Fetela boitsebisong

Fetela lethathamong la tse ka hare

 KHAOLO EA LESHOME LE METSO E MENE

Kamoo U ka Etsang Hore Bophelo ba Lelapa la Hao e be bo Thabileng

Kamoo U ka Etsang Hore Bophelo ba Lelapa la Hao e be bo Thabileng
  • Ho hlokahala eng hore motho e be monna ea molemo?

  • Mosali a ka phetha karolo ea hae ka katleho joang?

  • Ho ba motsoali ea molemo ho akarelletsa’ng?

  • Bana ba ka thusa joang ho etsa hore bophelo ba lelapa e be bo thabileng?

1. Ke’ng se etsang hore bophelo ba lelapa e be bo thabileng?

JEHOVA MOLIMO o batla hore bophelo ba lelapa la hao e be bo thabileng. Lentsoe la Hae, e leng Bibele, le tataisa setho se seng le se seng sa lelapa, le hlalosa karolo eo Molimo a batlang hore setho ka seng se e phethe. Ha litho tsa lelapa li phethahatsa likarolo tsa tsona tumellanong le keletso ea Molimo, liphello e ba tse khotsofatsang haholo. Jesu o ile a re: “Ho thaba ba utloang lentsoe la Molimo ’me ba le boloka!”—Luka 11:28.

2. Re lokela ho hlokomela ntlha efe e etsang hore lelapa e be le thabileng?

2 Ntlha ea sehlooho e etsang hore lelapa e be le thabileng ke hore re hlokomele hore lelapa le simolotsoe ke Jehova, eo Jesu a itseng ke “Ntat’a rōna.” (Matheu 6:9) Malapa ’ohle a lefatšeng a teng ka lebaka la Ntate oa rōna oa leholimo—’me ka sebele o tseba se etsang hore malapa e be a thabileng. (Baefese 3:14, 15) Kahoo, Bibele e ruta hore setho ka seng sa lelapa se phetha karolo efe?

 KE MOLIMO EA SIMOLOTSENG LELAPA

3. Bibele e re lelapa la batho le qalile joang, hona re tseba joang hore tlaleho eo ke ’nete?

3 Jehova o ile a bōpa batho ba pele, e leng Adama le Eva, ’me a ba kopanya hore e be monna le mosali. O ile a ba beha lehaeng le letle la paradeise lefatšeng—serapeng sa Edene—’me a re ba be le bana. Jehova o ile a re: “Atang le ngatafale le tlale lefatše.” (Genese 1:26-28; 2:18, 21-24) Taba ena hase pale feela tjee kapa eona tšōmo, kaha Jesu o ile a bontša hore tlaleho ea Genese ea kamoo bophelo ba lelapa bo qalileng kateng ke ’nete. (Matheu 19:4, 5) Le hoja hona joale re tobana le mathata a mangata ebile bophelo bo se ka tsela eo Molimo a neng a rerile hore bo be ka eona, a re bone lebaka leo ka lona ho ntseng ho ka ba le thabo ka lapeng.

4. (a) Setho ka seng sa lelapa se ka etsa’ng ho tlatsetsa thabong ea lelapa? (b) Ke hobane’ng ha ho ithuta ka bophelo ba Jesu e le habohlokoa hakaale bakeng sa thabo ea lelapa?

4 Setho ka seng sa lelapa se ka thusa ho etsa hore bophelo ba lelapa e be bo thabileng ka hore se etsise Molimo ka ho bonahatsa lerato. (Baefese 5:1, 2) Empa re ka etsisa Molimo joang, kaha re ke ke ra mo bona? Re ka ithuta kamoo Jehova a etsang lintho kateng hobane o ile a romela Mora oa hae oa letsibolo lefatšeng a tsoa leholimong. (Johanne 1:14, 18) Ha a le lefatšeng, Mora enoa, e leng Jesu Kreste, o ile a etsisa Ntate oa hae oa leholimo hantle hoo ha motho a ne a bona Jesu le ha a mo mametse ho neng ho tšoana feela le ha a ne a e-na le Jehova le ha a Mo mametse. (Johanne 14:9) Kahoo, ha re ithuta kamoo Jesu a neng a bontša lerato kateng ’me re etsisa mohlala oa hae, e mong le e mong oa rōna a ka thusa ho etsa hore bophelo ba lelapa e be bo thabileng haholoanyane.

