Fetela boitsebisong

Fetela lethathamong la tse ka hare

 SEHLOMATHISO

Jesu Kreste ke Mesia ea Tšepisitsoeng

Jesu Kreste ke Mesia ea Tšepisitsoeng

E LE ho re thusa hore re tsebe ho elelloa Mesia, Jehova Molimo o ile a bululela baprofeta ba bangata ba boletsoeng ka Bibeleng hore ba fane ka boitsebiso bo mabapi le ho tsoaloa ha Molopolli  enoa ea tšepisitsoeng, tšebeletso ea hae le lefu la hae. Boprofeta bona bohle ba Bibele bo phethahalitsoe ho Jesu Kreste. Bo nepahetse ka tsela e hlollang ebile bo qaqile. Ka mohlala, a re ke re hlahlobe boprofeta bo seng bokae bo boletseng esale pele liketsahalo tse mabapi le ho tsoaloa ha Mesia le khōlo ea hae.

Moprofeta Esaia o ile a bolela esale pele hore Mesia o ne a tla  tsoa lesikeng la Morena Davida. (Esaia 9:7) Jesu o ile a fela a hlaha lesikeng la Davida.—Matheu 1:1, 6-17.

Moprofeta e mong oa Molimo, e leng Mikea, o ile a bolela esale pele hore qetellong ngoana eo e ne e tla ba ’musi le hore o ne a tla hlahela “Bethlehema Efratha.” (Mikea 5:2) Ha Jesu a hlaha, ho ne ho e-na le metse e ’meli ea Iseraele e bitsoang Bethlehema. O mong o ne o le haufi le Nazaretha karolong e ka leboea ea naha, ha o mong o ne o le haufi le Jerusalema, Juda. Bethlehema e haufi le Jerusalema e ne e bitsoa Efratha. Jesu o hlahetse motseng oo, hantle feela joalokaha boprofeta bo ne bo boletse esale pele!—Matheu 2:1.

Boprofeta bo bong ba Bibele bo ile ba bolela esale pele hore Mora oa Molimo o ne a tla bitsoa hore a tsoe “Egepeta.” Jesu o ile a isoa Egepeta e sa le ngoana. O ile a khutlisoa ha Heroda a se a shoele, kahoo a phethahatsa boprofeta.—Hosea 11:1; Matheu 2:15.

Litemana tse thathamisitsoeng  chateng e leqepheng la 200 tlas’a sehlooho se reng “Boprofeta” li na le boitsebiso bo mabapi le Mesia. Ka kōpo bapisa litemana tsena le tse thathamisitsoeng tlas’a sehlooho se reng “Phethahatso.” Ho li bapisa ho tla matlafatsa tumelo ea hao le ho feta tabeng ea hore Lentsoe la Molimo ke ’nete.

Ha u ntse u hlahloba mangolo ana, u hopole hore litemana tse bontšang boprofeta li ngotsoe lilemo tse makholo pele Jesu a tsoaloa. Jesu o ile a re: “Lintho tsohle tse ngotsoeng molaong oa Moshe le Baprofeteng le Lipesalemeng mabapi le ’na li tla phethahala.” (Luka 24:44) Joalokaha u ka netefatsa seo Bibeleng ea hao, lintho tsena li ile tsa phethahala ka hohle-hohle—feela joalokaha ho ne ho boletsoe!