Fetela boitsebisong

Fetela lethathamong la tse ka hare

 Thuto 15

Ke Hobane’ng ha U Lokela ho Tsoela Pele ho Ithuta Litaba Tse Molemo?

Ke Hobane’ng ha U Lokela ho Tsoela Pele ho Ithuta Litaba Tse Molemo?

1. U ka rua molemo joang ha u tsoela pele ho ithuta Bibele?

Ha ho pelaelo hore ho hlahloba lithuto tsa bohlokoa tsa Bibele ho entse hore u rate Jehova le ho feta. Tsoela pele u sebetsa ka thata, e le hore lerato leo le lule le le matla. (1 Petrose 2:2) Tšepo ea hao ea ho phela ka ho sa feleng e itšetlehile ka hore u tsoele pele ho atamela haufi le Molimo ka ho ithuta Lentsoe la hae.—Bala Johanne 17:3; Juda 21.

Ha u ntse u eketsa tsebo ea hao ka Molimo, tumelo ea hao e tla matlafala. Tumelo e tla u thusa hore u thabise Molimo. (Baheberu 11:1, 6) E tla u susumelletsa hore u bake le hore u etse liphetoho bophelong ba hao.—Bala Liketso 3:19.

U ka ba motsoalle ea khethehileng oa Jehova

2. Tsebo ea hao ka Molimo e tla tsoela batho ba bang molemo joang?

Ho tla itlela feela hore u batle ho bolella batho ba bang lintho tseo u ithutileng tsona—kaofela ha rōna re rata ho bolella ba bang litaba tse molemo. Ha u ntse u ithuta Bibele, u tla ithuta kamoo u ka e sebelisang ho hlalosa tumelo ea hao ho Jehova le kamoo u ka hlalosang litaba tse molemo kateng.—Bala Baroma 10:13-15.

Batho ba bangata ba qala ka ho bolella metsoalle le beng ka bona litaba tse molemo. E-ba masene. Ho e-na le hore u ba bolelle hore bolumeli ba bona ke ha se ba ’nete, ba bolelle ka seo Molimo a se tšepisang. Hape, hopola hore hangata batho ba khahloa ke boitšoaro ba hao bo botle ho feta seo u se buang.—Bala 2 Timothea 2:24, 25.

3. U ka ba le setsoalle sa mofuta ofe le Molimo?

Ho ithuta Lentsoe la Molimo ho tla u thusa hore setsoalle sa hao le eena se hōle. Qetellong, u ka ’na ua ba le kamano e khethehileng le Jehova. Ha e le hantle a ka u amohela hore u be setho sa lelapa la hae.—Bala 2 Bakorinthe 6:18.

 4. U ka etsa joang hore setsoalle sa hao le Molimo se tsoele pele ho hōla?

U ka hōlisa setsoalle sa hao le Molimo ka ho eketsehileng ka hore u tsoele pele ho ithuta Lentsoe la hae. (Baheberu 5:13, 14) Kōpa e mong oa Lipaki Tsa Jehova hore a ithute Bibele le uena le sebelisa buka ea Ha e le Hantle ke Eng Seo Bibele e se Rutang? Ha u tsoela pele ho ithuta Lentsoe la Molimo, u tla atleha haholoanyane bophelong.—Bala Pesaleme ea 1:1-3; 73:27, 28.

Litaba tse molemo li tsoa ho Jehova, Molimo ea thabileng. U ka atamela haufi le eena haeba u tloaelana le batho ba hae. (Baheberu 10:24, 25) Ha u tsoela pele ho leka ho thabisa Jehova, u hahamalla bophelo ba sebele—e leng bophelo bo sa feleng. Ho atamela haufi le Molimo ke ntho e molemo ka ho fetisisa eo u ka e etsang.—Bala 1 Timothea 1:11; 6:19.