Fetela boitsebisong

Fetela lethathamong la tse ka hare

Selelekela

Selelekela

“Le be baetsisi ba bao ka tumelo le ho se fele pelo ba ruang litšepiso.”—BAHEBERU 6:12.

1, 2. Kamoo ho bonahalang kateng, molebeli e mong ea tsamaeang o ile a talima batho ba ka Bibeleng joang, hona ke hobane’ng ha batho ba kang bao e ka ba metsoalle ea bohlokoa?

“O BUA ka batho ba ka Bibeleng joalokaha eka ke khale e le metsoalle ea hae.” ’Mè e mong oa Mokreste o ile a bua joalo ka mor’a ho mamela puo ea molebeli e mong ea tsamaeang ea seng a hōlile. O ne a nepile, kaha mora eo oabo rōna o ne a se a qetile nako e ngata a ithuta Lentsoe la Molimo le ho le ruta ba bang—ho ne ho le joalokaha eka banna le basali ba nang le tumelo ba hlahang ka Bibeleng, e ne e hlile e le metsoalle eo a e tsebileng bophelo bohle ba hae.

2 Na ho ne ho ke ke ha e-ba hotle ha bongata ba batho bao ba ka Bibeleng e ne e ka ba metsoalle ea rōna? Na ke batho ba sebele ho uena? Ak’u nahane feela hore na ho ne ho tla ba joang ho buisana le bona, ho tsamaea le bona, ho qeta nako re tsebana le banna le basali ba kang Noe, Abrahama, Ruthe, Elia le Esthere. Ak’u nahane feela hore na ba ne ba tla ba le tšusumetso e joang ho uena—mohlomong ba u fa likeletso tsa bohlokoa le ho u khothatsa!—Bala Liproverbia 13:20.

3. (a) Re ka rua molemo joang ka ho ithuta ka banna le basali ba nang le tumelo ba hlahang ka Bibeleng? (b) Re tla hlaloba lipotso life?

3 Ke ’nete hore nakong ea “tsoho ea ba lokileng le ba sa lokang” ho tla khoneha ho ba le metsoalle ea mofuta ona. (Lik. 24:15) Leha ho le joalo, esita le hona joale re ka rua molemo ha re ithuta ka banna le basali ba nang le tumelo ba hlahang ka Bibeleng. Joang? Moapostola Pauluse o fana ka karabo ena: “Le be baetsisi ba bao ka tumelo le ho se fele pelo ba ruang litšepiso.” (Baheb. 6:12) Ha re qala ho ithuta ka banna le basali bana ba nang le tumelo, a re ke re hlahlobeng lipotso tse ’maloa tseo mantsoe a Pauluse a etsang hore re nahane ka tsona: Hantle-ntle tumelo ke eng, hona ke hobane’ng ha re e hloka? Re ka etsisa tumelo e tšoanang le ea batho ba khale ba ka Bibeleng joang?

Tumelo—Ke Eng Hona ke Hobane’ng ha re e Hloka?

4. Batho ba nahana hore tumelo ke’ng, hona ke hobane’ng ha ba fositse?

4 Tumelo ke tšobotsi e khahlehang, eo banna bohle le basali bao re tla ithuta ka bona bukeng ena ba neng ba e nka e le ea bohlokoa ka ho fetisisa. Batho ba bangata kajeno ha ba utloisise hantle hore na tumelo ke eng, ba nahana hore ke ho lumela feela u se na mabaka a utloahalang. Leha ho le joalo, ba fositse. Tumelo hase ho lumela feela ka hlooho e ntšo; hase boikutlo feela tjee. Ho lumela feela ka hlooho e ntšo ho kotsi. Tsela eo motho a ikutloang ka eona e ea feto-fetoha, esita le ho lumela feela ho Molimo,  ha hoa lekana kaha “bademona [le bona] baa lumela ’me baa thothomela.”—Jak. 2:19.

5, 6. (a) Tumelo ea rōna e thehiloe linthong life tse peli tse sa bonoeng? (b) Tumelo ea rōna e lokela ho ba le motheo o tiileng hakae? Fana ka mohlala.

5 Tumelo hase feela ho lumela ka hlooho e ntšo. Hopola kamoo Bibele e e hlalosang kateng. (Bala Baheberu 11:1.) Pauluse o ile a re tumelo e thehiloe linthong tse peli tseo re ke keng ra li bona. Ea pele, e thehiloe linthong tsa sebele tse ‘sa bonoeng.’ Mahlo a rōna a nama a ke ke a bona lintho tsa sebele tse maholimong—tse kang Jehova Molimo, Mora oa hae, kapa ’Muso o busang hona joale leholimong. Ea bobeli, tumelo e thehiloe “[linthong] tseo ho nang le tšepo bakeng sa tsona”—e leng lintho tse e-s’o ka li etsahala. Hona joale ha re khone ho bona lefatše le lecha leo haufinyane le tla tlisoa ke ’Muso oa Molimo. Kahoo, na seo se bolela hore tumelo ea rōna linthong tseo tsa sebele le linthong tseo re nang le tšepo ho tsona, ha e na motheo?