MOHLALA BAKENG SA BANNA

5, 6. (a) Tsela eo Jesu a tšoarang phutheho ka eona ke mohlala joang bakeng sa banna? (b) Motho o lokela ho etsa’ng e le hore a tšoareloe libe?

5 Bibele e re banna ba lokela ho tšoara basali ba bona ka tsela eo Jesu a tšoarang barutuoa ba hae ka eona. Nahana ka taelo ena ea Bibele: “Banna, le tsoele pele le rata basali ba lōna, feela joalokaha Kreste le eena a ile a rata phutheho ’me a inehela  bakeng sa eona . . . Ka tsela ena banna ba tšoanela ho rata basali ba bona joaloka ’mele ea bona. Ea ratang mosali oa hae oa ithata, kaha ha ho motho ea kileng a hloea nama ea hae; empa oa e fepa le ho e baballa, joalokaha Kreste le eena a etsa phutheho.”Baefese 5:23, 25-29.

6 Lerato leo Jesu a ratang phutheho ea barutuoa ba hae ka lona ke mohlala o phethahetseng bakeng sa banna. Jesu “o ile a ba rata ho isa bofelong,” a ba tella bophelo ba hae, le hoja ba ne ba sa phethahala. (Johanne 13:1; 15:13) Ka ho tšoanang, banna ba phehelloa ho etsa sena: “Le ’ne le rate basali ba lōna ’me le se ke la ba halefela ka matla.” (Bakolose 3:19) Ke’ng se tla thusa monna ho sebelisa keletso eo, haholo-holo haeba ka linako tse ling mosali oa hae a hlōleha ho sebelisa masene? O lokela ho hopola hore le eena o etsa liphoso a be a hopole le seo a lokelang ho se etsa e le hore Molimo a mo tšoarele. O lokela ho etsa’ng? O lokela ho tšoarela ba mo fosetsang, ’me bao ba akarelletsa le mosali oa hae. Ho hlakile hore mosali le eena o lokela ho etsa se tšoanang. (Matheu 6:12, 14, 15) Na ua bona hore na ke hobane’ng ha ba bang ba ’nile ba re lenyalo le atlehileng ke kopano ea batho ba babeli ba ikemiselitseng ho tšoarelana?

7. Jesu o ne a nahanela eng, ’me o ile a behela banna mohlala ofe?

7 Banna ba boetse ba lokela ho hlokomela hore Jesu o ne a lula a nahanela barutuoa ba hae. O ne a nahanela mefokolo ea bona le seo ba se hlokang ’meleng. Ka mohlala, ha ba ne ba khathetse, o ile a re: “Tloong boinotšing sebakeng se ka thōko ’me le phomole hanyenyane.” (Mareka 6:30-32) Basali le bona ba tšoanela ho nahaneloa. Ha Bibele e ba hlalosa e re ke “sejana se fokolang haholo” seo banna ba laetsoeng hore ba se abele “tlhompho.” Hobane’ng? Hobane banna hammoho le basali ba bontšitsoe “mohau o sa tšoanelang oa bophelo” ka tsela e lekanang. (1 Petrose 3:7) Banna ba lokela ho hopola hore botšepehi ke bona bo etsang hore motho e be oa bohlokoa ho Molimo, eseng hore na motho ke monna kapa ke mosali.—Pesaleme ea 101:6.

8. (a) Ke joang monna ‘ea ratang mosali oa hae a ithatang’? (b) Ho ba “nama e le ’ngoe” ho bolela’ng ho monna le mosali oa hae?

