Fetela boitsebisong

Fetela lethathamong la tse ka hare

Boprofeta bo Ileng ba Phethahala

Boprofeta bo Ileng ba Phethahala

Pejana re ile ra bona kamoo Morena Croesus a ileng a isoa le khongoana holimo ke moprofeta oa motseng oa Delphi, eaba o qetella a hlotsoe ke Morena Cyruse. Bibele eona e na le boprofeta bo buang ka Morena Cyruse bo ileng ba phethahala hantle feela joalokaha Jehova a ne a profetile.

Lilemo tse ka bang 200 le pele Morena Cyruse a hlaha, moprofeta Esaia o ile a bua ka eena, a ba a bolela hore na o ne a tla hlola motse oa Babylona joang.

Esaia 44:24, 27, 28 e re: “Sena ke seo Jehova a se boletseng, . . . ‘ea reng ho boliba, ‘Fetoha mouoane; ’me ke tla pshesa linōka tsohle tsa hao’; ea reng ka Cyruse, ‘Ke molisa oa ka, ’me o tla phetha ka ho feletseng sohle seo ke se thabelang’; esita le ha ke re ka Jerusalema, ‘E tla tsosolosoa,’ le ka tempele, ‘Motheo oa hao o tla raloa.’”

Ntate Herodotus oa Mogerike eo e leng setsebi sa histori, o bontša hore lebotho la Cyruse le ile la khelosa metsi a noka ea Eufrate e neng e phalla le ka har’a motse oa Babylona. Leqheka leo le ile la sebetsa, eaba Cyruse le lebotho la hae ba khona ho kena ka har’a motse. Cyruse o ile a hapa motse oo, eaba o lokolla Bajuda ba neng ba entsoe makhoba moo Babylona hore ba il’o tsosolosa tempele Jerusalema, e neng e ile ea timetsoa lilemo tse 70 tse fetileng.

Esaia 45:1 e re: “Sena ke seo Jehova a se buileng ho motlotsuoa oa hae, ho Cyruse, eo ke tšoereng letsoho la hae le letona, hore ke hlōle lichaba ka pel’a hae, e le hore nka tlamolla linyepa mathekeng a marena; hore ke bule ka pel’a hae menyako e nang le mamati a mabeli, hoo le liheke li ke keng tsa koaloa.”

Cyruse le lebotho la hae ba ile ba fumana heke e kholo ea motse e butsoe, eaba baa kena. Hoja Bababylona ba ne ba tsebile hore Cyruse o tl’o ba hlasela, ba ka be ba koetse liheke tsohle tsa motse. Empa hoa bonahala hore ba ne ba se na mokhoa oa ho itšireletsa.

Ho na le lintho tse ling tse ngata tseo Bibele e ileng ea bua ka tsona tse ileng tsa phethahala feela joalokaha li ne li profetiloe. * Batho ba profeta lintho tseo ba li boleletsoeng ke melimo ea bona ea bohata. Empa boprofeta bo ka Bibeleng bona bo tsoa ho Molimo, “ea bolelang qetello ho tloha tšimolohong, le eo ho tloha khale a bolelang lintho tse e-s’o etsoe.”—Esaia 46:10.

Molimo oa ’nete eo lebitso la hae e leng Jehova,  ke eena feela “ea bolelang qetello ho tloha tšimolohong, le eo ho tloha khale a bolelang lintho tse e-s’o etsoe.” Lebitso la hae le bolela “O Etsa Hore ho be.” Lebitso leo le bontša hore o na le bokhoni ba ho re bolella lintho tse tla etsahala ka moso le hore o na le matla a ho etsa hore li etsahale ka tsela eo a e batlang. Hape lea bontša hore o tla fela a phethahatse lintho tsohle tseo a li tšepisitseng.

BOPROFETA BO PHETHAHALANG MEHLENG ENA

Ho na le lintho tseo Bibele e ileng ea re li tla etsahala mehleng ena. Lilemo tse ka bang 2 000 tse fetileng, Bibele e ile ea re “matsatsing a ho qetela” kapa mehleng ea bofelo, “ho tla ba le linako tse mahlonoko tseo ho leng thata ho sebetsana le tsona.” Matsatsi aa a ho qetela kapa mehla ea bofelo, ke eng? Ha se hore ho na le mohla lefatše le tla ba sieo kapa hore ha le sa tla ba le batho, empa ho tla fela mathata le lintho tsohle tseo esale li utloisa batho bohloko ka lilemo tse ngata. Re tl’o hlahloba tse ling tsa lintho tse bontšang hore re phela “matsatsing a ho qetela” kapa mehleng ea bofelo.