6 Le hanyenyane! Pauluse o ile a hlalosa hore tumelo ea ’nete e thehiloe motheong o tiileng. Ha a ne a re tumelo ke “tebello e tiisitsoeng,” o ne a sebelisa poleloana eo e ka ’nang ea bolela “lengolo la setša.” Nka hore motho e mong o batla ho u fa ntlo. A ka ’na a u fa lengolo la setša ’me a re, “Ntlo ea hao ke eo.” Ke ’nete hore ha a bolele hore u tla lula sephephechaneng seo sa pampiri; o mpa a bolela hore joale u na le bopaki bo tiileng ba hore ka molao, setša ke sa hao le tsohle tse ho sona. Ka ho tšoanang, bopaki ba tumelo ea rōna boa kholisa, bo matla hoo bo ka lekanngoang le tumelo ea rōna.

7. Tumelo ea ’nete e lokela ho ba joang?

7 Kahoo, tumelo ea ’nete e lokela ho ba le motheo o tiileng le o sa thekeseleng o itšetlehileng ka ho feletseng ho Jehova Molimo. Tumelo e etsa hore re mo nke e le Ntate oa rōna ea lerato ’me re tšepe hore tsohle tseo a li tšepisitseng li tla phethahala. Empa tumelo ea sebele e bolela ho fetang hoo. Joaloka ntho e phelang, e lokela ho feptjoa e le hore e lule e phela. E lokela ho bontšoa ka liketso, ho seng joalo e tla shoa.—Jak. 2:26.

8. Ke hobane’ng ha tumelo e le ea bohlokoa hakaale?

8 Ke hobane’ng ha tumelo e le ea bohlokoa hakaale? Pauluse o ile a fana ka karabo e susumetsang. (Bala Baheberu 11:6.) Re ke ke ra atamela ho Jehova kapa hona ho mo thabisa ntle le hore re be le tumelo. E le hore libōpuoa tsohle tse bohlale li finyelle morero oa tsona oa bohlokoa ka ho fetisisa, e leng ho atamela haufi le ho tlotlisa Ntate oa rōna ea leholimong, Jehova, ho hlokahala hore li be le tumelo.

9. Ke’ng se bontšang hore Jehova oa tseba hore re hloka tumelo?

9 Jehova o tseba kamoo re hlokang tumelo kateng, kahoo o re file mehlala e re rutang hore na re ka e haha joang le ho e bonahatsa. O hlohonolofatsa phutheho ea Bokreste ka mehlala ea banna ba tšepahalang ba etellang pele. Lentsoe la hae le re: “Le etsise tumelo ea bona.”  (Baheb. 13:7) Ebile o re file ho fetang hoo. Pauluse o ile a ngola mabapi le “leru le leholo . . . la lipaki,” banna le basali ba mehleng ea boholo-holo ba re sietseng mehlala e ikhethang ea tumelo. (Baheb. 12:1) Ho na le bahlanka ba tšepahalang ba bangata ho feta bao Pauluse a buileng ka bona ho Baheberu khaolo ea 11. Bibele e na le lipale tsa ’nete tse hlollang tsa banna le basali ba bacha le ba hōlileng, ba tsoang limelong tse fapaneng, ba ileng ba phela ka tumelo, ba ka re rutang lintho tse ngata, mehleng ena eo batho ba se nang tumelo.

Re ka Etsisa Tumelo ea Bona Joang?

10. Thuto ea rōna ea botho e ka re thusa joang hore re etsise banna le basali ba tšepahalang ba hlahang ka Bibeleng?

10 Pele u ka etsisa motho, u lokela ho sheba hantle seo a se etsang. Ha u ntse u bala buka ena, u tla hlokomela hore ho entsoe lipatlisiso tse ngata ho u thusa hore u shebe ka hloko banna bana le basali ba tumelo. Ho ka ba hotle hore le uena u iketsetse lipatliso tse eketsehileng. Thutong ea hao ea botho, etsa lipatlisiso Bibeleng u sebelisa lisebelisoa leha e le life tseo u nang le tsona. Ha u ntse u e-ja masapo a hlooho ka seo u ithutang sona, leka ho nahana ka sebaka le boemo boo litlaleho tseo tsa Bibele li buang ka bona. Nka hore u sebakeng seo, utloa melumo u be u fofonele menko. Ntho ea bohlokoa le ho feta, leka ho ikutloa ka tsela eo batho bao ho buuoang ka bona ba ikutloang ka eona. Ha u ntse u ipeha boemong ba banna le basali bao ba tšepahalang, e tla ba ba sebele ho uena ’me u tla ba tloaela—ba bang ba bona ba tla ba joaloka metsoalle ea khale e ratehang.

11, 12. (a) U ka ’na ua ikutloa u le haufi le Abrame le Sarai ka tsela efe? (b) U ka rua molemo joang mohlaleng oa Anna, oa Elia, kapa oa Samuele?

