsa lefu ka ho sa feleng, ’me ka sebele ’Musi Morena Jehova o tla hlakola meokho lifahlehong tsohle.” (Esa. 25:8) Ho e-na le hore re ‘lle le batho ba llang,’ re tla ‘thaba le batho ba thabileng.’—Bar. 12:15.

^ ser. 8 Bibele e bua ka Josefa ka lekhetlo la ho qetela ha Jesu a le lilemo li 12. Ha Jesu a etsa mohlolo oa pele oa ho fetola metsi veine, ha ho moo ho buuoang ka Josefa ka nako eo kapa liketsahalong tse ling. Ha Jesu a le thupeng ea tlhokofatso, o ile a re moapostola Johanne a sale a hlokomela ’mè oa hae. Jesu a ka be a sa cho joalo haeba Josefa a ne a ntse a phela.—Joh. 19:26, 27.

^ ser. 14 Sheba le sehlooho se reng “Tšelisa ba Hlokahaletsoeng, Joalokaha Jesu a Ile a Etsa” se hlahang ho Molula-Qhooa oa November 1, 2010.