Fetela boitsebisong

Fetela lethathamong la tse ka hare

 POTSO EA 9

Na ke Lokela ho Lumela Hore Lintho li Ikentse?

Na ke Lokela ho Lumela Hore Lintho li Ikentse?

KE HOBANE’NG HA E LE HABOHLOKOA?

Haeba ke ’nete hore lintho li ikentse, seo se bolela hore bophelo ha bo na morero. Haeba ke ’nete hore lintho li bōpiloe, re ka fumana likarabo tse khotsofatsang tsa lipotso tseo re ipotsang tsona ka bophelo le bokamoso.

U NE U TLA ETSA’NG?

Nahana ka sena: Alex o ferekane. Haesale a lumela ho Molimo le hore lintho li bōpiloe. Empa kajeno tichere ea hae ea baeloji e re thuto ea hore lintho li ikentse ke ’nete, le hore e tšehetsoa ke lipatlisiso tse entsoeng ke borasaense. Alex ha a batle ho bonahala eka ke sethoto. O re: ‘Ebile haeba lipatlisiso tsa borasaense li bontša hore thuto ea hore lintho li ikentse ke ’nete, ’na ke mang hore nka ba hanyetsa?’

Haeba e ne e le uena, na u ne u tla lumela thuto ea hore lintho li ikentse hobane feela libuka tsa sekolo li re ke ’nete?

NAHANISISA HANTLE!

Batho ba bangata ba potlakela ho lumela ntho e itseng, empa ba sa tsebe hore na ke hobane’ng ha ba e lumela.

  • Batho ba bang ba lumela hore lintho li bōpiloe hobane feela ba rutiloe seo kerekeng.

  • Batho ba bang ba lumela hore lintho li ikentse hobane feela ba rutiloe seo sekolong.

LIPOTSO TSE TŠELETSENG TSEO U LOKELANG HO NAHANA KA TSONA

Bibele e re: “Ntlo e ’ngoe le e ’ngoe e hahoa ke motho ea itseng, empa ea hahileng lintho tsohle ke Molimo.” (Baheberu 3:4) Na hoa utloahala ho lumela seo?

Ho lumela hore ha ho na motho ea bōpileng lintho tse phelang, ho tšoana le ho lumela hore ha ho na motho ea hahileng ntlo ena

SEO BATHO BA SE BUANG: Lintho tsohle li bile teng ka lebaka la ho phatloha ho hoholo.

1. Ke eng kapa ke mang ea bakileng ho phatloha hoo?

2. Ke taba efe e utloahalang—hore lintho tsohle li ikentse kapa hore ho na le motho ea li entseng?

SEO BATHO BA SE BUANG: Batho ba tsoa liphoofolong.

3. Haeba batho ba tsoa liphoofolong—ka mohlala, litšoeneng—ke hobane’ng ha batho ba le bohlale ho feta litšoene?

4. Ke hobane’ng ha bophelo, esita le ba lintho tse nyenyane ka ho fetisisa, bo rarahane hakaale?

SEO BATHO BA SE BUANG: Thuto ea hore lintho li ikentse ke ’nete.

5. Na motho ea reng thuto eo ke ’nete o iketselitse lipatlisiso?

6. Ke batho ba bakae ba lumelang thuto ea hore lintho li ikentse hobane feela ba boleletsoe hore batho bohle ba bohlale baa e lumela?

“Haeba u ntse u tsamaea har’a moru, ebe u bona ntlo e ntle, na u ne u tla re: ‘Ona ke mohlolo! E tlameha ebe lifate li ile tsa oela, eaba li etsa ntlo ena.’ U ke ke ua cho joalo! Hase ntho e utloahalang. Joale ke hobane’ng ha re lokela ho lumela hore ha hona motho ea bōpileng lintho tsohle tse lefatšeng le leholimong?”—Julia.

“Nahana haeba motho e mong a ne a ka u bolella hore ho bile le ho phatloha fekthering e hatisang libuka, eaba enke e qhalanetseng maboteng le marulelong e se e ngola mantsoe a dikishinari. Na u ne u tla lumela seo?”—Gwen.

 KE HOBANE’NG HA U LOKELA HO LUMELA HO MOLIMO?

Bibele e u khothalletsa hore u sebelise ‘matla a hao a ho nahana.’ (Baroma 12:1) Seo se bolela hore ha ua lokela ho lumela ho Molimo hobane feela u susumetsoa ke

  • MAIKUTLO (Ke nahana hore e tlameha ebe ho na le motho e mong ea nang le matla a maholo)

  • BATHO BA BANG (Batho ba motse oa heso ke balumeli)

  • KHATELLO (Batsoali ba ka ba nthutile hore ke lumele ho Molimo —ha kea ikhethela)

Ho e-na le hoo, u lokela ho ba le mabaka a utloahalang a ho lumela ho Molimo.

“Ha ke le ka tlelaseng ke mametse ha tichere e hlalosa kamoo ’mele ea rōna e sebetsang kateng, seo se etsa hore ke lumele hore Molimo o teng. Karolo e ’ngoe le e ’ngoe ea ’mele e na le mosebetsi oa eona, haesita le tse nyenyane ka ho fetisisa, ’me lintho tse ling ’meleng li etsahala re bile re sa hlokomele. Ruri ’mele oa motho o entsoe ka tsela e hlollang!”—Teresa.

“Ha ke bona mohaho o mo telele, sekepe se seholo kapa koloi, kea ipotsa, ‘Ebe ke mang ea entseng lintho tsee?’ Ka mohlala, e tlameha ebe motho ea entseng koloi o bohlale, hobane likarolo tse ngata tse nyenyane tsa eona li lokela ho sebetsa hammoho e le hore koloi e ka tsamaea. Joale haeba koloi e entsoe ke motho, e tlameha ebe le rōna ho na le motho ea re entseng.”—Richard.

“Ha ke ntse ke ithuta saense ke ile ka hlokomela hore thuto ea ho iphetola ha lintho ha e utloahale. . . . Ke bona ho le bonolo ho lumela ho ’Mōpi ho e-na le ho lumela hore lintho li ikentse.”—Anthony.

SEO U KA NAHANANG KA SONA

Le hoja ho fetile lilemo tse mashome borasaense ba etsa liphuputso, ba ntse ba sa bue ntho e lumellanang tabeng ea ho iphetola ha lintho. Haeba ba sa lumellane, le hoja e le litsebi—na ke phoso ha u sa lumele thuto eo?