Fetela boitsebisong

Fetela lethathamong la tse ka hare

 KHAOLO EA BOHLANO

Thekollo ke Mpho ea Molimo e Khōlō

Thekollo ke Mpho ea Molimo e Khōlō
  • Thekollo ke eng?

  • E fanoe joang?

  • E ka bolela eng ho uena?

  • U ka bontša joang hore ua e ananela?

1, 2. (a) Mpho e ba ea bohlokoa haholo ho uena ha e le joang? (b) Ke hobane’ng ha ho ka thoe thekollo ke mpho ea bohlokoa ka ho fetisisa eo u ka e fuoang?

MPHO ea bohlokoa ka ho fetisisa eo u kileng ua e fuoa ke efe? Ha ho hlokahale hore mpho e be e bitsang chelete e ngata hore e be ea bohlokoa. Ha e le hantle, hase chelete e etsang hore mpho e be ea bohlokoa ba sebele. Ho e-na le hoo, mpho e bolela ho hoholo ho uena ha e u thabisa kapa e u fa seo u hlileng u se hlokang bophelong.

2 Har’a limpho tsohle tseo u ka ratang ho li fuoa, ho na le e ’ngoe e ikhethang ho feta tsohle. Ke mpho eo Molimo a e fileng moloko oa batho. Jehova o re file lintho tse ngata, empa mpho e khōlō ka ho fetisisa eo a re fileng eona ke sehlabelo sa thekollo sa Mora oa hae, e leng Jesu Kreste. (Matheu 20:28) Joalokaha re tla bona khaolong ena, thekollo ke mpho ea bohlokoa ka ho fetisisa eo u ka e fuoang, kaha e ka u tlisetsa thabo e khaphatsehang le ho finyella lintho tsa bohlokoa ka ho fetisisa tseo u li hlokang. Ha e le hantle, thekollo ke ponahatso e khōlō ka ho fetisisa ea lerato la Jehova ho uena.

 THEKOLLO KE ENG?

3. Thekollo ke eng, hona re lokela ho utloisisa eng pele e le hore re tle re utloisise bohlokoa ba mpho ee?

3 Ka mantsoe a bonolo, thekollo ke tokisetso eo Jehova a e entseng ho lopolla moloko oa batho, kapa ho o pholosa sebeng le lefung. (Baefese 1:7) E le hore re utloisise hore na thuto ena ea Bibele e bolela’ng, re lokela ho ikhopotsa se etsahetseng serapeng sa Edene. Ke feela ha re utloisisa seo Adama a ileng a se lahla ha a etsa sebe, re ka khonang ho utloisisa bohlokoa ba thekollo ho rōna.

4. Bophelo bo phethahetseng ba botho bo ne bo bolela’ng ho Adama?

4 Ha Jehova a bōpa Adama, o ile a mo fa ntho e ’ngoe ea bohlokoahali—e leng bophelo bo phethahetseng ba botho. Ak’u nahane hore na seo se ne se bolela’ng ho Adama. Ho ne ho se mohla a tla kula, a tsofale kapa a shoe hobane o ne a bōpiloe a phethahetse ’meleng le kelellong. Kaha e ne e le motho ea phethahetseng, o ne a e-na le kamano e khethehileng le Jehova. Bibele e re Adama e ne e le “mora oa Molimo.” (Luka 3:38) Kahoo Adama o ne a e-na le kamano e haufi le Jehova Molimo, e kang eo mora a nang le eona le ntate ea lerato. Jehova o ne a buisana le mora oa hae ea lefatšeng, o ne a fa Adama mosebetsi o khotsofatsang a bile a mo bolella seo a se lebeletseng ho eena.—Genese 1:28-30; 2:16, 17.

