Fetela boitsebisong

Fetela lethathamong la tse ka hare

 THUTO EA 37

Jehova o Bua le Samuele

Jehova o Bua le Samuele

Moprista ea phahameng Eli, o ne a e-na le bara ba babeli ba neng ba sebetsa tabernakeleng e le baprista. Mabitso a bona e ne e le Hofni le Finease. Ba ne ba sa hlomphe melao ea Jehova ebile ba tšoara batho ba bang hampe. Ha Baiseraele ba etsetsa Jehova sehlabelo, Hofni le Finease ba ne ba inkela nama e ntle. Eli o ne a tseba hore na bara ba hae ba etsa’ng, empa a sa ba khalemele. Jehova o ile a etsa’ng?

Samuele ha aa ka a etsisa Hofni le Finease le hoja a ne a le monyenyane haholo ho bona. Kahoo, Jehova o ile a mo rata haholo. Ka le leng bosiu ha Samuele a robetse, a utloa motho a mo bitsa. Eaba oa tsoha, o mathela ho Eli, o re: ‘Ke ’na enoa!’ Empa Eli a re: ‘Ha kea u bitsa. Tsamaea u e’o robala.’ Kahoo, Samuele a khutlela likobong. Eaba o utloa motho a mo bitsa hape. Ha Samuele a bitsoa ka lekhetlo la boraro, Eli a hlokomela hore Samuele o ntse a bitsoa ke Jehova. Eli a bolella Samuele hore ha a utloa motho a mo bitsa hape, a re: ‘Bua Jehova. Mohlanka oa hao o mametse.’

Samuele a khutlela likobong. Eaba o utloa motho a mo bitsa a re: ‘Samuele! Samuele!’ A araba a re: ‘Bua, mohlanka oa hao o mametse.’ Jehova a re ho eena: ‘Bolella Eli hore ke tl’o mo fa kotlo, eena le ba  lelapa la hae. Oa tseba hore bara ba hae ba etsa lintho tse mpe tabernakeleng empa ha a ba khalemele.’ Hoseng ka le hlahlamang, Samuele a bula mamati a tabernakele joalokaha a tloaetse. O ne a tšaba ho bolella moprista ea phahameng hore na Jehova o itse’ng. Empa Eli a mo bitsa ’me a re: ‘Mora, Jehova o itse’ng ho uena? Mpolelle.’ Kahoo, Samuele a bolella Eli ntho e ’ngoe le e ’ngoe.

Ha Samuele a ntse a hola, Jehova a tsoela pele ho mo rata. Baiseraele bohle ba tseba hore Jehova o khethile Samuele hore e be moprofeta le moahloli.

“U hopole ’Mōpi oa hao e Moholo, hona joale, matsatsing a bohlankana ba hao.”—Moeklesia 12:1