Fetela boitsebisong

Fetela lethathamong la tse ka hare

 Thuto 14

Ke Hobane’ng ha Molimo a E-na le Mokhatlo?

Ke Hobane’ng ha Molimo a E-na le Mokhatlo?

1. Ke hobane’ng ha Molimo a ile a hlophisa Baiseraele ba boholo-holo?

Molimo o ile a hlophisa litloholo tsa mopatriareka Abrahama hore e be sechaba ’me a se fa melao. O ile a bitsa sechaba seo “Iseraele” ’me a etsa hore se tsebe borapeli ba ’nete le lentsoe la hae. (Pesaleme ea 147:19, 20) Kahoo, batho ba lichaba tsohle ba ne ba ka rua molemo ho Baiseraele.—Bala Genese 22:18.

Molimo o ile a khetha Baiseraele hore e be lipaki tsa hae. Tlaleho ea bona e bontša kamoo batho ba ka ruang molemo kateng ha ba mamela melao ea Molimo. (Deuteronoma 4:6) Kahoo, Baiseraele ba ne ba ka khona ho ruta batho ba bang ho tseba Molimo oa ’nete.—Bala Esaia 43:10, 12.

2. Ke hobane’ng ha Bakreste ba ’nete ba hlophisitsoe?

Ha nako e ntse e ea, Molimo ha aa ka a hlola a amohela Baiseraele, ’me Jehova o ile a nkela sechaba seo sebaka ka phutheho ea Bokreste. (Matheu 21:43; 23:37, 38) Hona joale Baiseraele ba nketsoe sebaka ke Bakreste ba ’nete, bao e seng e le bona lipaki tsa Jehova.—Bala Liketso 15:14, 17.

Jesu o ile a hlophisa balateli ba hae hore ba etse barutuoa lichabeng tsohle. (Matheu 10:7, 11; 24:14; 28:19, 20) Hona joale mosebetsi ona o fihla sehlohlolong sa oona, ha lefatše lena le ea bofelong. Ka lekhetlo la pele historing, Jehova o entse hore batho ba limilione ba tsoang lichabeng tsohle ba kopane borapeling ba ’nete. (Tšenolo 7:9, 10) Bakreste ba ’nete ke sehlopha se kopaneng e le hore ba khothatsane le ho thusana. Lefatšeng lohle, ba fumana thupelo e tšoanang ea Bibele libokeng tsa bona.—Bala Baheberu 10:24, 25.

 3. Mokhatlo oa Lipaki Tsa Jehova oa mehleng ee o simolohile joang?

Mokhatlo oa mehleng ena oa Lipaki Tsa Jehova o simolohile lilemong tsa bo-1870. Sehlotšoana sa liithuti tsa Bibele se ile sa boela sa fumana linnete tseo e neng e le khale li lahlehile. Li ne li tseba hore Jesu o ne a ile a hlophisa phutheho ea Bokreste hore e bolele, kahoo li ile tsa qala mosebetsi oa ho bolela ka ’Muso lefatšeng ka bophara. Ka 1931, li ile tsa qala ho ipitsa Lipaki Tsa Jehova.—Bala Liketso 1:8; 2:1, 4; 5:42.

4. Lipaki Tsa Jehova li hlophisitsoe joang?

Lekholong la pele la lilemo, liphutheho tsa Bokreste tse linaheng tse ngata li ne li thusoa ke sehlopha se busang se neng se nka Jesu e le Hlooho ea phutheho. (Liketso 16:4, 5) Ka ho tšoanang le kajeno Lipaki Tsa Jehova lefatšeng ka bophara li fumana thuso ho Sehlopha se Busang se entsoeng ka baholo ba nang le phihlelo. Sehlopha se Busang se hlokomela liofisi tsa makala tsa Lipaki Tsa Jehova tse etsang mosebetsi oa ho fetolela, ho hatisa esita le ho aba lingoliloeng tse thusang batho ho ithuta Bibele, ka lipuo tse fetang 600. Kahoo, Sehlopha se Busang se fana ka khothatso e thehiloeng Mangolong le ho tataisa liphutheho tse fetang 100 000 lefatšeng ka bophara. Phuthehong ka ’ngoe ho na le banna ba tšoanelehang ba sebeletsang e le baholo kapa balebeli. Banna bana ba hlokomela mohlape oa Molimo ka lerato.—Bala 1 Petrose 5:2, 3.

Lipaki Tsa Jehova li hlophiselitsoe ho bolela litaba tse molemo le ho etsa barutuoa. Joalokaha baapostola ba ne ba etsa, le rōna re bolela ka ntlo le ntlo. (Liketso 20:20) Re boetse re ithaopela ho ithuta Bibele le batho ba ratang ’nete ka lipelo tsohle. Empa Lipaki Tsa Jehova hase mokhatlo feela tjee. Re lelapa le nang le Ntate ea lerato. Re bara le barali ba motho ba tsotellanang. (2 Bathesalonika 1:3) Kaha batho ba Jehova ba hlophiselitsoe hore ba thabise Molimo le ho thusa ba bang, ke lelapa le thabileng ka ho fetisisa lefatšeng.—Bala Pesaleme ea 33:12; Liketso 20:35.