Fetela boitsebisong

Fetela lethathamong la tse ka hare

Lipotso Tse Tsoang ho Babali

Lipotso Tse Tsoang ho Babali

Ke eng se boleloang ke ho kopanngoa ha lithupa tse peli tse hlalositsoeng ho Ezekiele khaolo ea 37?

Jehova o ile a fa Ezekiele molaetsa, a tšepisa hore o tla momahanya sechaba sa Iseraele ka mor’a hore se khutlisetsoe Naheng e Tšepisitsoeng. Molaetseng oo o ile a boela a profeta hore o tla momahanya batho ba hae matsatsing ana a ho qetela.

Jehova o ile a laela moprofeta Ezekiele hore a ngole lithupeng tse peli. Thupeng ea pele o ne a lokela ho ngola mantsoe a reng, “Bakeng sa Juda le bakeng sa bara ba Iseraele balekane ba eona” ’me ho ea bobeli a reng, “Bakeng sa Josefa, thupa ea Efraime, le ntlo eohle ea Iseraele balekane ba eona.” Lithupa tseo tse peli li ne li lokela ho fetoha “ntho e le ’ngoe” ka letsohong la Ezekiele.—Ezek. 37:15-17.

Lentsoe “Efraime” le emela’ng? Morena oa pele oa ’muso o ka leboea oa meloko e leshome, ea bitsoang Jeroboame, o ne a tsoa lesikeng la Efraime, e leng lona le neng le le ka sehloohong.  (Deut. 33:13, 17; 1 Mar. 11:26) Lesika lena le tsoa ho mora oa Josefa ea bitsoang Efraime. (Num. 1:32, 33) Josefa o ile a hlohonolofatsoa ka tsela e ikhethang ke ntate oa hae, Jakobo. Kahoo, ho ne ho loketse hore thupa e emelang ’muso oa meloko e leshome e bitsoe “thupa ea Efraime.” Nakong eo Ezekiele a ngolang boprofeta bo mabapi le lithupa tse peli, e ne e se e le khale ’muso o ka leboea oa Iseraele o isitsoe botlamuoeng ke Baassyria ka selemo sa 740 pele ho mehla ea Kreste. (2 Mar. 17:6) Ka hona, ka nako eo boholo ba Baiseraele bao ba ne ba se ba hasane libakeng tse busoang ke Babylona, kaha ba Bababylona ba ne ba se ba lihetse ’Muso oa Assyria.

Ka selemo sa 607 pele ho mehla ea Kreste, Baiseraele ba ’musong o ka boroa oa meloko e ’meli, mohlomong le ba setseng ba ’musong o ka leboea ba ile ba isoa botlamuoeng Babylona. Meloko e ’meli e ne e busoa ke marena a lesika la Juda, ’me a ne a amahanngoa le leloko la baprista, kaha baprista ba ne ba sebeletsa tempeleng e Jerusalema. (2 Likron. 11:13, 14; 34:30) Kahoo, ho ne ho loketse hore thupa e emelang ’muso oa meloko e ’meli ho thoe ke e “bakeng sa Juda.”

Lithupa tsee tse peli tsa tšoantšetso li ile tsa kopanngoa neng? Ha Baiseraele ba khutlela Jerusalema ho ea tsosolosa tempele ka selemo sa 537 pele ho mehla ea Kreste. Baiseraele ba tsoang ’musong oa meloko e ’meli le ba tsoang ’musong oa meloko e leshome ba ile ba khutla hammoho botlamuoeng. Ho ne ho se ho se na lekhalo lipakeng tsa bara ba Iseraele. (Ezek. 37:21, 22) Baiseraele ba ne ba boetse ba rapela Jehova ba momahane. Moprofeta Esaia le moprofeta Jeremia le bona ba ne ba boletse sena esale pele.—Esa. 11:12, 13; Jer. 31:1, 6, 31.

Boprofeta boo bo hatisa ntlha efe ea bohlokoa e mabapi le borapeli ba ’nete? Bo bontša hore Jehova o tla momahanya barapeli ba hae hore e be “ntho e le ’ngoe.” (Ezek. 37:18, 19) Na boprofeta boo boa phethahala mehleng ee? E. Bo qalile ho phethahala ka 1919, ha batho ba Molimo ba ne ba hlophisoa bocha ’me ba momahanngoa. Boiteko ba Satane ba ho ba arola ka ho feletseng bo hlōlehile.

Boholo ba batho ba ileng ba momahanngoa ka nako eo ba ne ba e-na le tšepo ea ho ba marena le baprista leholimong le Jesu. (Tšen. 20:6) Ba ne ba tšoana le thupa e bakeng sa Juda ka tsela ea tšoantšetso. Leha ho le joalo, ha nako e ntse e ea batho ba nang le tšepo ea ho phela lefatšeng ba ile ba qala ho ikopanya le monna oa Mojuda. (Zak. 8:23) Ba ne ba tšoana le thupa e bakeng sa Josefa ka tsela ea tšoantšetso, ’me ba se na tšepo ea ho busa le Kreste.

Lihlopha tsena tse peli li sebeletsa Jehova li momahane kajeno, e le batho ba Jehova ba busoang ke Morena a le mong, Jesu Kreste, eo ho ileng ha boleloa esale pele hore o tla bitsoa “mohlanka oa ka Davida.” (Ezek. 37:24, 25) Jesu o ile a rapella hore balateli bohle ba hae ‘ba be bonngoeng, feela joalokaha Ntate oa hae, a le bonngoeng le eena ’me eena a le bonngoeng le Ntate oa hae.’ * (Joh. 17:20, 21) Jesu o ile a boela a bolela esale pele hore mohlatsoana oa batlotsuoa e tla ba “mohlape o le mong” le “linku tse ling” tsa hae. Kaofela ba tla ba tlas’a ‘molisa a le mong.’ (Joh. 10:16) Mantsoe a Jesu a hlalosa bonngoe ba batho ba Jehova ba mehleng ena hantle, ho sa tsotellehe hore na ba na le tšepo efe!

^ ser. 10 Hoa thahasellisa ho bona tatellano ea lipapiso tseo Jesu a ileng a li etsa tseo e leng karolo ea letšoao la boteng ba hae. O ile a qala ka ho bua ka “lekhoba le tšepahalang le le masene,” e leng sehlopha se senyenyane sa barab’abo ba batlotsuoa ba neng ba tla etella pele. (Mat. 24:45-47) Eaba o etsa lipapiso tse neng li tobisitsoe ho bohle ba nang le tšepo ea ho phela leholimong. (Mat. 25:1-30) O ile a qetella ka ho bua ka ba nang le tšepo ea ho phela lefatšeng ba neng ba tla tšehetsa barab’abo Kreste. (Mat. 25:31-46) Ka ho tšoanang, le mehleng ea kajeno boprofeta ba Ezekiele bo bontša se tla etsahalla ba nang le tšepo ea ho phela leholimong. Le hoja e se kamehla ’muso oa meloko e leshome o emelang ba nang le tšepo ea ho phela lefatšeng, ho momahanngoa hoo ho buuoang ka hona boprofeteng bona ho re hopotsa bonngoe bo teng pakeng tsa ba nang le tšepo ea ho phela lefatšeng le ba nang le tšepo ea ho phela leholimong.