11 Ha u ka ba tseba haholoanyane, u tla batla ho ba etsisa. Ho tea mohlala, a re re u ntse u nahana ka kabelo e ncha. Ebe joale, mokhatlo oa Jehova o u memela ho eketsa tšebeletso ea hao ka tsela e itseng. Mohlomong u kōptjoa ho fallela sebakeng seo ho hlokahalang thuso e potlakileng ea baboleli, kapa mohlomong u khothalletsoa ho leka mokhoa oa ho paka oo u sa u tloaelang kapa oo u sa u rateng. Ha u ntse u nahanisisa ka kabelo ena ’me u e rapella, na ho nahana ka mohlala oa Abrame ho ka u thusa? Eena le mosali oa hae Sarai, ba ile ba ikemisetsa ho tela mabothobotho a Ure, kahoo ba ile ba hlohonolofatsoa ka ho enneng. Ha u ntse u hata mehlaleng ea bona, ka sebele u tla utloa hore joale u ba tseba hantle ho feta leha e le neng pele.

12 Ka ho tšoanang, u ka etsa’ng haeba motsoalle oa hao ea haufi a u tšoara hampe, ebe u nyahama hoo u ikutloang eka u ka khaotsa ho ea libokeng? Haeba u ka nahanisisa ka mohlala oa kamoo Anna a sa kang a lumella hore ho tšoaroa hampe ke Penina ho mo nyahamise ho sebeletsa Jehova, seo se tla u thusa ho etsa qeto e nepahetseng—e leng se ka etsang hore u nke Anna e le motsoalle ea ratehang. Ka tsela e tšoanang, haeba u nyahamisoa ke ho ikutloa  eka ha u na thuso, u ka ikutloa u le haufi le Elia ha u ntse u ithuta ka mathata ao a ileng a tobana le ’ona le kamoo Jehova a ileng a mo khothatsa kateng. Bacha ba lulang ba hatelloa ke bana ba itšoereng hampe bao ba kenang sekolo le bona ba ka ikutloa ba le haufi le Samuele ka mor’a hore ba ithute kamoo a ileng a sebetsana kateng le tšusumetso e mpe ea bara ba Eli ha ba sebeletsa tabernakeleng.

13. Na ho etsisa tumelo ea batho ba ka Bibeleng, ho etsa hore tumelo ea hao e se ke ea e-ba ea bohlokoa? Hlalosa.

13 Na ho etsisa tumelo ea batho ba ka Bibeleng, ho etsa hore tumelo ea hao e se ke ea e-ba ea bohlokoa mahlong a Jehova? Che, ha ho joalo! Hopola hore Lentsoe la Jehova le re khothalletsa hore re etsise batho ba nang le tumelo. (1 Bakor. 4:16; 11:1; 2 Bathes. 3:7, 9) Ho feta moo, batho bao re tlil’o ithuta ka bona, le bona ba ile ba etsisa tumelo ea batho ba tšepahalang ba phetseng pele ho bona. Ka mohlala, Khaolong ea 17 ea buka ena, ho bonahala Maria a ile a qotsa mantsoe a Anna, e leng se bontšang hore o ne a mo nka e le mohlala. Na seo se ile sa etsa hore tumelo ea Maria e se ke ea e-ba ea bohlokoa? Le hanyenyane! Ho e-na le hoo, mohlala oa Anna o ile oa thusa Maria hore a matlafale tumelong le hore a be le kamano ea hae e ikhethang le Jehova Molimo.

14, 15. Ke lintho life tse ling tse teng bukeng ee ’me e tla re thusa joang?

14 Buka ena e etselitsoe ho u thusa hore u matlafatse tumelo ea hao. Likhaolo tse latelang li nkiloe lihloohong tse tlas’a sehlooho se reng, “Bontša Tumelo e Tšoanang le ea Bona” tse ileng tsa hatisoa Molula-Qhooeng ho tloha ka 2008 ho ea ho 2013. Leha ho le joalo, ho na le boitsebiso bo bocha bo kenyelelitsoeng. Khaolo ka ’ngoe e na le lipotso tse tla re thusa hore re buisane le ho bona hore na re ka sebelisa boitsebiso boo joang. Buka ena e na le litšoantšo tse ngata tse mebala ’me tse neng li ntse li le teng li ntlafalitsoe le hōlisoa. Ho boetse ho kenyelelitsoe lintho tse thusang tse kang lichate tsa tatellano ea liketsahalo le limmapa. Buka ena ea Etsisa Tumelo ea Bona e etselitsoe ho re thusa ha re ithuta re le bang, re le lelapa kapa re le phutheho. Malapa a mangata le ’ona a ka ’na a thabela ho bala lipale tsena a le ’moho.

15 E se eka buka ena e ka u thusa hore u bontše tumelo e tšoanang le ea bahlanka ba tšepahalang ba Jehova ba nako e fetileng. E se eka e ka u thusa hore u matlafatse tumelo ea hao ha u ntse u atamela haufi le Ntate oa hao ea leholimong, Jehova!