8 Bibele e re monna “ea ratang mosali oa hae oa ithata.” Lebaka  la sena ke hore monna le mosali “ha ba sa le babeli, empa e se e le nama e le ’ngoe,” joalokaha Jesu a boletse. (Matheu 19:6) Kahoo ha baa lokela ho kopanela liphate le motho leha e le ofe e mong. (Liproverbia 5:15-21; Baheberu 13:4) Ba ka khona ho etsa sena haeba ba bontša ho ameha ka tsela e se nang boithati ka seo e mong a se hlokang. (1 Bakorinthe 7:3-5) Ntlha ea bohlokoa e lokelang ho hopoloa ke hore: “Ha ho motho ea kileng a hloea nama ea hae; empa oa e fepa le ho e baballa.” Banna ba lokela ho rata basali ba bona joalokaha ba ithata, ba ntse ba hopola hore ba ikarabella ho hlooho ea bona, Jesu Kreste.—Baefese 5:29; 1 Bakorinthe 11:3.

9. Ke tšobotsi efe ea Jesu e boletsoeng ho Bafilipi 1:8, hona ke hobane’ng ha banna ba lokela ho bonahatsa tšobotsi ee ho basali ba bona?

9 Moapostola Pauluse o ile a bua ka ‘lerato le mofuthu leo Kreste Jesu a nang le lona.’ (Bafilipi 1:8) Lerato la Jesu le mofuthu e ne e le tšobotsi e khathollang, e ipiletsang ho basali bao e neng e e-ba barutuoa ba hae. (Johanne 20:1, 11-13, 16) Basali ba labalabela hore banna ba bona ba ba rate ka lerato le mofuthu.

MOHLALA BAKENG SA BASALI

10. Jesu o behela basali mohlala joang?

10 Lelapa ke mokhatlo, ’me le hloka hlooho hore le sebetse hantle. Esita le Jesu o na le Eo a ikokobelletsang eena e le Hlooho ea hae. “Hlooho ea Kreste ke Molimo,” feela joalokaha “hlooho ea mosali [e le] monna.” (1 Bakorinthe 11:3) Ho ikokobelletsa ha Jesu bohlooho ba Molimo ke mohlala o motle, kaha kaofela ha rōna re na le hlooho eo re lokelang ho ikokobelletsa eona.

11. Mosali o lokela ho ba le boikutlo bofe mabapi le monna oa hae, hona boitšoaro ba hae bo ka ’na ba e-ba le phello efe?

11 Banna ba sa phethahalang ba etsa liphoso ebile hangata ha ba khone ho ba lihlooho tse molemo ka ho fetisisa tsa malapa. Joale, mosali o lokela ho etsa’ng? Ha aa lokela ho nyenyefatsa seo monna oa hae a se etsang kapa hona ho leka ho inkela bohlooho ba monna. Mosali o lokela ho hopola hore Molimo o nka moea o thōtseng le o bonolo e le oa bohlokoa haholo. (1 Petrose 3:4) Ha a bonahatsa moea oo, o tla nolofalloa haholoanyane ho bonahatsa boikokobetso ba bomolimo, esita  le tlas’a maemo a lekang. Ho feta moo, Bibele e re: “Mosali o lokela ho ba le tlhompho e tebileng ho monna oa hae.” (Baefese 5:33) Empa ho thoe’ng haeba monna a sa amohele Kreste e le Hlooho ea hae? Bibele e phehella basali e re: “Le ipehe tlas’a banna ba lōna, e le hore, haeba leha e le bafe ba sa mamele lentsoe, ba ka hapuoa ka ntle ho lentsoe ka boitšoaro ba basali ba bona, kahobane e bile lipaki tse boneng ka mahlo tsa boitšoaro ba lōna bo hloekileng hammoho le tlhompho e tebileng.”1 Petrose 3:1, 2.

