Fetela boitsebisong

Fetela lethathamong la tse ka hare

Selelekela

Selelekela

Ho Bohle ba Ratang Jehova:

Jesu o ile a re: “Le tla tseba ’nete, ’me ’nete e tla le lokolla.” (Johanne 8:32) Mantsoe ao a khothatsa hakaakang! Ha e le hantle, esita le ‘matsatsing ana a ho qetela’ a mahlonoko a ha leshano le ho hloka ’nete li atile, motho a ka tseba ’nete. (2 Timothea 3:1) Na u sa hopola ha u ne u qala ho tseba ’nete kamoo e hlalositsoeng kateng Lentsoeng la Molimo? E tlameha ebe u ile ua thaba hakaakang!

Leha ho le joalo, feela joalokaha ho ba le tsebo e nepahetseng ea ’nete le ho e bolella ba bang e le habohlokoa, boitšoaro ba rōna le bona bo lokela ho lumellana le ’nete. E le hore re etse seo, re lokela ho ipoloka leratong la Molimo. See se akarelletsa’ng? Mantsoe ao Jesu a ileng a a bua bosiung ba pele ho lefu la hae a araba potso ena. O ile a re ho baapostola ba hae ba tšepahalang: “Haeba le boloka litaelo tsa ka, le tla lula leratong la ka, feela joalokaha ke bolokile litaelo tsa Ntate ’me ke lula leratong la hae.”—Johanne 15:10.

Hlokomela hore Jesu o ile a lula leratong la Molimo ka ho boloka litaelo tsa Ntate oa hae. Taba ena ea sebetsa le ho rōna kajeno. E le hore re lule leratong la Molimo, re lokela ho phela tumellanong le ’nete bophelong ba rōna ba letsatsi le letsatsi. Mantsiboeeng ’ona ao, Jesu o ile a re: “Haeba le tseba lintho tsena, lea thaba haeba le li etsa.”—Johanne 13:17.

Re na le tšepo e tiileng ea hore buka ena e tla u thusa hore u tsoele pele ho phela tumellanong le ’nete bophelong ba hao ’me kahoo u ipoloke “leratong la Molimo . . . ka tebello ea bophelo bo sa feleng.”—Juda 20.

Sehlopha se Busang sa Lipaki Tsa Jehova