Fetela boitsebisong

Fetela lethathamong la tse ka hare

 PALE EA BOPHELO

Ho Ithuta Mehlaleng e Metle ho Entse Hore ke Hlohonolofatsoe Haholo

Ho Ithuta Mehlaleng e Metle ho Entse Hore ke Hlohonolofatsoe Haholo

HA KE sa le ngoana, ho ne ho le thata hore ke ee tšimong. Ha ke ntse ke hola, ke ile ka fuoa mesebetsi eo ke neng ke sa nahane hore nka khona ho e etsa. Kahoo, e reng nke ke le bolelle ka mehlala e metle e ileng ea nthusa ho hlola bothata boo le ka litlhohonolofatso tsa ho ba tšebeletsong ea nako e tletseng ka lilemo tse 58.

Ke hlahetse seterekeng se seng se toropong ea Quebec e Canada moo ho buuoang Sefora. Ke holisitsoe ke batsoali ba ka ba nthatang haholo e leng Ntate Louis le ’Mè Zélia. Ntate oa ka o ne a le lihlong hape a rata ho bala. Ke ne ke rata ho ngola ’me ke ne ke lakatsa hore ka le leng ke be moqolotsi oa litaba.

Ha ke le lilemo li 12, mosebetsi-’moho le ntate oa ka e leng Rodolphe Soucy le motsoalle oa hae ba ile ba tla lapeng. E ne e le Lipaki Tsa Jehova. Ke ne ke sa tsebe hakaalo ka Lipaki hape ke ne ke sa li tsotelle hakaalo. Empa ke ile ka makalla tsela eo ba neng ba khona ho arabela lipotso tsa rona ka eona ba sebelisa Bibele. Batsoali ba ka le bona ba ne ba hloletsoe ’me re ile ra lumela ho ithuta Bibele.

Ka nako eo, ke ne ke kena sekolo sa kereke ea Roma. Ka linako tse ling, ke ne ke bua le bana bao ke kenang sekolo le bona ka lintho tseo ke ntseng ke ithuta tsona ka Bibeleng. Ha nako e ntse e-ea, matichere ao e neng e le baruti a ile a tseba ka taba eo. Ho e-na le hore ba sebelise Bibele ho bontša hore litaba tseo ke buang ka tsona ha se ’nete, e mong oa bona o ile a re ke ngoana ea sa mameleng ka pel’a tlelase eohle. Le hoja taba eo e ne e ntšoenya, e ile ea nthusa ho bona hore ha e le hantle lithuto tsa bolumeli tse rutoang sekolong ha li lumellane le Bibele. Ke ile ka etsa qeto ea ho tsoa sekolong seo. Batsoali ba ka ba ile ba lumellana le ’na eaba ke ea sekolong se seng.

KAMOO KE ITHUTILENG HO RATA TŠEBELETSO

Ke ile ka tsoela pele ho ithuta Bibele empa e le ka monyebe hobane ke ne ke tšaba ho ea ka ntlo le ntlo. Kereke ea Roma e ne e e-na le tšusumetso e mpe hape e hanyetsa mosebetsi oa rona ka matla. Moeta-pele oa lipolotiki oa Quebec  ea bitsoang Maurice Duplessis, o ne a tšehetsa kereke kahohle-hohle. Ka lebaka leo, mekhopi ea batho e ne e hobosa Lipaki le ho li hlasela. Lipaki li ne li lokela ho ba sebete e le hore li bolele molaetsa oa Bibele mehleng eo.

Mor’abo rona John Rae ea neng a le sehlopheng sa borobong sekolong sa Gileade, o ile nthusa ho hlola bothata ba ho tšaba ho ea tšimong. Mor’abo rona Rae o ne a e-na le boiphihlelo, a ikokobelitse hape a khona ho atameleha. Ka linako tse ling, o ne a nkeletsa ’me ke ile ka ithuta haholo mohlaleng oa hae. O ne a sa tsebe ho bua Sefora hantle, kahoo hangata ke ne ke tsamaea le eena tšimong e le ho mo thusa hore a khone ho bua le batho. Ho ba le nako e ngata le eena ho ile ha nthusa hore ke be Paki ea Jehova. Ke ile ka kolobetsoa ka la 26 May, 1951 ka mor’a hore ke qete lilemo tse leshome ke tsebana le Lipaki.