5. Bibele e bolela’ng ha e re Adama o ne a entsoe “ka setšoantšo sa Molimo”?

5 Adama o ne a entsoe “ka setšoantšo sa Molimo.” (Genese 1:27) Seo ha se bolele hore Adama o ne a tšoana le Molimo ka chebahalo. Joalokaha re ithutile Khaolong ea 1 ea buka ena, Jehova ke moea o sa bonahaleng. (Johanne 4:24) Kahoo Jehova ha a na ’mele oa nama le mali. Hore Adama o ne a entsoe ka setšoantšo sa Molimo ho bolela hore o ne a bōpiloe a e-na le litšobotsi tse kang tsa Molimo, tse akarelletsang lerato, bohlale, toka le matla. Adama o ne a tšoana le Ntate oa hae ka tsela e ’ngoe hape ea bohlokoa ka hore o ne a e-na le bolokolohi ba ho iketsetsa liqeto. Kahoo, Adama  o ne a sa tšoane le mochine o etsang feela seo o qapetsoeng hore o se etse kapa o latelang feela seo o se laetsoeng. Ho e-na le hoo, o ne a ka iketsetsa liqeto, a ikhethela se nepahetseng le se fosahetseng. Haeba a ne a ile a khetha ho mamela Molimo, a ka be a phela ka ho sa feleng Paradeiseng lefatšeng.

6. Adama o ile a lahleheloa ke eng ha a sa mamele Molimo, hona bana ba hae ba ile ba ameha joang?

6 Ka hona, ho hlakile hore ha Adama a sa mamele Molimo ’me a ahloleloa lefu, o ile a lefa haboima. Sebe sa hae se ile sa etsa hore a lahleheloe ke bophelo bo phethahetseng ba botho le melemo eohle ea bona. (Genese 3:17-19) Ka masoabi, Adama ha aa ka a itahlela bophelo bona ba bohlokoa a le mong feela empa o ile a bo lahla le bakeng sa bana bao a neng a tla ba le bona nakong e tlang. Lentsoe la Molimo le re: “Sebe se ile sa kena lefatšeng ka motho a le mong [Adama] le lefu la kena ka sebe, ’me kahoo lefu la namela ho batho bohle hobane kaofela ba ne ba entse sebe.” (Baroma 5:12) Ha e le hantle, kaofela ha rōna re futsitse sebe sa Adama. Ke kahoo Bibele e reng o ile a ithekisa le ho ‘rekisa’ bana ba hae bokhobeng ba sebe le lefu. (Baroma 7:14) Ho ne ho se na tšepo ea letho bakeng sa Adama kapa Eva kaha ba ne ba khethile ho se mamele Molimo ka boomo. Empa ho thoe’ng ka bana ba bona, ho kopanyelletsa le rōna?

7, 8. Ha e le hantle thekollo e bolela lintho life tse peli?

7 Jehova o ile a pholosa moloko oa batho ka hore a lokisetse thekollo. Thekollo ke eng? Ha e le hantle thekollo e bolela lintho tse peli. Ea pele, thekollo ke tefo e lefuoang ho lokolla kapa ho rekolla ntho e itseng. E ka ’na ea tšoantšoa le tefo e lefuoang ho lokolla motšoaruoa oa ntoa. Ea bobeli, thekollo ke tefo e koahelang, kapa e lefellang litšenyehelo tsa ntho e itseng. E tšoana le tefo e lefuoang ho koahela litšenyehelo tse bakiloeng ke kotsi e itseng. Ka mohlala, haeba motho a baka kotsi, o tla lokela ho lefa chelete e lekanang hantle le se senyehileng.

 8 Ho ne ho ka khoneha joang ho koahela tahlehelo e khōlōhali eo Adama a e tliselitseng e mong le e mong oa rōna le ho re lokolla bokhobeng ba sebe le lefu? A re hlahlobeng thekollo eo Jehova a e lokiselitseng le hore na e ka bolela’ng ho uena.

KAMOO JEHOVA A FANENG KA THEKOLLO KATENG

9. Ho ne ho hlokahala thekollo ea mofuta ofe?

9 Kaha ho ne ho lahlehile bophelo ba motho ea phethahetseng, bo ne bo ke ke ba rekolloa ka bophelo ba motho ea sa phethahalang. (Pesaleme ea 49:7, 8) Ho ne ho hlokahala thekollo e lekanang le se lahlehileng ka bohlokoa. Sena se lumellana le molao-motheo oa toka e phethahetseng o ngotsoeng ka Lentsoeng la Molimo, o reng: “Moea o tla ba bakeng sa moea.” (Deuteronoma 19:21) Kahoo, ke’ng e neng e ka lefella bohlokoa ba moea oa motho ea phethahetseng kapa bophelo boo Adama a bo lahlileng? Ho ne ho hlokahala bophelo ba motho e mong ea phethahetseng hore e be “thekollo e lekanang.”—1 Timothea 2:6.

