Fetela boitsebisong

Fetela lethathamong la tse ka hare

Sephetho

Sephetho

“Le be baetsisi ba bao ka tumelo le ho se fele pelo ba ruang litšepiso.”—BAHEBERU 6:12.

1, 2. Ke hobane’ng ha e le habohlokoa hore re be le tumelo hona joale? Bontša.

TUMELO. Ke lentsoe le letle le emelang tšobotsi e babatsehang haholo. Leha ho le joalo, ha re bona lentsoe leo, ke habohlokoa hore re nahane ka lentsoe le leng, e leng: “Ho potlaka.” Etsoe haeba re se na tumelo, re lokela ho e batla ka potlako. Hape, haeba re e-na le tumelo, re lokela ho potlakela ho e sireletsa le ho e hlokomela. Hobane’ng?

2 A k’u nahane u tsamaea lehoatateng le sabaletseng. U hloka metsi ka potlako. Ha u fumana metsi, u tlameha ho a sireletsa letsatsing. U boetse u lokela ho a tlatselletsa e le hore u lule u e-na le a lekaneng ho fihlela u fihla moo u eang. Kajeno, re phela lefatšeng le tšoanang le lehoatata la moea, lefatše leo tumelo ea sebele—joaloka metsi ao—e sa fumaneheng habonolo e bileng e nyamelang ka potlako ntle le ha e ka sireletsoa le ho tlatselletsoa. Re hloka ho etsa sena ka potlako; joalokaha re ke ke ra phela ntle ho metsi, re ke ke ra phela moeeng ntle le tumelo.—Bar. 1:17.

3. Jehova o re file eng e le hore re hahe tumelo ea rōna, hona ke lintho life tse peli tseo re lokelang ho hopola ho li etsa?

3 Jehova oa tseba hore re hloka tumelo ka potlako ’me oa tseba hore ho thata hakae ho e haha le ho lula re e-na le eona. Ha ho pelaelo hore ke lona lebaka le entseng hore a re fe mehlala eo re ka e etsisang. Jehova o ile a bululela moapostola Pauluse hore a ngole: “Le be baetsisi ba bao ka tumelo le ho se fele pelo ba ruang litšepiso.” (Baheb. 6:12) Ke kahoo mokhatlo oa Jehova o ileng oa re khothalletsa hore re sebetse ka thata ho etsisa mehlala ea banna le basali ba tšepahalang, e kang eo re e hlahlobileng bukeng ena. Ebe joale re lokela ho etsa’ng? Re lokela ho hopola lintho tse peli: (1) Re hloka ho lula re matlafatsa tumelo ea rōna; (2) re lokela ho lula re e-na le tšepo.

4. Satane o bontšitse joang hore ke sera se sa batleng ha re e-ba le tumelo, empa ke hobane’ng ha re sa lokela ho mo tšaba?

4 Lula u matlafatsa tumelo ea hao. Ho na le sera se seholo se sa batleng ha re e-ba le tumelo—Satane. ’Musi enoa oa lefatše o entse hore tsamaiso ena ea lintho e tšoane le lehoatata leo ho leng thata ho lula re e-na le tumelo ho lona. O matla ho re feta. Na re lokela ho tšaba hore re ke ke ra khona ho ba le tumelo le ho e matlafatsa? Le hanyenyane! Jehova ke Motsoalle e moholo oa bohle ba batlang ho ba le tumelo ea sebele. O re tiisetsa hore ha A le ka lehlakoreng la rōna, re ka khona ho hanyetsa Diabolose ra ba ra etsa hore a re balehele! (Jak. 4:7) Re mo hanyetsa ka hore letsatsi le letsatsi re matlafatse tumelo ea rōna le ho e haha. Re ka etsa seo joang?

5. Banna le basali ba tšepahalang ba hlahang ka Bibeleng ba ile ba fumana tumelo joang? Hlalosa.

 5 Joalokaha re bone, banna le basali ba tumelo ba hlahang ka Bibeleng, ha baa tsoaloa ba tšepahala. Ba ile ba bontša ka tsela eo ba phelang ka eona hore moea oa Jehova o halalelang o thusa batho hore ba be le tumelo. (Bagal. 5:22, 23) Ba ile ba rapella thuso ’me seo se ile sa etsa hore Jehova a lule a matlafatsa tumelo ea bona. A re ba etsiseng, re sa lebale hore Jehova o fana ka moea oa hae ka seatla se bulehileng ho ba o kōpang le ba sebetsang tumellanong le lithapelo tsa bona. (Luka 11:13) Na ho na le ho eketsehileng hoo re ka ho etsang?

6. Re ka rua molemo ka ho feletseng joang ha re ithuta litlaleho tsa Bibele?

6 Bukeng ena, re buile ka batho ba ’maloa feela ba re behetseng mehlala e ikhethang ea tumelo. Ho na le ba bang ba bangata haholo! (Bala Baheberu 11:32.) E mong le e mong o re behetse mohlala o ikhethang oo re ka ithutang lintho tsa bohlokoa ho oona. Haeba re bala mohoalotso feela ka batho ba hlahang ka Bibeleng ba neng ba e-na le tumelo, re ke ke ra matlafatsa tumelo ea rōna. E le hore re rue molemo ka ho feletseng ha re bala, ho hlokahala hore re qete nako re batlisisa taba e potolohileng tlaleho ea Bibele le lintlha tse e tšehetsang. Haeba re lula re hopola hore banna le basali bao ba ne ba e-na le “maikutlo a joaloka a rōna,” mohlala oa bona e tla ba oa sebele ho rōna. (Jak. 5:17) Re ka khona ho ikenya lieteng tsa bona ha re ntse re nahana hore na ba ne ba ikutloa joang ha ba ne ba tobana le mathata le litšitiso tse tšoanang le tsa rōna.