Mohlala o motle oa Mor’abo rona Rae (A) o nthusitse (B) hore ke hlole bothata ba ho tšaba ho ea tšimong

Phutheho ea rona e nyenyane e neng e le toropong ea Quebec, e ne e e-na le bo-pula-maliboho ba bangata. Ba ile ba etsa hore ke batle ho ba pula-maliboho. Ka nako eo, re ne re bua le batho re sebelisa Bibele feela. Kaha re ne re se na lingoliloeng, re ne re tlameha ho sebelisa Bibele ka tsela e atlehang. Kahoo, ke ile ka tlameha ho ithuta litemana tsa Bibele e le hore nka khona ho e sireletsa. Leha ho le joalo, batho ba bangata ba ne ba sa lumele ho bala Bibele le ha e le efe haeba feela e sa lumelloa ke kereke ea Roma.

Ka 1952, ke ile ka nyala Simone Patry, ea neng a le phuthehong e le ’ngoe le ’na. Re ile ra fallela Montreal eaba pele selemo se fela, re sitsoa ka ngoana oa ngoanana. Le hoja ke ile ka khaotsa ho ba pula-maliboho nakoana pele ke nyala, ’na le mohats’aka re ile ra phela bophelo bo itekanetseng e le hore re khone ho etsa mesebetsi ea phutheho le ea lelapa kahohle kamoo re ka khonang.

Ho ile ha boela ha feta lilemo tse leshome pele nka nahana ka ho ba pula-maliboho hape. Ka 1962, ke ile ka ea sekolong sa baholo se neng se tšoaretsoe Bethele e Canada eaba ha ke le moo ke lula le Mor’abo rona Camille Ouellette. Ke ile ka hlolloa ke tsela eo a neng a chesehela tšebeletso ka eona le hoja a ne a e-na le mosali le mora. Ka nako eo, ho ne ho sa tloaeleha Quebec hore Paki e be pula-maliboho e e-na le bana empa ke ntho eo Mor’abo rona Camille a neng a e etsa. Nako eo re e qetileng re le ’moho, o ile a nkhothaletsa hore ke nahane ka boemo ba ka hantle. Ka mor’a likhoeli tse seng kae, ke ile ka bona hore nka khona ho ba pula-maliboho ea  kamehla hape. Batho ba bang ba ne ba nahana hore ke entse qeto e fosahetseng empa ke ile nkela bopula-maliboho hobane ke ne ke kholisehile hore Jehova o tla nthusa hore ke etse mosebetsi oa hae.

RE KHUTLELA QUEBEC RE LE BO-PULA-MALIBOHO BA KHETHEHILENG

Ka 1964, ’na le Simone re ile ra koptjoa hore re il’o ba bo-pula-maliboho ba khethehileng hae koana Quebec ’me re ile ra sebetsa teng ka lilemo tse ’maloa. Ka nako eo, re ne re ntse re hanyetsoa empa e seng joaloka pele.

Moqebelo o mong mantsiboea, ke ile ka tšoaroa torotsoaneng ea Sainte-Marie e haufi le toropo ea Quebec. Lepolesa le ile la ntšoara, la nkisa sepoleseng eaba le nkoalla seleng hobane ke ne ke ntse ke kena ntlo le ntlo ntle ho tumello. Hamorao, ke ile ka hlaha ka pel’a moahloli ea tšosang ea bitsoang Baillargeon. O ile a mpotsa hore na ’muelli oa ka ke mang. Eitse ha a utloa ke bitsa Mor’abo rona Glen How, * ea neng a tsebahala ka ho buella Lipaki, o ile a re: “Jonna oee! E seng eena hle banna!” Mor’abo How o ne a e-na le botumo bo botle ba ho sireletsa Lipaki ka molao mehleng eo. Hamorao, lekhotla le ile la mpolella hore nyeoe ea ka e nyahlalitsoe le hore ha ke sa le molato.

Kaha re ne re hanyetsoa Quebec, ho ne ho se bonolo ho fumana libaka tse maemong a matle tseo re ka tšoarelang liboka ho tsona. Phutheho ea rona e nyenyane e ile ea fumana karache ea khale e batang. E le hore re se ke ra hatsela haholo mariha, barab’abo rona ba ne ba besa hitara. Hangata re ne re khobokana ho eona pele liboka li qala ebe rea khothatsana.

E ne le ntho e thabisang kannete ho bona mosebetsi oa boboleli o ntse o atleha ha lilemo li ntse li feta. Morao koana lilemong tsa bo-1960, ho ne ho e-na le lihlotšoana tse nyane ka palo toropong ea Quebec libakeng tsa Côte-Nord le Gaspé ’me li ile tsa kopanngoa. Hona joale, ho na le lipotoloho tse fetang tse peli libakeng tseo hape bara le barali babo rona ba kopanela Liholong Tsa ’Muso tse ntle haholo.

