Fetela boitsebisong

Fetela lethathamong la tse ka hare

Tumelo e re Thusa ho ba Matla

Tumelo e re Thusa ho ba Matla

TUMELO ke mohloli oa matla. Mohlala, le hoja Satane a leka ho senya kamano ea rona le Jehova, tumelo e re thusa “ho tima metsu eohle e tukang ea ea khopo.” (Baef. 6:​16) Ha re e-na le tumelo, re ka khona ho mamella mathata ’ohle, ho sa tsotellehe hore na a maholo hakae. Jesu o ile a re ho barutuoa ba hae: “Haeba le e-na le tumelo e boholo ba thollo ea mosetareta, le tla re ho thaba ena, ‘Tloha mona u ee mane,’ ’me e tla tloha.” (Mat. 17:​20) Kaha rea tseba hore tumelo e ka re thusa ho ba le kamano e ntle le Jehova, re lokela ho ipotsa lipotso tsena: Tumelo ke’ng? Tsela eo re ikutloang ka eona e ka ama tumelo ea rona joang? Re ka etsa’ng e le hore tumelo ea rona e lule e le matla? Hona re lokela ho ba le tumelo ho mang?​—Bar. 4:3.

TUMELO KE’NG?

Tumelo ha se ho lumela feela seo Bibele e se rutang, etsoe le “bademona baa lumela [hore Molimo o teng] ’me baa thothomela.” (Jak. 2:​19) Joale, tumelo ke’ng?

Joalokaha re lumela hore ho tla lula ho e-na le bosiu le motšehare, re tšepa hore litšepiso tsohle tsa Molimo li tla phethahala

Bibele e hlalosa tumelo ka litsela tse peli. Ea pele, “tumelo ke tebello e tiisitsoeng ea lintho tseo ho nang le tšepo bakeng sa tsona.” (Baheb. 11:1a) Ha u e-na le tumelo, u kholiseha ka ho feletseng hore lintho tsohle tseo Jehova a li tšepisitseng ke ’nete le hore li tla phethahala. Mohlala, Jehova o ile a re ho Baiseraele: “Haeba le ka tlola selekane sa ka sa motšehare le selekane sa ka sa bosiu, esita le hore bosiu le motšehare li se ke tsa e-ba teng ka nako ea tsona, ka ho tšoanang le selekane sa ka le mohlanka oa ka Davida se ka tloloa.” (Jer. 33:​20, 21) Na u ee u nahane hore letsatsi le ka khaotsa ho chaba ebe ha ho sa ba le bosiu le motšehare? Haeba ha u ke u nahane hore ntho e joalo e ka etsahala, na u nahana hore ’Mopi oa tsona a ka hloleha ho phethahatsa litšepiso tsa hae? Che!​—Esa. 55:​10, 11; Mat. 5:18.

Ea bobeli, tumelo “ke bopaki bo totobetseng ba lintho tsa sebele le hoja li sa bonoe.” Tumelo e hlalosoa e le “bopaki bo totobetseng,” kapa “bopaki bo kholisang,” ba lintho tse sa bonoeng empa e le tsa sebele. (Baheb. 11:1b) Ka tsela efe? A re re mohlomong ngoana oa u botsa, ‘U tseba joang hore ho na le moea?’ Le hoja u e-s’o ka u bona moea, u ka leka ho kholisa ngoana eo ka ho bua ka lintho tse kang, ho hema, ho foka ha moea le tse ling. Ha ngoana eo a lumela hore lintho tseo ke ’nete, o tla utloisisa hore hoa khoneha ho lumela ntho eo u sa e boneng. Ka tsela e tšoanang, tumelo e thehiloe holim’a bopaki bo tiileng.​—Bar. 1:20.