12. Ke hobane’ng ha e se phoso hore mosali a hlahise maikutlo a hae ka tlhompho?

12 Ebang monna ke molumeli-’moho le eena kapa che, hase hore mosali o bontša ho se hlomphe haeba a hlahisa maikutlo a hae hantle ha a sa lumellane le a monna oa hae. E ka ’na eaba maikutlo a mosali a nepahetse, ’me lelapa lohle le ka rua molemo haeba monna a mo mamela. Le hoja Abrahama a ne a sa lumellane le tlhahiso e molemo eo mosali oa hae, Sara, a neng a fana ka eona bothateng bo itseng lapeng la bona, Molimo o ile a re ho Abrahama: “Mamela lentsoe la hae.” (Genese 21:9-12) Ho hlakile hore ha monna a etsa qeto tabeng e itseng ’me qeto eo e se khahlanong le molao oa Molimo, mosali oa hae o bontša boikokobetso ka hore a e tšehetse.—Liketso 5:29; Baefese 5:24.

Sara o ile a behela basali mohlala ofe o motle?

13. (a) Tite 2:4, 5 e khothalletsa basali ba nyetsoeng hore ba etse’ng? (b) Bibele e re’ng ka karohano le tlhalo?

13 Mosali a ka phetha karolo ea hae ea ho hlokomela lelapa ka litsela tse ngata. Ka mohlala, Bibele e bontša hore basali ba nyetsoeng ba lokela hore “ba rate banna ba bona, ba rate bana ba bona, e be ba hlaphohetsoeng kelellong, ba hloekileng, basebetsi malapeng, ba molemo, ba ipehang tlas’a banna ba bona.” (Tite 2:4, 5) Ha mosali ea nyetsoeng eo e bileng e leng ’mè a etsa lintho ka tsela ena, ba lelapa la hae ba tla lula ba mo rata le ho mo hlompha . (Liproverbia 31:10, 28) Empa kaha lenyalo le kopantse batho ba sa phethahalang, ho na le maemo a itseng a feteletseng a ka ’nang a etsa hore ba qetelle ba arohane kapa ba hlalane. Bibele e lumella karohano maemong a itseng. Leha ho le joalo, karohano ke taba e tebileng, kaha Bibele ea eletsa: “Mosali  ha aa lokela ho tloha ho monna oa hae; . . . ’me monna ha aa lokela ho tlohela mosali oa hae.” (1 Bakorinthe 7:10, 11) Ke ha molekane e mong oa lenyalo a entse bohlola feela moo Mangolo a fanang ka lebaka la tlhalo.—Matheu 19:9.

MOHLALA O PHETHAHETSENG BAKENG SA BATSOALI

14. Jesu o ile a tšoara bana joang, hona bana ba hloka eng ho batsoali?

14 Jesu o behetse batsoali mohlala o phethahetseng ka tsela eo a neng a tšoara bana ka eona. Ha batho ba bang ba ne ba leka ho thibela bana ha ba tla ho Jesu, o ile a re: “Tlohelang bana ba banyenyane ba tle ho ’na; le se ke la leka ho ba thibela.” Bibele e re ka mor’a moo o ile a ‘sika bana bao ’me a qala ho ba hlohonolofatsa, a ba beha matsoho.’ (Mareka 10:13-16) Kaha Jesu o ne a ipha nako ea bana, na le lōna ha lea lokela ho etsa ho tšoanang ka bara le barali ba lōna? Bana ba hloka hore le ba fe nako e ngata, eseng metsotso feela e seng mekae. Le lokela ho ipha nako ea ho ba ruta, kaha seo ke sona seo Jehova a laetseng batsoali hore ba se etse.—Deuteronoma 6:4-9.

