Fetela boitsebisong

Fetela lethathamong la tse ka hare

 THUTO EA 1

Sephiri Seo re Thabelang ho se Tseba

Sephiri Seo re Thabelang ho se Tseba

Na ho na le motho ea kileng a u bolella sephiri?— * Bibele e bua ka sephiri se khethehileng se bitsoang “sephiri se halalelang.” Sea halalela hobane se tsoa ho Molimo. Ke sephiri hobane batho ba ne ba sa se tsebe. Esita le mangeloi a ne a batla ho se tseba. Na le uena u batla ho tseba hore na sephiri seo ke sefe?—

U nahana hore mangeloi a ne a batla ho tseba eng?

Lilemo tse ngata-ngata tse fetileng, Molimo o ile a bōpa monna oa pele le mosali oa pele. Mabitso a bona e ne e le Adama le Eva. Molimo o ile a ba fa lehae le letle le ileng la bitsoa serapa sa Edene. Haeba Adama le Eva ba ne ba ile ba mamela Molimo, bona le bana ba bona ba ka be ba ile ba etsa hore lefatše lohle e be paradeise joaloka serapa seo. Hape ba ka be ba ile ba phela Paradeiseng ka ho sa feleng. Empa na u sa hopola hore na Adama le Eva ba ile ba etsa eng?—

Adama le Eva ha baa ka ba mamela Molimo ’me ke kahoo re sa pheleng paradeiseng hona joale. Empa Molimo o ne a itse o tla etsa lefatše lohle le be letle ’me batho bohle ba ne ba tla phela ka ho sa feleng ba thabile. O ne a tla etsa seo joang? Ka nako e telele batho ba ne ba sa tsebe. E ne e le sephiri.

Ha Jesu a ne a le lefatšeng, o ile a ruta batho ka sephiri sena. O ile a re se ne se amana le ’Muso oa Molimo. Jesu o ile a re batho ba rapelle ’Muso ona hore o tle. ’Muso oo o tla etsa hore lefatše e be paradeise e ntle.

Na u thabile ha u tseba sephiri seo?— Hopola hore ke batho ba mamelang Jehova feela ba tla phela Paradeiseng. Bibele e re bolella ka lipale tsa banna le basali ba bangata ba ileng ba mamela Jehova. Na u ka rata ho ithuta ka bona?— A re ke re bone hore na ba bang ba bona e ne e le bo-mang le hore na ke joang re ka tšoanang le bona.

^ ser. 3 Ha le ntse le bala lipale tsena, le tla bona letšoao lena (—) le latelang lipotso. Ena ke nako e ntle ea ho ema hanyenyane e le hore ngoana a arabe.