TSELA EO RE IKUTLOANG KA EONA E AMA TUMELO EA RONA

Kaha tumelo e thehiloe holim’a bopaki, e le hore motho a be le eona, u lokela hore a qale pele a be le ‘tsebo e nepahetseng ea ’nete.’ (1 Tim. 2:4) Empa ho ba le tsebo feela ha hoa lekana. Moapostola Pauluse o ile a re: “Ka pelo motho o bontša tumelo.” (Bar. 10:​10) Motho ha a lokela ho lumela feela hore lintho tseo a ithutang tsona ke ’nete empa o lokela ho li nka e le tsa bohlokoa. Ke ka ho etsa joalo feela a ka bontšang tumelo ’me a phela ka tsela e khahlisang Molimo. (Jak. 2:​20) Motho e mong a ka ’na a hana ho lumela lintho tseo a ntseng a ithuta  tsona hobane a sa batle ho tlohela lintho tseo a li lumelang kapa hobane a batla ho phela ka tsela eo a e ratang. (2 Pet. 3:​3, 4; Juda 18) Ke ka lebaka leo, e seng batho bohle ba ileng ba bona mehlolo ea mehleng ea ha ho ne ho ngoloa Bibele ba ileng ba e lumela. (Num. 14:​11; Joh. 12:​37) Ke batho ba ratang ’nete feela bao moea o halalelang o ba thusang hore ba be le tumelo.​—Bagal. 5:​22; 2 Bathes. 2:​10, 11.

DAVIDA O ILE A THUSOA KE’NG HORE A BE LE TUMELO E MATLA?

Morena Davida ke e mong oa batho ba neng ba e-na le tumelo e matla. (Baheb. 11:​32, 33) Leha ho le joalo, e ne e se bohle habo Davida ba neng ba e-na le tumelo e matla joaloka eena. Mohlala, Eliabe e leng abuti oa Davida e moholo, o ile a bontša hore ha a na tumelo ha a ne a belaella sepheo sa Davida sa ho batla ho loantša Goliathe. (1 Sam. 17:​26-28) Kaha ha re tsoaloe re e-na le tumelo ebile ha re e futse ho batsoali ba rona, tumelo eo Davida a neng a e-na le eona ho Molimo e bile teng ka lebaka la kamano e ntle eo a neng a e-na le eona le eena.

Ho Pesaleme ea 27, Davida o hlalosa hore na ho tlile joang hore a be le tumelo e matla. (Temana ea 1) O ne a thuisa ka lintho tse mo hlahetseng nakong e fetileng le kamoo Jehova a ileng a mo thusa ho hlola lira tsa hae kateng. (Temana ea 2 le ea 3) Davida o ne a rata ho sebeletsa Jehova feela. (Temana ea 4) O ne a mo rorisa hammoho le batho ba ratang Molimo. (Temana ea 6) O ne a bua le Jehova ka ntho e ’ngoe le e ’ngoe ka thapelo. (Temana ea 7 le ea 8) Davida o ne a boetse a batla hore Jehova ebe eena ea mo rupelang. (Temana ea 11) Tumelo e ne e le bohlokoa ho Davida hoo a ileng a re haeba a ne a se na eona a ka be a sa khona ho mamella mathata.​—Temana ea 13.

RE KA ETSA’NG E LE HORE TUMELO EA RONA E LULE E LE MATLA?

U ka ba le tumelo e tšoanang le ea Davida ka hore u etse lintho tse hlalositsoeng ho Pesaleme ea 27. Kaha tumelo e thehiloe tsebong e nepahetseng, ha u lula u ithuta Lentsoe la Molimo le lingoliloeng tse thehiloeng ho lona, ho tla ba bonolo hore moea o halalelang o u thuse ho ba le tumelo. (Pes. 1:​2, 3) Iphe nako ea ho thuisa ha u ntse u ithuta. Ho thuisa ho ka tšoantšoa le mobu ’me ho ananela lintho tseo re ntseng re ithuta tsona ho ka tšoantšoa le semela se holang mobung oo. Ha lerato leo u ratang Jehova ka lona le ntse le hola, ha ho potang hore u tla batla ho bontša tumelo ho eena ka hore u mo rorise ha u le libokeng le ha u bolella batho ba bang ka tšepo eo u nang le eona. (Baheb. 10:​23-25) Hape, u tla bontša hore u na le tumelo ha u ‘rapela kamehla ’me u sa tele.’ (Luka 18:​1-8) Kahoo, ‘rapela u sa phetse’ ’me u kholisehe hore Jehova ‘oa u tsotella.’ (1 Bathes. 5:​17; 1 Pet. 5:7) Tumelo e re thusa ho etsa lintho tse nepahetseng ’me ha re li etsa, tumelo ea rona e ba matla le ho feta.​—Jak. 2:22.