MEMO EA HO BA BALEBELI BA TSAMAEANG

Ka 1977, ke ile ka ea sekolong sa balebeli ba tsamaeang se neng se le Toronto, Canada

Ka 1970, ’na le Simone re ile ra memeloa ho ba balebeli ba potoloho. Eaba ka 1973, re ba balebeli ba setereke. Lilemong tseo, ke ile ka ithuta lintho tse ngata haholo ho balebeli ba tsamaeang ba neng ba ipabola mosebetsing oa bona e leng Mor’abo rona Laurier Saumur * le Mor’abo rona David Splane. * Ka mor’a kopano e ’ngoe le e ’ngoe, ’na le Mor’abo rona Splane re ne re hlabana malotsana ka hore na re ka ntlafatsa mokhoa oo re rutang ka oona joang. Ke hopola ka lekhetlo le leng Mor’abo rona Splane a re ho ’na: “Léonce, ke ratile puo ea hao e neng e koala lenaneo. E ne e le monate empa lintlha tsa eona nkabe ke entse lipuo tse tharo ka tsona.” Ke ne ke tloaetse ho bua ka lintho tse ngata ha ke fana ka puo. Ke ne ke lokela ho ntlafatsa.

Ke ile ka sebetsa libakeng tse fapaneng karolong e ka bochabela ea Canada

Balebeli ba setereke ba ne ba lokela ho khothatsa  balebeli ba potoloho. Leha ho le joalo, bahoeletsi ba bangata ba Quebec ba ne ba ntseba. Kahoo, hangata ba ne ba thabela ho sebetsa le ’na ha ke etetse lipotolohong tsa bona. Le hoja ke ne rata ho sebetsa le bona tšimong, ke ne ke sa khone ho ba le nako ea mopotolohi. Ka lekhetlo le leng, mopotolohi e mong o ile a re ho ’na: “Ke ntho e ntle kannete ha u qeta nako le bahoeletsi empa ke kopa hore le ’na u nkhopole. Ke hloka ho khothatsoa.” Keletso eo e mosa e ile ea nthusa ho leka-lekanya lintho.

Ka 1976, ho ile ha etsahala ntho e ’ngoe eo ke neng ke sa e lebella e ileng ea nkutloisa bohloko. Moratuoa oa ka o ile a kula haholo a ba a hlokahala. Boitelo ba hae le ho rata Jehova, li ile tsa etsa hore e be mosali ea ikhethang. Kaha ke ne phathahane mosebetsing oa boboleli, ke ile ka khona ho mamella ’me ke leboha Jehova ka hore ebe o ile a ntšehetsa nakong eo e boima. Hamorao, ke ile ka nyala Carolyn Elliott eo e neng e le pula-maliboho e chesehang ea buang Sekhooa ea neng a tlile Quebec moo ho hlokehang bahoeletsi. Carolyn ke motho ea botsoalle le ea tsotellang batho ba bang, haholo-holo ba lihlong kapa ba itšehlang thajana. O ile a nthusa haholo nakong eo re neng re le balebeli ba tsamaeang.

SELEMO SE IKHETHANG

Ka January 1978, ke ile ka koptjoa hore ke il’o ba morupeli Sekolong sa Bo-pula-maliboho se neng se le Quebec. Ke ne ke tšohile hobane ke ne ke e-s’o ka ke e-ea sekolong seo ’me ke ne ke le mocha ho sona joaloka liithuti tseo. Ke ile ka ba lehlohonolo hobane liithuti tse ngata e ne e le bo-pula-maliboho ba nang le boiphihlelo. Le hoja ke ne ke le morupeli, ke ile ka ithuta lintho tse ngata ho liithuti tseo.

Ho elella mafelong a selemo sa 1978, ho ile ha ba le kopano ea Machaba e neng e tšoaretsoe lebaleng la lipapali la Montreal e nang le sehlooho se reng “Tumelo e Hlolang.” E ne e le kopano e kholo ka ho fetisisa e kileng ea tšoareloa Quebec ’me ho ne ho e-na le batho ba ka holimo ho 80 000. Ke ile ka sebetsa lefapheng le phatlalatsang litaba tsa kopano. Ke ile  ka bua le baqolotsi ba bangata ba litaba ’me ke ile ka thaba haholo ha ke bona hore ba buile lintho tse ntle ka rona. Re ile ra qeta lihora tse ka holimo ho tse mashome a mabeli re bua le bona thelevisheneng le seea-le-moeeng hape ho ile ha e-ba le lihlooho tse ngata likoranteng tse buang ka rona. Ho ile ha fanoa ka bopaki bo botle haholo ka rona!

