Fetela boitsebisong

Fetela lethathamong la tse ka hare

Ka 1881 Molaoli Gordon o ile a fumana serapa sa hae sa Edene Praslin e Seychelles

Paradeise Lefatšeng—Na ke Toro Feela Tjee Kapa Ehlile e Tla ba Teng?

Paradeise Lefatšeng—Na ke Toro Feela Tjee Kapa Ehlile e Tla ba Teng?

Paradeise. Libuka tse bapatsang libaka tseo batho ba ka eang phomolong ho tsona, li hlahisa libaka tse ntle tse kang “paradeise” tseo re ka eang ho tsona ho ea phomola le ho itebatsa mathata. Empa joalokaha re tseba, ha re khutla phomolong e joalo re fumana bophelo bo ntse bo tšoana le pele.

Ho ntse ho le joalo, batho ba rata ho ba paradeiseng. Empa na “paradeise” ke toro feela tjee kapa ehlile e ka ba teng? Joale ke hobane’ng ha re e rata hakaale? Na e tla ke e be teng?

HISTORI EA PARADEISE

Ho tloha khale, haesale batho ba rata ho ba paradeiseng. Se entseng hore ba bangata ba e rate ke ha ba bala tlaleho ea Bibele e buang ka ‘serapa sa Edene se neng se le ka nģ’a bochabela.’ Ke eng e neng e khahla ka serapa seo? Bibele e re: “Jehova Molimo a melisa lefatšeng sefate se seng le se seng se lakatsehang ponong ea motho le se molemo bakeng sa lijo.” Serapa seo e ne e le sebaka se setle. Ntho e ’ngoe e neng e khahla le ho feta ka serapa seo ke hore ho ne ho e-na “le sefate sa bophelo har’a” sona.—Genese 2:8, 9.

Ho feta moo, tlaleho ea Genese e bua ka linoka tse ’nè tse neng li phalla ho tsoa serapeng seo. Tse ling tsa linoka tseo e leng Tigris, (kapa Hidekele) le Eufrate li ntse li tsejoa haholo le mehleng ena. (Genese 2:10-14) Linoka tsena tse peli li phallela leoatleng, li feta moo hona joale e leng Iraq, karolo ea Persia ea boholo-holo.

Ke ho utloahalang hore e be paradeise ke ntho ea bohlokoa haholo ho batho ba Persia. Ka mohlala, Musiamong oa Bonono o Philadelphia, Pennsylvania, U.S.A ho na le ’mete oa lilemong tsa bo-1500 o takiloeng serapa se setle se nang le lifate le lipalesa tse ntle. Ho batho ba Persia “serapa se setle se hlokometsoeng hantle” se bolela “paradeise,” ’me setšoantšo se neng se le ’meteng oo se ne se bontša seo Bibele e se buang ka paradeise kapa Edene.

Ha e le hantle lipale tse buang ka paradeise li phetoa lefatšeng lohle. Ha batho ba ntse ba ata lefatšeng ba ile ba e-ba le boikutlo bo tšoanang bo hlalosoang ka Bibeleng ka paradeise, boo ha nako e ntse e e-ea bo ileng ba tsoakoa ka lipale le litumelo tse sa tšoaneng ho ea ka libaka ho fapana. Esita le mehleng ena, batho ba bangata ba amahanya libaka tse ntle tsa tlhaho le paradeise.

HO BATLA PARADEISE

Bafuputsi ba bang ba bolela hore ba fumane moo paradeise e neng e le hona teng. Ka mohlala, nakong eo Charles Gordon eo e neng e le molaoli e mong oa sesole sa Brithani , a etetseng Seychelles ka 1881, o ile a bona sebaka se botle bo hlollang se bitsoang Vallée de Mai, o ile a re ke serapa sa Edene. Lilemong tsa bo-1400, Christopher Columbus ea neng a pota lefatše ka nako eo, o ile a nahana hore o haufi le ho fumana serapa sa Edene nakong eo a neng a fihla sehlekehlekeng sa Hispaniola, seo hona joale e seng e le Dominican Republic le Haiti.