 E-BA LE TUMELO HO JESU

Bosiung ba pele ho lefu la hae, Jesu o ile a re ho barutuoa ba hae: “Bontšang tumelo ho Molimo, le bontše tumelo le ho ’na.” (Joh. 14:1) Kahoo, re lokela ho ba le tumelo le ho Jesu eseng ho Jehova feela. Re ka bontša joang hore re na le tumelo ho Jesu? A re hlahlobeng litsela tse tharo tse ka re thusang.

Ho ba le tumelo ho Jesu ho bolela’ng?

Ea pele, nka sehlabelo sa Jesu e le mpho eo Molimo a u fileng eona ka ho toba. Moapostola Pauluse o ile a re: “Ke . . . phela ka tumelo e mabapi le Mora oa Molimo, ea ileng a nthata ’me a inehela bakeng sa ka.” (Bagal. 2:​20) Ha u e-na le tumelo ho Jesu, u tla bontša hore oa lumela hore sehlabelo sa hae sa thekollo se ne se reretsoe uena ’me se u fa tšepo ea ho phela ka ho sa feleng le hore hape ke bopaki ba hore Molimo oa u rata. (Bar. 8:​32, 38, 39; Baef. 1:7) Haeba u lumela hore ehlile sehlabelo sa Jesu se ka u thusa, u ke ke oa ikutloa u sa tšoanelehe hore u mo sebeletse.​—2 Bathes. 2:​16, 17.

Ea bobeli, sehlabelo sa Jesu sa thekollo se re thusa ho bua le Jehova ka thapelo. Ka lebaka la thekollo, re khona ho rapela Jehova “ka bolokolohi ba puo . . . e le hore re ka fumana mohau le ho fumana mosa o sa tšoanelang bakeng sa thuso ka nako e nepahetseng.” (Baheb. 4:​15, 16; 10:​19-22) Thapelo e re thusa hore re ikemisetse ho qoba ho etsa sebe.​—Luka 22:40.

Ea boraro, mamela Jesu. Moapostola Johanne o ile a re: “Ea bontšang tumelo ho Mora o na le bophelo bo sa feleng; ea sa mameleng Mora a ke ke a bona bophelo, empa khalefo ea Molimo e sala holim’a hae.” (Joh. 3:​36) Ela hloko hore Johanne o bapisitse ho hloka tumelo le ho se mamele. Kahoo, u bontša hore u lumela ho Jesu ha u mo mamela. U mamela Jesu ka hore u ikobele “molao oa Kreste” e leng lintho tsohle tseo a li rutileng le melao ea hae. (Bagal. 6:2) U ka boela oa bontša hore u mamela Jesu ka ho latela tataiso eo a fanang ka eona a sebelisa “lekhoba le tšepahalang le le masene.” (Mat. 24:​45) Ha u mamela Jesu, u tla ba le matla a ho mamella mathata ’ohle a ka u hlahelang.​—Luka 6:​47, 48.

‘IKAHENG TUMELONG EA LONA E HALALELANG KA HO FETISISA’

Ka lekhetlo le leng, monna e mong o ile a hoeletsa ho Jesu a re: “Ke na le tumelo! Nthuse moo ke hlokang tumelo!” (Mar. 9:​24) Monna eo o ne a e-na le tumelo empa kaha o ne a ikokobelitse o ile a hlokomela hore o lokela ho ba le tumelo e eketsehileng. Joaloka monna eo, kaofela ho na le nako eo re tla hloka ho ba le tumelo e eketsehileng. ’Me kaofela ha rona re ka matlafatsa tumelo ea rona esale hona joale. Joalokaha re se re ithutile, re matlafatsa tumelo ea rona ka ho bala Lentsoe la Molimo le ho thuisa ka lona e leng ntho e re thusang ho rata Jehova haholoanyane. Tumelo ea rona e tla boela e be matla ha kaofela ha rona re rorisa Jehova, re bolella batho ba bang ka tšepo eo re nang le eona le ha re lula re rapela. Ka holimo ho tsohle, ha re matlafatsa tumelo ea rona, re fumana moputso oa bohlokoa. Lentsoe la Molimo le re: “Baratuoa, ka ho ikaha tumelong ea lona e halalelang ka ho fetisisa . . . le ipoloke leratong la Molimo.”​—Juda 20, 21.