7-9. (a) E ka ’na eaba banna le basali ba tumelo ba hlahang ka Bibeleng ba ne tla ikutloa joang ka tsela eo re rapelang Jehova ka eona kajeno? (b) Ke hobane’ng ha re lokela ho matlafatsa tumelo ea rōna ka liketso?

7 Re boetse re tiisa tumelo ea rōna ka liketso tsa rōna. Etsoe, “tumelo e se nang mesebetsi e shoele.” (Jak. 2:26) Ak’u nahane hore na banna le basali bao re buileng ka bona ba ne ba tla thaba hakaakang haeba ba ne ba fuoe mosebetsi o tšoanang le oo Jehova a laetseng hore re o etse kajeno!

8 Ka mohlala, Abrahama o ne a tla ikutloa joang haeba a ne a boleletsoe hore ho e-na le hore a rapele Jehova lialetareng tsa nakoana tsa majoe tse neng li emisitsoe lefeelleng, a ka rapela Jehova a e-na le barapeli-’moho le eena Holong ea ’Muso le likopanong tse khōlō, moo litšepiso tseo a neng a li “bonela hōle” li hlalosoang le ho hlahlojoa ka hloko ka tsela e tsotehang? (Bala Baheberu 11:13.) Hape, Elia o ne a tla ikutloa joang haeba a ne a lokela ho etela batho a ba isetsa molaetsa oa tšepo le o ba tšelisang, ho e-na le hore a bolaee baprofeta ba khopo ba Baale ha ka lehlakoreng le leng a ntse a leka ho sebeletsa Jehova tlas’a morena oa mokoenehi ea khopo? Ka sebele banna le basali bao ba hlahang ka Bibeleng ba tumelo ba ne ba ke ke ba qeaqea ho sebeletsa Jehova joalokaha re etsa kajeno.

9 Kahoo, re lokela ho matlafatsa tumelo ea rōna ka liketso. Ha re etsa joalo, re tla be re sebelisa mehlala ea banna le basali ba tumelo ba  hlahang Lentsoeng le bululetsoeng la Molimo bophelong ba rōna. Joalokaha ho boletsoe selelekeleng, re tla ikutloa re le haufi le bona joaloka metsoalle ea rōna. Leha ho le joalo, haufinyane setsoalle se joalo e ka ba sa sebele le ho feta.

10. Ke ntho efe e tla re thabisa Paradeiseng?

10 Lula u e-na le tšepo. Ka linako tsohle, banna le basali ba tšepahalang ba ne ba fumana matla tšepong eo Molimo a neng a ba file eona. Na le uena u fumana matla tšepong eo? Ka mohlala, nahana ka thabo eo u tla ba le eona ha u kopana le bahlanka ba tšepahalang ba Molimo ha ba khutlela bophelong nakong ea “tsoho ea ba lokileng.” (Bala Liketso 24:15.) Tse ling tsa lipotso tseo u ka ratang ho ba botsa tsona ke life?

11, 12. Lefatšeng le lecha, ke lipotso life tseo u ka ’nang ua li botsa (a) Abele? (b) Noe? (c) Abrahama? (d) Ruthe? (e) Abigaile? (f) Esthere?

11 Ha u kopana le Abele, na u tla rata ho mo botsa hore na batsoali ba hae ba ne ba le joang? Kapa mohlomong u ka mo botsa: “Na u kile ua bua le likerubime tse neng li lebetse tsela e eang Edene? Na li ne li u araba? Noe eena? U ka ’na ua mo botsa: “Na u ne u tšaba Banefelime? U ne u hlokomela liphoofolo tseo joang selemo kaofela ha li ntse li le ka arekeng?” Haeba u ka kopana le Abrahama, mohlomong u ka mo botsa: “Na u kile ua kopana le Sema? Ke mang ea ileng a u ruta ka Jehova? Na ho ne ho le thata ho tloha Ure?”

12 Ka ho tšoanang, nahana ka lipotso tseo u ka ratang ho li botsa basali ba tšepahalang ba tla beng ba tsositsoe. “Ruthe, ke’ng e ileng ea etsa hore u be morapeli oa Jehova?” “Abigaile, na u ne u tšaba ho bolella Nabale hore na u ile ua thusa Davida joang?” “Esthere, ho ile ha etsahala’ng ka uena le Mordekai ka mor’a hore pale ea lōna e ka Bibeleng e fele?”

13. (a) E ka ’na eaba ba tsositsoeng ba tla u botsa lipotso life? (b) U ikutloa joang ka tšepo ea hore u tlil’o kopana le banna le basali ba tšepahalang ba boholo-holo?

13 Ha ho pelaelo hore mohlomong banna le basali bao ba tla ba le lipotso tse ngata tseo ba ka batlang ho u botsa tsona? E tla ba thabo e kaakang ho ba bolella kamoo matsatsi a ho qetela a ileng a fihla sehlohlolong kateng le kamoo Jehova a ileng a hlohonolofatsa batho ba hae linakong tse thata! Ha ho pelaelo hore ba tla ameha ka ho tebileng ha ba utloa kamoo Jehova a ileng a phethahatsa litšepiso tsohle tsa hae. Matsatsing ao a tlang, re tla be re se re sa ipotse hore na bahlanka ba tšepahalang ba Molimo ba hlahang ka Bibeleng ke batho ba joang. Re tla be re phela le bona Paradeiseng! Kahoo etsa sohle se matleng a hao ho etsa hore e be ba sebele ho uena hona joale. Lula u etsisa tumelo ea bona. E se eka u ka thabela ho sebeletsa Jehova hammoho le bona e le metsoalle ea hao e ratehang ka ho sa feleng!