Fetela boitsebisong

Fetela lethathamong la tse ka hare

 KAROLO EA 9

Rapelang Jehova le le Lelapa

Rapelang Jehova le le Lelapa

“Le rapele Ea entseng leholimo le lefatše.”—Tšenolo 14:7

Joalokaha le ithutile bukaneng ena, Bibele e na le melao-motheo e mengata e tla le thusa le le lelapa. Jehova o batla hore le thabe. O le tšepisa hore haeba le etelletsa borapeli ba hae pele, “lintho tsena tse ling tsohle le tla li ekeletsoa.” (Matheu 6:33) Ruri o batla hore le be metsoalle ea hae. Kahoo, etsang sohle seo le ka se khonang ho matlafatsa setsoalle sa lōna le Molimo. Ena ke tlotla e khōlō ka ho fetisisa eo le ka bang le eona.—Matheu 22:37, 38.

1 MATLAFATSA KAMANO EA HAO LE JEHOVA

SEO BIBELE E SE BUANG: “‘Ke tla ba ntat’a lōna, ’me le tla ba bara le barali ba ka,’ ho bolela Jehova.” (2 Bakorinthe 6:18) Molimo o batla hore u be motsoalle oa hae oa sebele. E ’ngoe ea lintho tse ka u thusang ho etsa seo ke thapelo. Jehova o u mema hore u ‘rapele u sa phetse.’ (1 Bathesalonika 5:17) O labalabela ho utloa maikutlo a hao a tebileng le lintho tse u tšoenyang. (Bafilipi 4:6) Ha u rapela hammoho le ba lelapa la hao, ba tla hlokomela hore ruri Molimo ke motho oa sebele ho uena.

Ho phaella tabeng ea ho buisana le Molimo, u lokela ho mo mamela. U ka etsa sena ka ho bala Lentsoe la hae le lingoliloeng tse thehiloeng Bibeleng. (Pesaleme ea 1:1, 2) Thuisa ka seo u ithutang sona. (Pesaleme ea 77:11, 12) Ho mamela Molimo ho boetse ho akarelletsa hore u ee libokeng tsa Bokreste kamehla.—Pesaleme ea 122:1-4.

Tsela e ’ngoe ea bohlokoa eo ka eona u ka matlafatsang kamano ea hao le Jehova ke ka ho bolella ba bang ka eena. Ha u bua ka eena kamehla, u tla ba le kamano e haufi-ufi le eena.—Matheu 28:19, 20.

SEO LE KA SE ETSANG:

  • Ipheng nako ea ho rapela le ho bala Bibele letsatsi le letsatsi

  • Le le lelapa, etsang hore mesebetsi e amanang le borapeli e tle pele ho boithabiso le boikhathollo

2 THABELANG BORAPELI BA LELAPA

SEO BIBELE E SE BUANG: “Atamelang ho Molimo, ’me o tla atamela ho lōna.” (Jakobo 4:8) Le lokela ho ba le kemiso ea kamehla ea borapeli ba lelapa ’me le e khomarele. (Genese 18:19) Empa ho hlokahala ho fetang hoo. Le lokela ho ameha ka Molimo bophelong ba lōna kamehla. Matlafatsang kamano ea ba lelapa la lōna le Molimo ka hore le bue ka eena ‘ha le lutse ka tlung le ha le tsamaea tseleng le ha le robala le ha le tsoha.’ (Deuteronoma 6:6, 7) E-bang le sepheo se tšoanang le sa Joshua ea ileng a re: “Ha e le ’na le ba ntlo ea ka, re tla sebeletsa Jehova.”—Joshua 24:15.

SEO LE KA SE ETSANG:

  • E-bang le lenaneo la ka mehla la ho ithuta le finyellang litlhoko tsa setho ka seng sa lelapa