Fetela boitsebisong

Fetela lethathamong la tse ka hare

 THUTO EA 10

Kamehla Jesu o ne a Mamela

Kamehla Jesu o ne a Mamela

Na ho bonolo hore u mamele batsoali ba hao kamehla?— Ka linako tse ling ha ho bonolo. Na u ne u tseba hore Jesu o ne a mamela Jehova le batsoali ba hae?— Mohlala oa hae o ka u thusa hore u mamele batsoali ba hao le hoja ho se bonolo. A re ke re ithute ka taba ena.

Pele Jesu a tla lefatšeng, o ne a phela leholimong le Ntate oa hae, Jehova. Empa hape Jesu o ne a e-na le batsoali lefatšeng. Mabitso a bona e ne e le Josefa le Maria. Na ua tseba hore ho tlile joang hore e be batsoali ba hae?—

Jehova o ile a nka bophelo ba Jesu leholimong ’me a bo kenya ka hare ho Maria e le hore Jesu a ka hlaha le hore a phele lefatšeng. Ona e ne e le mohlolo! Jesu o ile a hōla a le ka har’a Maria joalokaha bana ba hōla ka har’a bo-’mè ba bona. Ka mor’a likhoeli tse robong, Jesu o ile a hlaha. Ke kamoo Maria le monna oa hae Josefa e ileng ea e-ba batsoali ba Jesu.

Ha Jesu a ne a le lilemo li 12, o ile a etsa ntho e ileng ea bontša kamoo a ratang Ntate oa hae Jehova kateng. Sena se ile sa etsahala ha Jesu le ba lelapa labo ba ne ba nkile leeto le le telele le eang moketeng oa Paseka Jerusalema. Ha ba khutlela hae, Josefa le Maria ba ile ba hlokomela hore Jesu o lahlehile. Na ua tseba hore o ne a le hokae?—

Ke hobane’ng ha Jesu a ne a le tempeleng?

Josefa le Maria ba ile ba khutlela Jerusalema kapele e le hore ba il’o batla Jesu. Ba ne ba tšoenyehile haholo hobane ba ne ba sa mo fumane. Empa ka mor’a matsatsi a mararo, ba ile ba mo fumana ka tempeleng! Na ua tseba hore na ke hobane’ng ha Jesu a ne a le ka tempeleng?— Ke hobane o ne a batla ho ithuta ka Ntate oa hae, Jehova. O ne a rata Jehova ’me o ne a batla ho tseba hore na a ka mo thabisa joang. Leha a ne a se a hōlile, kamehla Jesu o ne a mamela Jehova. Jesu o ne a mamela leha ho le thata ’me a tlameha ho utloa bohloko. Na Jesu o ne a mamela Josefa le Maria?— E, Bibele e re o ne a ba mamela.

U ka ithuta eng mohlaleng oa Jesu?— U lokela ho mamela batsoali ba hao, esita leha ho se bonolo. Na u tla ba mamela?—