10. Jehova o ile a fana ka thekollo joang?

10 Jehova o ile a fana ka thekollo joang? O ile a romela e mong oa bara ba hae ba phethahetseng ba moea lefatšeng. Empa Jehova ha aa ka a romela sebōpuoa leha e le sefe feela sa moea. O ile a romela Mora oa hae ea tsoetsoeng a ’notši, eo a mo nkang e le oa bohlokoa ka ho fetisisa. (1 Johanne 4:9, 10) Mora enoa o ile a ithaopela ho tloha lehaeng la hae leholimong. (Bafilipi 2:7) Joalokaha re ithutile khaolong e fetileng ea buka ena, Jehova o ile a etsa mohlolo ha a fetisetsa bophelo ba Mora enoa pōpelong ea Maria. Moea o halalelang oa Molimo o ile oa etsa hore Jesu a tsoaloe e le motho ea phethahetseng ea seng tlas’a kotlo ea sebe.—Luka 1:35.

Jehova o re file Mora oa hae ea tsoetsoeng a ’notši e le thekollo

11. Motho a le mong e ne e ka ba thekollo ea batho ba limilione joang?

11 Ke joang motho a le mong e neng e ka ba thekollo ea ba bangata, ha e le hantle, a rekolla batho ba limilione? Ho tlile joang hore batho ba limilione e be baetsalibe? Hopola hore  ha Adama a etsa sebe, o ile a lahla lefa la bohlokoa e leng bophelo bo phethahetseng ba botho. Kahoo, o ne a ke ke a bo fetisetsa ho bana ba hae. Ho e-na le hoo, o ne a ka fetisa sebe le lefu feela. Jesu, eo Bibele e reng ke “Adama oa ho qetela,” o ne a e-na le bophelo bo phethahetseng ba botho ebile ho se mohla a kileng a etsa sebe. (1 Bakorinthe 15:45) Ka mantsoe a mang, Jesu o ile a nkela Adama sebaka e le hore a re pholose. Jesu o ile a lefella sebe sa Adama ka ho tela bophelo ba hae bo phethahetseng le ka ho mamela Molimo ka ho feletseng. Ka hona Jesu o ile a tlisetsa bana ba Adama tšepo.—Baroma 5:19; 1 Bakorinthe 15:21, 22.

12. Ho utloa bohloko ha Jesu ho ile ha bontša eng?

12 Bibele e hlalosa ka ho qaqileng bohloko boo Jesu a ileng a bo mamella pele ho lefu la hae. O ile a shapuoa habohloko ka sephali, a khokhotheloa ka sehlōhō thupeng, ’me a shoa lefu le bohloko thupeng ea tlhokofatso. (Johanne 19:1, 16-18, 30; Sehlomathiso, leqepheng la 204-6) Ke hobane’ng ha Jesu a ile a tlameha ho utloa bohloko hakaale? Khaolong e tla latela hamorao bukeng ena, re tla ithuta hore Satane o ile a belaella taba ea hore ho na le bahlanka ba Jehova ba ka lulang ba tšepahala tlas’a teko. Jesu o ile a fana ka karabo e molemo ka ho fetisisa qosong ea Satane, ka hore a mamelle ka botšepehi le hoja a ne a utloa bohloko haholo. Jesu o ile a bontša hore motho ea phethahetseng ea nang le bolokolohi ba ho iketsetsa liqeto o ne a ka lula a tšepahala ho Molimo ka ho feletseng ho sa tsotellehe seo Diabolose a ka ’nang a se etsa. E tlameha ebe Jehova o ile a thabisoa haholo ke ho tšepahala ha Mora enoa oa hae ea ratoang!—Liproverbia 27:11.

