Fetela boitsebisong

Fetela lethathamong la tse ka hare

 NA E ENTSOE?

Tsela eo Limela li Sebelisang Setache ka Eona

Tsela eo Limela li Sebelisang Setache ka Eona

LIMELA li sebelisa mokhoa o rarahaneng o bitsoa photosynthesis e le hore li monye matla a letsatsi bakeng sa ho hlahisa lijo. Liphuputso li bontša hore mefuta e meng ea limela e khona ho lekanya nako e le hore li ’ne li hlahise lijo bosiu.

Nahana ka sena: Motšehare limela li fetola carbon dioxide e moeeng hore e be setache le tsoekere. Bosiu limela tse ngata li sebelisa setache seo li ileng tsa se boloka motšehare e le hore li tsoele pele li phela ’me li hōle. Ho feta moo, li sebelisa liphesente tse 95 tsa setache seo li se bolokileng ka tsela e lekaneng e le hore ka meso li ka qala ho hlahisa se eketsehileng.

Tšibollo eo e ile ea etsoa ho itšetlehiloe ka teko e ileng ea etsoa semeleng se bitsoang Arabidopsis thaliana. Bafuputsi ba fumane hore ho sa tsotellehe hore na bosiu bo bolele hakae, ebang bo nka lihora tse 8, 12 kapa tse 16, se sebelisa setache ka tsela e lekaneng ho fihlela se etsa setache se seng ha letsatsi le chaba. Ho bonahala eka semela sena se arola setache se teng hantle e le hore ho sa tsotellehe hore na bosiu bo bolelele hakae, letsatsi le chabe se ntse se e-na le setache.

Limela li tseba joang hore na ho setse setache se sekae? Li tseba joang hore na ho setse nako e kae? Ke eng e li thusang ho etsa lipalo? U ka fumana likarabo ka hore u etse lipatlisiso.

U nahana joang? Na tsela eo limela li arolang setache ka eona e bile teng ka ho iphetola ha lintho? Kapa na e entsoe?