15. Batsoali ba ka etsa’ng e le hore ba sireletse bana ba bona?

15 Ha lefatše lena le ntse le mpefala le ho feta, bana ba hloka batsoali ba tla ba sireletsa ho batho ba batlang ho ba ntša kotsi, joaloka batho ba nkang monyetla ka bana hore ba kopanele liphate le bona. Ak’u nahane kamoo Jesu a ileng  a sireletsa barutuoa ba hae kateng, bao ka lerato a neng a ba bitsa “bana ba banyenyane.” Ha Jesu a tšoaroa ’me a le haufi le ho bolaoa, o ile a ba bulela monyetla oa ho phonyoha. (Johanne 13:33; 18:7-9) Joaloka motsoali, u lokela ho ela hloko boiteko ba Diabolose ba ho ntša bana ba hao kotsi. U lokela ho ba lemosa esale pele. * (1 Petrose 5:8) Ha ho mohla ho kileng ha e-ba le lintho tse ngata hakana tse ba behang kotsing ’meleng, moeeng le boitšoarong.

Jesu o behetse batsoali mohlala ofe ka tsela eo a neng a tšoara bana ka eona?

16. Batsoali ba ka ithuta eng tseleng eo Jesu a ileng a sebetsana le ho se phethahale ha barutuoa ba hae ka eona?

16 Bosiung ba pele Jesu a e-shoa, barutuoa ba hae ba ile ba phehisana khang ka hore na ke mang e moholo har’a bona. Ho  fapana le hore Jesu a ba halefele, o ile a tsoela pele ho ipiletsa ho bona ka tsela e lerato ka ho bua le bona le ka ho ba behela mohlala. (Luka 22:24-27; Johanne 13:3-8) Haeba u motsoali, na u bona tsela eo u ka etsisang mohlala oa Jesu ka eona ha u khalemela bana ba hao? Ke ’nete hore ho hlokahala hore ba khalemeloe, empa ba lokela ho khalemeloa ka “tekanyo e loketseng” ’me le ka mohla u se ke ua ba khalemela u halefile. Ha u batle ho bua ka tsela e sa nahaneleng “joalokaha eka ke ka ho hlaba ha sabole.” (Jeremia 30:11; Liproverbia 12:18) Khalemelo e lokela ho fanoa ka tsela eo hamorao ngoana a tla lemoha hore e ne e hlile e loketse.—Baefese 6:4; Baheberu 12:9-11.

MOHLALA BAKENG SA BANA

17. Jesu o ile a behela bana mohlala o phethahetseng joang?

17 Na bana ba ka ithuta ho itseng ho Jesu? E, ba ka ithuta ho itseng! Ka mohlala oa hae, Jesu o ile a bontša kamoo bana ba lokelang ho mamela batsoali ba bona kateng. O ile a re: “Feela joalokaha Ntate a nthutile ke bua lintho tsena.” A phaella ka hore: “Kamehla ke etsa lintho tse mo khahlisang.” (Johanne 8:28, 29) Jesu o ne a mamela Ntate oa hae oa leholimo, ’me Bibele e re bana ba lokela ho mamela batsoali ba bona. (Baefese 6:1-3) Le hoja Jesu e ne e le ngoana ea phethahetseng, o ne a mamela batsoali ba hae, e leng Josefa le Maria, ba neng ba sa phethahala. Ka sebele seo se ile sa tlatsetsa thabong ea litho tsohle tsa lelapa labo Jesu!—Luka 2:4, 5, 51, 52.

18. Ke hobane’ng ha kamehla Jesu a ne a mamela Ntate oa hae oa leholimo, hona ke mang ea thabang ha bana ba mamela batsoali ba bona kajeno?

18 Na bana ba ka hlokomela litsela tseo ba ka etsisang Jesu ka tsona ’me ba thabisa batsoali ba bona? Ke ’nete hore ka linako tse ling bana ba ka ’na ba fumana ho le thata ho mamela batsoali ba bona, empa seo ke sona seo Molimo a batlang hore bana ba se etse. (Liproverbia 1:8; 6:20) Kamehla Jesu o ne a mamela Ntate oa hae oa leholimo, esita le tlas’a maemo a thata. Ka nako e ’ngoe, ha thato ea Molimo e ne e le hore Jesu a etse ntho e ’ngoe e thata haholo, Jesu o ile a re: “Tlosa senoelo sena [ntho eo ho neng ho hlokahala hore a e etse] ho ’na.”  Leha ho le joalo, Jesu o ile a etsa seo Molimo a mo kōpileng hore a se etse, kaha o ne a hlokomela hore Ntate oa hae o tseba se molemo ka ho fetisisa. (Luka 22:42) Bana ba tla thabisa batsoali ba bona le ho nyakallisa Ntate oa bona oa leholimo ha ba ithuta ho mamela. *Liproverbia 23:22-25.