13. Thekollo e ile ea lefshoa joang?

13 Thekollo e ile ea lefshoa joang? Ka hore Molimo a lumelle hore Mora oa hae ea phethahetseng le ea se nang sebe a bolaoe, ka la 14 khoeling ea Sejuda ea Nisane, 33 C.E. Ka hona Jesu o ile a tela bophelo ba hae bo phethahetseng ba botho “hang le ka ho ke keng ha phetoa.” (Baheberu 10:10) Ka mor’a matsatsi a mararo Jesu a shoele, Jehova o ile a mo  tsosetsa bophelong ba moea. Ha Jesu a le leholimong o ile a fa Molimo bohlokoa ba bophelo ba hae bo phethahetseng ba botho boo a bo tetseng e le sehlabelo sa phapanyetsano ho rekolla bana ba Adama. (Baheberu 9:24) Jehova o ile a amohela bohlokoa ba sehlabelo sa Jesu e le thekollo e neng e hlokahala e le hore moloko oa batho o lopolloe bokhobeng ba sebe le lefu.—Baroma 3:23, 24.

SEO THEKOLLO E KA SE BOLELANG HO UENA

14, 15. E le hore re fumane “tšoarelo ea libe tsa rōna,” re lokela ho etsa’ng?

14 Ho sa tsotellehe boemo ba rōna ba boetsalibe, re ka thabela litlhohonolofatso tse hlollang ka lebaka la thekollo. A re hlahlobe e meng ea melemo eo mpho ena e khōlōhali eo Molimo a faneng ka eona e e tlisang hona joale le eo e tlang ho e tlisa nakong e tlang.

15 Tšoarelo ea libe. Ka lebaka la ho se phethahale hoo re ho futsitseng, re tlameha ho loana ka thata ho etsa se nepahetseng. Kaofela ha rōna re etsa sebe ka seo re se buang kapa re se etsang. Empa ka lebaka la sehlabelo sa Jesu sa thekollo, re ka fumana “tšoarelo ea libe tsa rōna.” (Bakolose 1:13, 14) Leha ho le joalo, e le hore re fumane tšoarelo eo, re lokela ho baka e le kannete. Re boetse re lokela ho ipiletsa ho Jehova ka boikokobetso, re mo kōpe hore a re tšoarele motheong oa tumelo ea rōna sehlabelong sa thekollo sa Mora oa hae.—1 Johanne 1:8, 9.

16. Ke’ng e re nolofalletsang ho rapela Molimo re e-na le letsoalo le hloekileng, hona ho ba le letsoalo le hloekileng ke habohlokoa hakae?

16 Letsoalo le hloekileng ka pel’a Molimo. Ho bonolo hore letsoalo le molato le etse hore re felloe ke tšepo re be re ikutloe re se na thuso. Empa ka lebaka la tšoarelo e tlisoang ke thekollo, Jehova ka mosa o re nolofalletsa ho mo rapela re e-na le letsoalo le hloekileng le hoja re sa phethahala. (Baheberu 9:13, 14) Sena se re nolofalletsa ho bua le Jehova ka bolokolohi. Ka hona, re ka mo atamela ka bolokolohi ka thapelo. (Baheberu 4:14-16) Ha motho a lula a e-na le letsoalo le  hloekileng o ba le khotso ea kelello, oa itlhompha ebile o lula a thabile.

17. Re ka fumana litlhohonolofatso life kahobane Jesu a re shoetse?

17 Tšepo ea bophelo bo sa feleng lefatšeng la paradeise. Baroma 6:23 e re: “Moputso oo sebe se o lefang ke lefu.” Temana eo ha e tsoela pele e re: “Empa mpho eo Molimo a fanang ka eona ke bophelo bo sa feleng ka Kreste Jesu Morena oa rōna.” Khaolong ea 3 ea buka ena, re buile ka litlhohonolofatso tseo Paradeise e tlang ea lefatšeng e tlang ho li tlisa. (Tšenolo 21:3, 4) Re ka fumana litlhohonolofatso tseo tsohle, tse akarelletsang ho phela ka ho sa feleng re phela hantle ’meleng, hobane Jesu a re shoetse. E le hore re fumane litlhohonolofatso tseo, re lokela ho bontša hore re ananela mpho ea thekollo.

U KA BONTŠA JOANG HORE UA E ANANELA?