RE FALLELA TŠIMONG E ’NGOE

Ho ile ha e-ba le phetoho e kholo bophelong ba ka ka 1996. Ka mor’a hore ke kolobetsoe, haesale ke sebetsa tšimo e buang Sefora ea Quebec empa joale re ile ra kopuoa hore re il’o sebetsa Toronto moo ho neng ho buuoa Senyesemane. Ke ne ke ikutloa ke sa tšoanelehe hape ke ne ke tšaba ho fana ka lipuo hobane ke ne ke sa tsebe Sekhooa hantle. Ke ne ke tlameha ho rapela Jehova nako le nako le ho mo tšepa haholo.

Ke ne ke tšohile ha ke qala ho fihla toropong eo empa lilemo tse peli tseo ke li qetileng ke le Toronto e bile tse monate haholo. Carolyn o ile a nthusa hore ke khone ho bua Sekhooa hantle hape bara le barali babo rona ba ne ba ntšehelitse le ho nkhothatsa. Re ile ra atleha ho ba le metsoalle kapele.

Le hoja ho ne ho e-na le lintho tse ngata tseo ke neng ke lokela ho li etsa bekeng ea kopano, Labohlano mantsiboea ke ne ke qeta hora ke le tšimong. Batho ba bangata ba ne ba ipotsa hore na ke hobane’ng ha ke ne ke e-ea tšimong letsatsing leo ho tšoaroang ka thata ka lona pele ho kopano. Empa ke ne ke khothala ha ke fumana batho bao ke buang le bona hamonate tšimong. Le hona joale ke ntse ke thaba haholo ha ke tsoa tšimong.

Ka 1998, ’na le Carolyn re ile ra isoa Montreal hore re il’o ba bo-pula-maliboho ba khethehileng. Ka lilemo tse ngata, ke ’nile ka sebetsa mafapheng a hlophisang bopaki bo khethehileng ba phatlalatsa le ho sebetsa le baphatlalatsi ba litaba e le ho thusa batho hore ba tsebe Lipaki Tsa Jehova haholoanyane. Hona joale, ’na le Carolyn re thabela ho bua le batho ba sa tsoa fallela mona Canada ba ratang ho ithuta Bibele.

Ke na le mochesi oa ka Carolyn

Ha ke hetla morao ’me ke sheba lilemo tse 68 tseo ke li qetileng ke kolobelitsoe, kannete Jehova o ntlhohonolofalitse haholo. Ke ile ka thaba haholo hobane ke ile ka ithuta ho rata mosebetsi oa boboleli le ho thusa batho ba bang hore ba tsebe Jehova. Ka mor’a hore morali oa ka Lise, le monna oa hae ba holise bana ba bona, e ile ea e-ba bo-pula-maliboho ba kamehla. Kea thaba ha ke bona kamoo a ntseng a chesehela tšebeletso kateng. Ke leboha Bakreste-’moho ba ileng ba mpehela mohlala o motle le ba ileng ba nkeletsa. Ba ile ba nthusa hore ke be le kamano e ntle le Jehova le ho etsa mesebetsi e mengata ka mokhatlong oa Molimo. Ke ithutile hore ntho e ka re thusang ho lula re e-na le tumelo ha re le mesebetsing eo Jehova a re fileng eona, ke ha re itšetleha ka moea oa hae o halalelang. (Pes. 51:​11) Ke lula ke leboha Jehova ka hore ebe o mphile monyetla o babatsehang oa hore ke rorise lebitso la hae!​—Pes. 54:6.

^ ser. 16 Sheba pale ea bophelo ea W. Glen How e nang le sehlooho se reng, “The Battle Is Not Yours, but God’s,” ho Tsoha! ea Senyesemane ea April 22, 2000.

^ ser. 20 Sheba pale ea bophelo ea Laurier Saumur e nang le sehlooho se reng, “I Found Something Worth Fighting For,” ho Molula-Qhooa oa Senyesemane oa November 15, 1976.

^ ser. 20 Mor’abo rona David Splane ke e mong oa Sehlopha se Busang sa Lipaki Tsa Jehova.