Bacha ba lokela ho nahana ka eng ha ba lekoa?

19. (a) Satane o leka bana joang? (b) Boitšoaro bo bobe ba bana bo ka ama batsoali joang?

19 Diabolose o ile a leka Jesu, ’me re ka kholiseha hore o tla leka le bacha hore ba etse se fosahetseng. (Matheu 4:1-10) Satane Diabolose o sebelisa khatello ea lithaka, eo ho ka bang thata ho e hanyetsa. Kahoo ke habohlokoa hore bana ba se ke ba etsa botsoalle le batho ba etsang lintho tse fosahetseng. (1 Bakorinthe 15:33) Morali oa Jakobo, Dina o ile a etsa botsoalle le batho ba sa rapeleng Jehova, ’me sena se ile sa baka khathatso e tšabehang. (Genese 34:1, 2) Ak’u nahane ka bohloko boo ba lelapa ba ka bo utloang haeba setho se seng sa lelapa se ka kopanela boitšoarong bo litšila ba ho kopanela liphate!—Liproverbia 17:21, 25.

SENOTLOLO SA THABO EA LELAPA

20. E le hore setho se seng le se seng sa lelapa se thabele bophelo bo thabileng ba lelapa, se lokela ho etsa’ng?

20 Ho batla ho le bonolo ho sebetsana le mathata a lelapa  ha ho sebelisoa keletso ea Bibele. Ha e le hantle, ho sebelisa keletso eo ke senotlolo sa thabo ea lelapa. Kahoo banna, ratang basali ba lōna ’me le ba tšoare joalokaha Jesu a tšoara phutheho ea hae. Basali, ikokobeletseng bohlooho ba banna ba lōna, ’me le latele mohlala oa mosali ea khabane ea hlalositsoeng ho Liproverbia 31:10-31. Batsoali, koetlisang bana ba lōna. (Liproverbia 22:6) Bo-ntate, ‘okamelang ba matlo a lōna ka mokhoa o motle.’ (1 Timothea 3:4, 5; 5:8) Bana, mamelang batsoali ba lōna. (Bakolose 3:20) Ha ho le ea mong ka lapeng ea phethahetseng, kaha bohle re etsa liphoso. Kahoo, ikokobetseng ’me le kōpe tšoarelo e mong ho e mong.

21. Ke tebello efe e babatsehang e larileng ka pele, hona re ka thabela bophelo bo thabisang ba lelapa joang hona joale?

21 Ha e le hantle, Bibele e fupere likeletso le lithuto tse ngata tsa bohlokoa tabeng ea bophelo ba lelapa. Ho feta moo, e re ruta ka lefatše le lecha la Molimo le ka paradeise ea lefatšeng e tletseng batho ba thabileng ba rapelang Jehova. (Tšenolo 21:3, 4) Eo ke tebello e babatsehang hakaakang! Le hona joale re ka thabela bophelo bo thabisang ba lelapa ka ho sebelisa litaelo tsa Molimo tse ka Lentsoeng la hae, e leng Bibele.

^ ser. 15 Boitsebiso bo ka thusang ho sireletsa bana bo hlaha khaolong ea 32 ea buka ea Ithute ho Mosuoe e Moholo, e hatisitsoeng ke Lipaki Tsa Jehova.

^ ser. 18 Ke feela ha motsoali a batla hore ngoana a tlōle molao oa Molimo moo ngoana a sa lokelang ho mamela.—Liketso 5:29.