18. Ke hobane’ng ha re lokela ho leboha Jehova ha a re file thekollo?

18 Ke hobane’ng ha re lokela ho leboha Jehova ka ho tebileng ka thekollo? Mpho e ba ea bohlokoa ka ho khetheha ha ea faneng ka eona a tetse nako, a entse boiteko a bile a kene litšenyehelong ka lebaka la eona. Re ameha ka ho teba ha re bona hore mpho eo e bontša lerato la sebele leo mofani a re ratang ka lona. Thekollo ke mpho ea bohlokoa ho feta tsohle,  kaha Molimo o entse boitelo bo boholo ka ho fetisisa ha a fana ka eona. Johanne 3:16 e re: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši.” Thekollo ke bopaki bo hlaheletseng ka ho fetisisa ba hore Jehova oa re rata. E boetse e paka hore Jesu oa re rata, kaha o ile a ithaopela ho tela bophelo ba hae molemong oa rōna. (Johanne 15:13) Ka hona mpho ea thekollo e lokela ho re kholisa hore Jehova le Mora oa hae baa re rata re le batho ka bomong.—Bagalata 2:20.

Ho ithuta ho eketsehileng ka Jehova ke tsela e ’ngoe ea ho bontša hore re ananela mpho ea thekollo eo a faneng ka eona

19, 20. U ka bontša ka litsela life hore u ananela mpho ea Molimo ea thekollo?

19 Joale, u ka bontša joang hore u ananela mpho ea Molimo ea thekollo? Ntlha ea pele, ithute ho eketsehileng ka Mofani e Moholo oa eona, e leng Jehova. (Johanne 17:3) Ho ithuta Bibele u sebelisa buka ena ho tla u thusa hore u mo tsebe ka ho eketsehileng. Ha tsebo ea hao ka Jehova e ntse e eketseha, u tla mo rata ka ho teba. Lerato leo le tla etsa hore u batle ho mo khahlisa.—1 Johanne 5:3.

20 Bontša tumelo sehlabelong sa Jesu sa thekollo. Jesu o ile a re: “Ea bontšang tumelo ho Mora o na le bophelo bo sa feleng.” (Johanne 3:36) Re ka bontša tumelo joang ho Jesu? Tumelo eo ha e bontšoe ka mantsoe feela. Jakobo 2:26 e re: “Tumelo e se nang mesebetsi e shoele.” E, tumelo ea sebele e pakoa ke “mesebetsi,” ka mantsoe a mang, e pakoa ke liketso tsa rōna. Tsela e ’ngoe eo re bontšang ka eona hore re na le tumelo ho Jesu ke ha re etsa sohle se matleng a rōna ho mo etsisa, eseng feela ka seo re se buang empa le ka seo re se etsang.—Johanne 13:15.

21, 22. (a) Ke hobane’ng ha re lokela ho ba teng moketeng oa selemo le selemo oa Lijo Tsa Shoalane Tsa Morena? (b) Khaolo ea 6 le ea 7 li tla hlalosa eng?

21 E-ba teng moketeng oa selemo le selemo oa Lijo Tsa Shoalane Tsa Morena. Bosiung ba la 14 Nisane, 33 C.E., Jesu o ile a theha mokete o khethehileng oo Bibele e reng ke oa “lijo tsa shoalane tsa Morena.” (1 Bakorinthe 11:20; Matheu  26:26-28) Mokete ona o boetse o bitsoa Sehopotso sa lefu la Kreste. Jesu o ile a o theha e le ha a thusa baapostola ba hae le ba bang bohle bao e neng e tla ba Bakreste ba ’nete ka mor’a bona hore ba lule ba hopola hore ka lefu la hae e le motho ea phethahetseng, o ile a tela moea oa hae kapa bophelo ba hae e le thekollo. Jesu o ile a fana ka taelo ena mabapi le mokete ona: “Le ’ne le etse sena ho nkhopola.” (Luka 22:19) Ho keteka Sehopotso ho re hopotsa hore Jehova le Jesu ba bonahalitse lerato le leholo ka thekollo. Re ka bontša hore re ananela thekollo ka ho ba teng moketeng oa Sehopotso sa lefu la Jesu o tšoaroang selemo le selemo. *

22 Ka sebele thekollo eo Jehova a faneng ka eona ke mpho ea bohlokoa haholo. (2 Bakorinthe 9:14, 15) Mpho ena ea bohlokoahali e ka ruisa esita le ba shoeleng molemo. Khaolo ea 6 le ea 7 li tla hlalosa hore na joang.

^ ser. 21 Ho fumana boitsebiso bo eketsehileng ka se boleloang ke Lijo Tsa Shoalane Tsa Morena, bona Sehlomathiso, leqepheng la 206-8.