2 Timothea 3:1-5 e re: “Matsatsing a ho qetela . . .  batho e tla ba baithati, ba ratang chelete, ba ikhopolang ho tlōla, ba ikhohomosang, banyefoli, ba sa mameleng batsoali, ba se nang teboho, ba sa tšepahaleng, ba se nang lerato la tlhaho, ba sa bulehelang tumellano leha e le efe, baetselletsi, ba hlokang boitšoaro, ba bohale bo tšosang, ba hlokang lerato la se molemo, baeki, ba hlooho li thata, ba ikhohomosang ka boikakaso, ba ratang menyaka ho e-na le ho rata Molimo, ba nang le ponahalo ea boinehelo ba bomolimo empa ba se na ’nete matleng a bona.”

Na mekhoa ee e boletsoeng ka holimo ha se eona eo batho ba nang le eona mehleng ee? Na u hlokometse hore batho ba bangata mehleng ee ba inahana bobona, ba rata chelete ebile baa ikhohomosa? Na ha se ’nete hore batho ba mehleng ee ke bahatelli ebile ba manganga? E tlameha ebe oa hlokomela hore bana ha ba sa mamela batsoali le hore batho ba rata menate ho feta ho rata Molimo. Maemo ana a sa jeseng litheohelang a ntse a mpefala letsatsi le letsatsi.

Matheu 24:6, 7 e re: “Le tla utloa ka lintoa le litlaleho tsa lintoa. . . . Sechaba se tla tsohela sechaba matla le ’muso o tla tsohela ’muso matla.”

Liphuputso tse ling li bontša hore batho ba fetang limilione tse 100 ba ile ba shoa ka lebaka la lintoa ho tloha ka 1914. Palo eo e feta le palo ea baahi ba linaha tse ngata. U se u ka inahanela feela hore na ke batho ba bangata hakae ba ileng ba utloa bohloko bo otlang pelo ka lebaka la ho hlokahalloa ke batho bao ba ba ratang. Ho ntse ho le joalo, ho bonahala mebuso e hlolehile ho etsa hore lintoa li fele.

Matheu 24:7 e re: “Ho tla ba le likhaello tsa lijo.”

Lenaneo la Lefatše la Lijo le ile la re: “Le hoja ho e-na le lijo tse lekanang batho bohle ba teng lefatšeng, batho ba limilione tse 815 ba robala ba itsosa letsatsi le letsatsi. Batho ba bang ba bangata ho feta moo ba tšoaroa ke mafu a bakoang ke ho hloka lijo tse nang le phepo e nepahetseng.” Liphuputso li bontša hore bana ba ka bang limilione tse tharo baa shoa selemo le selemo ka lebaka la tlala.

Luka 21:11 e re: “Ho tla ba le litšisinyeho tse khōlō tsa lefatše.”

Selemo le selemo ho ba le litšisinyeho tse 50 000 tsa lefatše tse kholo. Tse 100 tsa tsona li senya matlo le mehaho, ebe ho ba le e ’ngoe e kholo ho li feta kaofela e etsahalang hoo e ka bang selemo le selemo. Phuputso e ’ngoe e bontša hore batho ba 471 000 ba ile ba shoa ka lebaka la litšisinyeho tsa lefatše pakeng tsa 1975 le 2000.

Matheu 24:14 e re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.”

Lipaki Tsa Jehova li feta limilione tse robeli ka palo. Haesale li ntse li bolella batho molaetsa oa Bibele lefatšeng lohle linaheng tse 240. Li thula hohle ka molaetsa ona. Bibele e re “bofelo bo tla tla” ha mosebetsi ona o se o felile ’me Molimo a khotsofetse. Ho tla fela eng? Ho tla fela puso ea motho ebe ho se ho busa ’Muso oa Molimo. Ke lintho life tseo ’Muso oa Molimo o tla li etsetsa batho? Karabo e tla hlaha sehloohong se latelang.

^ ser. 8 Sheba sehlooho se reng: “Bopaki ba Hore Bibele e Nepahetse.”