Fetela boitsebisong

Fetela lethathamong la tse ka hare

 SE KA THUSANG LELAPA | HO BA MOTSOALI

Ho Ruta Bana ho Mamela

Ho Ruta Bana ho Mamela

BOTHATA

Uena le ngoana oa hao ea lilemo li ’nè le lula le loanela hore na ke mang ea nang le tokelo ea ho laela ’me kamehla ho bonahala e le eena ea hlōlang.

  • Ha u mo bolella hore a etse ntho eo a sa batleng ho e etsa oa u hlokomoloha.

  • Ha u mo bolella hore a se ke a etsa ntho eo a batlang ho e etsa, oa ithaburanya.

Mohlomong ua ipotsa: ‘Na ke taba ea bongoana feela? Na o tla ke a tlohele mokhoa oo oa hae?’

U ka khona ho ruta ngoana oa hao ho mamela. Empa pele re hlahloba hore na u ka etsa seo joang, nahana ka lebaka le etsang hore a itšoare ka tsela eo.

KE HOBANE’NG HA SEE SE ETSAHALA?

Ha ngoana oa hao e ne e le lesea, mosebetsi oa hao o ka sehloohong e ne e le ho mo hlokomela. U ne u mo thusa kapele ha a hloka thuso ea hao. Ha a ne a lla feela u ne u potlakela ho mo fa seo a se hlokang. Ka sebele, ho etsa joalo ho ne ho nepahetse ebile ho hlokahala. Lesea le hloka tlhokomelo e feletseng ea batsoali.

Leha ho le joalo, ka mor’a hore u mo tšoare ka tsela eo ka likhoeli tse ngata, ke ha tlhaho hore ngoana a itšoare joalokaha eka ke eena mong’a ntlo ’me batsoali ba hae ke makhoba a lokelang ho etsa thato ea hae. Kahoo ha ngoana a le lilemo li peli o qala ho hlokomela hore ha e le hantle, ke batsoali ba hae ba laolang lintho ka lapeng eseng eena. Batsoali ha ba sa mamela eena, empa ba lebeletse hore e be eena ea mamelang litaelo tsa bona. Sena se etsa hore bana ba ferekane maikutlong! Kahoo, ba bang baa ithaburanya. Ba bang ba leka batsoali ba bona ka hore ba se ke ba ba mamela.

Nakong eo e thata, u lokela ho ema u tiile ha u fa ngoana oa hao litaelo e le hore a be ka tsela eo u batlang hore a be ka eona. Empa u ka etsa’ng haeba ngoana a hlokomoloha kapa a sa mamele tataiso ea hao joalokaha ho bontšitsoe mohlaleng o qalong?

 SEO U KA SE ETSANG

Etella pele. Ngoana oa hao a ke ke a amohela hore ke uena ea etellang pele ho fihlela a bona seo se etsahala. Kahoo, mo bontše hore ke uena ea nang le matla a bolaoli empa u etse seo ka tekatekano. Lilemong tsa morao tjena, batho ba ipolelang hore ke litsebi ba entse hore lentsoe “bolaoli” le utloahale eka ke bokhopo. Monna e mong o bile o re ho fosahetse hore batsoali ba khalemele bana. Empa ho se ba khalemele ho ka etsa hore ba ikutloe ba ferekane, ba tsoe taolong ba be ba nahane hore batsoali ba tlamehile ho ba etsetsa lintho. Hape ha ho ba lokisetse hore e be batho ba baholo ba nang le boikarabelo.—Molao-motheo oa Bibele: Liproverbia 29:15.

Mo khalemele. Dikishinari e ’ngoe e re ho khalemela ngoana le ho mo fa melao, ke “tsela ea ho mo koetlisa e le hore a mamele kapa a laolehe ’me ha a sa mamele batsoali ba ka mo fa kotlo e itseng kapa ba mo shapa.” Leha ho le joalo, ha u khalemela ngoana u se ke ua mo hlekefetsa. Ka lehlakoreng le leng, u lokela ho bua le eena ka tsela e tobileng, u mo bolelle hore na ho tla etsahala’ng ha a sa u mamele.—Molao-motheo oa Bibele: Liproverbia 23:13.

Itlhalose ka ho hlaka. Batsoali ba bang ba rata ho utloa maikutlo a bana ba bona ha ba ba laela ho etsa ntho e itseng. (“Ke kōpa u hloekise phaposi ea hao ea ho robala—oa utloa?”) Mohlomong ba nahana hore ho etsa joalo ho bontša mekhoa e metle. Empa seo se ka etsa hore motsoali e be eena ea ikokobeletsang ngoana le ho etsa hore ngoana a ikhethele hore na o tla mamela taelo ea motsoali kapa che. Fa ngoana litaelo tse hlakileng ho e-na le ho mo tlohela hore a iketsetse khetho.—Molao-motheo oa Bibele: 1 Bakorinthe 14:9.

Lomahanya meno. Haeba u hanela ngoana ka ntho e itseng, lomahanya meno ’me u tiise hore uena le molekane oa hao le ba ntsoe-leng. Haeba u itse u tla mo shapa hobane a sa mamele seo u mo laetseng sona, u fele u etse joalo. U se ke ua ngangisana le ngoana ka qeto eo u entseng kapa ua ikoahlaea ka hore ebe u e entse. Ho tla ba bonolo ho uena le ho ngoana oa hao haeba u etsa hore ‘E ea hao e bolele E, ’me Che ea hao, Che.’—Jakobo 5:12.

E-ba lerato. Lelapa hase moo bana ba lokelang ho itaola kapa ho hatelloa. Ho e-na le hoo, ke tokisetso ea Molimo moo bana ba lokelang ho tataisoa ka lerato, e le hore e tle e be batho ba baholo ba nang le boikarabelo. Kaha khalemelo ke karolo ea tokisetso eo, e tla etsa hore ngoana oa hao a mamele le hore a ikutloe a sireletsehile tlhokomelong ea hao e lerato.