Mapping Paradise, e leng buka ea morao tjena ea histori, e na le limmapa tse fetang 190 tsa khale ’me bongata ba tsona li na le setšoantšo sa Adama le Eva ba le serapeng sa Edene. Har’a limmapa tseo, ke ’mapa o sa tloaelehang oa lilemong tsa bo-1200 o entsoeng ke Beatus oa Spain. Karolong e holimo ea ’mapa oo, ho ne ho e-na le setšoantšo sa paradeise. Ho ne ho bontšitsoe linoka tse ’nè e leng “Tigris,” “Eufrate,” “Indus,” le “Jordane,” ’me e ’ngoe le ’ngoe o ne a ne a e behile lik’honeng tse ’nè tsa ’mapa oa hae ho tšoantšetsa ho ata ha Bokreste likhutlong tse ’nè tsa lefatše. Le hoja ho se ho se na Paradeise, litšoantšo tseo li bontša hore haesale paradeise e le ntho eo batho ba e ratang.

 Seroki sa Lenyesemane e leng John Milton, ea phetseng lilemong tsa bo-1600, o tsejoa ka thothokiso ea hae e bitsoang Paradise Lost, ’me o e ngotse a ipapisitse le tlaleho ea Genese e buang ka sebe sa Adama le ho lelekoa ha hae serapeng sa Edene. Milton o ile a ngola thothokiso e latelang eo, e neng e e-na le sehlooho sa Paradise Regained. Ho eona o ile a hatisa tšepiso ea hore batho ba tla boela ba phele ka ho sa feleng lefatšeng, a re: “Ka nako eo lefatše e tla ba paradeise.”

BOIKUTLO BO FAPANENG

Ka ho hlakileng paradeise esale e le ea bohlokoa historing ea batho. Empa joale ke hobane’ng ha batho ba se ba se na tšepo ea hore e tla ba teng? Buka ea Mapping Paradise e re “litsebi tsa thuto ea bolumeli li iphapanyetsa taba ea hore na paradeise e hokae.”

Likereke tse ngata li ruta batho hore moo re eang teng ke leholimong e seng paradeiseng lefatšeng. Empa Bibele e re ho Pesaleme ea 37:29: “Ba lokileng ba tla rua lefatše, ba tla lula ho lona ka ho sa feleng.” Kaha lefatše ha se paradeise hona joale, na ho na le mohla tšepiso ee e tla ke e phethahale? *

PARADEISI E TLA FELA E BE TENG LEFATŠENG

Jehova Molimo ea entseng paradeise qalong, o tšepisa hore e tla ba teng hape. Joang? Hopola thapelo eo Jesu a re rutileng eona, “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.” (Matheu 6:10) ’Muso oo o tl’o busa lefatše, o felise mebuso eohle ea batho, ’me morena oa oona ke Jesu Kreste. (Daniele 2:44) ’Musong oo, lefatše e tla ba paradeise joalokaha e le morero oa Molimo.

Moprofeta Esaia o ile a bululeloa hore a ngole maemo a tlang ho ba teng paradeiseng. Mathata ’ohle a moloko oa batho a tla fela, a kang ho kula, maemo a lichelete, a morabe le a mang (Esaia 11:6-9; 35:5-7; 65:21-23). Re u khothalletsa ho bala mangolo ana ka Bibeleng ea hao. Ka ho etsa joalo u tla ba le tseba lintho tseo Molimo a tlang ho li etsetsa batho ba mo mamelang. Ba phelang ka nako eo ba tla thabela bophelo paradeiseng le ho fumana kamohelo ea Molimo, e leng lintho tseo Adama a ileng a li lahla.—Tšenolo 21:3.

Ke’ng e ka re kholisang hore Paradeise e tla ba teng lefatšeng, le hore taba ee ha se toro feela tjee empa ehlile e tla ba teng? Ke hobane Bibele e re: “Ha e le maholimo, ke maholimo a Jehova, empa lefatše o le file bara ba batho.” Hape Bibele e re: “Molimo, ea ke keng a bua leshano” o ile re tšepisa ‘pele ho linako tse tšoarellang halelele’ hore batho ba tla phela paradeiseng lefatšeng. (Pesaleme ea 115:16; Tite 1:2) Bibele e fana ka tšepiso e hlollang hakaakang—Bophelo paradeiseng ka ho sa feleng!

^ ser. 15 Koran ho Al-Anbiya khaolo (sura) 21 temana ea 105, e re: “Bahlanka ba ka ba lokileng ba tla rua lefatše.”